Ke Alaula, Volume VII, Number 5, 1 August 1872 — Page 20

20 KE ALAULA.

NAUWE MAI I KE KULA SABATI.
Leo: "COME AWAY TO THE SABBATII SCHOOL."--The Pearl.

1. Ka-ni mai na be-le e, be-le ku-la Sa-ba-ti; Nauwe e, nau-we e, nau-we e, nauwe e, Hamau e! ke pai-pai nei i na ka-ma-lii oo-nei; Nauwe e, nauwe e, nauwe e, nau-we e, Ho-lo o-li na po-kii, nau-we e, nau-we e, I ke ku-la Sa-ba-ti, nau-we e, nau-we e, Ka-hi e ao po-no ai i na ka-na-wai mai-kai; Nau-we e, nau-we e, nau-we e.
2. Nani no ka pomaikai ma ke kula Sabati;
Nauwe e, nauwe e, nauwe e,
Hui ma ka pule e, me ke mele himeni;
Me na buke ao a pau; nauwe e,
A malaila loaa no na olelo e ola'i,
Nauwe e, nauwe e, nauwe e.
3 Lohe pono no Iesu ma ke kula Sabati;
Nauwe e, nauwe e, nauwe e,
Hai a kuhikuhi pu i ko luna ao maikai;
Nauwe e, nauwe e, nauwe e;
Mele pu na mea a pau, nauwe e,
Imi i ka waiwai mau, nauwe e,
Hele mau, o na pokii, i ke kula Sabati,
Nauwe e, nauwe e, nauwe e.

Ke Keiki i Malama mau i kana Olelo.

                Auhea la ia keiki? Owai hoi kona inoa? Aia no a ma ka aina hau, a anu loa i ka wa hooilo, mahana maikai nae i ke kau. O ka inoa o ke keiki aole i kakauia, aka, ma ke koho ana, Robaka paha ia. He mea uuku ka inoa; aka o ka hana maikai ka mea nui.
                He kanaka mea oihana nui e noho ana ma kahi o keia keiki, o Wudeweka kona inoa, ua hele oia i kahi e, e noho ana kana wahine; laua me kekahi wahine kuke wale no. He palapala ka ka wahine na ke kane mai, aia ma ka Hale Leta; a makemake oia e loaa koke mai, no ka mea he leta ano nui ia ; a makemake hoi e loaa kekahi mau huaolelo na kana kane mai, no ka mea ua kaumaha iki oia no ka noho mehameha
                Aole nae ana mea e hoouna aku ai, ua maimai hoi ke kuke, a ua loihi aku hoi, a e haule ana ka hau me ka noenoe anu. Kali ka wahine me ka makemake e hoea mai kekahi mea e ae e kii i ka palapala. Aole liuliu a lohe oia i ka pio ana o kekahi me he pio keiki la no. A nana oia ma kona puka aniani, aia hoi he keiki liilii e hoea mai ana me ka lole weluwelu, a me kahi lole huluhulu mea hoomahana iaia no ka mea ua anu loa. E holo mai ana ia me ka pio ana a e olioli loa ana.
                Kikeke ka wahine ma ka puka aniani a wehe ia, a kahea aku, e o, e ke keiki pokii, makemake anei oe e loaa kekahi hana uuku i keia po?
                Ninau koke oia, heaha la ia hana?
                Ke makemake nei au e holo awiwi oe i ka hale leta, a e lawe mai i leta na'u aia no ilaila, na kuu kane mai nei; ina e kii aku oe a lawe mai i keia po, e uku aku au ia i elua hapawalu.
                Ae, e ae no au e kii, aole ulu na hapawalu elua ma na lala laau a pau i keia mau la ino. E haawi koke mai anei oe ia mau hapawalu ano, mamua o ko'u hele ana? wahi a ke keiki.
                E ae no au e haawi e aku i ka uku ia oe, ke akaka ia'u kou hele ana i keia po. Pehea ke ae nei anei oe e hele io no, a lawe pololei mai i ka leta ia'u i keia po ?
                Nana ke keiki i ka maka o ka wahine, a pane kaena aku, ua ae e au mamua e lawe mai i ka leta ma keia po, a he keiki malama mau au I ka'u olelo.
                Lawe ka wahine i na hapawalu elua mailoko mai o kona eke dala, a o aku i kona lima mawaho o ka puka aniani a haawi aku ia Robata. Thank you ma'ma, wahi ana, me ka imo olino mai o ka maka, a nalo koke oia iloko o ka ino pouli o ke ano ahiahi.
                A hala ke keiki, hoopau ka wahine i kona pihoihoi, a hoomakaukau i ka paina ahiahi, a paina no, a pau ia, hoomoe oia i ke keiki liilii, ka pepe, a noho ala oia e kali aha i ka puka ana mai o ke keiki me kahi leta. Aole nae i puka koke mai. Kali a hala ka hora ewalu, a aumoe, aohe mea i loheia, o ka pa ana mai o ka hau a me ka makani, ma ka puku aniani, oia wale no kana i lohe ai. (Aole i pau.)

