Ke Aloha Aina, Volume IV, Number 18, 30 April 1898 — Page 5
| This text was transcribed by: | Rosemary Mccune |
| This work is dedicated to: | Kaelene Puanani Ahu Rey |
KE ALOHA AINA, POAONO, APERILA 30, 1898
====================================================================
UA KUPONO IA HOOPAI NO KE PUKIKI
-
Ua hoopai ia o Camachero, ke Pukiki i hoao ai e lapaau i ka lima o ke keiki e waiho nei maloko o ka Haukipila, he $150, na ae maoli aku no oia i kona hewa, a ua noi aku no oia i kona hewa, a ua noi aku la oia no kia haawi ana mai i kona hoopii. O keia Pukiki ka mea i kupono loa e hoopai ia, no ka mea,
ma ka lawelawe ana i ke keiki poino, ua ike ia na ni aku na poino i loaa i ke keiki. Aka, aole nae pela ke kanaka Hawaii i hoopai ia iho la he $150 no ka lapaau me ka laikini ole aole he wahi hoike ma aoao o ke aupuni e hoike mai ana ua hoopoino ia he ola ma ka@a lapaau ana, nolaila; pehea la i hookau ole mai ai i ka hoopai kaulike no kana hewa i hana ai, ino io hoi ua hana hewa oia ma ka hoola ana i na ma'i o kona lahui ponoi. Ua lohe nai makou o Charles Creighton aku ia kona loio ma ke kau kiure, aole o Molale.
---o---
UA KOMO AIHUE IA AE.
-
Mawaena o ka po Poakolu a me ka wanaao Poaha nei, ua komo aihue ia ae ke keena o ka halekuai o T. H. Davies & Co., a ua lilo aku he mau dala uuku mai mai kekahi ume aku, nona ka waiwai io o $3.00. Aole he maopopo o ka mea nana i aihue, a me kona wahi i komo mai ai. A ua manao wale ia aku ia ma ka puka ma ke alanui Kaahumanu aku nei. Eia maloko o ka poholima o David Kaapa keia hihia e lawelawe ia nei, a ke hana ia nei hoi ka mea o ke kolohe.
---o---
KA MOKUAHI GAELIC.
-
Ma ke aumoe o ka Poaha, he 10 la mai Iokohama mai, mamuli o ka makemake ole o ke kapena e komo mai i ka po, nolaila, ua no-ku oia iwaho, a i ke kaiahiaka Poalima i kapalulu mai ai oia i ke awa.
Ua lawe nai nei ka mokuahi Gaelic he 578 Iapana a me 23 Pake, no keia awa.
Mahope koke iho o ko Gaelic haalele ana ia Amoy, Kina, ua lawe ae la o Parker i kona ola me kekahi pu panapana, he limahana oia no luna o ke Gaelic.
---
[pointing finger] O na poe a pau i makemake ia Jos. Kalana, a i ole i kona Kaapio, e hookani ae i ke Telepona, Helu 319.
[pointing finger] O na poe a pau e makemake ana ia Kanamu, e hookani ae i ke telepona helu 84, a i ole, i kona kaa pio helu 143, e loaa no au ia oukou mai ke ahiahi a hiki i ke ao ana, mai ka hora 5 a hiki i ka hora 7 o kakahiaka nui.
============
HE MA'I AHULAU.
-
Aia ke pahoia nei kekahi mai i like me ka kolera iwaena o na opio i keia mau la, a ua nui hoi na haumana, o na kula aupuni i hiki ole aku i ke kula. O keia ma'i i hoea ae iwaena o na keiki liilii he ikaika loa, he nahu ka opu a me ka luai.
Ma ka hoike a na kumukuia a me na makiai kula, ua kokoke loa na kula, e pau loaa na haumana i keia ano ma'i.
