Ke Aloha Aina, Volume I, Number 2, 1 June 1895 — O KE AU O KA MANAWA KA HOIKE. [ARTICLE]

O KE AU O KA MANAWA KA HOIKE.

O na manao, na hana a me na kulana o na lahui a pau, he hookahi wale no mea nana e hoike mai i ke kupono, oia ke Au o ka Manawa. Ina e oieloia mai aia he mea e hoea mai ana, a i ole ke au o ka wa pomaikai nui loa, alaila, aole loa he mea e ae nana e hoike mai i ka oiaio o ia mea.,o ke au wale no o ka manawa. Ano, ke hoike nei makou i ka makou mea i lohe mua ai, oia keia: Ina e ku ae ana keia Aupuni Kuikawa, (ia wa ka olelo ana) a hoomaka aku, i kona ku ana, alaila, e nui mai ana na pomaikai dala, e holo nui mai na poe mea dala, a lu iho i ke dala ma Hawaii nei. E loaa ana na hana i ke kanaka Hawaii, me ka hoopii ia ae o ko lakou mau uku hana iluna! I keia wa, ua hiki mai makou i ke Au o elua a oi makahiki, eia nae, o ka oi loa aku keia o ka wa nele a hune loa o ka aina. Nele ma na hana loaa, nele ma ka hana, nele ma ke dala, nele ma na ano he nui wale. Olelo okoa mai no na haole kalepa, aole loa he wa i ikeia ka nele a me ka hune e like me keia wa! Ua emi loa mai kahi dala loaa ia makou. Aohe nui o na poe kipa mai e kuai me makou! No keaha hoi? No keaha la? E aho no ka wa o ke Aupuni Moi e ku ana, he nui ko makou laki ia wa, loaa no he mau haneri dala i i da la; o ke oki loa keia, eia aku eia mai, loaa ae la kahi hapalua o ka la. Nui ka hune

a me ka nele! Ae, o ke Au o ka Manawa, oia ka mea hoike oiaio.