Ke Aloha Aina, Volume IV, Number 46, 12 November 1898 — Page 5

KE ALOHA AINA, POAONO, NOVEMABA 12, 1898.

 

kekahi mau poe Hawaii koikoi o ka aina, i keia la me ka malama ana me ka eehia o ka naau, e nonoi ana i ka lokomaikai o na lani, e malama mai ia la nui a kamahao, a ke poina ole nei makou i ka inoa oia poe, a me ko lakou makee io i ke kuokoa o ko lakou aina, a oiai hoi, ua moe ko lakou mau kino i ka lepo, aka, o ka lakou mau hana nae, no ko lakou aina aloha, ke paa nei ia iloko o ka umauma o na ohana Hawaii a hiki i keia la, me ka poina ole a hoohewahewa ole ia, a eia no ke ola mau nei ko iakou mau inoa ma keia ao, me he mea la, o ko lakou mau kino ponoi no.

      Iwaena o na inoa o keia poe, aole i poina ia na inoa o na Mea Hanohano Jno. M. Kapena, Simon Kaai, Jos. Nawahi, G. W. Pilipo, D. W. Pua, a me kekahi poe e aku he lehulehu wale, a ke kokolo mai nei ke a a o ka lakou ole-loao, e hiipoi, e mailani, i ka la i loaa ai ia kakou o ke kuokoa no ko kakou aina, ka mea hoi a ka Moi Kauikeaouli Kamehameha III., i makia ai i kona kahua hana me ka mana a me ka oiaio me keia mau huaolelo. Ua mau ke Ea o ka aina i ka pono.

      Ua paa kela olelo kumu, i pohaku kihi no na la o ko kakou mau Alii Aimoku, a hiki i ka wa i hookahuli ia ai o ko kakou aupuni, ua holo ae la ka mana o ke ia makia aupuni, iloko o ka hapanui o ka lahui aloha aina, a nele loa iho la ka opuu aupuni i ulu ae mahope iho o ke aupuni kumu, i ke kuleana hiehie o ka malama ana ia la, oiai, ua hoi mai la no ia pono iloko o ka lima o ka poe no lakou ia kuleana.

      Aka, aole no nae lakou i nele i ka malama hoopalaimaka ana ia la, e hauoli pu ana nae ka lahui me ke ano hoonalonalo, aka, aole nae ia he mea na kakou e nana aku ai no lakou, a pehea ana la lakou i keia makahiki, e poina ana paha ko lakou hoomanao ana ia la, a e nele ana paha lakou i ka hoike aku imua o ka lahui, he la kulaia aupuni ia a puni ka Paeaina, mamuli o ka olelo hooholo hui a Newland, a i hookoia hoi ma na mokupuni o Hawaii ma ka la 12 o Augate.

      Aohe a kakou nana ana maluna oia mea, o ka lakou alahele no ia i makemake ai ia kakou e apuka mahope o ka lakou mau alakai ana? Aole. Ua ku no kakou me ka manao paa e hana no kakou iho a hiki i ka hopena loa o ka Ninau o Hawaii. Nolaila, o ka hookokoke ana mai o ka la kuo-koa o ko kakou aina imua o ko kakou alo, aole ia he mea na kakou e hoonele ai i ka hookipa ana mai me ka hauoli, a o ka makou ia e puana ae nei, e malama mau loa ia ke kuokoa o Hawaii no ka wa pau ole.

 

O KA PONO HOI PAHA IA.

 

      Eia ke liuliu ia mai nei e Kuhina Kupa, ka wahine a ka Peresidena Sanford B. Dole a me Mrs. J. B. Atherton, hookipa hiwahiwa ana ia Miss Anna Rose, ka moi-wahine opio o Topeka, Kansas, mamua o kona huli hoi ana aku no ka Ua Kanilehua o Hilo. O keia ke kaikamahine puukani o ka mokupuni o Hawaii, i lilo ai ka hanohono o ka lei a me ka aahu ana i na hoohiwahiwa o na ano like ole, mai ke gula, na pohaku makamae, ke daimana, a pela aku, ka mea hoi nana i hoohaule i ka upu ana a kekahi poe e ae, e loaa ana ia lakou ia kulana.

