Ke Aloha Aina, Volume VI, Number 33, 18 August 1900 — Page 6

KE ALOHA AINA

 

HE MOOLELO WALOHIA

NO KA

LEDE ELENOR

Ka Ui Nohea i Hookaawale ia mai ka Alo aku o na Makua

A I OLE

Ka Wahine Opio i Auamo i na

Koikoi a Kona Makuakane

i Hana ai.

 

MOKUNA X.

KA AIHUE IA ANA ELENORA.

 

            I ka pauhia hou ana o ke kamaiki opio iloko o ka hiamoe kulipolipo, oia no ka wa o ua Nora nei i kua ae ai me kae kamoe hou ana aku no loko o ka huikau o ke kualanakauhale.

            Ua hoohikileleia ae la oia i ka ike ana ae ua uhipaa ia ke kulanakauhale me na kahakahana lole eleele mai ana aia oia iloko o ke kumakena kuhohonu, aka, ua hoopau koke ia nae ia i kona hoomaopopo ana no ka opio no ia ana e hiipoi nei i manao kuhihewa ia ua make oia.

            Ua kaalo ae la ua wahine aoo nei ma kahi a na puulu kanaka e haiamu ana me ka nune nui ana no ke kaumaha nui i ili iho maluna o ke kiaaina a me kana wahine, no ka laua kaikamahine i manao wale ia ua nalowale, me ka hoomaopopo ole o keia wahi bebei maalo iho la ma ko lakou aoao o ka opuu makamae no ia a Daniela Hunter.

            A i ka hoea ana aku o ua Nora nei ma kekahi aoao o ke kulanakauhale, ua huli ae la oia a kamau aku la no kekahi wahi pupuhale nona na ipuka e hamama pono mai ana ma kona alahele, kahi hoi ana i manao ai e loaa mai ana na kokua ana ia laua, no ka mea, ua hele mai la o loko ona a aneane.

            A ma ke alapiie komo aku ai iloko o ua hale nei i noho iho ai o Nora a hookuu iho la i ka ui Elenora maluna o kona uha me ka halu ana aku o kona mau maka no loko o ka hale.

            Ike aku la oia he wahine opio e hoomakaukau ana i ka papaaina, no ka mea, o ke awakea ia, a i kona ike ana mai i keia mau malihini e noho aku nei ma ko lakou ipuka hale, ua haalele koke akula oia i ka hana ana i ka papaaina me ka hele ana e huipu me na kamahele o ke awakea a me ka leo olu wai pahe ninau  maila oia me ka puuwai i pihe me ke aloha.

            E ka lede aoo, e hoike mai mahea ae nei kau huakai o keia awakea me ka opio e waiho nei mamua o kou alo?

            E ka wahine opio, wahi a Nora me ka maalea nui, e kala mai ia maua i ka mahaoi ana mai imua o kou ipuka hale nei, no ka mea, he malihini maua i kou mau helehelena, aka, he hookahi wale no mea nana i kono mai ia maua e kipu mai i anei oia ke noi ana aku la oe, e haawiia mai ona wahi mana ai no ka hoopiha ana iho i ko maua houpo lewalewa, oiai, he kanalima mile a maua i hele mai ai me ke komo ai ole.

            E ku ae a komo mai ilokoo ka hale nei, e ka wahine aoo, a mai hopohopo hoi, no ka mea, ua hamama mau na ipuka o keia wahi hale no ka hookipa ana mai i na poe i halawai me na popilikia. E komo koke mai.

            Na keia leo aloha o ke kamaaina o ka hale a me na helehelena ohaoha no laua, i hoopau ae i na manao kanalua iloko o Nora no ko laua hookipa ia aku, a me ka puuwai hauoli ku ae la oia a hahai aku la aku la mahope o ke kamaaina no kahi o ka papaaina e waiho ana me ka lede Lenora e hiipoi ana ma kona alo.

            Maluna o ka papaaina i hoonoh ia iho ai oia e ka wahine opio, me ka nalo ana aku a oili mai la me na mea ai e kuku ana ka mahu, a waiho iho la ma ke alo o ka wahine aoo.

