Ke Aloha Aina, Volume VI, Number 19, 12 May 1900 — KE ALOHA AINA, HE AHA IA? [ARTICLE]

KE ALOHA AINA: HEAHA IA?

O ke Aloha Aina, oia ka Ume Mageneti iloko o ka puuwai o ka Lahui, e kaohi ana i ka noho Kuokoa Lanakila ana o kone one hanau ponoi. O ka Ume Mageneti, oia no ka ikaika nana i kaohi i ke kui mageneti o ke Panana, e hoopololei ana i kona kuhikuhi i ka welelau Akau o ka Honua nei, a i ka hoku akau hoi. He mea pohihihi ka ike ana i kahi i loaa ai ia mea he ume iloko o ka hao Magenti [Mageneti], aka, eia ka mea maopopo loa, aia kela kui Mageneti ke hoomau la i kona kuhikuhi ana i ka hoku akau ma ka welau akau o ka honua nei. Pela ke aloha iloko o ka puuwai o ke kanaka no kona aina hanau ponoi. Aole i ike maka ia ia mea he aloha, aole hoi hiki ke hoopaaia, aole hoi e hiki ke haha ia; aka, ua laha wale aku ia, a ua lele wale aku a pili kona aina hanau ponoi iho, me he ume la o ke kui Mageneti. Ina i hookokoke ia na kui Mageneti i kahi hookahi, alaila, he mea maopopo loa me ke kanalua ole o ka manao, ua ume like no lakou a pau loa kekahi i kekahi. Pela hoi na lahui a me na kanaka a pau loa i noho pihaia e ka uhane aloha i ka aina hanau. E like auanei ko lakou huki ana, ume ana, a me ko lakou kaohi ana i ka pono Kuokoa o ke kanaka. Na ke aloha iloko o lakou e hoolilo ia lako [lakou] i poai hookahi, e kupaa ana, a e hakoko ana me ka wiwo ole imua o na enemi, e hoao ana e kaili i ko lakou pono Kuokoa. Nolaila, ua lilo ka hune, ka nele, ka inea a me na popilikia he nui i mea ole loa ia lakou. No ka mea, ua oi aku ke aloha no ka aina hanau mamua o na mea e ae a pau loa. He holoholona ke kanaka ke nele oia i keia ano he Aloha Aina. He haahaa loa ke kulana o ke kanaka aloha ole a kumakaia paha i kona one hanau, a e maalo ae ana oia i waena o kona lahui ponoi iho me ka hoowahawaha ia aku e lakou. Ua pani ae na Iapana i ko lakou mau hale oihana ma keia Poalima, no ka hauoli ana i ka la i hoohui ia ai ko lakou hooilina moi me kekahi kaikamahine alii oia aupuni no. Eia ke hooloheia nei ka hoopii koi poho a ka hui keaka paele i ka hui mokuahi Canada, o $500,000, a ua manao ia e hookaulua ia iho ana ka Miowera maanei no ka hoolohe ia ana o ke kumu o kona kapena i kue ai i ka lawe ana i keia hui keaka maluna o kona moku.