Ke Aloha Aina, Volume I, Number 4, 15 June 1895 — KA HUA O KA HILIIA ANA [ARTICLE]

KA HUA O KA HILIIA ANA

E hoike ana kekahi ulia no Nicaragua (kela wahi aupuni o Amerika Waena) mamuli o na koi ana a kekahi poe Beretania i noho ma Hawaii mamua loa aku nei; a penei ka moolelo i hoike ia ma ke Clasgow Mail. O John James Mago, he kanaka opio noho malie, a nona ka moolelo kaao kupaianaha mamua loa, i ano like aku me ka Monte Cristo. O Mago i keia wa, he ona miliona oia no Guatemala, e noho mai nei eiwa mahina o ka makahiki ma Parisa. He iwakalua makahiki mamua aku nei, he kanaka Enelani ilihune loa oia

e hoiliili ana i na mea ola makalii ma ka aina o Guatemala; a ia wa no hoi, e noho Hope Kanikela Beritania ana oia ma San Jose. I kekahi la, ua kauoha ia mai la o Mago e hiki kino aku imua o ka Lunakoa Gonzales, ua pane aku la o Mago, e hiki aku ana oia iloko o ka wa pokole. He mea hoonauki loa keia i ke Aliikoa, a nolaila, ua hoouna aku la oia he pualikoa e kii ia Mago, a i kona wa i hiki mai ai; ua haawi ia mai la ke kauoha, e hili ia kona kua i kanahikukumamalima (kaula) manawa. Ua hooko ia keia kauoha, a i ka pau ana o na hili ana he kanahikukumamalima, ua kahea hou aku la o Gonzalez:— "E hili hou ia ia i iwakaluamamalima hou kaula." I ka pau ana o ko Mago hili ia ana, mahope iho o kona nana ia ana, ua ehaa loa ia kona kua, ia wa, ua waiho aku oia i kana hoopii i ke aupuni Beritania. O ka hopena i loaa mai, oia no ke kauoha i ke aupuni o Guatemala e hoopai ia Gonzalez, a e uku hoi ia Mago i 100 paona dala (oia hoi $500), Beritania no kela a me kela hiliia ana ona. Ina e hooko ole ia keia koi, alaila, e kipoka pahu ia o San Jose a me na kulanakauhale pili kahakai. Ua ae koke o Guatemala e hoopai ia Gonzalez, aka, ua hoao nae e hoole i ka uku ana he umi tausani paona dala ia Mago. la wa ua pii koke ke kai o Beritania, a ua hooko ia na hana i uku ia ke koi, a i ka la hookahi, ua loaa ia Mago kana koi, a ua waiwai loa oia ia wa pokole. A no ka nui o kana dala ia wa, ua lilo oia i hoahui no Peresidena Barrios.