      Eia oia ke minamina nei no ia mea, no ka mea, he mea maopopo ole, aole loa paha e halawai hou aku ana oia me na ulia laki oia ano i loaa aku nei iaia, aka, e haaheo loa nae ka lahui Hawaii ma ona la, no ka mea, ua mae wale na olelo a ka poe wahaa i holo aku nei i na aina e, e olelo ai he lahui pegana loa ka lahui Hawaii aka, aia nae la, ke oni mau la o Hawaii i ka maka o ka lahui Amerika, he poe naauao loa kakou, a he kilakila hoi ma ke kahiko ana i na aahu.

      Ke haawi pu aku nei i na mahalo ana i ka ulu ana ae la o ka manao o kekahi mau wahine koikoi o ka aina, e haawi i anaina ike no ua moiwahine la o Topeka, mamua ae hoi o kona hoi ana aku i kona home oiwi, a oia ano hana, ua pili no ia ma ke ano manawalea, a e mahalo ia aku hoi ko lakou hana ana pela, no ka mea, ua hiki no ia lakou ke hana pela, ma ke ano, he poe Luna Aupuni lakou no ka aina nei, ma o ka lakou mau kane la, a he poe kulana koikoi hoi iloko nei o ka aina, nolaila, i kupono loa ai ia ke haawi i mau anaina ike no ka moiwahine o kekahi poe Amerika o lakou iloko o na la pokole. O ka makou ia e puana ae nei, o Hawaii no ka oi.

 

UA PAU I KE AHI.

 

      Ma ka auina la o ka Poakahi nei ua pau iho la ka hale noho o Arthur Mericourt, e ku nei mauka o Kalihi i ke ahi, mamuli o ke pahu ana o kekahi kapuahi aila. Ua hoea aku na kaawai malaila no ka hoao ana e hoopio i ke ahi, aka ua hala loa nae ka wa pono, a ua hamuia iho la e ke ahi ka hale a me na waiwai a pau oloko. Ua laki no nae i ke panihakahaka ia ana o ka hale a me na waiwai oloko, mamua o ka pau ana iho la i ke ahi.

 

      He elua mau Lutanela o na koa Amerika e waiho mai ne maluna o kahi moe no ka mai.

 

KA LA 16 O NOVEMABA.

 

      O ka Poakolu o keia pule ae e hoea mai ana, oia ka la 16, oia hoi ka la hanau o Kalani Kauli-luaikeanuowaialeale Kalakaua I., ka Moi Imipomaikai o na Auna Kolea o Kahiki, e nonoho mai nei i keia la iluna o ka pane poo o ka hanohano ka poe nana oia i hoopoina lou aku ma na ano a pau, me ka hoomanao ole no kana mau hana maikai ia lakou i na la o Kona hoolohe ana i ka lakou mau ao ana no ko lakou nei mau pakeke.

      Ua lawe ae ka Moiwahine Kanemake Kapiolani, a me ka laua mau Keikialii David Kawananakoa a me Cupid Kalanianaole ia la, i la heihei no na moku liilii iloko o ke awa o Honolulu nei, a ua lilo hoi ia la, i la hauoli no na poe Hawaii a pau i maamaa iki ma ka hana moku liilii ana, me ka uku ia mai hoi o na uku makana i ka poe e loaa ana ia lakou na eo ana ma na heihei.

      He mea hoohauoli io no keia no ko Hawaii ponoi, no ka mea, he la kupono loa no ia nou e Hawaii ma ke ano ai kupono ai, aole hoi ma na palena mawaho aku o ka mea kupono, oiai he mea hoopilikia ia i ka noho ana, a ke ikemaka nei no hoi kakou i keia mau ia e nee nei o ka aina, ka wa hoi a kakou e kapa nei, he wa wi a loaa i na poino. Ua hala na wa o ka pomaikai mamua, a eia kakou ke hakoko nei me na pilikia a me na poino.

