Ke Aloha Aina, Volume I, Number 11, 3 August 1895 — O ko ke Akua Makemake ke Hookoia. [ARTICLE]

O ko ke Akua Makemake ke Hookoia.

O ko makou manaoio, ua pololei maoli no ia mau huaolelo, aole loa i hoololi ia ae ko makou manao mai kinohi mai o keia loli ana o na hana pili ia Hawaii nei. Ua manao o Heneri Opukahaia, e holo mahuka mai kona mau makua hanai aku, no ka make, e holo ma ka moku i ike paha i ka aina e, aka, ua hoolilo nae ke Akua i kona hele ana i Elele no Hawaii, e koi aku ai i ko Amerika poe e lawe mai i ka Lamaku o ke ola, no keia Paeaina poeleele. Pela makou e manao nei, malia paha, e hoolilo auanei ke Akua i na mea e hana ia nei no ka pono o kekahi poe, i mea e hookoia ai ka pono no ko Hawaii nei a pau. O ke au o ka manawa, oia ka mea nana e hoike piha mai i ka puana a ka moe.