Ke Aloha Aina, Volume IV, Number 50, 10 December 1898 — Page 6

KE ALOHA AINA

 

                                                                                                            POAONAO, DEKEMABA 10, 1898.

 

 

                                                                        HE MOOLELO WALOHIA

 

                                                                                                ALANADELA

 

                                                Ka Wahine Hoopahaohao o ka Aahu Keokeo.

 

 

                                                                        --A I OLE--

 

                                                            Ka Loea Hookani Pila Hapa o ke Kuiu Aumoe.

 

 

                        E ku hoa alo ehuehu, mai hookaumaha i kou noonoo, aka, e hilinai aku i ka mea kiekie, a nana no auanei e haawi mai ia kaua i na hoopakele ana mai keia kulana poino a kaua e ike nei.

 

            E hoomanao, aole o oe wale no kai ike i keia haawina ehaeha, aka, o kaua pu no ilaila.  Nolaila, e hoomama i kou mau manao kaumaha.

 

            Ae, e Alanadela aloha, wahi a Margarita i puana mai ai me ke kaumaha, e lawe no au i kau mau olelo hoolana a malama iloko o ko ʻ u puuwai, me ka hauoli nui.  A ina e paulele io ana kaua i ka Mana Lani e loaa no ia kaua ka maha.

 

            A i ke kuu ana iho o kona leo i piha me ka ehaeha, oia koke no ka manawa o na lio ahiu i piena ae ai a lilio ae la ko laua mau pepeiao, me he mea la, e hoike mai ana he halul ka laua e lohe ana.

 

            No kekahi mau sekona wale no ko laua hoolono ana, aia hoi, ua loheia aku ia ka leo o kekahi o Iaua i ka uhuhu ana ae me ka ikaika, a mamua o ka hiki ana ia Magarita ke haawi aku i kona aloha hope no Alanadela, aia oia ke laweia la e ka hokua o kona lio ahiu e kau ana he mau iwilei ka kaawale.

 

            Aole no nae i hoohakalia iho ka lio o ka kaua Alanadela malaila, aka, ua ukali koke aku Ia oia mahope o kona kokoolua e ahai la ka pupuhi, a iloko o kekahi mau minute pokole wale no, ua nalowale aku la laua noloko o ka ululaau e hihipea ana.

 

            He oiaio, aole i lohe hewa ka pepeiao o na lio ahiu.  no ka mea, i ka manawa no i nalowale aku ai o na lio ahiu no loko o ka ulu laau oia no ka wa i oili mai ai o kekahi mau holo lio elua mai kekahi aoao mai a na laau loloa e ulu ana, ua aahu ia laua me na lole uhai holoholona a ua hoolako pono ia hoi mena lako kaua.

 

            He hookahi o laua he kanaka aoo, a o ka lua he kanaka opio ui, i keia wa a na lio e kuupau nei ko laua mama holo aia hoi, ua ike ia aku la ke kaohi ana mai o ke kanaka aoo i ka holo o kona lio me ke kuhi ana aku o kona lima no lalo o ka honua.  A mamuli o ke ku ana o ke kanaka aoo, ua kaohi mai la ke kanaka opio i ka holo o kona lio.      

 

            hilinai ia, a iha pela na Hawaii a pau e hoohalike ai, alaila, he mea maopopo loa, e holo ana na hana oia ano iloko o na lima o na Hawaii a he hoool ana ahu hoi i ka ilihune a nele hana o kekahi poe Hawaii e noho mai iloko o ke kulanakauhale nei.

 

            He mau meheu makamaka hou keia no kekahi mau kapuai liilii, a me he mea la, aole laua i kaawale loa mai ia kaua aku nei.

 

            Ae, wahi a ke kanaka opio, a owai la na hololio no laua kela mau meheo, o ka mea anei kekahi a kuu puuwai i aloha ai?  A ʻ u hoi e huli pauaho ole nei i ke ao a me ka po.  E na lani e hoike mai ano, owai na mei nono keia mau meheu makamaka hou e waiho nei.

