Ke Aloha Aina, Volume V, Number 31, 5 August 1899 — Page 7

KE ALOHA AINA

 

HE KAAO KAILI PUUWAI NO KA UI MINEWA A ME NA Kaikunane Eiwa I Hooliloia i mau Manu Nene Ahiu a i ole na Keiki i Hoehaehaia

Kakauia no KE ALOHA AINA

     Akā, aole nae he leo i pae aku mai na lehelehe aku o ke koa opio poino, a mamuli o keia hoonele ia ana o kona leo me ka pane, ua hoopiha koke ia mai la kona puuwai me ka hopohopo, aka, aole nae oia i manaoio loa ua poino kona hoaloha, nolaila, me ka leo nui moakaka, ua poho hou aka la kona leo kahea i ka i ana aku:

     E Boliona, kuu hoaloha maikai, e pane mai i keia wa ano, aia oe mahea, ua poino anei oe?  E wiki i hiki ai ia ʻ u ke hookolo aku mahope ou.

     A elike no me na haawina nele i loaa ai iaia i na minute i hala, pela no keia, no ka mea, aohe he leo i pae mai, aka, o ka meha wale no ke halii ana a mahope iho o kona hooki ana i kona leo.

     Na keia hoonele hou ia ana o ko Sinora makemake i hookomo mai i na manao hoihoi iloko o ka elemakule, a nolaila, me ka puuwai o paila aua i ke aloha no kona hoaloha, i ku ae ai o Sinora a huli hoi aku la no hope no kahi hoi ana i haalele aku ai ia Boliiona me ka hookuukuu ana aku hoi i ke kaula keleawe o ka pokaa ana e paa ana i kela a me keia kapuai wawae ana e hehi aku ai.

     I keia mau minule a ka elemakule o naku hele nei iloko o ka pouli, oiai kona pepeiao ke hoolohe pono ia no ka pae hou mai o ka leo o kona hoaloha, oiai, aole he maopopo o kana wahi e hele nei, no ka mea, ua nohopaa ia mai o mua e ka pouli uwahi, aka, he nele wale no nae ka haawina a halawai mai me ia.

     A no kekahi mau minute leihi keia nee malie ana o ua Sinora nei imua, aia hoi, ua hoohikileleia ae la oia i ka lohe maopopo ana aku i kekahi leo nunulu e pae mai ana ma kahi aole i mamao loa mai iaia aku.

     O oe anei ia e kuu hoaloha maikai, wahi a Sinora i puana malie ae ai, ka mea nona keia leo nunulu o ka poino a ʻ u e lohe nei.  E na lani mai lawe koke aku i kona ola a hoea aku au no ka hoopakele ana ae iaia.

     Nolaila, me na kapuai mama, nee akula la oia me ka puahi no kahi a ka leo nunulu e pae mai ana, a iloko o na sekona pokole wale no, ua hoea aku la ua elemakule nei no kani a kona hoaloha opio e waiho ana iloko o ke kulana kupilikii me kona poo hoi e moe ana maluna o ka umauma o kana Minewa aloha.

     A ia mau sekona no i haule iho ai kona mau kuli ma ke aoao o ke kanaka opio, a me na lima palanehe, lalau aku la oia i ke poo o kona hoaloha a hoala mai la iluna me ke kahea ana iho me ka leo nui moakaka.

     E kuu hoaloha Boliona, e hiki ana anei ia oa ke ku ae maluna o kou mau wawae a hahai mai mahope o ʻ u?

     Aka, elike no me kona nele i kinohi pela no i keia wa, a o ka leo nonolo wale no hoi ke oili mai ana mailoko mai o ke koa opio.

     Nolaila, ma ka hoohakalia hou ole aku lalau iho la o Sinora i ke kino o ke koa opio, a me na lima wikani hapai ae la oia iaia, a hookolo aku ma kahi maawe kaule keleawe no kahi o ka waha o ke ala huna pohihihi.

     A he mea oiaio, iloko o na minute pokole wale no, aia hoi, ua hoea aku la oia no ka piko o kahi a ke kaula keleawe a paa ana.

     Aole nae, ua elemakule la ia waiho iho i kana puolo makamae ma ia wahi, aka, ua komo loa aku la oia no loko o ke alahele pohihihi, a ma ia wahi hoi, ua hoohikileleia ae la oia i ka pa ana mai o kekahi wahi o aheahe makani a hoomau iho la ma kona papalina, a na ua wahi o aheahe lau makani la i puni hou aku i ka hohono uwahi no loko o ke ana me koe iho o na ea polo polona o ua alahuna pohihihi la, aka, aole nae i hoopilikia ka hanu o ka kaua eueu e lakou, ma keia i hookuu iho ai o Sinora i ke kino o ke koa Boliona no luna o ka lepo me ka hookaulua ole iho komo aku la oia no loko o ko ana a me na kapuai mama kamoe hou aku la kana, huakai no kahi e waiho ana o ka wahine opio Minewa.

