Ke Alaula, Volume IV, Number 5, 1 August 1869 — Page 19

KE ALAULA. 19

NA NA KULA SABATI I HOOKAHUA I NA EKALESIA.

                He mau mea hoopomaikai no keia mau mea elua. Na kekahi i hooulu i kekahi, a na kekahi hoi i hooulu i kekahi. E hoomaikaiia ka poe i kokua mamuli o ke kukulu ana i keia mau mea no a elua. A ua awili pu ia ke kula Sabati a me ka Ekalesia e hoopomaikai ai. Ma keia aina ua kukulu mua ia na ekalesia ma na wahi a pau, a he hope ka hapaiia ana o ke kula Sabati ma ke kau wahi. Aole nae pela ma na aina e aku.
                Hele aku kekahi misionari kuloko ma na mokuaina komohana o Amerika Huipuia, a ma kekahi wahi ekalesia ole houluulu oia i na keiki he kanaiwa a kukulu aku he kula Sabati, a waiho pu oia me lakou i na buke maloko o ko lakou waihona buke, e like paha ke kumukuai me na dala he kanakolu. Paipai ikaika oia i na keiki e hoopaanaau i ka ke Akua olelo, a hoomaka ikaika aku lakou ia hana. Ma kekahi kulanakauhale hou aku loaa aku oia i na ohana he umi-kumamalua, a malaila ekolu hale kuai rama. Ua oi aku ka makemake o na kanaka i ka rama mamua o ka makemake i na buke. Aka, ua houluulu oia i na keiki a hoomaka aku he kula Sabati maikai. A eia ka hua i loaa mai keia mau kula Sabati elua, he elua ekalesia i hookumuia me ka haiia o ka olelo o ke ola i kela Sabati keia Sabati. A ua ulu wehiwehi mau no hoi keia mau kula elua. Pela e hoopomaikai mau ai ka Haku i ka poe hapai hana ma kona kihapai.

HE MEA MAIKAI KA MALAMA.

                Ala mai o Kale i kakahiakanui o ka la hanau o ka Moi, a puka mai la e paa ana he wahi pahu liilii ma kona lima. Maloko o ia pahu he mau hapaha a me na hapawalu a me na dime, he dala me ka hapalua ka huina pau. Nani ke kani ana o ua mau hapaha la i kona lu ana ilalo ma ka papa.
                "Akahi no a loaa ia'u ka nui o ke dala me neia; aole like me ia mamua."
                "Heaha kau mea e kuai ai?" wahi a ka makuahine.
                "E hele ana au e ike i na koa, a ilaila e kuai au i wahi mea ono paha."
                "Heaha la ka Kale mea e kuai ai?" wahi a kona mau kaikaina.
                "Ke manao nei au aole oia e kuai i kekahi mea waiwai ole, i mea maikai ke malama," wahi a ka makuahine.
                I ko lakou malama ana i ka pule kakahiaka, ike iho la o Kale ua weluwelu ka Baibala, ua lilo aku kekahi hapa. Manao iho la ia e kuai no ia i Baibala hou. Aole no ia i hai i kona manao; aka i kona hele ana e nana i na koa, i ko lakou paikau ana, a i na mea ono e waiho mai ana, he lehulehu no na mea ono o kela ano keia ano, a me na mea palanaiki e ae i makemakeia e na kamalii. Aole nae i kuai o ua o Kale la i keia mau mea. Ua makemake oia e hoohauoli i kona makuahine. Nolaila nana hele aku la no ia a hiki aku i kahi e waiho mai ana na buke o kela ano keia ano. Aia no kekahi mau buke nani ke nana aku ua piha i na kaao; aole nae kupono keia mau buke. Nana hou no ia, a ike mai la he Baibala Ohana. Ninau aku la ia, "Heaha ke kumukuai?"
                "He kala me hapalua no," wahi a ka mea kuai.
                Nana iho la o Kale, a hoomaopopo ua lako pono ua Baibala la i na "moohana," kuai iho la. Me ka olioli no ia i hoi aku ai me kona ukana makamae, a huna iho la, me ka manao aia a pau ka aina ahiahi a hiki i ka wa e malama ai ka pule ahiahi, alaila e hoike aku ia. A mahope mai akoakoa ae la ka ohana i ka pule ahiahi, waiho mai no ia i ua puolo la ma na lima o kona makuahine, me ka olelo, "He makana keia nou, e kuu makuahine."
                Wehe ae la kona makuahine i ua puolo la me na maka alohilohi, no ka mea ua koho ia i ke ano o ka mea o loko. A ike ae la ia, i iho la ia, "Ua kuai io no oe, e kuu keiki, i ka mea maikai ke malama."
                E na pokii, he maikai io no ke malama pono oukou i na Baibala a oukou; aole nae e malama me ka waiho malie ma ka pahu, a ma ka paia paha, aka me ka heluhelu a me ka hoopaanaau i na olelo maikai mai loko ona. Ke olelo mai nei o Davida ma na Halelu: "Nani ka ono o kau mau olelo i ko'u puu, ua oi aku mamua o ka meli i kuu waha." "He maemae loa kau olelo, nolaila ua makemake kau kauwa ia mea." "Olioli no au ma kau olelo, e like me ka mea loaa ka waiwai pio a nui."— Halelu 119:103, 140, 162.
                Pela, e na pokii, e hauoli ai kakou ma na olelo maikai a ke Akua.  L. L. N.

KE KEIKI ALII O BERETANIA I HIKI MAI I HAWAII NEI.