 

            Hala ae la he manawa o keia makahiki ana o na hololio i na moali kapuai wawae lio e wahio ana iluna o ka lepo, ua ike ia aku la ka puiwa ana ae o ka elemakule, a kuhi hou aku la hoi kona lio a akau no luna o kekahi wahi lau nahelehele me ka hooho ana ae me ka hikilele penei:

 

            E kuu hoaloha, he mau kulukoko ka ʻ u e ike nei, aia maluna o kela mau lau nahelehele.  E nana aku ua kuhihewa anei ka ike a ko ʻ u mau maka.

 

            Aole, wahi a ke kanaka opio i puana mai ai, aole i hewa ka ike a kou mau maka, aka, he mau aweawea koko makamaka hou loa no ia.  A no wai keia mau kulu koko o ka ehaeha a kaua e ike nei, ke ole au e koho hewa na kekahi limakoko no ia o keia ululaau.

 

            A ia manawa no i ike i aku ai, ua kanaka opio la i ka lalau ana iho i kana pahikaua e moe lolii ana iloko o ka wa-hi, a e kaiewa ana hoi ma kona aoao, unuhi ae la oia a me ka hoohakalia ole iho loheia aku la kona leo i ka hooho ana me ka leo nui.

           

            E kuu hoahele o keia mau ululaau mehameha, e naku hele nei no ka huli ana i ka ʻ u mea i aloha ai, e hookolo aku kaua mahope o keia mau mooa e waiho nei, no ka huli pono ana aku i na lio nona keia mau mooa, a ina he mau haku powa ko laua, aole loa iaua e pakele mai kuu pahikaua aku.

 

            Ae, pane mai ai ke kanaka hololio aoo, me ka unuhi ana ae i kana pahikaua a owiliwili ae la ma kona poo me ka hoomau hou ana mai.  O keia pahikaua pu kekahi e inu aku i na kulu koko o na limakoko, ina he mau kanaka powa io laua.

 

            Ua hala aku no Kawaihae ke Kama ʻ liiwahine Kaiulani, no ka hoohala ana i kekahi mau la ma ka home o Samuela Paka.

            Ma ke Kopatika i lohe ia mai nei ua manaoia e kolo ia mai ana ka mokukaua Camanche e ka mokukaua Iroquis no Honolulu nei.

 

                                                                        Nuhou Kuwaho.

 

            Maluna o ka mokuahi Moana i loaa mai ai ia makou na mea hou hope loa e pili ana no ka ino nui i pahola ae ma na kapakai o ka Atelanika, a no ka pomaikai o ko makou poe heluhelu, ke hoo puka aku nei makou me ka hoohakalia ole penei:

 

                                                            HE ULIA POINO WELIWELI.

 

                                                            KANAIWA KUMAMAIWA OLA I MAKE.

 

            Highland Light, Mass., Nov. 29.  O ka mokuahi Portland, o ka kaina mokuahi Bosetona a me Portland, us nalowale oia ma ka lae o Cod, me na ola a pau maluna ona.

 

            Ua lohe mua na kanaka hoopakele oia, i ke oeoe Loailona poino o kekahi mokuahi, ma ka hora Oo ke kakahiaka o nehinei, i ka wa a ka makaoi ino nui e pa ana me ka ikaika a ma ke aumoe oia po, ua loaa aku la he kino make e waiho ana ma ke kahakai.  Ma ke kino o ua kanaka la, e paa ana he mea hoolana i maka ia ka mokuahi Potalana o Potalana.  Maloko o kona pakeke na loaa aku he uwati gula i make ma ka hora 10.  He kanaka oia i aahu ia me ka lele eleele.

 

            He kino make no kekahi wahine me ka aahu ole ma kona kino kai pae ae ma ka muliwai Pamet; a nolaila, aole he hiki ke hoomaopopo ia o kona ano a me kona inoa.

 

            Ua manao wale ia ua poino ka mokuahi Potalana ma ka hora 10 o ka ponei, a ua lawe ia aku oia no luna o na puu pohaku o Hill, a malama i nahaha ai oia.  Ua pae aku no iuka o ka aina na pahu lole, paka, aila a pela aku.

