Ke Aloha Aina, Volume V, Number 13, 1 April 1899 — Page 4

KE ALOHA AINA

 

Hookumuia no ka Pomaikai o ka Lehulehu, a he Nupepa na ka Lahui Hawaii.

EDWARD L. LIKE. Lunahooponopono

EMMA A. NAWAHI. Puuku o KE ALOHA AINA.

Honolulu Apr 1, 1899

 

HE MAIKAI NO O KALANI AIMOKU

      Ua loaa mai nei ia makou he leta no ka la 6 iho nei o Maraki ma luna mai nei o ka mokuahi Hongkong Maru, e hoike mai ana he maikai no ke ola o Kalani Aimoku e noho mai la ma Wasinetona.  Aole he mau lono e hoike mai ana no Kona hoi mai, elike me na olelo e hauwawa ia nei, aka, aia no Oia ke kali ia no ka hopena o Kana hana me ka manaolana mau.  A i haawi mai la no hoi Oia i ke aloha i Kona lahui.  Ae, aloha no.

 

E LAWE ANA O AMERIKA I NA AINA AUPUNI.

      Ua ike iho makou maloko o na nupepa o Amerika Huipuiia e lawe ana o Amerika i kekahi mau aina aupuni i hoakakaia maloko o kela palapala haawi a ka Repubalike Hawaii, i wahi no kona mau pualikoa, a penei na olelo a ua mau nupepa la.

      Wasinetona Mar. 13.  Mahope o kekahi noonoo akahele ia ana, ua hooholo ae ke Keena Kaua e lawe ae elike me ka mea i oleloia ma ka hoohui ia ana o Hawaii  me Amerika Huipuia, e hoolilo ana i na aina aupuni no ke Aupuni, no ka lawe ae ia mau aina maloko o na mokupuni no ka hoohana ana aku no ka oihana koa.  No keia mea e hoouna ia aku ana he aliikoa no Honolulu me ka hoomaka koke aku i ka hana o ka lawe ana i na aina ma ka inoa o ke Keena Kaua ma kahi kokoke i ke kapitala.  O ke Keena Kaua Moana kai komo mua aku ma keia hana, ma o Kapena Hauna la, ua loaa iaia he mau waiwai pili koi nani loa mahope koke iho o ka ae ia ana o ka olelo hooholo.

 

KE HOPOHOPO NEI.

      Eia kekahi poe kanuko ke hopohopo loa nei i na Iapana mamuli o kela haunaele weliwelli i ulu ae nei malalo o Kahuku me na Pake.  A ke hoomaka nei hoi lakou e ao kanaka no ka hewa o ka hookomo mai ia ana mai o keia lahui, no ka mea, eia lakou ke halia e mai nei no e hoea hou mai ana no haunaele i oi ae ka weliweli ma keia mua aku.

      A eia ka Hoku ke ao mai nei e akahele ka hookomo nui ana mai i na Iapana ma keia mua aku.  Oiai, i ka wa o na poe malihini e komo mai ai, ua loaa koke aku ia ke ao ana ia lakou mai na poe kamaaina aku, a oia no hoi ko lakou wa e hoomaka ai i na hana hoohaunaele.

      Ina e hooko ia aku ana keia mau manao o ka hoopau ana i ka lawe nou ia mai o na limahana Iapana, e lilo ana keia he ninau nui e ulu ai he mau hoopaapaa hahana ana, a makou hoi e hilinai nei aole e lanakila ana ia manao ana.  E komo mai ana no lakou iloko o ka aina nei ma kekahi ano e ae. A no wai ka hewa o ke komo nui ana o na Iapana no na poe kanu ko no, oiai, ua ohi hapuku aku lakou i keia lahui mamuli o ka emi loa o ko lakou uku hana.  Nolaila, oia ka makou e puana ae nei, ua make hewa loa keia hopohopo ana.

 

HE MEA HIKI OLE IA KE MAWEHE IA.

      O ke aloha ana i ka aina aina hanau a na kupuna i noho ai a hiki i ka lawe ana aku a ka make ia lakou, he mea hiki ole ia ke mawehe ia ae mai ka puuwai mai o kela a me keia kanaka i oili mai ko lakou puhaka mai, e aai ana hoi iloko o ko lakou naau ia he mea aloha i ka aina me ka makaukau e molia aku i ko lakou mau ola ina he mea ia he mea e loaa ai ia lakou ka noho kuokoa ana.

      Aole iwaena o na lahui naauao wale no keia momi makamae he aloha ana i ka aina, aka, ua hoea loa aku i na lahui hupo.  A no ia kumu i ala mai ai na Pilipine a kue aku la ia Amerika, no ka mea, aole o lakou makemake na hai e hoomalu mai ia lakou, oiai, ua lawa no he naauao kupono no ka hooponopono i ko lakou aupuni.