      Aole ka makou he mau olelo e hoino aku ana ia oukou, aka, he mau olelo e hoonaauao ana i ko kakou noho ana, oiai makou e ike mau ana i kekahi poe, e hoopunahele ana i ka lealea iloko o ko lakou mau manao, a o ka uwe o ka lakou mau keiki liilii a me na makuahine o lakou, aole ia i maliu ia aku e ko lakou mau makuakane lokoino, a puni lealea. Nolaila, e akahele ma ka lealea ana, o kou pono ia a me kou ohana.

 

HALAWAI ME KA ULIA POINO.

 

      He ekolu kanaka o ka hale hana hao o Ulakoheo i halawai ae me kekahi ulia poino, ma ka auina la Sabati nei. I ko lakou wa e hookuikui ana i na apana hao o kekahi mekini makai iho o ka hale hana hao, mamuli o ka haule ana o ka lakou wahi e ku ana nona ke kiekie o 15 kapuai.

      Ua haule aku lakou iluna o na pauku hao e waiho mokaki ana iluna o ka lepo. He elua o na kanaka i kukonukonu loa na palapu, a ua lawe ia aku hoi laua no ka hauki-pila, oia o William Kau a me Keahinui, a o Pehu ka ekolu o na kanaka i hoeha ia, aole i kukonukonu loa no palapu i loaa iaia, ua hoihoi ana aku oia no kona hale.

 

POINO KA MOKU COLUMBIA.

 

      Maluna mai nei o ka mokupea C. D. Bryant mai Hilo mai nei, i loa mai ai ka lono no ka hoea ana aku la o ka mokuahi City of Columbia iloko o ke kulana po ino, e hiki hou ole ai iaia ke holo hou ma ka moana, i Hilo ma ke kakahiaka nui o ka Poakolu nei.

      Ua haalele iho ke Columbia ia Honolulu nei, ma keia ahiahi Poaono aku nei, i ka wa o ka moku i kuawale aku ai mawaho o Daimana Hila, ua halawai iho ia oia me kekahi makani ikaika a me ka ino o ka moana, a ma ia wa i pahu ai kekahi paipu mahu, ua hana kokeia keia wahi poino hoomau aku la i ka holo ana. Oiai, no nae ka ino e hoomau ana, na ikeia iho la ke komo nui ana mai o ke kai, ua hoomaka kokeia ka pauma ana, aka, aole nae i pau ke komo ana mai o ke kai, a i keia manawa no a ka ino e hoomau nei, ua poino hou iho la kekahi o kona paipu mahu, a i ka hoomaopopoia ana aole e hiki ia lakou ke hoomau aku i ka holo ana imua, ua ikeia iho la o Hilo ke awa kokokeia lakou, he 400 wale no mile, nolaila, ua hoohuli ae la ka ihu o ka moku a holo hou mai la no Hilo.

      Ua hoomaopopoia aole he poe e ae aku ana no ka holoa hou ana maluna ona, a e koi ia aku ana he hui pani hakahaka no ka uku ana poho o keia ulia poino. Ua pani hakaka ia ka moku no $80,000.

 

KA WAHINE ILOKO O KA AAHU KOA.

 

      Maluna mai nei o ka moku lawe-koa Indiana i kipa mai la ianei me na koa Amerika no Manila, he wahine mahuka kekahi iloko o ka huikau o na koa. Ua hoaahu ia oia me ka lole a me ka papale o na koa Amerika, a ua oki ia hoi kona lau-oho elike loa me ko na kane ka pokopoko. He ekolu la o kona noho pu ana iwaena o na koa, mahope o ko lakou haalele ana aku ia Kapalakiko, ua ikeia iho la kona ano he wahine, a aole hoi he kane elike me ke kuhihewa ia, ua hopu koke ia oia me ka hoonoho ia ana he mau kiai nona a hiki i ka hoea ana mai la i ke kulanakauhale nei, ua haawi ia mai oia iloko o ka oihana makai, aka, ua hookuu ia mai no nae.

