Ke Aloha Aina, Volume I, Number 1, 25 May 1895 — KE KUIKAHI LAHUI. [ARTICLE]

KE KUIKAHI LAHUI.

O na kuikahi maluhia mawaena o na lahui kanaka o na aupuni maluna o ka honua nei, ua kukulu ia oia maluna o ka Olelo Hoonani a na Puali Anela o ka Lani i ka manawa i hanauia ai o ko kakou Hoola, ke keiki a ke Akua; e like me ia i hoikeia ma ka Euanerio a Luka, Mokuna 2:14, penei: "E hoonaniia ke Akua ma na lani kiekie !oa, a he malu hoi ma ka honua, he aloha no i kanaka." He kaua mawaena o ke Akua a me Kona Puali Anela e kue ana ia Satana a me kona puali Anela, pela hoi, he kue mawaena o na lahuikanaka o keia ao a me ke Akua. Ua maopopo ke kumu o keia kue ana, oia no ka makemake ole aku o na kanaka e hana i ko ke Akua makemake, ua paa hoi ka uku hoopai a ke Akua maluna o lakou, he make mau loa. Aka, ua hanai he Kuikahi o ka Berita, e ola ai ke kanaka ke ae oia e hana, oia mea, ua loaa mai a ua hookoia ma ka hanau ana mai o ka Hoola lesu Kristo i keia ao. He Hoola Oia, a he mea e hoo malu ai i na lahuikanaka a pau loa o ke ao nei, e like me ka olelo o na lalani mele o ka pauku maluna ae nei. "He malu ma ka honua, A he aloha no i kanaka." I ka manawa e komo ai na lahui a me na aupuni o ke ao nei iloko o na uluaoa, a me na kaua ana, a hiki aku i ka pahu hope loa o ka lanakila o kekahi aoao, alaila, na ka aoao i pio e lawe i na kaumaha o na poho o na hana ana iloko o ia wa kaua o ia mau lahui. la wa e hoomakaukau ia ai he kuikahi i maluhia mawaena o na aupuni i komo aku iloko o ke kaua. E like me Kina a me lapana i kaua mai nei, a hana hoi i kuikahi maluhia mawaena o laua. O na Luna Oihana Aupuni o kela a me keia aina, i hoouna ia, a e noho ana paha ma ka aina e; aia no lakou malalo o na oleloao, a me na olelo kauoha paa a ko lakou mau aupuni. O ko lakou noho Luna ana, ua kuhikuhi ia a ua alakai ia e ka manao alakai o na Kanawai Lahui. He moolelo ano nui a loihi hoi, na rula a me na loina pili oihana Luna Aupuni o na lahui a pau loa mai kahiko loa mai, pela ko Roma, ko Enelani a me ko Amerika mau alakai manao naauao ana e pili ana i ke kahua nui o na Kanawai Lahui. Ua olelo kekahi mea naauao kakau ao Kanawai Lahui; o kela Pauku 14 o ka Mokuna 2 o Luka, oia ke kahua maoli a me ka mole o na Kanawai Lahui a pau loa o ke ao holookoa. O ka maluhia, oia ka mea i manao nuiia; a i makemake nuiia no na aupuni a pau, a no na lahui kanaka a pau loa. He mea hoopoino loa ka noho

haunaele ana, a he mea e hoopilikia loa ai i ka Lahui kanaka e hoouluaoa ia ana e na hana kolohe a me na ana luku wale. He mea kupono keia no ka noho haipule ana, a me ka noho lahui ana ma ka honua nei. He mea i kupono no ka uhane a me ke kino o kakou a pau.