Ke Alaula, Volume VII, Number 12, 1 March 1873 — Page 46

46 KE ALAULA.

hoopai ana i na kanaka, i na kamalii o Sodoma ma, no ko lakou mau hewa, no ka hookuli, a minamina i na mea maikai o keia ao, heaha ka oukou e makau ai ko hoohalike me lakou? Mahea oukou e holo ai? Owai ko oukou mea uwao? Ahea oukou e holo? I na hoomaka e holo, a nana i hope, heaha ka hope? E uwao oukou no wai? Ahea oukou e oki i ka pule no ka poe hewa? Aia a make lakou. Ke ahi aha e make ai ka poe hewa?
                Mele--"Kai a nauwe." Hae Hoonani. Pule.

Helu 10- Maraki 9.
Pauku Baibala-KINOIU 22:7, 11--Ka Hoaoia'na o ko Aberahama Manaoio.

                Mele- "Ka Iesu kamaiki au." Hae Hoonani.
                Pule like--E ka Makua nui ma ka lani, nani kou aloha ia makou, ua haawi mai oe i kau keiki ponoi, ia Iesu Kristo i mohai ka'ahala no makou. E haawi mai oe i ka manaoio, a me ke aloha nui iaia, i ola makou ma o na la. Amene.
                Na kaikamahine—Owai ke keiki a Aberahama  i aloha nui ai? p. 2. Nawai mai ia keiki? Kauoha ke Akua ia Aberahama e lawe i kana keiki i hea? A, e aha iaia malaila? E mohai, oia ka pepehi ana iaia, i mohai aha? p. 2. Ua ae no Aberahama, a ua hele no, a lawe pu ia Isaaka, me ka wahie, me ke ahi, a me ka pahi, a, ma ke aloha nui, heaha ka ninau a ke keiki? Auhea ke ke kihipa i mohai kua? Ua akaka anei iaia oia ka mohai kuni? A ike, oia no ka mohai kuni, hoole anei oia? Aole. Kupanaha keia makua a me kana keiki! Ae no ka makua e mohai i ke keiki; ae hoi ke keiki e mohaiia, a nakiikii ia ma ka paila wahie, e pepehiia i ka pahi! No hea keia ae oluolu ana? No ka mau oio i ke Akua. Hebera 11:17. Owai ka i ana ole i kana keiki hiwahiwa? Ioane 3:16. Rom. 8:32.
                Na keikikane--Ua mohaiia anei Isaaka? Nawai i hoole? p. 10, 12. Ua hoaoia ko Aberahama manaoio, a pehea? ua akaka anei ka paa ana o kona manaoio? Heaha ke pani no Isaaka? p. 13. No hea mai ka hipa kane? Owai ka inoa i kapaia'i ia wahi? No ke aha? p. 14.
                Oukou a pau--Ua like kakou me Isaaka, ua kau ka make maluna o kakou, owai ke pani, i ole kakou e make? Iesu, ke keiki a ke Akua. Hai mai Ioane 1:29. " E nana i ke keikihipa a ke Akua, nana e lawe aku ka hala o ke ao nei." Ua like ka nana ana me keaha? Me ka manaoio. Heaha ka manaoio e ola'i ? O ka manaoio i makau ole i ka make, e like me ko Isaaka, e like hoi me ko Aberahama i aua ole I na mea i alohaia.
                Mele—"Make Iesu no'u." Hae Hoonani. Pule.

Helu 11--Maraki 16.
Pauku Baibala--Kinohi 27:30, 40 Iakoba laua me Esau.

                Mele—"A wehe ke Alaula." Alaula, Sept. 1872.
                Pule like -- E ka Haku, e kokua mai oe ia makou i ole makou e hoohalike me Iakoba ma ka hoopunipuni ana; i ole hoi e hoohalike me Esau ma ke kuai naaupo ana i ko makou pomaikai nui no na mea o keia ao; e hoolilo mai ia makou i poe haumana oiaio, a hana maikai, loaa ka hoopomaikai ia mai ma ka lani, ma o Iesu la. Amene.
                Na keikikane--Esau, Iakoba he mau keiki laua na wai? Na Isaaka me Rebeka. He mau mahoe laua, owai ka mua? Owai ka hooilina ma ka manao o ke Akua? Mok, 25:23. No hea ka inoa Esau? 25;25. Heaha ke ano o keia mau keiki? 25:27. He Paniolo Esau, ea. Aloha ka makuakane ia wai? No keaha? Aloha Rebeka ia wai? No keaha? No ka mea, Iakoba ka hooilina mai ke Akua mai. Hai mai Malaki 1:2--3. "Aloha aku au ia Iakoba, a hoowahawaha hoi ia Esau." He keiki hihiu, a auwana Esau, he keiki i noho malie o Iakoba, e hoohalike oukou me wai? Ae, e noho malie oukou me na makua, me ka hoolohe pono i ka lakou, me Iakoba, aka, he wahi hewa no i pili ia Iakoba, heaha ia hewa? Mokuna 27:24; Hoopunipuni, ea. O Ekau wau; aole ka! Na wai nae i ao i ia e hoopunipuni ? Ina ao mai na makua ia oukou e hoopunipuni, e aihue, &c. pono anei ke ae? Ua loaa ka pomaikai o ka hooilina ia Iakoba, no keaha i hooneleia'i Ekau ka hanau mua? No kona kuai naaupo ana i kona pomaikai ia Iakoba. Mokuna 25:32, 34. Naaupo maoli Esau. Mai hooholike oukou me ia, a kuai i na pono o ko oukou mau uhane no na lealea o keia ao.
                Mele--"Kaa kuu aie ia Iesu." Him. 97. Pule.

Helu 12—Maraki 23.
Pauku Baibala-KINOHI 28:10, 22 Iakoba ma Betela.

