Ke Aloha Aina, Volume I, Number 2, 1 June 1895 — HOIKE AE NEI NA KUHINA. [ARTICLE]

HOIKE AE NEI NA KUHINA.

Ua hoike ae nei he ekolu poe Kuhina o ke Aupuni Repubalika i ko lakou manao no ka manaoio i ka hoohui aina, oia o Kakina, Haki a me Kamika. Ua koe aku he elua Kuhina aole i hele ae e hoike i ko laua manao, oia o Damon a me King. Malia paha, ua hiki no na manao, aole nae hoi i hoike ae na Kuhina mua pela. I ko makou manao, ina ua makemake na alakai o ke Aupuni e loaa ko manao like mai ka Lahui Hawaii aku, mamuli o na hana kuokoa me ka lanakila, me ka hoohaiki ole ia, no ka manao hoohui aina, no ke aha, ua ae ole ia ia manao, no ka mea, oia ka manao o ke kanaka mai ka aina malamalama mai, e akena nei ma Hawaii nei? No keaha na hanauna a me na pua na Misionari i ae ole ai e hana ia mea maikai loa, a lakou no i mahalo ai ? A kahi a hiki mai ke au e hooleia ai ka pono a me ka oiaio, o ka loaa ana o ka manao lanakila i ke kanaka e koho nona iho, aole loa mai mua mai o na makahiki he kanalima i hala aku. Ua makemake anei lakou e hoihoi hou i ka Lahui Hawaii iloko o na kulana, o ka wa kahiko? E hoole i ko lakou ake ike, ake oiaio, ake malamalama, ake Kuokoa me ka lanakila? No makou iho, he hilahila ke ike aku pela ka mea e hana ia mai, e ka poe i manaoia, he mau alakai no ka pono Karistiano ma Hawaii nei, a he alakai pu hoi no ka noho aupuni ana no ka Lahui ma ka Paemoku o Hawaii nei.