      Aole i hookuu aku o Peresidena Makinile i na Pilipine e noho kuokoa e like me na Cuba, aka, ua lawe mai la oia i na paemoku no Amerika me ka naau pakaha. Maluna o ka piko o kona poo i hookau aku ai kekahi mau senate i na ahewa ana, oiai, mamuli o kona hoopaakiki ana e nui la na koko e hookaheia la ma ia mau paemoku.

      Ua hoomaopopo o Amerika i keia wa, aole e loaa ana he noho maluhia ma ia wahi ina aole e hiki ana iaia ke opa pu aku i na Pilipine, aka, he hana nui nae ia hana e hooko aku ai me ka nui o na ola e poino.

      E like me ka loihi o ke ola ana o na Pilipine, pela no e hiki pono ole ai ia Amerika ke noho oluolu malaila.  Aloha no na kane, na wahine a me na opio o Pilipine e nai la no ka pono o ko lakou aina.

 

UA HALA AKU LA NO IAPANA.

      Maluna o ka mokuahi Hongkong Maru i haalele iho ai ke Komisina Beritania W. J. Kini i ke kulanakauhale o Honolulu nei no Hokodate, Iapana, no ka lawe ana ae i ka oihana Kanikela o ko na aupuni malaila.  O ka hora 8 o ka po Poalima, Maraki 24, ka manawa i hoolaha ia ai no ka haalele ana iho o ka moku ia nei, aka, mamuli nae o kekahi poino i loaa i kona mekini, ua hookaulua ia kona holo ana a hiki i ka hora 7:30 o ke kakahiaka Poaono nei.

      Mamua o ke kani ana o ka hola 8 o ua po la, ua hiki ae makai o ka uwapo ka bana aupuni no ka haawi ana aku he mau leo mele Hawaii a me Beritania no kona hanohano.  A ma ia manawa pu no hoi i hoea mai ai o Komisina Kini me kona mau hoaloha no ka uwapo.  Ua hoowehiwehi ia kono a-i me na lei poni moi, aka, ua hoonuanua hou ia kau nae oia e na hoaloha Hawaii e kali ana iaia me na lei poni mai a me ka ilima maluna o kona poo a me ka a-i a hiki i ka loaa ole ana he wahi kaawale no ka lei e hookau aku ai maluna ona.  Ua haawi mai oia i kona hoomaikai palena ole no lakou me ka hauoli nui.

      I kona hoea ana aku iluna o ka moku, aia he puulu nui o kona mau hoaloha a me ka Hui Cricket e kali mai ana nona, a mahope o ke mele ia ana mai o ka mele lahui o Beritania, ua haawi ae la lakou he ekolu mau huro ana me ka puana ana ae he mau leo kahoahoa no ka pomaikai o kana huakai au moana.

      Ua ukali pu aku o Albert Kahiwahiwa Nawahi ke keiki ponoi a ko makou makuahine Puuku, no ka noho pu ana me ia ma ia aina malihini no ke ao hana ana e mahuahua ae ai kahi ike me ka maopopo ole o ka loihi o kona wa e ike hou ai i ka maka o kona makuahine a me kona ohana.  Ua kahiko ia oia mai kona poo a hiki aku i kona mau kipoohiwa me ne wehi aala o kona aina hanau.  Ua hoea pu aku hoi ma kai olaila kona makuahine, pokii, ka ohana, na hoakula na hoaloha he nui me ka hoohanini ana he mau kulu waimaka aloha nona.

      O ka makou e kahoahoa ae nei i na Mana Lani e malama maikai ia ka laua huakai au moana a hiki i ka pae maalahi ana i ka pahuhopu o ko laua alahele.

      Ua lawe ae la o Harry Evans i ka mana piha o ka hooponopono ana i ka mokuahi Columbia.

 

HAUNAELE WELIWELI MA KAHUKU

MAWAENA O NA IAPANA A ME NA PAKE

      Make he ekolu Pake a he lehulehu wale i Hoehaia. Ua noho nanea na Pake i ka wa a na Iapana i lele hakaka mai ai.

      Ma ka La Pule nei, ua ulu ae la he haunaele weliweli loa mawaena o na limahana Iapana a me na limahana Pake e noho nei ma ka mahiko o Kahuku, a o ka hopena oia hakaka ana ua make he ekolu Pake a he lehulehu wale i hoeha ia.

      He nui ka weliweli o keia hakaka ana, no ka mea, ua lele aku na Iapana maluna o na Pake i ko lakou wa e noho nanea ana me na pauku laau a me na kui loloa, a he nui ka manaonao o na kino make i loaa aku.