            Ma keia wahi i puoho ae ai ka ui Elenora mai kona hiamoe ae, me kona nana koke ana ae ma o a maanei no keia wahi hou ana e ike nei, a i ka haule pono ana o ka ike a kona mau maka maluna o na mea ai, ua hamama ae la kona waha, me ka onioni ana ae, me he mea la, e hoike okoa mai ana no, ua pololi oia, aka, i kona ike ana ae aole ona hoomaopopo ia iho, ua uwe la oia, a na ia mea i hookomo aku i ke aloha iloko o ka wahine opio no Elenora me ke kii ana mai a hanai iho la iaia.

            A maanei i komo mai ai ka ohana o ka wahine opio no loko o ka rumi, a i mea hoi e hoopau ia ai na manao pahaohao no keia mau malihini i kipa aku ma ko lakou home, ua haawi koke aku la oia i keia mau olelo hoolauna i ka i ana aku.

            E kuu papa aloha, a me kuu kane eia au ke hoolauna aku nei ia olua i keia lede aoo.  He kanalima mile ana i hele mai ai me keia opio nani a'u e hii nei me ke komo ai ole, a mamuli o ka hopohopo o keia wahine aoo no ke ola o ke kamaiki nei i kipa mai ai laua no ke noi ana i na kokua no ka hoopiha ana i ko laua houpo lewalewa.

            I ka lohe ana o ka elemakule a me ke kanaka opio i na mea e pili ana no keia mau malihini ua ike ia aku na helehelena kaumaha e hekau iho ana maluna o laua no ka opio nani a me ka wahine me ka owaka ana ae a pane mai la.

            E ka wahine aoo e noho iho maluna o ke pakaukau, a e ai i na mea a pau e waiho nei maluna ona me ka hopohopoh ole, no ka mea, ua noa i na poe pilikia, aka, mamua nae o ko'u hooki ana iho e hoi aku ana au i kou oluolu e@ mai owai kou inoa, @ hele mai ai, a e hele ana oe iho.

            Na keia leo aloha i hoopiha aku i ko Nora puuwai me ka hauoli, aka, no na ninau nae a ke kamaaina o ka hale ua hiki ole iaia ke pane koke aku.  Aka, iloko no nae oia wa i komo hou mai ai ka manao eepa iloko o Nora e hoopunipuni aku i na hamaaina o ka hale me ka i ana aku.

            Ke haawi aku nei au i na mahalo kiekie no na hana lokomaikai i pahola ia mai maluna o maua, a maua hoi i moeuhane ai e loaa ana na hookipa pumehana ana mai ia oukou mai.

            O ko maua wahi i hele mai ai mai Eledarado, a e hele ana maua no ke kapitalea no ka hoihoi aku i kuu moopuna nei me kona mau, a o ko'u inoa i kapaia mai ko'u mau la opio o Nora.

 

HE MOOLELO WALOHIA

NO

ALANADELA

Ka Wahine Hoopahaohao o ka Aa

hu Keokeo

A I OLE

Ka Loe Hookahi Pila Hapa o ke

Kulu Aumoe.

 

            A he mea oiaio no kekahi mau minute pokole wale no keia nalo ana aku, ua oili hou mai l ua poe kanaka nei, me ka hoihoi pu ana mai i ke kino o ke koa Walata e waiho ana iloko o ke kulana nawaliwali mai na hana hoomainoino ana e kona mau enemi, a mamua o ke alo o Lihano ko lakou alakai i hookuu malie iho ai lakou i ka lakou pio me ka pane pu ana mai.

            E Lihano eia ke kino o ka kakou pio, aole i lole kona aho, aka, ua hookeo ia mai nei ia no ka ike hope ana iho o na maka o ko kakou moiwahine i ka mea a kona puuwai i aloha pupule ai.  a hoi aku no ka opu o ka honua.

            A iloko no o keia manawa i poha mai ai ka leo o ko lakou alakai i ka i ana mai me ka leo ohaoha.

