Ke Aloha Aina, Volume III, Number 40, 2 October 1897 — Page 7

KE ALOHA AINA

PO AONO, OKATOBA 2 1897

 

HE  MOOLELO  HOONANEA

—:NO:—

 

ALANADELA.

 

KaWahine Hoopahaohao o ka Aahu Keokeo

 

—A  I  OLE—

Ka Loea Hookani Hapa o ke Kuluamoe.

 

I ka uhi ana mai o ka pouli aia no ua mau hololio la ke hoomau la i ke kuupau ana i ka hole o ko laua mau lio me ka hoomaha ole.

Hala ae la he mau hora o keia holo ana o laua, ua hoea aku la laua maluna o kekahi kiekiena, a oia no hoi ka wa i halawai mai ai me ko laua onohi maka na kukui e uiuiki mui ana ma kahi he hapalu a wale no mile ka mamao.

Ma keia wahi akahi no a kaohi mai o Rodika i ka holo o kona lio, a e like no hoi me ka paa ana mai o Rodika i kona lio pela no ka wahine me ka uhi maka eleele i kaohi pu mai ai i ka holo o kona lio.

A iloko no ho o ia manawa i lohe ia aku ai ko Kodika leo i ka puana ana ae i keia mau huaolelo me ka lio moakaka.

Ano, a kuu hoahele i ukali mai nei mahope o’u me ke kunununu ole, ua hoea mai la kaua i ka pahu hopu o ka kaua huakai, no ka mea, aia ilalo o kahi a kela mau kukui e uiuiki mai la kahi a kuu aikane lokoino e noho la, me ka manao kuhihewa ana paha ua make au, aka e hoonanaiia na lani, oiai, aole pela ko lakou makemake.

Alaila, pehea ka loihi o kahi ia koe a kaua e hole aku ai a hoea aku kaua i kahi a kela mau kukui e a mai la?  Wahi a ka wahine i ninau mai ai.

He hapalua mile wale no ka mamao i pane mai ai o Rodika.

He nani maoli no ka keia wahi, wahi a ka wahine i pane hou mai ai.

Ae, he mani ma na ano a pau, a pela no i komo ai ke aloha iloko o’u no keia wahi, no ka mea, i anei like no maua kahi i holoholo like ai, mai ko maua mau la opio mai a hiki i ko maua kanaka makua ana, a mai kaawale ole no paha ko maua noho ana ina aole keia wahine opio i komo like ai iloko o maua ka hoohihi.

I ka pau ana ae o kana kamailio ana, oia, no ka wa i umoki hou aku ai o Rodika i ka holo o kona lio no ka ihona o ua kiekiena la, a iloko wale no o ka hapalua hora, ua hoea aku la laua i ka puka pa o ua hale la, a ike aku la hoi laua i ka maaloalo mai o na kanaka a oia no hoi ko laua wa i kaohi like mai ai i ka holo o ko laua mau io.

Maanei e waiho ai kaua i ko kaua mau lio wahi a Rodika, a e hele wawae aku kaua ma keia wahi, no ka mea, aole o, u makemake e ike ia mai kaua e na poe kauwa o ka hale.

Ae, he manao maikai kena ou,wahi a ka wahine i panai mai ai.

Lele iho la mai luna iho o ko laua mau lio, e komo aku la iloko o ka pa mae ka nihi malie ana, ua lawe hou ae la no hoi o Rodika i ke palaka ana no ka laua huakai, a nolaila, ua hikiwawe loa ka laua hele ana imua.

Aole loa nae i mamao loa aku laua mai ka puka mai, a i ka wa a kekahi wahi makani kiu a pakolonahe mai ana, e lawe mai ana hoi i ke ala kupaoa like ole o na pua, ua lawe pu mai la oia i ka leo nahenahe o kekahi pila a Rodika i lohe mua ole ai i kona mau la e holoholo ana maloko o ia wahi, a uwe hone iho la hoi iloko o ko laua mau puka pepeiao.

A oia ka ua Rodika nei i huli ae ai a ninau aku la i kona hoa.  Ke lohe aku la anei oe i ka leo honehone o kekahi pila e kani maila.

Ae, wahi a kona hoahele i pane mai ai.

He mea haohao loa kou lohe ana i kekahi pila e kani ana maloko nei o keia pa, no ka mea, aole hookahi o maua i ike i ka hookani ana i kekahi o ia mau mea kani, a nolaila, ke ole au e kuhihewa he uhane lapu keia e lapunei ia kaua, oiai, aole au i lohe mau ke kani ana o kekahi mea kani i oi @ ka nani mamua o keia, a me he mea ia e huki okoa ana no ia’u no kahi a ka leo e pae mai nei.