      Ua homaka hou ka maluhia ma kahi i malama ia ai o ka hakaka. Aia hoi na makai i hoouna ia mai ke kulanakauhale aku nei ke hoomalu ia. Ua hoopiha loa ia na Pake me ka inaina me ko lakou hoopuka ae e haawi kau ana lakou he uku panai no na hana ino i hana ia mai maluna o ko lakou mau hoakanaka.  A ke hopohopo ia la e aia mai ana lakou.

      Mahope koke iho o ka hora 2 o ka auina La Pule, ua loaa mai la he lono telepona i ka halewai mai Kahuku mai e hoike mai ana ua ulu ae he haunaele mawaena o na limahana Iapana a me na Pake.  Aole he mau lono e ae i loaa hou mai, a mamuli o ka manao ia ana, aole ia he haunaela nui, nolaila, ua hoouna ia aku la o Hope Ilamuku Charles Chillingworth, i ukali ia e na makai Chas. Faneuf a me Toma ma ke alanui Pali, maluna o na lio no lalo o laila.

      Aka ma ka hora 8 o ia po, ua loaa hou mai la he lono telepona mai ia Luna Nui George Weight i ka Ilamuku Baraunu ma Waikiki, e noi ana no ka hoouna koke ia ana i mau kokua mai ke kulanakauhale aku nei.  Ua make he ehiku pake, a aia na Pake ke liuliu la no ka lele hakaka ana aku maluna o na Iapana.

      Ua hoea koke mai ka Ilamuku no ka halewai a haawi aku la i na kauoha no ka ohi ana i na makai elike me ka hikiwawe e loaa ana. Iloko o ka manawa pokole, ua loaa iho la he nui mau makai kaulio malalo o ke alakai ana a Kapena Spillner, a he umi nei mau makai ku huina malalo o ke alakai ana o Kapena Holi, me ka hamuku a me kekahi poe kakaikahi e ae i haalele iho ai lakou ia Honolulu nei mahope o ka hora 9 a kau aku la maluna o kekahi kaaahi kuikawa no ke kahua hakaka.

      Ua hoolako pono ia na makai me na mea kaua no ke kue ana aku i ka ulu hou ana mai o ka haunaele.  Ma ka hora 12:30 oia po i kapalulu aku ai ke kaaahi i lalo o laila, a he mau minute pokole hoi mahope iho i hoea aku ai o Hope Ilamuku Chillingworth me kona mau ukali.

      O ke kumu i ulu mai ai o keia hakaka ana, mamuli o kekahi hoopaapaa i malamaia mawaena o kekahi Iapana a me kekahi Pake, a o ka hopena oia hoopaapaa ana, ua ulele hoolei puupuu ae laua me ka hoeha ia o ka Iapana, ma ka auina ka Poaono nei.

      O ka nui o na pake i make loa he ekolu, he ewalu e waiho la me ka maopopo ole o ko lakou ola, a mawaena o kanaha a me kanalima i hoeha ia.  O ka nui o na makai e noho la ma Kahuku mai Honolulu aku nei a me na apana e ae he kanalima, a na manao ia ua lawa ia ikaika no ke pale ana aku i ka ulu hou mai o ka haunaele.

 

HE AHA MELE NUI.

      Ua haawi ia ae he ahamele nui maloko o ka luakini o Kaumakapili ma ka po Poaha nei, a ua lehulehu hoi na poe puni himeni i hoea malaila.  He nui na puu kani i hoea malaila.  He nui na puu kani i hoea ma ia po ma ka lua kini a he nui hoi na mahalo palena ole i panai ia aku no lakou mawaena oia poe puu kani o Mrs. Makapolena kekahi.  Ua lohe mai makou e haawi ia aku ana na pomaikai o ia ahamele no ke kokua ana i kekahi mau pilikia o ka luakini o Kaumakapili.

 

UA HOEA MAI LA KA MOKU HOKU AO.

      Ua hoea mai la ma ke kahiaka nui Poalua nei ka moku misionara Hoku Ao, mahope o kona haalele ana aku ia Kapalakiko no 18 la i hala ae nei.  Ua olelo ae Kapena Brey, ua hoea mai oia ma kahi he 300 mile mai na kapakai aku nei o Hawaii he pule a oi i hala ae nei.  Aka, mamuli nae o ka loaa ole ana iaia he makani maikai, pela oia i ulolohi loa ai.

      E holo aku ana ka Hoku Ao no na paemoku o Marshall, Kilipati a me Caroline, mahope o kona kali ana iho nei no aneane hookahi makahiki, no ka hopena o ke kaua mawaena o Amerika a me Sepania.  E noho iki iho ana oia he mau la ma Honolulu mamua o kona holo ana aku no na paemoku Hema.

      He elua mau keiki Hawaii i huli hoi mai nei maluna ona, a e holo hana aku ana laua maluna o ka moku Hoku Ao.