Ke Aloha Aina, Volume I, Number 1, 25 May 1895 — Na Home Hawaii. [ARTICLE]

Na Home Hawaii.

O na Home Hawaii, oia maoli ke kahua no ka manaolana no ka Lahui Hawaii: O ka Home, oia ke kihapai hooulu i na kawowo no ka hoopiha ana i ka lahuikanaka o ka aina. E like me ka malama pono ia o na kawowo i mea lawe aku a kanu a hoopiha i ka aina a lilo i ululaau nui; pela no na pulapula pio o ka Lahui Hawaii e malama ia ai no ko lakou noho ana kanaka makua ana iloko o ka lahui a me na pono o ko lakou aina. He mea makehewa loa nae ina e hoaoia na keiki opio e alakaiia, e hoao e wawahi i ko lakou pono Lahui i kupono maoli no na kau e hoea mai ana. Mamuli o ia mea, ua alakai ia aku la ka manao o na poe makua mea keiki, e nana i kekahi mea i kuhihewa loa ia, oia maoli ka mole o ai o ka pono Lahui Hawaii. Ano, i keia la, ke hakilo aku nei makou me ka nana pono ana aku i kahi e alakai ia nei o na opio Hawaii. Ma kekahi ano, ua nana ia aku ke alakai ana, me he mea la no ka malamalama; aka, ma ke ano io maoli nae, aole loa pela. He kumu okoa loa a he manao okoa ka mea i makemakeia e hookomo iloko o na opio Hawaii. Ua mopopo anei i na makua keia ano e alakai ia nei o ka lakou mau keiki? Ua ike pono anei oukou i ka mea e ao ia nei ka oukou mau keiki iloko o na home kula? Ua loaa anei ia oukou na hoailona o ko lakou ao ia ana e hoole i ke aloha i ko lakou aina? Pehea ka oukou ike ana i ka oukou poe keiki ma ka lakou hana ana? E noonoo pono e na makua i na hana no ko oukou home Hawaii.