     A iloko o na minute pokole loa aia hoi, ua hoea aku la oia no kahi a ka wahine opio e waiho maule ana.

     I keia mau minute a ka elemakule e hoomakaukau nei e hapai ae i ke kino o ka wahine opio, ua hoopuanuanu ia ae la kona puuwai i ka lohe ana aku i ka leo hookinao kona haku o na la i hala hope aku. E kauoha ana i ia kauwa e hoopio i ke ahi, a e konia kau hoi e hopu pio i kona mau ene-mi.

     Aole i hoohakalia iho o Sinora malaila, aka, ua lalau koke iho la oia i ke kino o ka kaua Minewa, a me na lima aloha, hapai malie ae la oia iluna me ka hoihoi aku no kahi o Boliona e waiho ana,.

     I keia wa no nae ana e hookolo ana malalo o ke alakai ana a ka maawe kaula keleawe, aia hoi, ua lohe aku la oia i ka haluku mai o na kanaka mawaho o ke ana, a iloko o ka manawa pokole loa, ua lohe aku la oia i kekahi leo kauoha i ka puana ana ae me ka leo moakaka, ana i hoomaopopo ae ai, aole ia no kekahi mea okoa aku, aka, no ka elemakule no ia.

     E komo aku e na kauwa hoolohe noloko o ke ana, a lawe mai i kuu enemi no waho nei, no ka mea, ua iini loa kuu puuwai no ka hookau ana aku i kekahi haawina ehaeha o ka make maluna ona, no kana mau hana hehiku i ko ʻ u kapu.  E komo i keia wa ano, a mai hoohakalia, oiai ua pio ke ahi.

     A he mea oiaio, mahope iho o ka hooki ana iho i keia leo, oia no ka wa i loheia aku ai na leo hauwalaau e komo mai ana noloko o ke ana ma kahi a Sinora e nee nei, no kahi o kona puuhonua, ke alahele huna pohihihi, aka, mamuli nae o ka halii paa ana o ka pouli uwahi, ua hiki ole i ka malamalama o na lama ahi a na kauwa a ka elemakule puuwai lokoino ke hoahuwale ae i elemakule Sinora me kana puolo makamae e hiipoi ana.

     Iloko o na minute pokole wale no, ua hoea aku la o Sinora no kahi a kona hoaloha opio e waiho maule ana, a malaila i hookuu malie iho ai oia i ka wahine opio ma ka aoao o kana aloha.

     A maluna hoi o kekahi wahi ahua pohaku i noho iho ai oia a hoolono aku la i na leo piha inaina o na kauwa e hoopuka i na leo hailiili no ko lakou mau enemi.  No kekahi mau minute hoi kona hoolono malie ana, ua lohe aku la oia i kekahi leo i ka hooho ana ae.

     Aole, aole ke kino o ka wahine opio ma kona wahi i waiho ai, ua aihue ia oia, a pela pu hoi me Sinora, ke kauwa kipi i kona haku. E imi aku ia laua i keia wa ano, no ka mea, aole loa laua e hiki ke pakele mailoko aku nei, koe wale no ina he alahuna pohihihi kekahi maloko nei o keia ana.

     E huli aku i kona mau poopoo paia ano, a he manaolana no ko ʻ u e loaa aku ana no laua me ko kakou mau enemi e hoekepue mai ana ma kekahi wahi o keia ana, wahi a kekahi kauwa i panai koke mai ai iloko no o keia mau sekona, ua wawale ae la ko lakou mau leo, i ka i ana ae:

     Ua pono kou manao.  E huli aku ia lakou no ke ola a me ka make.

     I ka lohe pono ana aku o ka elemakule Sinora i keia mau huaolelo i pae mai la mai na lehelehe mai o kona mau hoaloha o na la i ana hope aku la, ua ikeia aku la kona mau waimaka o ka ehaeha i ke kulu ana iho, me ka lalau ana iho i kana pahikaua e paa ana ma kona puhaka, a unahi koke ae la iaia iwaho me ka makaukau no ka lumai ana aku iloko o ka puuwai o kona mau enemi i ka wa e kono ia mai ai e hana aku pela, ia me ka eo kaumaha puana malie ae la oia:

     E na lani e hoopakele ae ia ʻ u a me ko ʻ u mau hoaloha opio mai ka inaina mai o kuu mau hoaloha, oiai aole e hiki i ko ʻ u mau lala palupalu ke ku aku a paio me lakou.

     A maanei i ku ae ai oia a hele aku la no ke kua kiai ana ma ka ipuka o ke alahele me kana pahikaua punahele e paa ana ma kona lima akau.

 

NA MOKU LAWE HOLOHOLO NO NA MANILA.

     Wasinetona Iulai 22.  O ke keena hoolako, ua hoolimalima aku ia he ehiku moku no ka lawe ana i na lio, oia ka Siam, Sidane, Aztec, Athenian, Vitoria, Garronne, a me Port Albert.  O keia poe moku a pau e holo aku ana lakou no Manila me ka hakalia ole.

