Ke Aloha Aina, Volume I, Number 4, 15 June 1895 — Ka Haawina Kula Evenelio -NO KA- [Illegible] Ekulesia o ka Ekalesia o Iesu Karisto no na Poe Hoano o na La Hope Nei i H Hoonohonoho ou ia. LA O KA HAKU IUNE 24, 1895. Haawina Kula–Oihana 21, 18-34. [ARTICLE]

Ka Haawina Kula Evanelio -NO KALala Ekalesia o ka Ekalesia o Iesu Karisto no na Poe Hoano o na La Hope Nei i Hoonohonoho Hou ia.

LA O KA HAKU IUNE 24, 1895.

HAAWINA KULA – OIHANA 21: 18-34.

KUMUMANAO. - Kukakuka pu o Paulo me Iakobo ame na Lunakahiko ma kekahi Ahakuka ma Ierusalema. NA MANAO NUI. - 1. Ka Paulo moolelo no kana mau hana mawaena o na Genetile; 2. Ka oleloao a na Lunakahiko; 3. Ka hopuia ana o Paulo. MANAWA. - Ka wa i apono nui ia, oia ka A. D. 58. WAHI. - Ierusalema. Na 'Lii -- Like no me ka haawina mua. PAUKU GULA. - Oihana 21: 19 PAUKU PAANAAU. - Oihana 21: 30. WEHEWEHE ANO. Pauku 18. Iakobo: Ua manao ia keia Iakobo, oia no ka hoahanau o ka Haku. Galatia 1: 19. Malaila no na lunakahiko a pau. O ko Paulo mau hoahele kekahi malaila. Pela ka hoike a Luka ma ia pauku, e olelo ana, "hele pu aku la o Paulo me makou." Me makou: Laka, ame ka poe i hoike ia na inoa ma ka pauku 1 o ka moku na 20, ame ka poe i hoike ia ma ka pauku 6 o ka mokuna 20. He aneane 7 makahiki mahope mai o ka Ahaolelo Ekalesia mua loa i malama ia ma Ierusalema, ka-wa i noonoo ia ai ke okipoepoe ana i ka poe Genetile. 19. Hai pakahi aku la ia; Ma na pauku mahope iho o keia, e ikeia ai he mau olelo mai ka poe mai i akoakoa ma kela aha kuka, e hoike maopopo ana, aia he manao hoohuoi a ano kanalua iloko o lakou no na mea a Paulo i ao ai i ko na aina e (poe Genetile) a i ku like ole hoi ia mau ao ana me na mea a lakou i manao ai, oia ka pono ame ka pololei. He poe hoahanau Iudaio keia i manao

