Ke Aloha Aina, Volume VII, Number 24, 15 June 1901 — Page 6

KE ALOHA AINA

 Ke Aloha Aina, Poaono, Iune 15, 1901

 

MOOLELO HOONI PUUWAI NO

Kuu Aloha i na Pua, Kuu Ipo o na Launahele!

Ka Makaikiu Kupaianaha!

 

MOKUNA X.

Awaiaulu Ia E Ke Aloha — Ka Makana Poina Ole A Ka Puuwai — Ke Aloha Poluluhi I Ke Kino — Ka La Hoohuimare O Ka Haku Danekota

 

O keia po o ka malamalama o na tausani ihoiho e hookuluwela nei i na paia o ke Kakela Danekota, o ia no ka po o kela aelike hoohui mare i hooholo ia ai mawaena o ka Haku o ke Kakela a me ka ui o Stanefila Hale, ka po lua ole hoi o ka ulumahiehie o na poe a pau i kono ia e inu a e lealea, a maluna o ka papaaina mare, ua inu, a ua kalokalo ia me na leo kanaenae ke ola a me ka hauoli o ka Haku a me kana wahine iloko o na la o ko laua noho ana mare.

Mahope o kela papaaina mare, ua malamaia ae he aha hulahula e niniu poahi ai na kiina wawae a ka poe loea ma ia hana. E awihi hoohie ana na maka, a e hene ana na minoaka a ka makemake, a i ka hiki ana  aku i na hora liilii o ke kulu aumoe, aia kela a me keia a huli hoi ana no ko lakou mau home iho, oiai hoi na paa mare a makaukau ana ma ka laua huakai kaahele honua ia mau hora liilii o ke aumoe no ka hoohala ana i na la omaka mua o ka mahina me@i. Hora ekahi ponoi o ua po ala a ka pouli nui, aia ka leo feawela o ke oeoe a ke kaaahi ke haawi hope mai la i ke aloha o na mea mare, a niau palanehe aku la oia me ka hikiwawe ma kona alanui hele o ka holo imua me ka mama nui, a iloko o ka makahiki hookahi o ka huakai kaahele a na paa mare ua hoea hou mai la laua i Ladana a noho pu me ka poai o na hoaloha a me na makamaka a no laua paha keia mau hookaau ana:

Makamaka no‘u ke kanaka,

Kuu hale kipa e moe ai.

Iloko o kela mau la o ka noho ana mare o ka Haku Danekota, ua hoohala ia oia a me kana lede ia mau la me ka hauoli nui. E maalo ae ana laua ma na alanui maluna o ko laua kaa nana e huki ia ana e na paa lio pa-ha, a i ka nana aku i ua mau Haku ala o Danekota, me he mau moi ala laua no ke aupuni. O ka nui o ka waiwai a me ka lako i loaa i ka Haku Danekota na ia mea i hapai ae ia laua iloko o ka hanohano nui, aka, o ka hooilina nae o ua waiwai ala ke ake aku laua, ua hele o ko laua kihapai a me ko laua home kakela me ia mea, no ka mea, he wahine pa a hanau keiki ole ke kauna wahine Kalausia. O na leo noi a me na leo pule a ua mau haku nei no ka haawi ana mai o na lani i keiki na laua, uka hooko a ma@@ ole ia mai la ia mau uwalo ana, a ua lilo hoi ia i mea no laua e kaumaha ai.

O ka ike a lohe ole ia ana o ka moolelo o ka Haku Danekota e pili ana i kona mau la aole oia i ike ia he Haku no Danekota Kakela aia no ia ke mau ala iloko o ke pohihihi, me na manaolana ana, elike me kana i hoohiki ai, aole loa e kilo a he ike nana e hoikeike ae na mea huna nei ana i hunakele loa ai iloko o keia mau makahiki loihi i hala ae la, aka, he kuhihewa nui nae ia o ua Haku ala, no ka mea, hoike mai ka buke nui: O ka mea i hana ia me ka malu, e hoikeike ia ae no ia imua o ke akea. A o ua manawa ala oia ka kaua e ka mea heluhelu e hoi hope aku ai a moolelo ma kela la a ka o ka halawai mua loa ana o ka makaikiu a me Silevia ma ka home o Kakiana elike me ka mea i ike mua ia no na kukai kamailio ana mawaena o ka makaikiu a me ka wahine kauwa. Nolaila, o ka halawai ana o keia kanaka opio kupaianaha me ka lede opio ana i hoopaa aku ai i kana hoohiki, ua hui a halawai ae la laua iloko o na lulu lima ana o ke aloha hoaloha oiaio.