    

NUHOU KULOKO.

     E loaa no ia oe he paa lole maikai loa no ka $6.50 ke naue ae i ka Hub.

     E hoolohe ia ana ma keia kau kiure ka hihia kipu o Wade ia Gillespie.

     Ua loaa mai nei ka lono, ua lilo ae la ka mokuahi Port Albert i moku lawe holoholona no Amerika Huipuia.

     Ua hookuu ia mai o Namakaokeahi e Lunakanawai Wilikoki ma ka Poakahi nei, mai ka hewa lapaau laikini ole.

     E loaa no na lolewawae a me na palule kamalii no ka 25 keneta pakahi ma ka Halekuai Hub, kahi o ke emi aohe lua e like ai.

     He oia mau no ka pamaloo o keia mau la, ua hoi ka ua a paa i ka lani, a o ke ehu wale no ia e kulu mai nei i ka honua.

     O ka nui o na make o ke kulanakauhale nei no ka mahina o Iulai i hala aku la he 93, a he hapanui o keia heluna he poe Hawaii.  Oia hoi he 44 ko lakou nui, a o na Iapana kai ukali mai, he 20 ko lakou huina make.

     E hoomanao he kuai hoemi nui ka ka Hui Kuai Lole Hawaii ma ka Poakahi ae nei, Augate 7 o na lipine, lihilihi, kamaa a pela aku, a ke kono ia aku nei na poe a pau ma poino i keia kuai hoemi nui , e naue ae malaila.

     Ua laweia mai e ke Kinau o ka La Pule kekahi heluna ohea kapena nui no lakou ka huina 200 ua nele kekahi poe me na wahi e moe ai, nui ka hoohala o kekahi poe no ka pii o ka uku moku, aole nae he wahei moe ai.

     Eia o L. B . Ker ke kuai hoopau mai nei i kena mau waiwai nui hewahewa mamua o kona haalele ana mai ianei ma ka la 18 o Augate ae nei, no ka holo ana aku e wae hou i mau waiwai no kona halekuai.  E eleu ae e ka wa pono wale no keia e loaa ae ia oukou na aahu nani.

 

(Mai ka aoaoa Ekolu mai)

     "Ma ka aoao o ka Peresidena o ka Papa Ola Kupa, ke haawi aku nei oia i kona hoomaikai he nui no oukou, me kona hoike mai, ina e loihi ana kona noho ana me kulana ana e paa nei, e hoao no oia ma na ano a pau, e ike kela a me keia ohana i kona pilikana e noho la ma kela aina o ka ehaeha."  Ua panai ia aku na leo mahalo nona e ke anaina holookoa e akoakoa ana ma luna o ka moku.

 

KA HALEKUAI MEAI O LEWIS & Co.

     E loaa no na Kamano Paakai Momona ma ke kuai liilii a ma ke kuai aahu.  Na Palena o na ano a pau a me na Lako meaʻai o kela me keia Pno.  E hele mai e hoao no oukou no.  Telepona 240.  Alanui Papu, Helu 111.

 

KA HALEKUA O NA MEA AI O HENRY MAY & Co

     E loaa no malaila ka Ti, ke Kope i hoomoa ia a me na lako mea ai a pau.  E hoolawa ia no na ohana na mahiko a me na moku me na lako ai o Europa a me Amerika e hoea mau mai nei maluna o na mokuahi.  Alanui Papu, Helu 515.

 

NA LAKO GULA HOU LOA.

     I hoea mai nei maluna o na mokuahi mai Kapalakiko mai. Ma koʻu Halekuai, malaila e hana ia ai na Pine, Komo, Kupee Luma, Uwati, a pela aku.  H. G. Biart.  Alanui Papu, Helu 404

apr 18, 1898 tf

 

W. C. AKANA Kalauki

      He Loea Mahelolelo mawaena o ka Lahui Hawaii a me na keiki o ka Aina Pua.  He makaukau oia ma ka hana ana i na Palapala Hoolimalima, na Palapala Kuai a me na hana a pau e pili ana i na Waiwai Paa a me na Waiwai Lewa.  He waipahe ma ke kuka ana

Keena Hana: Ma Kanaana, kihi o na Alanui Moi a me Alakea

 

H. F. Wichman Wikimana

      E loaa no na MAKAANIANI no na maka ma ke kumukuai haahaa loa ma ko makou Hale Hana Gula ma Alanui Papu.

apr, 18, 1898

 

BAIKIKALA HOU "BEEB" NO KE $30.00

Kaa Kane a me Wahine MA KA Honolulu Cyclery o BAILEY

Helu 281 ALANUI MOI

      Na Milwaukee Puncture Proof Tires, aole e hiki i na kui Kiawe ke komo iloko o lakou.

      Hoonaueae ana i na Kaa Paikikala poino a pau.

      He heluna nui o na lako hoomaemae ma loko ona i loaa ole ma na Paemoku Hawaii.