Ke Aloha Aina, Volume V, Number 24, 17 June 1899 — Page 5

KE ALOHA AINA.  POAONO, IUNE 17, 1899.

 

MAI HOOKAUMAHA E KA LAHUI.

            Maiwaena mai o na ohua o ka mokuahi Miowera i loaa mai ai kekahi lono hoolele hauli, oia hoi, ua hookuu mai la i keia ola ana o Kalani Aimoku, ma ke kulanakauhale o Nu Ioka, ua huli pono aku makou i na hooiaio kupono e hilinai ia ai keia lono hoehaeha puuwai, aka, aole no nae he mau hoike oiaio i loaa mai ia makou.  Ua hoea loa aku ka noii pono ana i ke kapena, a ua hoole mai oia, aole ola i lohe i keia lono i ka wa a kona moku i haalele aku ai ia Vanekoua, ma ka la 1 o keia mahina.  O kekahi mea i manaoio ole ia ai keia lono, mamuli no ia o ka loaa ole ana mai he hoike i kekahi poe e ao maanei.

            He mea oiaio ua lilo keia lono i mea e hoopilihua ia ai o ko kakou mau puuwai, aka, alia nae kakou e hookaumaha i ko kakou mau noonoo a hiki i ka loaa ana mai o na lono oiaio maluna mai o ka moku lawekoa Sheridan e hoea mai ana i keia mau la, a i ole ma ka mokuahi Kina o keia Poalima iho.  O ka leta i loaa mai mai Wasinetona mai, no ka la 26 iho nei o Mei, e hoike mai ana he oluolu maikai ke ola o Kalani, a pela pu hoi me kona mau hoa.  Nolaila, e ka lahui e hoolana i ka manao a hiki i ka lohe maopopo ia ana mai.

 

HE PUALI KEAKA PAELE.

            Maluna o ka mokuahi Miowera i ku mai la i keia kakahiaka Poalima, i hoea hou mai ai he puali keaka paele ma ko lakou alahele e holo ana no Auseteralia.  Mai ke kulanakauhale mai o Kansas City keia puali keaka i holo mai ai me ka haawi ana he mau hoikeike ma kekahi mau kulanakauhale o Amerika Huipuia.

            A maiwaena mai o kekahi o lakou i lohe ia mai ai, aia no o Jim Brown, kekahi o na keiki Hawaii i holo pu aku ai me ka bana lahui ke noho la ma Kansas City me ke ola kino maikai.

            I keia awakea i maki ae ai kekahi hapa o ua puali keaka la maloko o kekahi alanui o ke kulanakauhale nei.  O ka nui o na lala o loko o keia hui keaka ma kahi no na o 40, mai na kane, wahine a me na kamalii.  Ua haawi ae la lakou he keaka maloko o ka Hale Mele Hou i ka hora 3 o keia auina la, a ua nui hai na poe i hoea aku e makaikai i ka lakou mau hana hoomakeaka.

 

            He haole i hoea mai nei maluna o ka Auseteralia, i manao no ka holo ana aku i Hilo e kukulu halekuai ai, kai kukulu ae i kona hale lole ma kahi kokoke i ka hale waapa o ka Matala.

 

HE MAU ELELE HAWAII.

            Ma ka halawai iho nei a na Kuhunapule o ka Aha Euanalio o na Ekalesia Kalavina, ua hoea ae imua o lakou he leo poloai mai ke komite mai o ka Halawai Nui o na Ekalesia Ahahuina e halawai ana ma ke kulanakauhale o Bosetona, ma ka mahina ae nei o Sepatemaba.  A ua lohe mai makou, ua hapai ia keia kumuhana e noonoo, a ua nui no na manao i hoopuka ia no keia; ua ulu ae no na manao kuhihewa iwaena o kahi poe o lakou, he mau hana hoohui Ekalesia keia.  Aka, mahope iho o ke kuka ana, ua hooholo iho la ka hapanui o ua aha nei, e apo aloha mai i keia leo kono, a ua koho iho la ua Ahahui nei he mau Elele e hele ai ma kela halawai ma Bosetona.

            No makou iho, aole no o ke kalai hoomana ke kahua o keia pepa, aka, ia makou i ike ai he mea e pono ai ko makou lahui, a e ike ia mai ai hoi ke kanaka Hawaii, a e holoi ia aku ai paha na huaolelo maewaewa o kau ana maluna o ko makou lahui (he poe Pegana) i hoolaha ia hoi ma ka nupepa o na aina e, e na poe e hoino mau ana i ke kanaka Hawaii, ma ia ano, ua kokua loa makou i keia wai ia ana o keia poe Kahunapule Hawaii, e hele a ku iwaena o kela anaina nui o na Elele, a e hoike aku i ke ano a me ke kulana o na kanaka Hawaii.

            Ua lohe pu mai no hoi makou, o keia halawai e malama ia ana ma ke kulanakauhale o Bosetona aole wale keia halawai no ko Amerika mau Ekalesia Kalavina iho, aka, e hoouna mai ana na Ekalesia Kalavina o na wahi a pau o ke ao nei i ko lakou mau Elele, a ina io pela, alaila, aole wale iwaena iho o Amerika e ku ai keia mau Elele Hawaii, aka, imua o ke ao holookoa.

