Ke Alaula, Volume I, Number 5, 1 August 1866 — Page 19

KE ALAULA. 19

HE MAU OLEO AKAMAI A SOLOMONA.

                E ao aku i ke kamalii i kona aoao a elemakule oia, aole ia e huli ae mai laila aku.—Sol. 22:6.
                Oi aku ka maikai o ke keiki ilihune me ka naauao, mamua o ke alii elemakule me ka naaupo, ka mea hiki ole ke aoia mai.—Kekahuna 4:13.
                E kuu keiki, ina e hoowalewale mai ka poe hewa ia oe, mai ae aku.—Sol. 1:10.
                E kuu keiki, e malama oe i ke kauoha a kuu makuakane; mai haalele hoi i ke kanawai o kou makuahine.—Sol. 6:20.
                O ke keiki akamai, aia no ia ma ke ao ia e kona makuakane; a o ka mea hoowahawaha, aole ia e hoolohe i ke ao ia mai.—Sol. 13:1.
                O ke keiki akamai, hoohauoli mai oia i kona makuakane; o ke keiki lapuwale, hoouluhua mai oia i kona makuahine.—Sol. 10:1.
                E kuu keiki, mai haalele oe i ko'u kanawai; e waiho hoi i ka'u mau kauoha ma kou naau.— Sol. 3:1.

KA IBEKA.
(THE IBEX.)

                He loloa ke kiwi o keia holoholona. He ano Kao nunui. Noho ka Ibeka ma na nina o ka hikina, ma Arabia a me Palesetina, maluna o na mauna kiekie, a he holoholona hihiu loa, he hiki ole i ka hoolakalakaia. Hele pu-a lakou i kekahi manawa, e ai ai, me ke kiai mau no nae o kekahi o lakou, a ina e hookokoke mai kekahi mea pono ole i ko lakou manao, he kanaka paha, a mea e ae paha, me ka ihu pi e hoolalelale ai ke kiai i kona mau hoa, a o ka auhee aku no ia o lakou, me ka pii mama loa aku i na pali wanawana, me he manu la ka mama loa.
                O ka holoholona no paha keia i manaoia e Davida ma ka Halelu 104:18: " O na mauna kiekie ka puuhonua o na Kao hihiu."
                O ko lakou ano he like me ke Kao, aka ua oi aku ka nui a me ka puipui o ke kino mamua o ko na Kao laka. O ke kiwi kekahi mea nui. He elua a ekolu kapuai ka loa o na kiwi i kekahi manawa, a ua loaa he umi-kumamawalu paona ke kaumaha o na kiwi elua o kekahi mau Ibeka. He pio maikai ihope ka moe ana o na kiwi, a he anuunuu mai ke kumu a ka welau.
                Hana no na Arabia i kumu pahi a i komo lima no loko mai o na kiwi a keia holoholona. O kona ili he like me ko ke Kao maoli, a ua hanaia na ili i omole waina, a i huewai.
                He umiumi loloa ko keia holoholona malalo ae o ka auwae, e ano like ana me na Kao huluhulu. He pokopoko loa ka huelo. I ka po, moe keia holoholona maalea ma na ululaau malalo mai, a ma na aoao o na pali. I ke ao, hoi loa aku ma na piko o na mauna a ma na pali awaawaa ma na wahi mehameha e hiki ole aku ai kona mau enemi.
                Ina e hookokoke aku ke kanaka io lakou la me ke kolo malu aku ma ka aoao makani, honi koke ae lakou iaia, a o ka holo loa aku no ia. Ina nae ma ka aoao lulu malalo aku ke kolo ana, alaila e loaa aku ana paha, a make mai i ka pu o ka mea ki pu aku.
                Ua oleloia ina e alualu aku ka ilio i kekahi Ibeka wahine me kana keiki liilii, kona holo no ia a kekahi ana, ilaila e komo aku ai, a hou mai ka makuahine i ka ilio, a holoholona e ae paha, me kona mau kiwi, e pale aku ana i ka poino mai kana keiki aku.

AUPUNI AO A NANI.
(A BRIGHT AND GLORIOUS KINGDOM.)

[GOLDEN CENSER]

1. He aupuni ao a nani,
He aupuni ao maikai,
A lohe a hiilani
Na keiki i ke 'lii.
HUI:—Ae, mele, mele
Na keiki o ia aupuni,
Aupuni, aupuni,
Aupuni ao maikai.

2. Ma ia aupuni nani
Ka noho gula mau
O ke 'Lii o ka lani,
Me kona nani pu.
HUI:—A mele, mele,
A mele ma ia aupuni,
Aupuni, aupuni,
Aupuni ao maikai.

