Ke Aloha Aina, Volume IV, Number 1, 1 January 1898 — KO MAKOU RULA KUMU. [ARTICLE]

KO MAKOU RULA KUMU.

Oiai, ua hoea mai na kauoha nupepa i o maku nei, i hele a piha pono ko makou mau kuineki, e hoike mai ana i ko ka lehulehu hiaai nui, ma o ka uku mua ana mai i ke ola o ka kakou wahaolelo, e leki me ko makou mau rula mau. A o na kauoha nupepa mawaho ae o ka makou i hoike ai, oia hoi ka uku mua ia mai o ke ola o ka pepa, e hoomanao iho ae lakou, aole e hoouna ia aku ka pepa, no ka mea, ua hoakaka mua ia, aia wale no a uku ia mai, ua kuleana makou e hoouna aku i ka pepa, O ke kumu, he nui kekahi poe lawe , i hoomanao ole mai i ke ola o ka pepa, aka, e hoomanao iho no lakou, ke hoea ole aku ka pepa, alaila, aia no ma kona aoao ke kumu o ka nele ana, a malia paha, o ulu ae ka hoomanao iloko ona, a o lakou paha, o ke alahele wale no e loaa aku ai ka pepa, oia ka uku pololei ana mai i ke ola o ka kakou milimili. E hoomaopopo iho ko makou mau makamaka heluhelu, he hana nui ka imi ana i kahi e hiki ai ke uku ia aku na lilo no ke pai ana a me ka uku ana i ko makou mau limahana, a he hana nui no hoi ka hoopiha ana iho i na mea hou makamaka, i wahi e hauoli ai ka naau o ka poe nana e lawe ana i ka makou pepa, aka, o na kauoha e olelo mai ana, e hoouna mua aku ka pepa. a mahope hoouna mai ke dala, he mau kauoha hiki ole ia ia makou ke hooko aku, oiai, aole i paa makou malalo oia mau kauoha, nolaila, aole e hiki ke hoounaia aku na kauoha oia ano.

A i ole ai hoi e hiki ke hoopono wale ia ko makou luhi, o ka hana pono wale no ia a kaulike a makou e hana ai, oiai, ua lehulehu na manawa a ka poe lawe i hooko ole ai i ka lakou olelo, o ka hana hoopokole wale no, oia ka uku mua mai i ke ola o ka pepa, alaila, hoouna ia aku ka nupepa. E hoolohe pono ia nei rula a ke ole pela, he nele no ka hope. O na mea pili i ke ola o ka pepa, a me na kauoha nupepa, e kauoha pololei ae ma ka inoa o ka Puuku, aole i ka Llunahooponopono a me kona Hope, oiai, aia ka hanu ola o ka kakou wahaolelo ma kona mau lima palupalu oiai, he mau lima wahine, e hana

ana, e hooikaika ana, a e hookele wahine ana i keia hana nui no ka pono o kona Moiwahine, ka lahui a me ka aina, o na mea pili i na manao, na hoolaha a me na kanikau, o ka hana wale no ia a ka Lunahooponopono a me kona Hope. E pono e hoolohe i keia.