      O ka inoa o keia wahine haole o Sadie White, a ua olelo ae oia, he ipo kana aia maluna o ka mokukaua Beritonia, a pela oia i hoao ai e manuka mai i Hawaii nei iloko o ka a hu koa no ka noho ana ma Honolulu nei. Aole oia e hoopilikia ia aka nae ana e na kanawai o ka aina. O ke koa nae i kokua ai iaia ma ka hoomahuka ana maluna o ka mokuahi Indiana, ua hoopaii, oia he $10.

 

KA PANE KUE A NA WAHINE O KA AHAHUI ALOHA AINA LALA O KALAPANA, PUNA, HAWAII, I KA MEMORIALA A KA AHA KUWAENA MA HONOLULU.

 

      Oiai, akahi no a malama ia ko makou halawai aloha aina, nolaila, ua ulolohi loa ka makou pane kue ia lakou.

      Nolaila, a oluolu oe e KE ALOHA AINA e hoike ae i ka makou mau kumu kue ia lakou penei:

      O makou o na lala o ka Ahahui Aloha Aina Lala o na Wahine o Kalapana, Puna, Hawaii, ma o ko makou Komite la i koho pono ia, ma ka halawai i malama ai i Oct. 30, 1898.

      Ma keia, ke hoike nei makou i ko makou mau manao kue, a me ka hilinai ole i ka memoriala a na wahine o ka Apa Kuwaena ma Honolulu i hana ai, no na kumu i hoike ia malalo iho nei:

      1.   Ko lakou hana a unuhi kaokoa ana i memoriala na lakou, e kue ana i ka memoriala a ka Aha Elele Lahui a na kane a puni ka Paeaina i hana ai, oiai nae o kekahi mau iaia no o ua Aha Kuwaena la o na Wahine kekahi i hana, kuka, a hooponopono pu i kela memoriala a ka Aha Elele o na kane i hana ai.

      2.   Ko lakou hoike hoopunipuni ana ae nei i ke akea, na ka Aha Elele Lahui o lakou a puni ka Paeaina i hana i keia memoriala a lakou i hana ai, oiai, aohe a lakou kuahaua Aha Elele i kahea ai, i hiki ai la hoi i kela a me keia ahahui lala ke koho i mau Elele no lakou, e hele ai e hana pu i memoriala no ko lakou mau ahahui ponoi.

      3.   Mamuli o keia mau hana kue a na Aha Kuwaena la o na Wahine ua lilo ia he hana e hoomokuahana ai i ka noho lokahi ana o ka lahui, malalo o ko kakou moto kaulana i keia wa, oia hoi ke aloha aina.

      Nolaila, me ka minamina nui i ko kakou noho lokahi ana, a me ke kahua onipaa a kakou e ku nei, i ka hoolilo wale ia i mea ole e na hana kue a kela Aha Kuwaena o na Wahine.

      Ke hoike nei makou i ko makou mau manao kue oiaio, a me ka hili-nai ole i ka Memoriala a lakou i hana ai, ma na ano a pau, a ma na kumu hoi i hoike ia ae la maluna.

      Me ka oiaio,

      O makou iho no o ke Komite

Mrs. Lucy Keola Pea,

Mrs. Mary Makua,

Mrs. Rebecca Kaiwi.

Kalapana, Puna, Hawaii, Nov. 2, 1898.

 

      Ma ka hora 4 o ka auina la Poakahi nei i haalele iho ai ka mokuahi Ohio i ke awa o Honolulu nei, a hala aku la no Manila, na haawi aku ka hana o na koe. Tenesi i na leo mele aloha no lakou a ua panai ia mai hoi me na leo huro.