 

MOKUNA XI.

Loaa Oe Ia‘u Ma Ka Hihio — Ko Kino Wailua He Hookahi No Ia — Ka Leta Pahaohao.

 

Maloko o ke keena hookipa o ka hale o Kakiana, e ike ia no o Selevia a me Heneri Beleinehama ka makaikiu kupaianaha e noho ana maluna o na noho pulu nolunolu, a hoohala i na minute o ko laua launa ana ma ke kamailio ana, ua hoike aku ka makaikiu i kona moolelo, oiai, oia ma kona alahele hanu ma ka meheu o Ailika Eema, a hiki i kona hoea hou ana aku i Sekotia a me ka lilo ana o kana misionari i mea weluwelu liilii malalo o na hana hamabaga a ua Silevia nei.

E kala mai ia‘u e kuu hoaloha opio, ua hewa loa ia au, ua hooluhi aku au ia oe, a ua luhi hoi oe mahope o‘u, aka, na ke Akua no nae e haawi mai i na pomaikai maluna ou, wahi a Silevia i pane mai ai.

Ae e Silevia a e Mrs. Ailika Lema hoi, mamuli o kou haalele ana aku i kela home a nalowale iho la oe me ka maopopo ole o kou wahi o ka hele ana, ua make iho la ko‘u mau manaolana ana a pau, a o ka‘u kumuhana hoi i hoolala ai ua walawala pahu aku la ia a weluwelu liilii iluna o ka honua. I ka wa o kela puupuu ikaika i hookui mai ai me a‘u, kiola a kapae koke ae la au i ka hanohana o ka‘u misiona mahope o ko‘u kua, a hookolo mai la au mahope o kou meheu. Pau ae la o Sekotia ia‘u i ka huli ia aole oe ilaila, puni ae nei ho@ o Ladana nei i ka imi ia he ola like ana no, a ia‘u iloko o ke kokoke a me ke aneane e waiho a he haalele iho i ka hooko ana i ka hanohano o ka‘u hoohiki, aia hoi, ua halawai mai la ka ike a ko‘u mau maka me kou mau helehelena ia olua i maalo ae ai maluna o ke kaa ma ka la inehinei.

Ua alualu mai la au mahope o ko olua kaa me ka hoao ana e kahea mai, aka, ua oi pakela loa aku ka mama holo o ko olua kaa imua o ka mama heihei o ko‘u mau kapuai wawae, a nolaila, he mau minute pokole wale no ua nalowale mai la ko olua kaa mai ka‘u ike ana, a hoi nele aku la au me ka hoka, me ka manaolana aia no he la e hiki mai ana a e halawai no kaua he alo a he alo, a he mea oiaio ua hooko ia ia upu a kuko ana a‘u ma keia la. Ua maalo ae ko olua kaa ma ke alanui a‘u e ku ana, me ka puahi nui malalo o ka lawe a lilo a kela mau paa lio, ao ka‘u mau manao alualu aku mahope ua haule, no ka mea, he hoonui ana mai ia i ka hana ma ko‘u aoao, a o ka hana pono wale no ia‘u oia no ko‘u kali ana a hiki i ko olua wa e hoi mai ai, alaila, ia wa au e alualu mai ai mahope o olua, a iloko oia mau manao ano pihoihoi i loaa ia‘u, ua halawai io mai la au me na uila pomaikai o ka laki, a eia kaua ke hui nei he alo a he alo.

Ma keia mau olelo a Beleinehama hoomaka hou ae la ia e hoike imua o Silevia i ka moolelo o kana huakai iloko o Parisa, kona au ana i ke kai no Italia a me kona huli hoi hou ana aku no ka aina hanau i na mokupuni ailana nui o Bertania Nui, a wahi a ua makaikiu nei ma ka hope loa o kana kamailio ana, he manaolana kona eia no o Ailika Lema iloko nei o Ladana kahi i noho ai a o ia mau manaolana kanalua ole ona, oia kana e hookolo aku ai a hiki i ka wa e loaa ai.