                Mele--"Koa maikai." Hae Hoonani.
                Pule like-- E Iehova, ke Akua o Aberahama, o Isaaka, a o Iakoba e lilo oe i Akua no makou, a i Makua hoi, e malama mau mai ia makou, a e launa mai, e kokua mai e alakai pono; e lawe i ko makou mau kino, me ko makou mau uhane nou mau loa, a e hoola mai ia makou, ma ka pono o Iesu. Amene.
                E mahuka ana o Iakoba, no keaha? No ka makau i ka pepehiia e Esau, kona kaikuana. No ka mea ua huhu oia ia Iakoba no ka lilo ana o ka pomaikai o ka hooilina iaia. He kumu pono anei no kona huhu? Aole paha—na ke Akua no i hoonele ia Esau, a haawi i kona pomaikai ia Iakoba.
                Huhu kumu ole Kaina, a pepehi ia wai?
                Huhu kumu ole Esau, a ohumu e pepehi ia wai?
                Na kaikamahine--Ma keaha i pakele ai Iakoba i ka papehiia e Esau? Hai mai ka mea ike. Mai kona mahuka ana mai kona alo aku. Nawai i ao iaia e holo i kahi e? Maikai ka makuwahine. E holo i hea? Heluhelu Mok. 27:41, 45.
                Na keikikane--Kena Isaaka ka makuakane ia Iakoba e ku a hele i hea? No keaha? I pakele i ka make ia Esau, a i loaa ka wahine nana malaila, no ka mea, aole maikai na wahine o Kanaana. Mahea Padanarama ?
                Oukou a pau— Heaha ka moe kapanaha i loaa ia Iakoba ma ke alanui? Heluhelu, p. 11, 12. Heaha, he mau anela. O Iehova maluna. Heaha ka Iehova olelo ia Iakoba? p. 13, 15. Heaha ka Iakoba olelo, i kona ala ana mai? p. 15, 17. He wahi aha ka luakini? Owai ko oukou Akua? Heaha ka Iakoba hoohiki? p. 21,22. Heaha ko oukou hoohiki pono? E haawi ia makou iho i ke Akua, a e lawe iaia i Akua no makou. Owai ko oukou Betela?
                Mele-"He Akua hemolele." Him. 8. Pule.
 

Helu 13-- Maraki 30.
Ka hoi hou i hope.

                Mele--"Iesu ke Alakai." Alaula, Iune, 1872.
                Pule like-- E ko makou Makua iloko o ka lani, &c.
                Na keikikane-- Heaha ka ke Akua i hana'i ma kinehi? Iloko o na la ehia i hanaia'i na mea apau? Ma ka la ehia i hanaia'i ke kanaka? Ma ke ano owai i hanaia'i ke kanaka? Owai ke kane mua, a me ka wahine mua? Noloko mai o keaha ke kane? Noloko mai o keaha ka wahine? Mahea laua i hoonoho mua ia'i? Heaha  i ka laua hana mua? Ka la ehia ka i hookapu ia? Ka la 7, oia ka Sabati. Heaha ke kanawai no ka la Sabati? Hai pualu mai.
                Na kaikamahine— Ua maikai Adamu me Ewa mamua, ua mau anei ko laua maikai? Nawai i hoowalewale ia laua? Owai ka nahesa? Ua hoopai i no ke Akua, pehea na hoopai? Luhi na kanaka, mai, eha, luuluu, pilikia, make, ka uku ia o keaha? O ka hewa, ea! Heaha ka uku nui o ka hewa? Ka make mau loa ma ke ahi pio ole. Owai ka hua e paopao ana i ke poo o ka nahesa? Ma owai la e pakele ai oukou i ka make mau loa? Ma keaha oukou e komo ai i ka mala maikai o ka lani?
                Oukou apau—Na keiki mua elua a Adamu, owai laua? Owai ke keiki maikai? Nawai i pepehi i kona kaikaina? No keaha? He mea ino loa anei ka huhu? A huhu oe, a hea e pau? A po ka la anei? Aole, mamua iho. Ehia hewa o Kaina? Ehia o oukou mau hewa? Kinikini wale! Owai ke kalahala? Ma keaha e kalaia'i na hewa?
                Na keikikane--Ma keaha i pakele ai Noa ma i ke kaiakahinalii? Ehia lakou? Pehea ka poe e ae? Owai ko kakou halelana? Ma keaha e pakele ai i ka make? Ma ke komo ana iloko o Iesu. A komo ole pehea? Ke anuenue, he hoailona ia no keaha? Ua hookahuliia na olelo, mahea? heaha ke kumu? Owai ka ke Akua i koho ai i poo no ka poe manaoio? Pehea oukou e lilo ai poe mamo na Aberahama? Owai ka mamo nui a Aberahama e pomaikai ai kakou?
                Na kaikamahine--Ehia, a owai na kulanakauhale i pau i ke ahi? No keaha? Owai ka i hoopakeleia? Holo oukou i hea i pakele i ke ahi mau loa?
                Oukou a pau—Owai ke keiki i laweia e mohaiia? Ua mohaiia anei? Owai na mahoe a Isaaka laua me Rebeka? Owai ke keiki maikai a laua? Heaha ka hoohiki o Iakoba ma Betela? A hea oukou e hoohiki e lilo no Iesu? Owai ko oukou Betela?
                Mele--"Owai no Iesu." Alaula, Iulai, 1872. Pule.

UA IKE KOU MAKUAKANE I KA MEA E PONO NUI AI.

                Ae, pela io no, ina he makuakane maikai kou, e makau ana i ke Akua me ka malama pono i kana mau kauoha. Ina nae ua make kou makuakane, a he makuakane hewa a hoolalau paha, heaha ka pono? Owai ka makua i