Ke Aloha Aina, Volume I, Number 3, 8 June 1895 — O KE ALOHA I KA AINA [ARTICLE]

O KE ALOHA I KA AINA

Oia kekahi o na mea i komo pono iloko o ka ke Akua kauoha maloko o ka Elima o na Kanawai i haawi mai ai ma ka Mauna o Sinai. He kauoha ano nui loa keia, no ka mea, ua hoopili pu ia kona hopena me ka haawina hoopomaikai loa: E nana kakou i ka olelo o keia kanawai hoopomaikai i pili hoi i ke aloha aina, penei:---"E hoomaikai oe i kou makuakane a me kou makuahine, i loihi ai na la o kou noho ana maluna o ka aina a Iehova a kou Akua i haawl mai ai ia oe." Pukaana 20:12. O ka aina, o ka honua, o ka lepo, o na materia i hoohui pu ia, ua hana ia lakou e ko ke Akua Kiekie, no ka pono, ke ola, ka lako a me ka hanohano o kekahi mea a ke Akua i manao ai e hoonoho mai maluna o ka honua. O ua mea la, oia ke kanaka ola, he hunahuna materia oia o ka lepo o ka aina, i hooopiha ia me ka uhane ola o ke Akua. I ka hoomaopopo ana i ke ano o ke kauoha kanawai, ua moakaka loa ia i na kanaka a pau loa, na lahui a pau loa, a me ka lakou mau mamo e ole ana, a e pani ana i ka makalua o ko lakou mau makua, a me na kupuna o lakou. O ka makuakane a me ka makuahine mua loa o ka lahui kanaka, oia o Adamu a me Eva, he mau materia laua o ka lepo o ka honua i hoopiha ia me ka hanu ola, ka uhane ola o ke Akua. I ka wa e kaawale ai ka uhane mai ke kino ola ae, ua hoi hou oia he lepo no ka aina, a no ka honua hoi, e like me mamua o kona lilo ana i kino ola. O na lahui a pau loa e ola nei, a e hele nei maluna o ka honua, mai ia Adamu mai a hiki i keia la, he mau hunahuna lepo lakou, a he mau mahele hunahuna materia o ka aina a ke Akua i hana ai. Nolaila, ma kekahi olelo poloiei ana ae; ke ola nei, a ke hele nei no ka aina maluna o ka honua: Ke ola nei a ke hele nei na keiki aina, na moopuna aina, na lahui aina, maluna o ko lakou makuahine nui, ka Honua. KA MAKUAHINE. Owai kou makuahine? O ka aina no! Owai kou kupunawahine ? O ka aina no! Pehea hoi o Eva, ko kakou kupunawahine mua loa? He lepo no ia no ka aina, kahi a kana kane Adamu i hoala ia mai ai; a mamuli o ko Adamu ike ana, mahope o kona puoho ana ae mai ka hiamoe he wahine oia, nolaila, kapa aku oia Eva (wahine) ka iwi aoao ia o ke kanaka lepo aina Adamu a ke Akua i hana ai. O ka Honua, he kino aina makuahine oia i hoopuka mua loa, mai i ke kino kanaka lepo mua loa Adamu. He makuahine ka Honua e hoohanau mai ana i na mea ulu, i mea ai na ke kanaka lepo aina e ola ana. Nolaila, ua loaa ke ola o keia kanaka, keia lahui, mamuli o na huaai i hoea mai mai loko mai o ka makuahine Honua. KA MAKUAHINE HANAU I KA HONUA. Malia, ua nui loa ke kuhihewa o ko Hawaii nei poe kupuna, ma ko lakou moolelo kahiko, e olelo ana: Ua hanau maoli ia mai keia Paemoku e Papa (w) nana me Wakea (k). He mea hiki ole loa ia ma ka noonoo ana o ke kanaka, aka, ina nae ma ka lawena olelo ana, a he wahi moowini malamalama

iki ko lakou no na hana a ke Akua i ke au kahiko loa, alaila, o kela lawena olelo ana, ua ku no ia i ka oiaio, ma na mookuauhau Akua, a he mea oiaio loa, noloko mai o ka aina i hanau mai ai ka aina, a mai loko mai o ka lepo i hanau ia mai ai ke kanaka, a e hoi hou no oia i ka lepo. Ua hoakaka ia, ua hoopunana iho ka Uhane o ke Akua maluna o ka wai, a lilo ae la i Honua mahope. Ua hoomoe ka moa wahine maluna o ka hua, a kiko ae la he manu moa opio. Ua noho aku o Wakea (k) ia Papa (w), alaila, hanau mai la keia mau Paemoku o Hawaii nei. Aohe ikeia ka aina ma ona iho, aia no ma o ka lahui e ola ana. Nolaila, i ka olelo ia ana, na Wakea (k) a me Papa (w) i hanau i keia mau Paemoka o Hawaii. Oiai he hookahi wale no hana ia ana o Adamu mai ka lepo mai: aka, ke mau nei no nae ko kakou hoopuka mau ana i na huaolelo, na ke Akua au i hana. Pela ka lawena olelo no ka hanau ia ana o keia Paemoku e Papa. KA POMAIKAI NUI LOA. Alaila, o ke aloha i kou makuahine, kou aina, kou wahi i hanauia ai, oia ka mea e loihi ai na la, na makahiki o ke ola ana. Nolaila, e ka poe aloha ole, hoomaikai o!e i ko lakou mau makua, a i ka aina hoi, aole e loaa keia makana ia lakou, ke ola loihi maluna o ka aina a ke Akua i haawi mai ai. Nolaila, e ka Lahui Hawaii, e hoonui i ke aloha no ko kakou aina hanau, ka Paeaina o Hawaii, alaila, e ola loihi oukou me ka oukou mau mamo maluna o ka aina o Hawaii a ke Akua i haawi mai ai ia oukou.