 

            Nu Ioka, Nov. 29.  Ua loaa mai nei i ke keana o ka hui telegarapa Farani, he lono kuikawa mai Cape Cod, Masekuseta, e hoike mai ana, he 12 mau kino make o ka mokuahi Potalana i pae mai la iuka nei o ka aina.

 

            Provincetown, Mass, Nov. 29.  He elua mau kino make i pae ae ma ka Highland Light, i manaoia no luna o ka Potalana, i laweia mai no onei.  He hookahi no kekahi kane i lako pono me ka aahu, a he hookahi no kekahi wahine i nele me ka aahu, a he kamaa me na kakini ke paa ana ma kona mau wawae.

            Ua kapiliia ka Potalana ma Bath, Me, nona ke kaumaha he 1317 tona, he 230 kapuai loihi, 42 kauai laula a me 15 kapuai hohonu.  A ma kahi o $250,000 kona waiwaiio, ua paa no nae i ke pani hakahakaia.

 

 

                                                            HE MAU HANERI OLA I PONO.

 

            Boston, Nov. 30.  O na lono no ka poino ana o ka mokuahi Potalana me kona ohua me ua luina a pau, ua hiki aku la ka heluna o na poe make i ka 120, aka, he mau wahi e ae no kekahi o na kapakai o Nu Enelani i lohe ole ia, aka, ua manao ia no nae e hiki aku ana ka huina ma kahi o elua haneri.  O ka nui o na moku poino he 56 i okaoka liilii, aole nae i helu ia na waapa lana lawe ukana.

 

                                                            ULUAOA NA KOA NEGERO.

 

            Anniaton, Ala., Nov. 25.  Ua ulu ae he haunaele mawaena o na koa negero a @ue na poe ilikeokeo a hiki i ka hora 1 o keia kakahiaka.  He elua mau koa negero i make, elima poe ilikeokeo i hoeha ia, a he elua i kukonokonu loa, a he heluna nui o na negero i hoeha ia, ua hana ia aku nae e na hoaloha.

            Ua hiki ole i na koa kiai maluna o na lio ke hoomalu aku i keia haunaele.  He bataliona mai na regimana pakahi mai, i lako pono i ua mea kaua ke hoopuni la i kahi hoolulu o na koa negero, me ko kiai pu io-o ke kulanakauhale.

            O ka haunaele nui i ike ia ma ke alanui umikumamalua, kahi i lele aku ai he mau haneri koa negero maluna o na koa kiai, aole nae i hoolako ia na koa me na poka.  Ua wawahi ia aku ka hale koa Wood stock e na poe oia kulanakauhale, a ua laweia mai Ia he 2,000 puni poka a me 50 pu, a ua haawi ia aku i na koa ilikeokeo.

            Eia no ka haunaele ke hoomau ia nei.  a ua hophopo ia e ulu ae ana he haunaele mawaena o ka regimana paele a me na koa ilikeokeo.  Ua piha inaina like na aoao a elua, a ua manaoia e nui ana na poe make mamua o ka hoea ana mai o ke kakahiaka.  Ua hoea mai la i kahi hoolulu o na koa kiai he kino make no kekahi negero a me hookahi i hoehaia..

            Ua pau ae na hale inu rama i ka paa malalo o ke kauoha a Kenerala Frank, a o kela a me keia mea, ua lako me na mea make.  He 1000 ka nui o na koa e kiai nei, a eia na aliikoa ke hoao nei ma na ano a pau e hoihoi hou mai i ka maluhia.  AOLE I MAKEMAKE E HOLO NO MANILA.

            Kikako, Nov. 23.  He lono kuikawakai loaa mai nei i ka nupepa Tribune ma Wasipegona mai e olelo ana:  Ua loaa mai nei i ka Wiliki Nui Melville he hoike mai ka Papa Nana mai, mahope hoi o ka huli pono ia ana o ke kumu i poina ai o ka mekini o ka mokukaua Buffalo e hoouna ia ana i Manila ma 300 luina no ka hoopiha ana aku i kahi kaawale o na mokukaua o Adiniarala Diuwe.