pela. A i ole ia, ua manao paha o Paulo ma kona hoike ana ma ia ano, i hiki ai iaia ke hooiaio aku na ke Akua i hana ia mau hana mawaena o ka poe Genetile, a i mea hoike hoi no ka mana o ke Akua ame Kona apono ana ia mau hana, mamuli o Kona haawi ana i na haawina kamahao. A i ole ia, ua hoike paha oia ma ia ano, mamuli o ka piha hauoli o kona naau no ka laha ana o ka Evanelio mawaena o ka poe Genetile. 20. Hoomaikai aku lakou i ke Akua. I ka wa i lohe ai oi Iakobo ame ka poe apau e noho pu ana me ia, no ka apo ana mai o ka poe Genetile i ka Evanelio, ame ko lakou haalele ana i ka hoomana ana i na akua kii a huli ae la lakou a manaoio i ke Akua oiaio, ua hoonani lakou i ke Akua no Kona lokomaikai ame Kona aloha. Ke ike nei oe: O ka wa Penetekote keia, a ua nui na poe Iudaio ame na Karistiano i akoakoa mai maloko o Ierusalema. A ua pili kela olelo ana, "ke ike nei oe," ia Paulo ma ke ano, e hoomaopopo oia he nui na ludaio i lilo i poe Karistiano mamuli o ko lakou hoolohe ana i ka Evanelio. Ua ikaika loa lakou apau ma ke Kanawai. E mau ana no ka malama ana o keia poe ludaio Karisto ano i na kauoha a Mose, oia na kanawai no ke okipoepoe, na mohai, na mea pili i ka i'o ame na la ahaaina, a pela aku. 21. Ua lohe lakou nou: Ua loaa i keia poe Iukaio no lono no na hana a Paulo. E haalele i ke kanawai o Mose: Aole loa o Paulo i manaoio iki, e loaa ke ola ma ka malana ana i na kanawai ame na hana mau i komo nui iloko o ka hoomana Iudaio. A no ia mea, aole oia i ao aku i ka poe Genetile i huli mai i ka Euanelio e malama lakou ia mau kanawai ame na maa kahiko o ka poe Iudaio, a me he me la, ua paio pu aku no oia me na Iudaio no ka waiwai ole ke malama ia mau hana. A me he mea la, no ia ano o Paulo i ulu mai ai ka lono e olelo ana, he kanaka manaoio ole ia i ke Kanawai ame ka mana o Mose. Ma na aina e: Ma ka olelo Beritania, penei: "Among the Gentiles," oia hoi, "mawaena o ka poe Genetile." Ma ka olelo Helene, penei: "Kata ta ethne." Ua hookauliilii nui loa ia aku ka poe ludaio mawaena o na lahuikanaka o ko na aina e, oia ka poe i kapaia he poe Genetile, a ua noho keia poe ludaio maloko o na kulanakauhale nui apau o na aina e noho mana ia ana e ke Aupuni o Roma. Okipoepoe ana i na keiki: Ma ka wa o Aberahama i hookumu ia ai keia oihana. E hele ma ia aoao: E malama i na hana i maa mau mawaena o na ludaio, ka lakou mau mohai ame na kuni mea ala ana, ka lakou mau holoi ana ame na hamo aila ana, a pela aku. 22. Heaha la hoi ? O ke ano maoli o keia, ua like ia me ka ninau: Heaha ka mea e hana ai? E lohe auanei: Ua lohe na kanaka i ka hiki ana aku o Paulo, ame na lono he nui e pili ana nona, kona huli ana i ka aoao Karistiano, kana mau hana ame kana mau ao ana, aole auanei e nele ko lakou hele nui mai e ike, e hoolohe a e kamakamailio pu me ia, a ma na mea hoi e pili ana i kona mau manao pili hoomana. 23. E hana oe i keia: He mea kanalua ole, ua nui na hoahanau Iudaio i pioloke loa ko lakou mau noonoo no na mea a Paulo i hana ai, ma ke ano he mau mea ia e hoike ana i ko Paulo hele hewa ana mai ka Ekalesia aku o ko lakou mau kupuna, wahi a ko lakou manao. Me he mea la, o ka oleloao a na lunakahiko i haawi aku ai iaia, he oleloai ia ma ke ano e kaomi ana i ke ala ana mai o kekahi uluaoa. A makou e olelo aku nei: O ka puulu holookoa keia o na lunakahiko e ao aku nei ia Paulo. Eia no ia makou na kanaka eha: He poe no keia noloko o ka Ekalesia Karistiano. Ua hoohiki lakou. O ka hoohiki a keia poe kanaka i lawe ai, oia ka hoololoa ana i ko lakou mau lauoho. No