Aole keia he uhane lapu e lohe nei aka, he leo no ia no kekahi pila hapa, a o ka mea nana e hookani mai la he lua ole kona akamai, wahi a ka wahine i panai hou mai aia.

Na keia leo hoene o ka pila i kono mai i ko laua mau kapuai e awiwi aku no kahi o kona leo e pa-e mariana, a ua lilo ae la hoi oia i alakai no na kamahele o ka po.

No kekahi mau minute wale no keia kuoe hele ana aku a laua, ua hoea aku la laua ma kahi e kokoke loa ana i ka leo o ka pila e kani ana, a malalo hoi o kekahi kumu Piku e hihiia ana e kekahi laau hihi i like me ke kowali i noho ai laua a hoolono aku la i ka hoene mai o na kaula uwea o ka pila.

Mamuli o ka pouli e aaki paa ana ia po, aole e hiki ia laua ke ike pono aku i ka mea nana e hookani ana i ka pila, aka, ua hiki no nae ia laua ke koho iho, he kino wahine ka mea nana e hookani ana.

Iloko o keia wa e kani ana o ka pila, aia o Rodika ke oni wale la no, me he mea la, e inikua ae ana oia, a no ka hiki ole iho iaia ke hoomanawanui, @ ku okoa ae la oia iluna, a me ka leo hoonauki, pane mai la oia i kona hoahele.

E kuu hoahele e hookuu mai ia’u e hele ae au e nana i ka mea nana e hookani mai la i kela pila, oiai, ua hoouluhua hua loa mai ia’u kona leo nahenahe e hoene mai nei, a ke ike aku au, e hoi hou mai ana no @ imua ou.

Ke hookuu aku nei au ia oe e hele, aka, he hopohopo nae ko’u, i ka noho hookahi ma keia wahi, wahi a kona hoahele i panai aku ai.

Mai hopohopo, aole he mea nana e hoopoino ke noho oe maanei, i hoomau mai ai o Rodika, oiai, aia aku la na poe kauwa a pau ke paina la i ko lakou aina ahiahi.

Ae, ina pela o hele, a mai hooloihi loa aku hoi, hoi ha oe.

I ka ae maikai ana mai o ka manao o ua Rodika nei, oia no kona wa i haalele aku ai i kona hoahele, a hookolo aku la ma kahi a ka leo o ka pila e hoohene mai ana.

Aole oia i auau kona nee ana imua aka, e like me ke ahi popoki e nihi malie ana no ke poi ana i ka lole, pela ua Rodika nei enihi hele nei, e nalo ana hoi ma o a maanei, o kahi ana e hele nei, mamuli o kona makemake ole e ike mai kekahi mea iaia.

He mau sekona wale no keia nee ana ona imua, aia hoi, ua hookapaliliia ae la kona puuwai i ka ike ana aku he wahine i-o no ka mea nana e hookani ana i ka pila, a o kona helehelena nae, aole i maopopo loa iaia, mamuli o ka pouli, a aia hoi ma ka lanai iluna o ka hale kahi a ua wahine nei e hookani nei i kana pila.

Mamuli o ka hooheleia ana ona i ka ike pono ana aku i kona helehelena, nolaila, ua pili ae la oia maluna o kekahi kumulaau oka.

Aole i pau.

 

NAHA   KE  KINO,  KA  HALE  O  KA  UHANE.

 

E oluolu mai oe i wahi kowa o kou kino lahilahi no ka Ekalesia o ka Hoomana Karisitiano Naauao, penei:

Ma ka Poalua nei, hora 4 p.m. Sept. 21, 1897.  Ma Koula, apana o Kona, Honolulu, Oahu.  Ua haalele mai la i keia ola ana o Mrs. Kaleipua Kanoa, i ke 57 o kona mau makahiki o keia ola ana, iloko o umi mahina o kona kaama’i ana, ua nui no na hooikaika ana i kahi o ke ola, ma na lapaau ana a pau, ua nele no a ua like ole ia mau manao ana a pau me ko ke Akua makemake.

