Ke Alaula, Volume I, Number 1, 1 April 1866 — KE ALII PEPEHI-KANAKA O RONOKITI, PONAPE. [ARTICLE]

KE ALII PEPEHI-KANAKA O RONOKITI, PONAPE.

Mai ka pae ana'ku o Mi. Kureke a me Kaaikaula i Ponape i ka makahiki 1853, a hiki i ka makahiki 1864, ua noho alii kekahi Nanakina ano naauao a hoomalu hoi ma ka aupuni o Kiti, Ponape. Ua make aku ia alii maikai, a i keia wa ua noho alii kekahi Nanakina uhauha, hooluhi, a puni koko. iloko o keia makahiki ua puhi oia i ka luakini maikai a na hoahanau o ka Ekalesia o Ronokiti i kukulu ai, a ua pau i ke ahi. Ua pepehi oia i na kanaka hala ole e lua me ka pahi a make. A ua waiho aku oia i ke kolu o ka pahi me ka i ana no kekahi kanaka hou no ia ana e manao ai e pepehi. Ke olelo nei kela, aia a make ehiku mea hou ia ia alaila e hoomaha iho oia i ka pepehi kanaka. Elima wahine a keia alii pepehi-kanaka. Makemake oia e lawe i wahine hou nona, a no ka ae ole o ka wahine, a mahuka aku ma kahi e, kii aku oia iaia, a hoihoi mai ma kona wahi a hoopaa ia ia i kekahi pou a pa. Ilaila kona paa ana mai kakahiaka a aui ae ka la. I ke ahiahi ki pu aku oia ia ia, aka ku ole ia. Kona lalau iho la ia i ka pahi a hou aku ma kona puuwai, a ka make iho la no ia o keia wahine. Aloha ino na kanaka o Ronokiti.