            Ua loaa iho la, na kekahi poe mikanika maluna o ka moku i hoopoino aku i ka mekini, mamuli o ko Iakou makemake ole e hoouna ia aku no kekahi wahi loihi.  Aole i loaa na poe nana i hana i keia hana kolohe.   

 

                                                            LILO KA HOTELE ST. JAMES IA JAMES CAMPBELL.

 

            San Jose, Nov. 24.  I kela la i li@ lo ai a Hotele St., James ia James Campbell, ka ona millions o Hawaii.  E hoolilo aku ana oia ma kahi o $50,000 no ka hooponopono hou ana i ka Hotele no elima hale ke kiekie me ka hana pu ana i mau pale ahi.

 

                                                            ALOHA WALE IA HOA LUHI     

 

            O ka make, ua like ia me ka aihue i ka po, pela makou i poana ae la, no ke kipa ana ae o ka make ma ko Sam ʻ l Keliikuala home kiuo , ma kona home noho ina Kewalo ae nei; ma ka hora 4 o ke ahiahi Poakolu Dekemaba 7, 1898.  iloko o na hoomailo lo hi aaa a ak ma ʻ i maluna ona no eha mahina ka loihi.

            He nui na manawa a kona makua hanai i imi ai i kona ola iloko o ka poholima o na kauka, aka, ua hiki ole nae ia lakou ke hoopakele iaia.  He opio oia no 25 makahiki, 6 malama, a me 20 ia o Kipahulu i Maui kona one oiwi.  I Aperila la 17, 1873 kona hanau ana, a waiho na iwi o kamahele ma ka aina hookama ana i aloha ai.  Ua puka mai oia mailoko mai o kona luaui makuahine i hala mua Keakakaiuli, a me Moses Keliikuala.  He ekolu lakou ma ka hanau ana, ola hoi he elua kaikamahine a me 1 keikikane oia no hoi o Sam ʻ l, a ua hala mua kona mau kaikuahine, a oia aku la no hoi ka panina pau ola ohana.

            He hoaloha oia no makou, no ka paaua pu ana i ka pono o ka aina nei mai ka M.H. 1892 a hiki i ka 1895; oiai hoi ka nupepa Ka Leo o ka Lahui, a me Ra Oiaio.  malalo o J.E. Bush, i ka wa ʻ e pahola o ka nune a me ka nele, aia no o Sam ʻ l e hoomanawanui ana no ka noho o kona haku.

            He lala oia no ka Ahahui Aloha Aina a hiki i kona moe pu ana aku la me ia haawina eehia no ka wa mau loa.

            Ke komo pu aku nei makou me ka wahine, na makua, a me ka lehelehu no a pau i pili lala.  a ke kalokalo aa nei e hoomana ia mai ko lakou mau ehaeha iloko o na manao walohia.  Aloha no.

 

                                                            OLELO HOOLAHA.

 

            E ike auanei na hooilina o Kaupena [k] ke nana mai i kela Olelo Hoolaha, owau o Kahanawale (w) o Waialua, mokupuni o Oahu, ka moopuna ponoi a Kahawalu (w), a o Kahawalu (w) oia no ka wahine mare a Imaui (k), oia wahi hookahi no I make  Kauoha ole, a he mau apana aina ko Imaui (k) e waiho nei ma Waialua, Oahu.  a he kaikaina ko Imaui (k) e ola ana mahope o ka make ana o Imaui (k) oia o Kaupena (k).  A no ka mea, mahope iho o kamake ana o Imaui (k) a hiki i keia la, na ko ʻ u makuakane ponoka me a ʻ u pu i uku i ka auhau aupuni maluna o ua mau apana aina la.  nolaila ke kono aku nei au i na hooilina o Kaupena (k) e hele mai a e uku mai ia ʻ u i ka halplua o ua mau auhau aupuni la, a e kuka pu no hoi me aʻu ma koʻu wahi noho ma Paalaa, Waialua, Oahu. E hoolohe i keia.

 

                                    O wau no me ka oiaio.

                                                                        KAHANAWALE (W).

                        Paalaa, Waialua, Oahu, Dec. 6, ʻ98.

                                                dec. 7--4ta wkly