Nolaila, mai kela la mai o ka halawai hou ana o ka makaikiu Belemehama me Silevia ua hoomau aku la laua i ka lakou ike a launa mau ana i kela a me keia ahiahi, a o na olelo hoolana mai na lehelehe aku o ua makaikiu ala, oia wale iho no na mea e loaa mau aku ana ia Silevia, aka, o ka loaa ana nae o ka oiwi kino o ua aloha nei a ka ui Silevia, ua nele a hoka maopopo laua. Aka iloko no nae oia hoka a me ka nele aole loa i haalele a haawi pio ka makaikiu Beleinehama, a no na pule loihi eha, aia hoi, ma ka hauoli nui ua hoouna leta aku la ua Heneri Beleinehama nei imua o Silevia me keia mau olelo:

Silevia: Me ka puuwai hauoli au e hoouna awiwi aku nei i keia hoike imua ou no ka hoomanao ana aku me keia mau olelo uuku o ka manaolana. O ko aloha i ka wehi o na pua, a o ko ipo hoi i na launahele, ua ike iho nei au iaia. Aole au e hiki ke ike koke aku ia oe a loaa na hoike pololei ma kou aoao. Eia au ke hookolo nei mahope o kona meheu me ka awiwi.

O ka loaa ana aku o keia leta ia Silevia, aia hoi, ua like oia i kela wa me he wahine ala i haakokohi ia e na kuakoko ehaeha o ka hanau keiki, mao ae la kona mau kaumaha nalo ae la hoi na luuluu, a ma ko laua makalua o ka maewaewa i alii ai no na la lehulehu i hala aku la aia hoi, ua olino mai la na kukuna malamalama o ka hauoli, aka pehea la oia e hana aku ai imua o ua aloha lokoino nei ana ke hoea mai oia mua o kona alo malalo o na hooko kauoha hopu a kona hoaloha makaikiu. Apo mai auanei oia a hookipa hou aku ma kona poli, a ae hou hoi i na kanaka nei nana oia i kumakaia me ka lokoino e pili hou iho ma kona aoao, a i ole, hoole mai paha ia a hoohewahewa iho na olelo ma ke kamailio ana aole au i ike ia oe?

Aka, ua olelo nae ka noeau: O ke aloha ka mea aole e mokuhia e na waikahe he nui. He kiekie kona me ka hohonu, he manao@oa hoi me ka paakiki, e hiki ole ai ke ana ia kona loa a me ka laula, a ina oia ke alahele a ua Silevia nei e apo hou mai ai i kana kane lokoino a hookipa hou aku ma kona umauma lahalaha i piha me kela haawina makamae, alaila, e hewa ole ai ke olelo ae: Nawai hoi e ole ke aloha, ua pili maua ilaila. Aka, ina hoi oia e lawe mai ana a hoomanao ae i kana olelo hope, oiai, oia iloko o kona mau minute ehaeha o kela leta kumakaia, alaila, i ke sekona a me ka minute mua loa o kona halawai ana me kana kane, e pane mai no ia me keia mau olelo paakiki o ka uahoa, aole ua Ailika Lema nei o kana kane mare.

Ua nui a lehulehu na noonoo like ole i ala mai iloko o ko ua Silevia nei mau hoomanao ana, aka, no ka hanohano o kana kamaiki bebe, kela kamaiki hoi e kolo ae ulu mai la kona mau la iloko o ka lilo aku i kanaka makua, na ia mea i hoopihoihoi nui mai i kona noonoo, a maopopo ole iho la kana olelo hooholo kupono e hoopuka ai.

Nolaila, ma ke ano o ka makuahine aloha a makee keiki oiaio, puili mai la oia i kana keiki iloko o kona umauma, a haawi i na honi aloha ana me na kulu waimaka, me na olelo kaukau ma kona lehelehe, wahi a ua Silevia nei e lu ana i kana mau olelo imua o kana keiki: E kuu Bosila aloha, kuu lei poina ole hoi iloko o ka inea a me ka ehaeha, ua hoao au e haalele hookahi iho ia oe iloko o keia ao akea, aka ua ae ole mai na lani, a ano, eia kaua ke ku nei me he makua me ke keiki a paio a hakoko aku me na inea o keia ao luhi me ka leo pule mau ma ko‘u lehelehe, e haawi mai na lani maluna o‘u i ka ikaika a me ka manao koa o ke kupaa no ka hookau ana aku i ka hoopai maluna o ka hokua o ka me nana kaua i kumakaia a

(E nana ma ka aoao 7.)