                Ma ka auina la o ka Poakolu, ka la 21 o Iulai, ua ku mai ma ka nuku o ke awa o Honolulu ka mokuahi manuwa Beretania, o Galatea kona inoa, me kona kapena Alii, oia o Alefereda, ke Duke o Edineboro, oia ka lua iho o na keikikane o ka Moi Wahine o Beretania, oia o Vikolia. O ko ia nei kaikuaana ponoi ka hooilina o ka lei alii o Beretania, a ke hala ae kela me ka waiho ole mai i na keiki kupono, alaila e ili mai ka noho ana i ka noho Alii i keia keiki kapena moku opiopio nei.
                He kanaka ui keia, nona paha na makahiki he 24 a 25 paha i keia manawa, aka ua nui na makahiki ana i holo ai i ka moana, e ao ana i na kanawai o ka holoholo moku. A i ka ike ana o na poo o ia oihana i kona makaukau, ua hookohuia oia he kapena, a ma kona moku nui no oia i holo kaapuni mai nei i ka honua, a ku mai nei i ko kakou nei wahi pae aina waena moana, a e holo loa aku ana i ka moku-aina o Iapana. I kela makahiki aku nei i hala ua holo mai oia i ka moana Pakipika nei, a ua kipa ma na panalaau o Beretania ma Nu Holani, a hoi hou aku no i Beretania; a o ka lua keia o kona holo ana mai i keia moana, a kipa mua ma Tahiti, a mai laila mai a Hilo, a hiki i Honolulu nei.
                Ke hookipa nei ko kakou Moi i ua pua Alii nei e like me ka hanohano ku i kona ano Alii hanauna no kekahi aupuni hanohano loa e launa oluolu mai nei me keia aupuni.
                Ke hoomanao nei makou i kekahi moolelo e pili ana ia Vikolia, ko ia nei makuahine i aloha ia, e hoike aha i ka maikai o kona ao ana a me kona hooponopono ana i kana ohana keiki. Aole o makou i hoomaopopo i ke keiki nona ia moolelo, o keia keiki Alii paha, o kona kaikuaana paha, o kekahi o na kaikaina muli loa mai paha. Eia nae ua moolelo la: E hele ae ana o Vikolia me kana mau keiki e holoholo ana ma kekahi alanui o kekahi kulanakauhale. Mamuli o ka manao paani kolohe ua hele aku kekahi keiki ana a kulai aku i ka hinai o kekahi wahine kuai hua, he hua ohia paha, a pau na hua ilalo i ka lepo, a holo aku ua keiki nei me ka akaaka. Kahea koke aku ua makuahine Alii nei iaia e hoi mai a ohi hou i na hua ma ke alanui a hoihoi pono ia lakou a pau iloko o ka hinai a ka wahine ilihune kuai hua, a pau ia ua kauoha aku oia i ke keiki e mihi aku imua o ua wahine la no kona hana kolohe. Pela no i ao pono aku ai ua makuahine Alii la, o Vikolia, i kana mau keiki e nana aku i ko hai pono, a e malama i na kanawai o ka noho maluhia ana mai ko lakou wa uuku mai, me ka hehi ole aku maluna o ka poe haahaa. No keia hoomalu pono ana o Vikolia i kana ohana, a me ka malama pono ana i ka pono o na makaainana, ua mahalo loa ia oia e kona lahui, a ua maluhia a pomaikai a waiwai ke aupuni o Beretania malalo o kona noho Alii ana.    Ina ua komo keia mau ano maikai a me keia hoomalu pono ana o ka makuahine Alii iloko o kana mau keiki eiwa e ola nei, e pomaikai loa ana o Beretania ia lakou, a e noho loihi auanei ko lakou ohana ma ka noho Alii o ia aupuni hanohano me ka maluhia.

E HOIKE MAI IA MAKOU KOU AKUA.

                Olelo aku kekahi poe pegana i kekahi keiki Hinedu nona na makahiki ewalu i huli mamuli o ka aoao Keris tiano, "E hoike mai oe ia makou i kou Akua." Olelo koke aku ua keiki la, "Aole i hiki ia'u ke hoike aku i ko'u Akua ia oukou, aka he mea hiki wale no ia'u ke hoike aku ia oukou ka oukou akua." Hoopaa koke aku oia i kekahi pohaku a hapala iho me ka lepo he wahi maka, he ihu a he waha, e like iki ana me ka maka o ke kanaka, a hoonoho aku oia ia ma ka lepo, a hoopaneenee aku i ua pohaku la me kona wawae, me ka olelo iho, "Aia ka! e like me ia ke akua a oukou e hoomana ai. Aka, 'Me wai la oukou e hoohalike ai i ke Akua? Heaha ka mea like e hoohalike ai oukou me ia?' wahi a ke Akua oiaio. 'Aole anei owau o Iehova? Aole hoi he Akua e ae, ke kaawale au, o ke Akua pono, ka mea e ola'i.'"

                Aia hoi! nani ka maikai a me ka oluolu o ka noho lokahi pu ana o na hoahanau. Ua like ia me ka poni maikai ma ke poo, ka mea i kahe ilalo ma ka umiumi, ma ka umiumi hoi o Aarona, ua hiki hoi ilalo o ke kihi o kona mea kano. Ua like ia me ka hau o Heremona, ka mea i haule mai maluna o na mauna o Ziona; no ka mea, malaila no i kauoha mai ai o Iehova i ka hoomaikaiia, i ke ola hoi, a hiki i ka manawa pau ole.