3. Ma ia aupuni nani,
A ma ia noho nei,
Iesu, e alii ana,
Me kamalii maikai.
HUI:—A mele, mele
Na keiki o ia aupuni,
Aupuni, aupuni,
Aupuni ao maikai.

4. Ma ia aupuni nani
Na anela maikai,
Ku pu, a mililani
Lakou me kamalii.
HUI:—Ae, mele, mele
Na keiki o ia aupuni,
Aupuni, aupuni,
Aupuni ao maikai.

5. Ma ia aupuni nani,
Ku nui na pokii,
A lawe a hookani
'Na lira maikai e.
HUI:—A nani, nani
Na lei o ia aupuni,
Aupuni, aupuni,
Aupuni ao maikai.
WAIKOLOA.

KE KEIKI MAKAU OLE.

                Kui mai kekahi keiki iaia ma ka maka a eha. Aka aole ma ka maka wale no kahi i eha. Malalo ma kona naau kekahi ehaeha i ka hoino kumu ole ia. Pii mai ke koko wela ma kona puuwai a ulaula kona mau papalina.
                O kona manao mua o ke kui aku no i ka mea i hana ino mai iaia, aka ua kue ia hana i ke ano o kona ao ia ana e kona mau makua, a na kekahi mea no i kaohi mai i kona lima i ole oia e kuikui aku.
                Ua kamailio mai kona makuahine i kela la no, no ke kala ana aku a me ka hoomaikai ana i ka poe hana ino mai, a me ke kuhihewa o ka poe i hana ino aku ka poe i hana ino mai. Ua kuhikuhi aku oia i kana keiki i ka hana a ke Alii o na 'lii; aia kuamuamu ia mai oia, aole ia i kuamuamu aku, a i kona hooehaia, aole ia i olelo hooweliweli aku, aka, "haawi aku oia iaia iho i ka mea nana e hoopai mai ma ka pololei."
                Hoomanao no o Kale i keia mau olelo ao a kona makuahine, a me ke kau ana o kona lima maluna o kona poo me ka i ana, " Ina e ike au i ka'u keiki e alii ana maluna o kona uhane iho, e kaohi ana iaia iho, alaila he mea ole ia'u ka manao o kanaka nona; he mea ole ia'u ina e kapa mai lakou iaia he makau wale."
                Ka pilikia no ia i ili koke mai maluna ona. Oiai e uumi ana oia i ka huhu o kona naau i ka hana ino ia mai, ike mai na keiki hoa kula ona i kona kui ole aku i ke keiki i kui mai iaia, ka henehene mai no ia me ke kahea mai, "He keiki hohe wale, he keiki makau wale!" Kuhikuhi mai ka lima me ka luliluli o ke poo e hoino ana iaia.
                Ula loa no kona maka, a hoi aku ia i kona home me ke akahele, a me ke kaumaha o ka naau. O ke alanui hookahi no ia e hoi aku ai ka nui o na haumana kula. Hoi aku lakou maluna o ka hau e uhi ana i kekahi loko wai, no ka mea oia ka hooilo i kela aina anu, a ua uhi paa ia na loko wai a me na muliwai i ka hau.
                I ko lakou hele ana'ku holuholu ka hau malalo o na wawae a poholo pu kekahi o lakou iloko o ka wai no ka lahilahi o ka hau. Makau koke lakou a pau a holo aku i uka, koe wale no o Kale. Moe koke aku la oia ilalo, maluna o ka hau, a hoopaa aku la i ke keiki i haule iloko o ka wai, pela i paa ai a hiki mai kekahi kanaka e kokua ia laua. Pela i hoopakele ai o Kale i ke ola o kekahi. Alaila ikeia na keiki "makau wale," a me ke keiki "makau ole."

KA ALOPEKE.
(THE FOX.)

                He ano holoholona keia i ike oleia ma Hawaii nei. Ua noho oia ma Amerika a me na aina o Europa a me Asia. Elua ano o keia holoholona, o ka alopeke liilii, a me ka alopeke nui iki ae. He kii keia i hoikeia maluna no kekahi alopeke ano nui (jackal.) O kona mau pepeiao he lili-o, o kona nuku he oioi, o kona mau wawae he like me ko ka ilio, a o kona huelo he huluhulu, e like me ko ka hoki. O ka nui o kona kino ua ane like me ko ka ilio ano mau.
                He holoholona kolohe loa ka alopeke; ai oia i na hua waina. Ua oleloia ma ka Mele o Solomona, 2:15 : "E hopu aku no makou i na alopeke, i na alopeke liilii, na mea i ino ai na malawaina." He pii aku keia holoholona liilii kolohe maluna o na laau hakake, kahi i kolo ai na waina, a pau ia lakou na hua momona i ka ai ia, a poho ka mea nona ka malawaina.
                I na holoholona liilii no e poho ai ka mea wai-