Ke Alaula, Volume VI, Number 7, 1 October 1871 — Page 28
28 KE ALAULA.
GULA MAEMAE.
Leo: "PURE GOLD"--Pure Gold.
Mai ku-ko ka-kou i na wai-wai o-nei, O-li-no po-ko-le a na-lo e ae. E he-le io Ie-su e no-no-i ae, Ke gu-la o-li-no a mau aku nae; E i-mi, e hu-li ka wai-wai mai-kai, Ka lei o ke o-la ke Gu-la mae-mae.
2 Ka olelo a Iesu i haawi mai
I kuhi lea'e i ke ala maikai,
He waiwai mau ia a oi nui ae
Na daimana uka, na momi o kai,
E imi, e huli, hoopaa a hahai,
Ka olelo a Iesu, ke Gula maemae.
3 Na hua a ka Uhane e haawl mai
Ka oli no ia no ke kalaia'e
Ke mihi a pule a paulele pu
A hoopili mau i ka Haku Iesu.
E noi i ka Uhane hoomaemaeia'e,
I loaa ka oli, ke Gula maemae.
4 Ka naau pepe me ka uhane haahaa,
Ke aloha lokahi, ke kulana paa,
Ka pau o ka luhi, me koonei luuluu
Ka maha maikai ma ke ao me Iesu,
Na waiwaii no keia e pomaikai ai,
Ke ola, ka nani, ke Gula maemae.
E HOOKO I KAU OLELO E KEONI.
He wahi keiki uuku elima wale no ona mau makahiki, Eda kona inoa, he keiki malama a hooko i kana mau olelo. Ka maikai no ia o na keiki a pau. E hoolohe oe e Keoni i ke ano o ua keiki nei. Ua hoi mai oia i kona home i kekahi ahiahi mai ka hale o kekahi makuahine ona, o Rebeka; ua hele oia e ike iaia, a paani pu me kona mau keiki, a milimili i na kii maikai, a ai pu i na mea ono.
Olelo oia i kona mama, i ka hoi ana mai, e mama, e ae oe komo keia wahi kui pine iloko o kou poho pine i keia po a ao ae.
Pono no homai, aia ua paa iloko. Aka, no ke aha kou noi ana mai ia'u e komo keia wahi pine kekee iloko o kuu poho pine?
No ka mea wahi a Eda, he pine keia a'u i noi aku ai i keia ahiahi i ko'u makuwahine ia Rebeka i mea e paa ai ko'u kihei me ka olelo nae, apopo e hoihoi aku au ia pine.
Kahaha, naaupo oe, e Eda, wahi a kona mama, he mea liilii wale iho no keia, he wahi pini kekee hookahi aole paha manao hou kou makua ia mea; a ina e hoihoi aku oe ia akaaka wale no oia ia oe no ka hoihoi aku.
Aka, ua olelo au, e mama, ia Rebeka, e hoihoi aku i ke pine ma ke kakahiaka, aole oia i akaaka no keia olelo a'u, a, ma kuu nana aku i ke ano o kona helehelena me he la ia e hooko io ana au i ka'u olelo. Aole no oia e akaaka mai ia'u ke hoihoi aku au i ke pine.
Hupo loa ka oe, e Eda, wahi a kona mama, i kou manao ana pela, aka hoi, ina makemake oe e akaakaia, e malama no au i kagu pine i keia po a apopo, e hoihoi aku oe ia.
Ehaeha ka naau o Eda no na hua olelo a kona mama, aka hookomo oia i ke pine iloko o ka popo pine ana, a hoi e noonoo i keia mea kupanaha, haohao oia ina he mea liilii ano ole ke pine no ke aha la i hai ole mai ai ko'u makuwahine o Rebeka ia'u. i olelo aku ai aia a kakahiaka e hoihoi mai au ia? a no ka'u olelo ana e hoihoi aku no au ia, no ke aha e keakea mai ai kuu mama i ko'u hooko ana i ka'u olelo? a paipai ole mai ia'u e hooko io no. He mea kupanaha hoi, i nehinei noi aku au iaia i wahi kaula paani me ka olelo e malama a hoihoi no au ia, a huhu loa mai oia ia'u no ka hooko ole i keia olelo a hoihoi ole i ke kaula, a nalowale loa aku, a hooweliweli mai e hoopai mai ia'u. Ao pinepine mai hoi oia ia'u no ka pono e hooko mau i ka'u mau olelo.
A pela hoi ko'u kupunawahine i ao mai ia'u e i mai ana aole pono ke hoohiki e hana i kekahi mea ke manao e hooko ole, ina hoohiki e hooko io no ke hiki.
Kaumaha loa hoi oia i ke ano o na huaolelo a kona mama, e kapa mai ana ia'u he naaupo, he hupo, no ko'u manao e hooko i ka'u olelo. Inehinei paipai mai oia ia'u e hooko i ka'u olelo, i keia ahiahi henehene mai oia ia'u no ka manao e hooko. A lilo oia i ka nalu pihoihoi ana, a lohe ole i ka leo kahea e hele e paina, a palua, pakolu ke kahea ana. Aloha ino o Eda, ke keiki maikai ea. (Aole i pau.)