            Ua lohe pu mai no hoi makou o ke Kahu o Kaumakapili, Rev. E.S. Timoteo, Kahu o Ewa, Rev. J.M. Ezera a me ke Kahu o Haili, Rev. S.L. Desha, o lakou na Elele i wae ia e ka aha no ka hele aku.

            Ua manao makou e ae oluolu mai ana no, na Ekalesia o keia mau Kahu i wae ia ae nei, a e ulu ole mai ana na ohumu a me na nukunuku ana, oiai, ma keia hele ana o keia mau Kahu, ua hapai ia ka inoa o ko lakou mau Ekalesia, a e loaa ana hoi i keia mau Kahu Hawaii, he pomaikai ma ka ike ana aku i na mea hou ma ia aina hou, a e lohe pu aku hoi i na manao naauao mai na Kahunapule kaulana o ka honua e akoakoa ana ma ia halawai.  A e hoi mai ana paha keia mau Kahu, me na makaukau hou e pono ai ka lawelawe ana ma ko lakou mau kihapai hana, a o ka mea nui nae i ko makou manao, oia ka ike ia mai o ka “Kanaka Hawaii,” he kulana naauao kona, aole hoi he poe pegana a naaupo elike me ka hoolaha aloha ole a ka poe e imi mau nei e hehi i ke kanaka Hawaii ilalo.

            Nolaila, ke nana aku nei makou me ka iini nui no ka wa e hooko ia ai keia hele ana.  O kekahi me maikai ma keia hele ana, oia hoi, aole e ili aku maluna o na Ekalesia Hawaii na koikoi o ka auamo ana i na lilo no keia huakai, aka, ua lawe ae kekahi poe opu aloha a auamo ia mau lilo.

            A o ka makou e uwalo ae nei i keia mau Elele (ina io e hele ana lakou) mai poina i ka lahui, a e hoao ma na ano a pau, e hoike aku i ke ano, a me ke kulana o ka lahui Hawaii.  He lahui Karistiano a hoomanawanui i na hoino wale ia mai.

 

O JAMES NAKAPUAHI UA HALA.

            Mai ke kupakako o ka Iwalani i loaa mai nei ka lono i ko makou Puuku i keia kakahiaka Poalua, no ka hala ana aku la o ka lakou hunona i aloha nui ia, Jas. Nakapuahi ma kela aoao o ka muliwai eleele o ka make, ma ka Poalima o kela pule aku nei, Iune 9, a nalo hoi ma ka La Pule Iune 11.  Ua hoouna ia mai keia lohe ma ke telepona mai Hilo ae a loaa o Iwalani, ma Kukuihaele, Hamakua.

            Auwe!  He lono kaumaha keia i loaa mai ia makou ka ohana o kana wahine e noho nei maanei.

            Ua hanauia o James Nakapuahi, ma Hilo Hanakahi, i ka la 24 o Mei 1878, mai ka puhaka mai o Mr. a me Mrs. George Nakapuahi, a nolaila, ua piha iaia na makahiki he 21 me na la keu a hala aku la.  Ua hoonaauao ia oia ma ke kula Katolika ma Hilo a ma ke kula o Sana Lui ma Honolulu nei.

            He limahana oia no ka nupepa Hilo Tribune a hiki i kona make ana aku la.  I ka la 16 o Iulai o ka makahiki i hala aku la, i lawe ae ai oia i kokoolua nona ma ke ia noho ana, he wahine, aka, aole nae i piha ka makahiki o ko laua noho ana iloko o ke apo gula o ke aloha, ua mo-@ ae la ia a kaawale ae la no ka wa mau loa.

            He kanaka opio oia i kamaaina i ko laila mau kupa, he oluolu, he heahea i na malihini a pau e kipa aku ana i ona la.  Ua haalele iho la oia i kana wahine o na la opio, ka makuahine, ka ohana a me na hoaloha he lehulehu wale e paiauma aku nona.  Aloha no.

            Ke komo pu aku nei KE ALOHA AINA ma ke kumakena pu ana me ka wahine a me ka ohana o ka mea aloha i haalele mai la.  A na ka lokomaikai o ka Mea Kiekie e hoomama mai i ko kakou mau naau pilihua.

 

MOKUPEA EONO KIA.

            O H.M. Bean, kekahi o na kanaka kapilimoku no Camden, Me., he kokua nui loa oia i ka mokukuna eono kia.  He manao kona no ke kapili ana aku i kekahi moku o keia ano maloko o kona pa kapili moku maloko o elua makahiki.  O ka lilo no ia ano moku he $140,000.  O na kia eono elike no ko lakou kiekie, ola hui he 125 kapuai pakahi.  I na e hoomohala ia kona mau pea e hiki aku no ia i ka 13,000 i-a, a ua hiki hoi ke hoaahu ia he 2,000 koa me ia mau i-a.  O kona loihi he 325 kapuai, laula 47 kapuai, hohonu o kona lua ukana 20 kapuai.  Ua olelo ae oia he oi loa ae ka waiwai o keia ano moku mamua o na moku kialima.  He holo me ka hoomahuahua mau ae hoi i na dala.

 

            He eha poe kanaka i lawe ia ae no ka halewai ma ka Poaono nei, no ka hoao ana e pepehi ia makai kau@ Leslie, ma kai o Kakaako.