Ua hanauia oia ma Kahaluu, Kona Akau, Hawaii, mai ka puhaka mai o Mr. a me Mrs. Kaluaihalawa, a malalia no oia i hanaiia ai a nui, a hiki i kona hoonaauaoia ana ma na kula apana, a malaila no i hoohuiia, ai ma ka berita o ka mare me ke alii kiaaina P. P. Kanoa, e ka makua Rev. Palika, ua hoi oia a noho loihi me kana aliikane ma Kauai, a holo mai i Honolulu nei i kahi manawa, a i na makahiki i kaa hope aenei ma Honolulu nei oia me kana aliikane P. P. Kanoa, oiai ka nawaliwali e hekau mai ana maluna ona a hiki i ka make ana o kana aliikane, ua noho iho o Kaleipua no elua makaniki wale no ke kaawale a make aku la me ke aloha nui ia.

He hoaloha oiaio oia no na mea a pau mai ke kiekie a i ka mea haahaa, mai ka mea waiwai a ka mea ilihune, a oia no hoi a me kana kane he mau hoahanau laua no ka Hoomana Naauao, a no ko laua pili aloha i keia hoomana, ua haawi mai laua he apana aina ma Koula, Honolulu, he wahi e ku ai ka luakini a me ka hale o ke kahu.  no ka manawa pau ole, a o laua no hoi na hoahanau koikoi o keia hoomana ma na mea a pau, aole o kela wale ae la no ka laua makane, aka, he mau kokua e ae no kekahi mawaho, i ikeia o ko laua mau hoahanau iloko o ka ekalesia nei.

Ma keia mau mea, aole e hiki i ka ekalesia ke poina i ka laua mau hana aloha a pau ia hanauna aku a ia hanauna aku.

Eia kekahi, mamua o kona make ana, ua lalau ae la oia he wahi Baibala Kauoha Hou, a kau iho la maluna o kona opu, a pule ae la i ke Akua me keia mau huaolelo:

“Ua hewa i’o au, e kala mai i kuu hewa, e hoola mai no oe ia’u, ina au e make ana i keia hora, e hookipa i kuu uhane ma ka lani, e pani iho i ka waha o ka lua po i pohole ole aku au ilalo.  Amene.”

Kaakaa ae la kona mau maka, a hoopuka mai la i keia mau huaolelo:

“Aloha oukou, ka ohana a pau loa,” a pili iho la kona maka a moe loa aku la i ka moe kau moe hooilo.  Ko iho la ia olelo a ka Baibala i olelo ai—O ka make ana o ka poe pono, me he mea la e hiamoe ana.

No keia mau mea ke komo pu aku nei ka Ekalesia o ka Hoomana Naauao me ka ohana o ka mea i make e auamo pu i na kaumaha a me na luuluu o keia ola ana, a na ke Akua e hoomama mai i ke kakou mau ehaeha a me na kaumaha ma ke kino a ma ka uhane, a ke pule nei makou i ka Makua Lani.  e hoomama loa ae i na kaumaha a pau o ka ohana o Mrs. Kaleipua, oia o Miss Hoomalu, Miss Kapualanilehua, Mr. Kaupiko, Mr. Kanehiwa, Mr. D. Spalding, a me kekahi ohana e ae i loaa ole ka inoa ia makou, o lakou no kekahi i komo pu iloko o keia mau manao hoalohaloha, a pela auanei e hoomauia ai ko kakou noho aloha ana me makou na lana a me na hoahanau o ka ekalesia nei, a pela ke Akua e kokua mai ai ia kakou.  Amene.

O makou no me ka haahaa na komite i hooholoia e ka aha luna o ka ekalesia Karisitiano, e waiho aku i ka lakou hoalohaloha i na nupepa Hawaii a pau, a imua o ke poo o ka ohana o ka mea make, o ia keia malalo iho nei:

Na Komite:  J. E. Kekipi; J. K. Makekau; S. K. Makekau;

Ke haawi aku nei na komite i ka mahalo i ka Lunahooponopono o KE ALOHA AINA,

 

                                                                   J. E. KEKIPI.

Lunahoomalu o ke komite

 

E  HOOLOHE   I  KEIA  LEO  POLOAI.

 

Ua kona ia mai makou e hoike aku imua o ko makou mau makamaka heluhelu, aole ma ka manao ikaika iloko o ka inaina, aole hoi hou ma ka @ ana aku i ko makou mau makamaka nana e lawe nei ke kino o ka kakou milimili, a wahaolelo hookahi hoi e alo nei i ke ehuehu o keia mau la kupilikii o ka aina i mau enemi, aka, mamuli no ia o ka nui o na pilikia e hookui mau nei me ka Makuahine Puuku o keia mau nupepa elua, oia hoi KE ALOHA AINA puka la a me puka pule pu.

