Ke Aloha Aina, Volume IV, Number 18, 30 April 1898 — Page 1

KE ALOHA AINA

BUKE IV.  HONOLULU, POAONO, APERILA 30, 1898.  HELU 18

 

KA NUPEPA KEALOHA AINA

E hoopuka mau ia aku ana mai ka

   Poakahi a ka Polima o na pule a

   pau o kela a me keia mahina

Ka Uku Pepa, he 20 keneta o ka

   pule.  No ke kope hookahi, he

   5 keneta.

E loaa no ka pepa mai ke Keena

   aku o KE ALOHA AINA, a mai

   ka lima aku o na Luna Lawe

   Pepa

E pai ia no na Olelo Hoolaha, na

   Kanikau a me na Mele Inoa, me 

   ke Dala kuike.  Aole nupepa ma

   ka owili pakahi e hoouna ia ke

   ole e hookaa mua ia ka uku pepa

E hoouna pololei mai i na Nuhou

   na Kumumanao, na Olelo Hoo-

   laha, na Kanikau a me na Mele

   Inoa i ka Lunahooponopono o

   keia Pepa.

Aole loa e hoopuka ia a hoolaha ia

   kekahi manao ma na kolamu o

   keia Pepa, malalo o kekahi inoa

   kapakapa ke ole e hooike mai i

   ka Lunahooponopono i kona

   inoa ponoi.

Ka Nupepa Puka Pule

 

Ke - Aloha - Aina

Hookahi makahiki. . . . $2.00

Eono mahina. . . . . . . .$1.00

Ekolu mahina. . . . . . . .   .50

Hookahi mahina. . . . . .   .20

EMMA A. NAWAHI.

 

Puuku o

Ke - Aloha - Aina

EDWARD L. LIKE.

Lunahooponopono a Hope Puuku

S. P. KANOA.

Hope Lunahooponopono

O na kauoha Nupepa me na hoo-

   kaa Dala, e hoona ponolei mai i

   ka Puuku ma Honolulu. 

 

KA HAKAKA LUA WELIWELI

     Skaguay, Mar. 28, 1898.  O na laina o na poe eli gula, e hele ana no kahi o na lua gula, ua hooweliweli ia lakou i keia kakahi aka, mamuli o ko lakou ike ana i kekahi hiohiona i ku i ka weliweli a lakou ike ole ai mamua.

     No hookahi hora paa o ka hakaka ana o kekahi mau kino kanaka elua maluna o kekahi pali nihinihi nona ke kiekie o 2000 mailale ae o kahi a ka wai e kahe ana, a maluna o kekahi ala ololii i oki ia ma ka aoao o ua pali la, nona ke akea aole e hiki i na kanaka elua ke hele, ua halawai ae la ua mau kanaka nei, a hakaka iho la me ka weliweli nui imua o na haneri e nana aku ana ia laua me ka menemene nui. 

     Ua puili aku kela a me keia ia laua me ka ikaika.  Iloko o keia aumeume ana, ua hoea aku la laua ma ke kae o ua pali la, a i keia wa i komo mai ai ke anu maeele iloko o na poe makaikai i ka hopena awahia o ka make e halawai ana me laua ke haule mai laua mai kahi a laua e hekaka ana, aka, aole nae he mea i aa no ka pii ana aku e hookaawale ae ia laua a ke hoomau la no hoi laua i ka hakaka ana. 

     Aole he leo i lohe ia iwaena o ke anaina e makaikai nei, a i ka hope loa, ua ikeia aku la kekahi o laua i ka hapai ana ae i ke kino o kekahi o laua, e hapaiia ae ana e kona hoa paio, aka, aole nae oia i hookuu ae i kana puliki ana, a i keia wa i hiki loa aku ai laua i ke kae o ua pali la, a i keia wa no i hiolo aku ai o kahi o ka lepo a laua e ku ana, a oia pu no hoi ko laua manawa i iho kualapoo aku ai no lalo o kahi a ka wai e kahe ana. 

     Ma kahi kokoke i kahi o keia mau kanaka i hakaka ai, ua loaa aku la ko laua mau opeope e waiho ana, aka, o ke kumu nae i ulu mai ai o keia hakaka ana, aole he mea i maopopo. 

