Ke Aloha Aina, Volume III, Number 37, 11 September 1897 — Untitled [ARTICLE]

He halawai makaainana nui ka ka lahui Hawaii i keia ahiahi Poakahi, ma ke Kuea o ka Paalii, i ka hora 5 P.M. Ua makemake ia kakou a pau loa e hele ae malaila, aole iloko o na uluaoa o ka haunaele, aole hoi me na olelo hoonaukiuki i mea e ulu mai kekahi hakaka nui e haunaele ai ka halawai i kahea ia. Aka, e naue mai me ka manao aloha aina oiaio, e haalele i na manao nonohua a pau i ka @@ maloeloe a hele pololei ae ma kahi i kahea ia ai. Ua haule ka hoopii a ke aupuni ia Keoki Makapolena, e pili ana no ka mokuahi Kina, i hoopaa hewa ia ai no kekahi mau la ma ke Awa o Honolulu. Ma ka Poaono nei, ua haawi ae o Lunakanawai Alfred Perry, o ka Aha Kaapuni, i ka pono no ka mea i hoopii ia, oia hoi o Makapolena, ma na kumu hoopii ekolu a ke aupuni i waiho aku ai, a i keia la, a ma keia mua aku, e holo mau aku ai ka mokuahi Hawaii Kina malalo o ka Hae Hawaii. Ua puka laelae mai la o Keoki Makapolena mai keia hihia hoapaapaa i ka manawa holo o kona mokuahi, a ina aole he mau hoohalahala ana i koe ma ko ke aupuni aoao, alaila, ua hamama ka puka o ke koi poho kiekie, i ka Ona nona ka mokuahi i hoopaa hewa ia, e like me kona makemake, a e like me ka mea ana i ike ai he pono. O ka makou no keia i hoike mua aku ai, e ala mai ana he mau koi poho koikoi ma ko ka moku aoao, e like me ka nui o na la i kukulu wale ia ai no me ka hana ole iloko oia mau la. Ke haili e nei makou, aole io no e nele ka hoea mai oia mau poinio koikoi maluna o ka lahui. Nowai kumu i hoea mai ai o keia pilikia, aole anei mamuli no ia o ka hana hemahema o na Luna Aupuni, a o ka oi loa aku no paha ka Luna Dute Nui Kakela i pau iho nei ka mea nana i hookomo i ke aupuni Repubalika Hawaii iloa na koi poho koikoi e ku nei a hiki i keia la, ke kumu hoi o kona ma'i mau i hoike ia ae ai a waiho aku la i ka hana.

He hoohuoi nae hoi ko makou, pehea ana la kana hana i kona wa i kau pono ae la i kaupoku o Hanalei, e hahai ana hoi mahope o ka meheu a kona mua i hana ai, a i ole ma kekahi alahele okoa e ae paha, mawaho ae o ka mea a kona mua i hana ai. O ka kakou wale no e nana aku ai, oia kona hooi hou aku i ka pilikia, e like me ka kona mua, a i ole hana paha i kekahi mea e hooi loa aku ai i ka pomaikai o ka lahui, e hoohauoli mai ana i ka waihona o ka lehulehu. O ka Poakolu iho ka wa e noho mai ai o ka Ahaolelo Senate Kuikawa o ka Repubalika Hawaii, e like me ke kahea a ka Peresidena e akoakoa mai, no ka apono koke ana i ke kuikahj hoohui aina, a hoouna aku i ko Amerika Aha Senate, e noho mai ana i ke kau mau o Dekemaba ae nei. He hana nui keia a ke aupuni e onou hikiwawe nei i na hana imua, a me he mea la, he Nika au aia mahope kahi i ku mai ai, a o ke poo wale no ia e kiei mai a emi aku. Oia hoi o ua Nika nui la a makou e haupu nei, oia no ke keakea ana mai i ka pono o ka lahui kumu o Hawaii, no ka pono o ko lakou aina makuahine. O ka halawai makaainana e malama ia ana i keia ahiahi, aole ia no ke keakea aku i ko ka Aha Senate Kuikawa mana aka, i ke Kuikahi Hoohui Aina a kakou e kue mau nei. Mai puni i na olelo hoonuinui a ke Kuokoa.