            Ua hooko aku oukou i ka oukou hana me ka paewaewa ole a no oukou au e haaheo mau ai a hiki i ko kakou hookaawale ia ana e ka make, aka, iloko nae o keia hana ano nui a oukou i lawelawe iho la e hoea mai ana he uku hoopai ke@ oi ma luna o kakou i n e lohe aku ana ko kakou moiwahine, aohe @ e ae nana i hooko i keia hana puuwai eleele maluna o kana mea i aloha ai, aka, na kakou no na kona poe kanaka.

            Nolaila ma keia wahi he hookahi wale no hana pono no kakou e hooko ai oia ka hunakele loa ana i na mea e pili ana i ka pepehiia ana e koi koa wiwo ole, a e hookaulihiia aku maluna o na powa na ahewa koikoi ia ana no keia hana lokoino.

            Ae, ae, @ a na kanaka i hooho mai ai, @ wale no ke @ e huna ai ia kakou ka mahi.

            Ina o ke alanui keia a oukou i manao ai e loaa ia kakou ka palekana, e paa ka waha a mai walaau iki, a o ke kanaka e kue ana i keia a koli ola oia.  wahi a Lihano no i panai hou mai.

            Ua lilo keia he manao maikai i na mea a pau, a mahope o ko lakou hooholo lokahi ana ua lawe ia aku la ua Walta nei no kahi a kana aloha e kali mai ana.

 

HALA IA PUA ALII O BERITANIA.

            Coburg, Iulai 31. Ma ka hora 10 o ke ahiahi ei, i make ai ke Duke o Saxe-Coburg ma ke Kakele Rosenau, mahope o ka hoehaeha ana a ka ma'i.  O ke kumu i make ai mamuli no ia o kekahi i o ulu ma kona elelo.  Ma o ka makemake ana o ke Duke Wahine a me kona ohana ua lawe ae oia i kona homa ma Rosenau.  Aole oia i maopopo i kona kulana kupilikii, a he manaolana mau hoi kona e loaa ana iaia ka maha a hiki i ka Poalima aku nei, ua ike ia ka loli ana ae o kona kulana, a make iho la ma ka Poakahi nei.

            O ke Keikialii Alfred Ernest William Alexander Albert i make aku la, ke Duke o Saxony a me Saxe-Coburg a me Gotha, a o ke Duke mua o Edineboro, o ke keikikane elua ia a ka Moiwahine Vitoria a me ka Hooilina Moi oia ke keikikane elua a Ernest I, ke Duke o Saxe Coburg.

            O ke Keikialii Afred Ernest ua hanau ia oia ma Windsor, i ka la 6 o Augate, 1844.  Ua komo oia iloko o ka oihana kaua moana o Beritania ma ke ano haumana i ka 1858, a mailaila i pii ai kona kulana a hiki i kona lilo ana he HOpe Adimara i ka 1882.  Ma ka la 24 o Mei, 1866 ua hanohano ia aku la oia me na inoa ke Duke o Edineboro ka Ela o Kept a me ka Ela o Ulster o ke aloalii, a lawe ae la i kona noho maloko o ka Hale o na Alii.

            Ua mare ia oia me ke Duke Wahine Kiekie Alexandrova ma ka la 23 o Ianuari, 1874, ke kaikamahine kamakahi a ka Moi Alexander Ii o Rusia.  O na hua i oili mai ko laua mau puhaka mai he hookahi keikikane, ke Keikialii Alfred i hanau ia ma ka la 15 o Okatoba, 1874, a i make i ka la 6 o Feberuari, 1899, a me eha keikamahine.

            Ua hapa ae na hae o na hale aupuni, a he nui na hiohiona kaumaha i ikeia ma ka Windsor ma ka ili iho o ua haawe koikoi maluna o ka Moiwahine Vitoria, a ua kauike ae ka bele o ka towera St. George Chapel.

            O keia ke keiki alii i kipa mai ai i Hawaii nei he mau makahiki lehulehu i hale ae nei, a i ike ia ia wa ke Duke o Edineboro.