     Skaguay, Mar. 29.  Ua loaa iho la he mau moali no na kanaka i haule ai mailuna mai o ka pali a make loa, i ko laua wa e hakaka ana, ma ka la inehinei.  Maloko o ke ope o kekahi o laua, ua loaa aku la he palapala na ke Kuhina Amerika e noho ana ma Rusia, e olelo ana, o ka mea nana e paa nei i keia leta, oia no ke Keikialii Ivan Oranhoff, ke keikikane hiapoo a Barona Oranhoff, ke Kiaaina o Alaska mamua o ka lilo ana i ke aupuni o Amerika Huipuia.  Ua hoomaopopoia e alakai ana oia i kekahi poe Rusia no ke kahua eligula o Yukon. 

     O kona kokoolua o Jonathan Prim.  O kona makuakane o Kapena Prim, i make ma ka 1867.  O kona makuahine he Ilikini, aka, o ke kumu nae i ulu mai ai o ko laua hakaka ana, aole he mea maopopo. 

     Ua hala aku la na Ilikini no ka huli ana i ke kino make o Jonathan Prime, no ke kanu ana e like hoi me ka mea i maa mau ia lakou.

 

Na Palapala.

     Aole e ili maluna o makou ke koikoi o na ahewa ana no keia mau manao i hoopuka ia malalo o keia poo, aka, e ili no ia maluna o ka poe na lakou i kakau mai. 

 

Hilo, Hawaii, April 18, 1898.

Ia E. Aima Nawahi, ka Peresidena a me na Hoa Komite a Luna Nui o ka Hui Aloha Aina o naWahine,

     Aloha oukou:

     Ma ka noho ana o ka halawai o na Hui Aloha Aina o Hilo nei i ke ahiahi Poaono, la 16 o keia malama no ke kuka a noonoo ana i kekahi mau kumuhana elua A o kekahi oia mau kumuhana i kuka ia e ka halawai, oia no ka mea e pili ana i kela mau dala i hiki aku la i Wasinetona no na Elele, a ua ninau ia mai ka lahui i ko lakou manao no ia mau dala. 

     Ua hooholo keia mau Hui elua i ka manao ma ia mea, a ua kauoha ia mai au e hoike aku imua o oukou i ka manao i hooholo ia no ia mea, a oia keia:

     1.  E lawe ae no oukou e noonoo in a paha he wahi aie ko na Elele i koe ma ko lakou alahele no ka hana a ka lahui, alaila, e uku aku a pau, ina hoi aole he mea oia ano, ua maikai iho la no.

     2.  E noonoo aku no oukou no ka Elele i koe ina paha he hemahema kona, na oukou no ia e noonoonoo pono, a kokua aku iaia, e like me ke kupono. 

     3.  A o ke koena in a e koe iho ana, e waiho malie no ma ko oukou mau lima, ma ke ano he waihona no ka lahui no ka poe aloha aina mai Hawaii a Kauai.  A malia, he wa e hiki mai ana, i pili i ka pono o ka lahui Hawaii aloha aina, alaila, he wa pono ia e hoohana ia ai no ia dala. 

     Me ka haahaa,

          M. A. KAIUAOLA.

     Kakauolelo o ka Ahahui Aloha Aina o na Wahine o Hilo Taona. 

 

NA ANOAI O KAHUA MAI.

MR. LUNAHOOPONOPONO,

     Aloha oe:

     Ma ke ku ana mai a ka mokuahi Mokolii ma ka Poakolu la 20 o Aperila nei, ua hii pu mai la oia ma kona oneki he ekolu haneri pa ʻ i ai no ke kahua ma ʻ i nei, he heluna pa ʻ i ai hoi i hiki ole e hoolawa i na ma ʻ i o ke kahua ma ʻ i nei, me ka manao ia paha, na na kanaka mahiai o Waikoeu, e hoolawa aku i ke koena i koe, eia nae, i ka nana ana iho, he neo ia i ka puu balaiana (blind), oia hoi, ua kii no kekahi poe i ko lakou helu (Ration) ma ka palaoa, laiki a me ka palena, ka mea hiki ole i ke kanaka Hawaii ke hoomau aku ma ka ai ana ia mau mea, oiai, o ka poi uouo kaohi puu ka ai i maa ia lakou elike me kahi hooheno. 

