Ke Aloha Aina, Volume I, Number 3, 8 June 1895 — UA PAAKIKI LOA. [ARTICLE]

UA PAAKIKI LOA.

Owai ka paakiki loa? O ka Lahui Hawaii hoi! ua manao ka poe e ake nei e hookoia ko lakou makemake, he mea maalahi wale no ka hoohuli ana aku i na kanaka e ae i ka hoohui aina, aka, i keia wa, ua ike pono iho la lakou, eia ka; he mea paakiki loa keia. Ua kaena ae no hoi lakou nei ma Amerika, he hiki wale no ke kuaiia ka mana koho o ke kanaka i elua dala, a i wahi omole gini, lilo mai la. A pehea la i keia wa? Paakiki o na paakiki, uahoa o na uahoa, luli ole oia mau, oia ke ano o ka Lahui Hawaii e ike ia nei. No keaha la ko lakou mea i hoole paakiki loa ai i ka hoohui aina? (1) No ka mea, ua oi ko lakou aloha i ka aina a lakou i hanau ai, mamua o na waiwai popopo pau wale a ka hoomalimali e koi mai nei. (2) Ua hanaino ia lakou, a ua ike kumaka i ka poino a me ka popilikia a keia poe pakaha e koi mai nei. (3) He hoike ko ka lahui mai ke Akua mai, e ao ana e hoomanawanui i ka nana ino a keia poe. (4) He pomaikai ma ka hopena o ka hoomanawanui ana, aole he mea e kanalua ia au. Oia ka ke Akua kauoha i hoopili pu ia me ka olelo hoopomaikai. O ka mokukaua Bennigton ke holo mai ana i o kakou nei no ke pani ana i ka hakahaka ma kahi o ka mokukaua Philadelphia e haalele mai ana i kona wa e hoea mai, aole hoi o ka Olympia e like mei na lole mamua iho nei.