Ua manao ia i kinohi he mnai keia i loaa mai mamuli o ka inu ana o na opio i ka wai ino o kela mau pule ua aku la, aka, i ka wa i pahola ae ai iwaene o na lahui like ole, na hoopohihihi ia iho laka ike o na kauka.
Nolaila, e na makua e malama pono i ka oukou mau opuu momi i keia mau la a ka mai e pahola neio iwaena o kakou, o kikoo mai auanei ka lima menemene ole o ka make a lawe aku i kakou mau mea aloha.
---o---
HOPUIA NO KA HO PAHI.
-
I ke ahiahi Sabati nei, ua lawe ia mai no ka halewai he pake nona ka inoa o Ah On, no ka hou ana i kekahi pake okoa aku a moku lihi i ka pahi. He lehulehu wale na manawa o keia pake i hoopaa ia ai ma Kawa, no ka aihue, ohumu a no ka hoeha ana i kekahi kanaka, ma ka uhauia ana i kona lima me ke koi. O keia kanaka, ua ona ia oia i kona wa i hoea aku ai i kahi o Ah On, a hiamoe iho la, ua hoala aku ua o Ah On i ke kanaka ona, a i kona ala koke ole ana mai, ua uhau aku oia i kona mau manamanalima i ke koi, a mahope mai, ua oki ia kekahi mau manamana o ko lima.
---o---
HE WAHINE OHANA NUI.
-
O Mrs. Sallie Shiver, e noho nei ma ka aoao hikina o keia apana aina, wahi a ka mea kakau o ka St. Louis Globe Democrat, e noho ana ma Albany, Ga., he 235 keiki, na moopuna a me na moopuna kualua e ole nei. Ina e hoohui ia me na poe oloko o kona ohana he 75, ehiki aku ana no ka huina i ka 310. O kana hana i keia wa oia no ke kipa ana aku i kona ohana he hookahi manawa iloko o kela a me keia alua makahiki.
Eia o Mrs. Shiver i ke 90 o kona mau makahiki, aka, he oia mau no nae kona ikaika. He 7 ka nui ona keiki i hanau ia me kana kane, Manning Shiver, i make ma ka 1865 i ke 60 o kona mau makahiki, a mailoko mai o keia huina i kupu mai ai o keia ohana nui hewahewa. O ka nui o na makahiki o kana hiapo he 70, a o ke mea opio loa he 43. Iloko o elua makahiki e puni ai iaia kona ohana i ka ikeia me ka noho pokole ana me kela a me keia ohana. O kona hiki ana aku i kela a me keia ohana, ua lilo ia he mea nui ia lakou.
============
KA BUKE MOOLELO HAWAII
IHAKUIA E KA
Moiwahine Liliuokalani, ma Wasinetona.
-
Pai a hoopuka iae Li a me Shepord o Bosetona, Amerika Huipuia.
-
(Unuhia no ka pomaikai o na poe heluhelu o KE ALOHA AINA)
-
MOKUNA IV.
KO'U MARE ANA.
Ua hoopalau au me Mr. Dominis no eha makahiki, a o ka'u mea hooolo ai e mare ia maua ma ka laelua o Sepatemaba, 1862. Aka, mamuli o ke kumu, aia ke aloalii iloko o ke kaumaha a me ke kumakena, nolaila, ua hoopanee ia ko maua mare ana a hiki i ka la umikumamaono oia mahina, e like me ke noi a ka Moi Kamehameha IV, na Rev. Kauka Damon, makuakane o Mr. S. M. Damon, ke alakai maloko o ka banako iloko o na mokupuni i keia wa, i hoohui ae ia maua. Ma kahi noho o Mr. a me Mrs. Bishop i malama ia ai ko maua mare ana. ka hale hoi a ko'u makuakane i kukulu ai, Paki, a i ikeia i keia wa ka hotele Alinetona, a aia no hoi oia ke ku la i ke kikowaena o ke kulanakauhale me ka nani nui. Malaila i hoea mai ai na alii, na poe o na lahui o na aina e a me na poe kuonoono a pau o ke kulanakauhale.
