Ke Aloha Aina, Volume I, Number 4, 15 June 1895 — NUHOU KUWAHO Ka Wa o ka Onene Kaua ma ka Hikina. Ua Makaukau na Aumoku no ka Hooili Kaua ana [ARTICLE]

NUHOU KUWAHO

Ka Wa o ka Onene Kaua ma ka Hikina.

Ua Makaukau na Aumoku no ka Hooili Kaua ana.

Ladana, Mei 29 — He hoike kai loaa ae i ka mea kakau o ka nupepa "Pall Mall Gazette," mai Sanahai mai, e olelo ana, ua hoea hou mai na hiona hooweliweli o ke kaua ana. Ua manao ia o ka Viceroy o ka mokupuni o Foamosa, ua manao oia e kipu i ke aupuni o Kina. Ua makaukau loa na aumokukaua a pau loa o Iapana no ka hoouka kaua aku. A ua olelo ia no hoi, o na aumokukaua a pau o Farani e ku ana ma ke awa o Tamasui, ma Foamosa, ua makaukau lakou no ka hooili kaua ana. Ua hoomahuahua hou ia ae na lono no ka Rusia mau hana hooweliweli e upu la. Ua pai ia kekahi palapala mai Sanahai mai, e olelo ana, ua ala ae ka hakaka nui ma Tamasui, ma ka aoao akau aku o Foamosa. Sanahai, Mei 20 - O haku Li Chang Fang, keiki ponoi a Li Hung Chang, a me John W. Foster, e hele ana laua no Pescakores i ka la apopo, e haawi aku i ka mokupuni o Foamosa i na Iapana. Ua hoopae ia aku na Iapana ma Tapiehfer, he kulanakauhale nona na kanaka he 70,000, he 11 mile ka mamao ma ka akau o ka muliwai o Tamsus, oia hoi kahi noho o ke Kiaaina o Foamosa, a ua hoike aku lakou i ka mana aupuni, he manao paa ko lakou e lawe i ka mokupuni o Foamosa. KELA A ME KEIA,. Sana Lui, Mei 27. - Mai ka nupepa "Examina" mai ka lono e olelo ana, ua haule mai luna mai o ka baluna he 500 kapuai ke kiekie mai ka ili lepo ae, o Toni Healle, a ua make loa oia. Ua holo pono kona hoomaka ana e lele me ka baluna, a i ka hiki ana i kela kiekie i hai ia ae la, ua loaa iho la oia i kela ulia poino. Ua hoopai ia mai nei kekahi haole ma ka inoa o Oscar Wilde he elua makahiki hoopaahao me ka hana i na ha-

na oolea. O kona hewa i hoopai ia ai, oia no kona hoopuka i na manao e hoino ana i kekahi ohana-alii maloko o kekahi nupepa. Victoria (B. C.)—O Kstophaet nona na makahiki he 94, ua haule oia a make loa, oiai oia iloko o kekahi anaina hulahula e malama ia ana. Ua make oia i kona wa e hulahula ana.