Ke Aloha Aina, Volume III, Number 38, 18 September 1897 — KA PUKUNIAHI NUI HOOKAHI O KE AO NEI. [ARTICLE]

KA PUKUNIAHI NUI HOOKAHI O KE AO NEI.

O ka pukuniahi nui hookahi o ke ao nei, aia ia i na aliikoa Beritania, he pu hoi i lawe pio ia e na Beritania mahope o ko lakou lanakila ana maluna o na Inia. O keia pukuniahi, ua hanaia i ka makahiki 1500, na kekahi o na alii o Inia nona ka inoa o Chuleby Koomy Khan o Ahmednugger. Maloko o ka waha o keia pu, ua hoonohonoho ia o loko me na noho, a he wahi hooluolu punahele loa ia i na aliikoa o Beritania, no ka hoohala ana i na hora o ke awakea.