Ua hoihoi aku ka'u kane mare ia'u ia wa no, no kahi i ike ia o Wasinetona Hale, i kukulu ia e kona makuakane, a oia no hoi ko'u hale e noho nei. He hale nui keia i pena keokeo ia, me na pou nunui, he oluolu kona noho ana, a ua kaawale loa mai ke alanui mai no ke pale ana aku i na lepo puehu a me na halulu. O kona mau paia e hooma uia ana e na kumulaau, a o kona malapua hoi ua hoopihaia ia me na pua nani o kela a me keia ano, i ike nui ole ia noi ma ia mau mokupuni mawaena o na hale o na alii o ke kulanakauhale. Ma o mai o kona mau puka e ku ana he hale nui, i ike ia, o ka luakini Central Union Church, a he hapanui hoi o na hanauna a me kekahi poe e ae.
O kapena Dominis, ke makuakane o ka'u kane mare, he uuku loa kona manawa i hoohala ai ma kona home i hoolala ai. Ua haalele iho oia i keia awa ma ka 1846, i ka wa o ka hale e kokoke loa ae ana e paa, a o ka moku ana e noho kapena ana aole he wahi mea i lohe hou ia nona O kana wahine kane make ua upu oia me ka manaolana a me ka pule ana e ike hou ana oia i kana kane mare, aka, aole nae he wahi i no i lohe ia mai nona, ua hoomaopopo ae la oia ua komo pu aku la oia me kekahi mau wahine a na luina e kumakena ana, no ka lakou mau mea aloha i nalowale aku. No keia kumu ua huli ae la kona aloha no kana keiki, aole no paha he kanaka e ae i like ka punahele i kona makuahine me Kenerala Dominis. Oia wale no ke keiki i koe, oiai nae he mau kaikamahine mamua, aka, i kona manawa e opiopio loa ana no, ua make aku ia laua ma Amerika Huipule, malaila hoi laua i haalele ia aku ai no ka imi naauao ana. O Mrs. Dominis, ua hanau la oia ma Bosetona.
He oluolu ka'u kane mare ia'u, aka, aole loa nae oia e lawelawe i kekahi mea e hoehaeha aku ana i ka manao o kona makuahine. Ua ike maopopo aku no hoi au i ka pili paa o ke aloha mawaena o ka makuahine a me ke keiki, a ua kokua aku hoi au i ka'u kane ma ka hooluolu ana aku i kona makuahine. Mahope
mai ona la hope o kona ola ana, ua lawe aku au iaia i makuahine no'u.
Mahope koke iho no o ko maua mare ana, ua kono mai la ke keiki alii Lota i ka'u kane a me a'u pu a me Mr. a me Mrs. Robert Davis i mare ia wa hookahi no, no ka holo pu ana aku me ia i Hawaii, ka mokupuni loa hoi iloko o ka Paemoku. Ua ae aku maua, a o ko'u huakai kaahele keia mahope o ko maua mare ana. O ko ke keikialii Lota pii ana ae i ke kalaunu ua kokoke loa ia, ma ke ano o Kamehameha V. Ua hoouna pu ia aku hoi ke kono ia Mr. a me Mrs. John Sumner Mr. Haalelea, he hoa e like me ka'u kane, he ukali pilikino hoi no ka moi, a me kekahi poe hoaloha kakaikahi. He huakai keia i piha me ka hauoli no kekahi mau pule.
Oiai, aole hotele ma na mokupuni a o na huaolelo e puka aku ana i ke alii a me kona mau hoa, aole lakou e nele i kahi e noho ai. Ua kamailio mau ae a u ia mau la, he nui loa na wahi no ke Keikialii a i ole no na kanaka. Ua hoonoho ia aku e ke alii he luna nana, no ka nana ana i na makemake o na kanaka, a o ka lakou hana e hoihoi mai ai oia no ka hoopiha ana i na pakaukau me na mea ai. Nolaila, o na aina o na Alii Kiekie e noho ana ma Honolulu ua kukulu ia he mau hale no lakou, no ko lakou wa e kipa aku ai e ike i ko lakou mau kanaka.
