Ke Aloha Aina, Volume I, Number 3, 8 June 1895 — UA LOAA HOI KE KULEANA. [ARTICLE]

UA LOAA HOI KE KULEANA.

Mai ka manawa mai i noho mana ai ke Aupuni Kuikawa a komo loa mai i ka hookumu ia ma o ke Aupuni Repubalika o Hawaii nei, mamuli o ka mana kaihi a lawe kaokoa ana, ua manaoia, ua lilo pono mai na kuleana a me na pono a pau ma o ke Aupuni Moi no ka Repubalika o Hawaii. Nolaila, ua hiki ke ae ia mai ke kuleana hoohui aina e koiia aku nei e ko Hawaii, me Amelika, no ka mea, ua pono a pololei ko lakou title (kuleana). A no keaha hoi keia hoapaapa loa ia ana? No keaha ka ae ole mai o Amerika e hoohui? N okeaha ua holo pono ole ka Kuhina Kakina mau hana pili i ka hoohui aina? No ka mea, ke hoole nei no ka Lahui Hawaii ponoi o ka aina, ka poe nona ponoi ke kuleana oi loa iloko o keia aina mai kinohi mai. Aia a ae pono ae ka Lahui Hawaii, alaila, pono ia hana he hoohui aina. Ma ka mea ponoi nona ka Hale e hoolilo i kona kuleana a pau loa iloko o ka hale, aohe kuleana o ka poe noho wale mai, a noho hoolimalima paha, e hoolilo i ka hale o kekahi kanaka. Pela ke aupuni a me ka aina, aohe kuleana o ka poe aea mai e hoolilo i ka aina ponoi o ke kamaaina nona ka aina, a nona ka Paemoku o Hawaii, aka, o na kupa, na kamaaina ponoi wale no ka poe kuleana e haawi, a e hoolilo ma na ano a pau loa. Nolaila, aole no e lilo, a e hoohuiia kekahi aina o kekahi lahui, me ka apono ole o ia lahui. Oia ka pono a me ka pololei maoli.