Na Manu i Hoomakapoia.

                No kekahi keiki lokoino a hana ino keia moolelo. Kona olioli no ia o ka hoeha wale i na holoholoka, i na anamala, i na manu, e like me na keiki Hawaii.
                Ua maa oia i ka hoopahele ana i na manu liilii, a poalo i na maka, no kona lohe ana, aia a hoomakapoia na manu, mahuahua ka maikai o ke mele ana. A mahope i kona ike ana he hana keia e waiwai ai oia, hopu pinepine oia i na manu a hoomakapo ia lakou, a kuai aku i ka poo makemake e lohe i ko lakou mele maikai ana iloko o na hale manu. Kokua ka keia poe i keia keiki i ka hana ino ana i na manu. Hewa pu. Lokoino pu. He mau wahine a kaikamahine paha kekahi i kokua ma keia hana, aole paha. He poe aloha paha lakou.
                Ka hana ia a keia keiki, a lilo oia i kanaka makua, alaila huli mai oia ma ka pono i kekahi manawa. Ma ka mana o ko ke Akua lokomaikai i huli mai ai oia, a mihi i kona hewa nui. A no ka mihi ana ua kalaia no kona hewa.
                Aka, aole nalo ia hewa, mau no ka hoomanao ana, a lilo ia mea kaumaha a eha mau kona naau, a hiki ole iaia ke kala iaia iho. Ua mare oia me kekahi wahine, a mahope lilo oia i makua no kekahi kaikamahine. A liuliu iki, nana oia a ike ua makapo ke keiki. Piha loa kona naau i ke kaumaha a me ka minamina. Manao iho la oia he hoopai ia na ke Akua mai, he hoopai mama nae no kona hoomakapo ana i na manu. A pili ke kaumaha iaia a pau kona ola
                E na pokii, ina aole e haule kekahi manu liilii i ka honua me ka ike ole ia o ka Makua ma ka lani, e ike pono oukou e hoopai ana no oia i ka poe a pau i hana ino wale aku i na mea ana i hana'i.
                                Mai kolohe a hana ino
                                I na manu makalii,
                                I ka maka, i ke kino,
                                Na eheu nani e.
                                Na ke Akua no i hana
                                I na manu maikai nei,
                                Ula, uli a onio, Na eheu e lele ai,
                                Me ka leo mele nani,
                                Lele, mele oli no,
                                Hana pono, hookuu aku,
                                Mai hoopio ia lakou.

                Manu iki ma ka pa, ma ka pa, ma ka pa.
                Manu iki ma ka pa,
                Mele maikai mai;
                Mele no na rose ma na mala e,
                Mele no na hua, no na lau maikai.

Kela me Keia.

                Ua holo aku ka moku misionari i Maikonisia ma ka pule mua o Iulai. Aole nae he mau misionasi hou i holo pu aku. Ua hoi pu aku no hoi o Kanoa me kana wahine. Ua manao no hoi o Aea e hoi pu i me kana wahine hou, ua hoole nae ke Akua ua lawe e oia iaia e hana ma ka lani. Ua makemake no hoi o Kapali e hoi hou aku, aole nae i pau ka nawaliwali o ke kino. Mahope aku paha, e pule kakou nona i hiki ia ke hoi aku.
                Ekolu Ahaolelo ma Honolulu nei i ka manawa hookahi. Ka Ahaolelo Aupuni, ka Ahahui Euanelio Hawaii a me ka Ahahui Kula Sabati o Hawaii nei. Ua lohe iho nei kakou i na hana a keia mau Ahaolelo.
                Ua kau hou mai ka mai puupuu kepela. Ua make kekahi poe, a ke mai nei kekahi poe. Ke lele nei i o a i anei. Ke piha nei kanaka, kamalii i ka makau a me ka pihoikoi. Ke ala nei ka o ana, a wikiwiki ana na mea a pau i ka oia i mea e pale ai i ka make.
                O Iesu nae ka puuhonua maikai, e wikiwiki na kamalii e holo iloko ona.