     A he onoono la, a he monimoni la,

     A ke manao nei kou mea kakau, e hiki ole ana paha ia Hon. W. L. Wilikoki & Co., ke hoolawa piha mai ma keia mua aku i ke pa ʻ i ai no ke kahua ma ʻ i nei, oiai, ke ike e ia nei no ke pakolekole i keia mau pule e nee nei. 

     Ma ka Poalima la 15 o Aperila nei, oiai o Henery Mahi e alualu aoa i ka bipi me kekahi mau paniolo ma ke kula o Kaupokiawa, a he paniolo bipi no hoi oia no ka Papa Ola, a iaia e hoomau ana i ke alualu ana, hina pu iho la oia me kona lio, a i ka holo ana aku o kekahi kanaka, nona ka inoa o Nailima, ua ike aku la oia ua hina pu o Henery Mahi me kona lio, i kona hiki ana aku malaila, ike iho la oia (Nailima) ua kukonukonu loa ka pilikia i loaa ia Mahi, oia hoi, ua pau ka ike, a ua pau ka lohe, a ua kaialupe ia mai oia a hiki i ka hale no kekahi mau mile, a ma ia ano ehaeha no oia i waiho ai, a mawaena o ka hora 8 a me 9 a.m. o ka la Sabati, Aperila 17, i lele loa ae ai o kona hanu hope loa, a hoi aku la ka lepo i ka lepo. 

     He kanaka opio oia, a he kokua ma ʻ i ho i, i hele mai mahope o kana mea aloha he wahine a me ke keiki, a he keiki kupa hoi oia no Napoopoo, S Kona, Hawaii.  Aloha no oia. 

     A ma ka Poakahi la 18 o Aperila nei, i malama ia ai kona hoolewa e na Hui Aloha, Naita a me Anela, A waiho iho la kona kino lepo ma keone o Papaloa.  Auwe!  Luuluu wale. 

     He mau la papaa la loa keia o ke kahua maʻi nei, a ua ike moakaka loa ia aku na kakai pali o na pali hauliuli o na Koolau.

     Ke hoomaemae hou ia nei na hale a pau ma ke kahua maʻi nei, a pela pu no hoi me na alanui hele, malalo o ka hooponopono ana a na Luna Nui hou, W. J. Feary a me J. K. Waiamau kona hope, he ku i ka nani a me ka maikai, he kulana hoi i ike ole ia mamua aku nei. 

     I keia mau la e n@e nei, aole no hoi he nui o na make iwaena o na maʻi. 

     Maanei ke hooki nei au i ka inu ana o kaʻu makasila i ka wai o ka inika, me ka manaolana no hoi e uwila hou aku ana. 

     Me oe e Mr. Lunahooponopono koʻu welina, a me kou mau keiki oniu hua metala koʻu adieu. 

     Me ka mahalo,

         WM. N. KUAANA.

     Puahi, Kalaupapa, Apr. 21, 1898.

 

UA LAWE IA MAI NO KA HOOPAA IA ANA.

     Ua lawe ia mai nei e ka Hope Makai Nui Omstead he 25 Iapana lawehala no ka hoopaa ia ana maanei.  Oiai, o ka hale paahao ma Kauai, aole i lawa no lakou.  He poe limahana Iapana hou loa keia i hoea mai nei mai Kauai mai.  Ua loaa aku keia poe i ka Hope Makai Nui Omstead a me kona mau makai e pepehi ana i ko lakou luna, a i pakele wale no i ka hoea koke ana aku o na makai in a na make oia. 

 

     He elua kalepa a ka Mokolii i keia pule e holo ai no Molokai, e haalele ana oia ianei keia ahiahi a hoea hou mai no ianei i ka po o ka la apopo, a e haalele hou iho no ia anei i ka Poakolu a hoea hou mai no i ka po Poaono