laila, he hoohiki Nazareta ka keia poe kanaka eha i hana ai. 24. E huikala ia oe iho: Kauoha ia o Paulo e huipu me keia poe kanaka eha ma na hana o ka haawi ana i na alana a me ka malama ana i na loina i hoike ia ma ke Kanawai o Mose. Ka waiwai makana: Na lilo no na alana. Amu lakou i na poo: Ua hoea mai lakeia i ka hopena o ka wa e pau ai ka hoohiki, a ua hookuu ia ka poe i hana ia hoohiki. I ike na mea a pau: I ike kanaka a pau. E hoike aku ana no o Paulo, mamuli o kona kokua ana i na kanaka e malama ana i ka hoohiki mamuli o na Kanawai a Mose, aole ia (o Paulo) i hoowahawaha i ke kanawai a me na hana mea kahiko. He mea ole: Aohe oiaio. Hele pololei oe: O ko Paulo hana ana e like me ia, he hooiaio auanei ia i kona kue maoli ana i ke kanawai o Mose, aka nae, ua manaoio oia, o ka malama ana i ua mau kanawai la apau, aole ia he mea e loaa ai ke ola. (25) I ka poe manaoio no na aina e: Oia ka poe Genetile i manaoio i ka Euanelio. Ua palapala makou: Ua pili keia i ka olelo hooholo i hooholoia ai ma ka Ahaolelo Ekalesia i malama ia ai he ehiku makahiki mamua aku, no ka mea e pili ana i ke okipoepoe ia ana o ko na aina e. Oihana 15:23-39. Aole lakou e malama i keia mau mea: O ka malama ana i ke kanawai o Mose, aole ia he mea i kauoha ia aku i ka poe Genetile i lilo i poe Karistiano, e malama. Aole nohoi he mea e loaa ai ke ola i ka poe ludaio i lilo i poe Karistiano, ma ko lakou hoomau ana e malama ia mau mea. A oiai nae, he poe no kekahi i makemake e malama i na ahaaina ludaio a malama i na hana pili hoomana, nolaila, ua hiki no ia poe ke hana pela; aole ia he hewa. Oiai na Iudaio e malama ana i ko lakou mau hana kahiko o ko lakou hoomana, me ko lakou nana ana aku no ka hiki mai o ka Mesia, e hiki nohoi i na poe hoano (na Karistiano) ke olelo iho, ua hiki kino mai ka Mesia i ke ao nei, a ua hooko Oia i ke kanawai o Mose. O ko Paulo lawe hapa ana i na liIo no ka waiwai makana ame ka laulima pu ana ma na hana o ka oihana huikala, he mea hoike wale no ia i kona manao maikai a aloha hoi i ka poe e malama ana i na hana o ka hoomana ludaio. E hookaokoa lakou i ko na Akua e: Ma ka olelo Beritania, "that they keep themselves from things offered to idols," oia hoi, "e hookaokoa lakou ia lakou iho mai na mea mai i alana ia aku i na Akua kii." Ua kauoha ia aku na Genetile Karistiano aole e ai i ka io o kekahi holoholona i alana ia aku i na kii. A me ke koko: E nana ma Oihanakahuna 17:11-14. Ua kauoha ia no o Noa ma ia mea. Kinohi 9:4. O na mea i uumi ia a make, ua paa ke koko iloko o ko lakou mau aa-koko. (26) Lawe ae la o Paulo i ua mau kanaka la; Komo pu o Paulo me lakou ma ka malama ana i ka oihana huikala. E hoike aku i ka malama ana: Pauku 24, ike ia aole i pau ka wa o ka paa ana i ka hoohiki. Ikea ko Paulo makemake e kaana pu me na kanaka eha ma ka haawi ana i na mohai i kauoha ia ai lakou. I ka mea kue i kanaka: I ka poe Iudaio. Keia wahi: Ka luakini. Lawe mai nohoi ia i mau Helene: Ua hoopuni ia ke kino maoli o ka luakini e na wahi houluulu like o na kanaka. O kahi houluulu o ka poe Genetile, aia ia mawaho loa; ua hiki lakou ke komo malaila, aka, aole i noa ia lakou ka hele aku ma na wahi houluulu e ai. (29) Ike mua lakou me ia: Aole i hoike ia mai, ua komo o Teropima, he kanaka Helene, iloko o ka luakini. Ua hoola nae na enemi o Paulo i ka manao hooulu hoohaunaele iloko o na kanaka i mea no lakou e inaina loa ai, ma ke ano ua hoohaumia ia ka luakini e ko na aina e (poe Genetile) oiai, ma ka manao o na Iudaio, aole hewa ino loa i oi aku mamua o ka hoohaumia ia ana o ka luakini.