O ke Keikialii Lota he nui kona mau aina a me na hale ma Hawaii a me kekahi mau wahi e ae, a ilaila makou i hele aku ai. Ua hookipa aloha aku kona mau kanaka ia makou, me ka nana ole pehea la ka loihi o ko makou noho ana, a o la manao oluolu a i ole aloha o na kanaka Hawaii aole loa ia e nalowale mai ia lakou aku: Pela na alii a pau o na ohana alii kahiko, e like me Mrs. Bishop, ma kona mau aina a pau, ua loaa iaia he hou e, aole no hoi ia i pau loa i keia wa i hoolilo.
(E nana ma ka aoao eono.)
============
Nuhou Kuloko.
-
E hoea mai ana maluna o ka Mariposa he $1,500,000 ma ke gula, no Kapalakiko.
Ua hoihoi ia aku o Ernest Marks no ka hoopaa ia ana ma Keoneula e eono mahina no ka haalele kula.
O ka Honolulu a me ka Regima na na hui kinipopo e paani ana mawaho o Makiki i keia auina la Poaono iho.
Ua maule iho o Elsie Adair maloko o ka Hale Mele Hou i ka po Poaono nei imua o ke anaina makaikai.
I ke kakahiaka Poakahi nei i hoea mai ai o ka mokuahi Iapana Mogul mai Iokohama mai me na limahana Iapana no keia awa.
He 511 kane, 128 wahine a me 4 keiki, oia ka huina nui o na limahana Iapana a ka mokuahi Mogul i lawe mai nei.
Ua make mai nei ma Halawa, Molokai, o W. B.Oopa, he hoahanau no A. P. Paehaole i ke 40 o kona mau makahiki.
Ua hoopaiia o Chock Pau, he elua makahiki hoopaahao ma Kawa no ka aihue ana i kekahi mau upena a kekahi Iapana.
O ka piha ana iho la ia o ka ewa@u o na manawa o Chock Pau i hoopaa i ma Kawa, i kona wa i hoopai ia ai no ka ainue upena.
Maluna o ka mokuahi Gaeilc i loaa mai ai o ka lona, aia he 30 mokukana o Beritania ke kiai la i kona mau pono ma Foochow.
Maluna mai ne o ka Maui i loaa mai ai kekahi lono, ua pau i ka hamu ia he 30 eka ko o ka Hui Mahiko o Wailuku, aole nae he maopopo ke kumu o ke ahi i hoea mai ai.
E haalele iho ana o E. C. Winston ma ke Zealandia o ka la 17 o Mei ae nei, no ke kuai ana i kekahi mekini holoi lole no ke kakulu ana ma Iwilei.
Ma ka hookuku kinipopo i malama ia mawaena o ka Regimana a me ka Unions, ua lilo i ka Regimana ka lanakila, mamuli o ka loaa ana iaia he 18 puni, a o kona hoa he 5 wale no.
Ua hoomanao ia mai makou e Mr. a me Mrs. G. W. Smith me kekahi o ko laua mea-ono mare, a oia ka makou e kalokalo ae nei, e hahai ia ko olua mau la me na pomaikai he nui wale o keia ola ana.
Ke hoike ia aku nei ka lohe i ua mea a pau, ua hoemi iho la makou i na papale i-e ona kamalii mai ka 15 keneta a pii aku o ka mea hookahi, ma ka Halekuai Papale nui o Iwakami.
Ma ke ku ana mai nei a ka mokuahi Gealic i lohe ia mai ai, na pau loa na wahi poino o ka mokuahi Coptic i ka hooponopono no ia, a ua makaukau oia i ka hoomau hou ana mai i ka holo ana mai ma kona mau awa.