Ke Aloha Aina, Volume I, Number 4, 15 June 1895 — Ka Wela Ikiiki o ka La. [ARTICLE]

Ka Wela Ikiiki o ka La.

Aole ia he mea e hoopuiwa ia ai ko Hawaii nei, no ka mea, ma ka moolelo o ka Hawaii, aohe kanaka i make no ka wela o ka La. O keia wela ikiiki o ka la a makou e hoike aku nei, no na aina ia maloko o Amerika Huipuia, a ua like a like no me ko Europa a me Asia a me ko Aferika hoi. Ma kekahi mau mokuaina a Amerika, ua oi ino loa ka wela, a ua pii mahuahua ae ka mea ana wela mai ka 90 a i ka 100 degere. Ma ka wa kakahiaka nui, oia ka hora 5, aia ka mea ana wela ma kahi o ke 70 degere; a ka hora 9 ae, ua pii ae ka wela i ke 81 degere, a i ke kupono ana o ka La, aia aku la ka wela i ke 89 degere. Ma kekahi mau mokuaina, ua lilo ka mauu uliuli a me na laau wehiwehi i mea maloo, me he la ua puhi ia i ke ahi no ka ikaika o ka wela o ka La. Ua nui na poe i haule a make loa no ka hehee o ka lolo o ke poo i ka wela a ka la. Ua aahu na wahine i na lole makalena lahilahi loa, a ua hele wale hoi na kane me ke kuka ole. Nui launa ole mai ka wela a ka la iloko o keia mahina o Mei i hala iho la. Aia a pau ae na mahina wela, alaila, hao nai la ke any, oia pilikia okoa ku no hoi ia, no ka mea, e uhipu ia ana ka aina e ka hao; a e ku olohelohe ana na laau me ka lau ole. E make wale ana na kanaka no ka nui loa o ke anu. E lilo ana i kia paakai e noho malie ana, me he kanaka la, aka, ua make nae i ke anu. Mamua ae o na aina a pau loa, o Hawaii, oia ka aina e noho ai, aole loa e ike ia ua make kekahi no ka wela a ka la, a i ole hoi ia, no ke anu. He olelo oiaio keia, a he olelo pololei maoli no.