A oiai hoi mamuli o kona lawelawe wahine ana, ua haawi mai oia i manawa no makou e hooikaika ai i ka huli ana, a me ka ohi ana hoi i ke ola o ka kakou mau wahaolelo elua, no ka uku ana i ka Papapa’i a me kona mau keiki oniu hua metala ahonui.

Aka, elike me ke ano mau, o ka hoopanee a me ka ulolohi o ka hookaa ia ana mai o ke ola o ua mau wahaolelo ala, a mamuli hoi o ke kanoha a ka Puuku o ka pepa, e paipai koke i na poe lawe pepa o KE ALOHA AINA paka la, e hookaa ia mai i  kela Poaono keia Poaono, me ka ae hou ole aku e hoale no kekahi pale hou aku, a ina he poe lawe mahina kekahi, e uku mua ia ka ulu mahina, mamua o ka loaa ana aku o ka pepa.

Nolaila, ke lawe mai  nei makou i keia, a hoike akea aku imua o na makamaka elike me ke kauoha i loaa mai ia makou, pela aku ana makou e hana ai ma keia hope aku.

No ka oiaio o keia, ke kakau nei makou i ko makou mau inoa pakahi,

 

Luna:

 

HENRY DOLE,

D. KAHALELUMI,

S. K. KAANAANA,

U.P. KAPOE,

 WM. S. KEAO,

 L. R. NALIMAAPA.

Honolulu , Sepatemaba 3, 1897

 

NUHOU   KULOKO.

 

He $1000 ka uku makana a ke aupuni e haawi ai i ka mea nana e hopu i ka lima koko ma Kauai.

Maluna mai o Kinau ka lono ua puoho ae la ka luahine Pele a hoa i kana ahi hookala kupua ma Kilauea.

Ua loaa mai ia makou ka lono o ka make ana o Mrs. Eliza Hakuaikawai Kalua, ma Kalaupapa, Molokai.

I keia pule ae e holo aku ai ka mokuahi Kalaudine no Kapalakiko, e pani ia ana kona makalua e Lehua.

O kekahi la maluhia loa ka la kohe balota o ke aupuni Repubalika, i ikeia ma Honolulu nei, no ka mea, aole hookahi lawehala i hopuia ma ia la.

Ma ke ahiahi Poakolu nei, Sept. 29, ma Kikihale ae nei, ua hoohuiia ma ka berita o ka mare o Mr. Kalauawa Kanepaiki ia Miss Anna Malie Apakahelu e Lunakahiko Aberahama Fernandez.

Ma ka po o ka Poaono nei, ua ulu a he hakaka mawaena o J. Kaui a me Kina, aka, ua pau wale nae mahope o ka hoea ana mai o na kokua, ma ka la Sabati nei, ua ulu hou a’e la ka hakaka mawaena @o o laua, a o ka hopena ua pepehiia iho la o Kaui a eha loa, ua hoihoi ia oia no ka haukapila, a o Kiha ua laweia mai oia no ka halewai, a ua hookouia mai ma ka bela 12 @.

Ua haawi paina ae ka Peresidena Nui o na wahine, Kuaihelani Campbell a me kona hoahele ma keia auwina la Poakolu hora 2 p.m. ma kona home noho ma alanui Ema, no ka paina pu ana me na kaikamahine aloha aina, i na waiwai i hoihoi pu ia mai nei e laua, e laa ka puaa, mea, i-a, limu, opihi, opae, a me na ope lei.  A o ia mau mea a pau na mea nana e hooluluu ana la papaaina hoomanao luhi ona kaikamahine ana ame ko ua mau kamahele aukai nei i huli hoi mai la i nehinei.

 

E  KIKIPU   ANA  NA  WAHINE.

 

Ua ike iho makou maloko o ka nupepa Avalataisa o keia kakahiaka Poaha, e hookaawale ia ana kahi e kiki maka ia nei me ka pu panapana, nona ka mamao he 50 i a mai kahi aku e ki ai a ka maka e ku ana, no na wahine, mamuli o ko lakou @oi ana e haawi ia aku i wahi e hoomaamaa kikipu ai lakou makai o Kakaako.

He pu raifela liilii ke haawi ia aku ana ia lakou, no ka hoike ana i ko lakou akamai kiki maka, a me he mea la, aole no e loihi na la, a ike ia aku no he pualikoa wahine e paikau hele ae ana ma na huina alanui.