KA NINAU BAIBALA NO OKATOBA.
1—Owai ke kanaka i hoomaau ia Iesu, a kupanaha kona huli ana mai mahope?
2—Heaha ka mea kupanaha ana i ike ai ma ke alanui?
3—Heaha kona ninau ana aku?
4—Owai ke keiki uuku i kahea pahaia ma ka po?
5—Ua makau anei oia?
6—Owai ke keiki uuku i makau i ka hoike aku i kekahi mea nui ika elemakule i noho pu ai?
7—Ua hoike aku anei mahope?
8—Ua kakauia anei ma ka baibala ka uwe ana o kekahi keiki liiilii?
9—A no ke keiki maikai kekahi?
10—Heaha ka Iesu olelo aloha i na keiki liilii?
KA HAINA NO KA NINAU MA IULAI.
Eha holoholona, eha mana, a pela aku. Oihanakahuna, mokuna 11. Ua pololei anei? Ina aole, e pane hou mai.
NA KE KULA SABATI O WAIPIO.
HAINA O NA NINAU BAIBALA NO SEPATEMABA.
1—Ioane 10:7; 2—Ioane 10:8-10; 3—Ioane 10:9; 4—1 Sam. 16:11; 5—1 Sam. 17:40-50; 6-Isaia 40:11; 7—Ioane 21:15; 8—Ioane 10:11, 16, 29.
NA DUTE O NA KAMALII.
HELU 3.
Aloha oe e ke kumu; aloha paha oe, e Mahoe. Pehea? ua hana anei oe i kela dute i hai e ia mamua, ka hoolako ana ia oe iho i ka baibala? Ae, ua loaa ka baibala, ua noi a koi ikaika aku i ka makua, a, ua hele oia i ka hale o ka misionari a kuai i baibala maikai na'u me na pauku kuhikuhi. Eia ua baibala nei, a makaukau au e lohe, a e huli i ko'u mau dute i paiia maloko.
Maikai wale, he kaikamahine hoolohe oe. E wehe i ka baibala a e nana a heluhelu i ka pauku 8 o ka mokuna 1 o Solomona. Aia mahea ia buke? Ka buke ia e pili ana i na Halelu. Malia paha o paa ole na inoa o na buke baibala ia oe. Ina ua paa ole, eia ka dute mua e hoopaa, alaila makaukau oe a loaa koke ke huli i kela buke keia buke.
Eia no ua loaa. "E kuu keiki, e hoolohe mai i ke ao ana a kou makuakane, aole hoi e haalele i ke kanawai o kou makuahine." Akaka ea; ua like ia me ke kanawai elima; ua paa anei ia kanawai? Ae, ua paa no. E hai mai. "E hoomaikai oe i kou makuakake a me kou makuwahine." Pono loa, aia mahea? ma Pukaana, mokuna 20:12. Ae, o ke kanawai no ia a o kou dute, e Mahoe, ka hooko ana; a hewa oe ke hooko ole. Ke hoomaikai nei anei oe i kou mau makua? Hoomaikai no i kekahi manawa, huhu a hookuli, a nuku, a mumule, a hakanu, a hoohalahala, a hailuku aku i ka pohaku. Kou dute ka ia i na makua? No ke kena mai hoi o laua ia'u e hele i kahi loihi, e kii i wai, i wahie, i wahi lau baka, a e olani i ka baka, a e hoa i ka ipu baka. A i kahi manawa papa laua ia'u aole make e hele i ka paani, i ke kinikini hua o ekaeka ka lole, aole make e holoholo wale ma ka la Sabati, e noho malie, e hele i ke kula Sabati, e hele i ka halawai, a aole o'u makemake e hoolohe, a pakike aku no.
Ka, kolohe oe, aole pela, ina he mau kauoha pono ole ka na makua, hiki ke hookuli; aka, e hoolohe, e malama i na kauoha pono. Kou dute ia, a o ka hooko ana oia ka mea e oluolu ai na makua, a me ke Akua ia oe. E heluhelu oe i kekahi pauku mahope iho o ka pauku 8:
"No ka mea, he mea nani no kou poo,
He mau lei hoi no kou ai."
E Maukau,e hoopaanaau oe i keia mau pauku elua, 8 a me ka 9 o Solomona, mokua 1.
Heaha ka nani no kou poo? Heaha ka lei no kou ai? Ke kau nei anei keia nani ma kou poo? A ke lewa nei anei keia lei ma kou ai?
Ina pela oluolu na makua ia oukou, a oluolu hoi ke Akua ia oukou; a nani ka mahalo ana o na mea ike a pau.
"Pomaikai ke kanaka i hele ole ma ka olelo a ka poe aia,
I ku ole hoi ma ka aoao o ka poe hewa.
I noho ole hoi ma ka noho o ka poe haakei.
Aka, ma ke kanawai o Iehova kona olioli,
A ma kona kanawai oia i manao ai i ke ao a me ka po."