Ke Aloha Aina, Volume I, Number 4, 15 June 1895 — Ke Alanui Kaa Uwila o Honolulu. [ARTICLE]

Ke Alanui Kaa Uwila o Honolulu.

He mau makahiki i kaa hope ae nei, ke kamailio ana, a me na haawi makana hoohoihoi ana i na poe nana e hana a e kukulu paha i kekahi Alanui Kaa Uwila ma Honolulu nei. Ua pau i ka hala aku, a ua make kekahi poe i olelo nui no keia kumuhana Alanui Kaa Uwila; a i keia wa, eia ua hiki mai nei kekahi mau mea e manao ana e kukulu ia alanui. O Mr. Audly Coote o Tasemania mai, ka mea i hiki mai nei ma ka mokuahi Monowai mai i kela pule aku nei, ua hoike ae oia i kona manao hapai ia hana, ke holopono na kuka ana me ka Papa Kahu Alakai o ke Ala Kaa Alanui o Honoulu ma Ladana. A pela no hoi, eia no hoi i anei nei he kanaka o Mr. Ballentyne kona inoa, mai Beritania Columebia mai, i manao e kukulu i Alanui Kaa Uwila ma na wahi i hoike ia ma Honolulu nei. Ua kuka pu ae o Mr. Coote me Mr. Pain, Luna Nui o ke Alanui Kaa Alanui o Honolulu nei; a ua hoike aku oia ia Coote, aia ma Enelani ka poe kuleana ma na mea a pau loa e pili ana i ke Alanui Kaa o Honolulu nei; a ua olelo aku hoi o Mr. Pain ia Coote, e hoike aku ana oia pela i na Luna Hooko o ke Alanui Kaa o Honolulu nei, ia lakou ka mana hoolilo mai ka ae ia e lakou e hoolilo. He mea hoomaopopo keia ia kakou, aia no ko Beretania mana dala ke noho nei ma na aina a pau loa o ke ao nei, a oia maoli no ka lua waihona waiwai nui o ke ao holookoa mailoko mai o na oihana mikiala holomua.