Ke Aloha Aina, Volume VIII, Number 23, 7 June 1902 — Page 6

KE  ALOHA AINA, POAONO  IUNE 7, 1902. 

 

HAWAII  MA  BUFFALO

 

                                    (Kakauia e William J. Celho.)

                                                (Boomau ia.)

 

                                                AHA  MELE

 

Mamuli o ka oluolu o ka mea hanohano Paulo Isenberg, ke keiki lalawai o Waialae, ua ae ia makou e Kapena Friel e haawi i ahamele Hoolaulea maluna o ka oneki.  He mele Hawii wale no ka makou, me kahi hula.  I ka po Poaha keia Ahamele.  Loaa ia makou $1816, palau dalaa ka mea hookahi, loaa na puu i’a i ka lele ana mai.

            O ka po Poalima ae, haawi hou he anaina hoolaulea i na’liio ka moku, niu ko lakou aluolu ia makou, pela no me na ohua haole malihini.

            O ka makou i aloha nui ai ma keia huakai moana, a he ku no hoi i ka mahalo.  Nui ka pauaho ole o Lahilahi Cuuba, Kapeka Merseberg a me Mrs. Collins.  E loaa mau ana na kokua ana ia makou ma na mea a pau a makou e makemake ai mai ka papa helu ekahi mai.  Me he poe pili loa la makou iluna o ka moku, i ko makou noho aloha, hookahi no mea nui o ka inoa Hawaii.  He mea nui loa ia ia makou, a na hiki iaia ke hoike aku ia oukou, e o’u poe makamaka ahonui, i ka aina nei mamao ko kakou launa ana, aka, i kahi e, pulama mau ke aloha aina oiaio.

 

                                    HOONOHONOHO  ANO NUI

 

            Mamua o ko’a hooluolu ana i ko makou po hope loa, oiai au e okuu hookahi ana i ka hora 2 o ka wanaao maluna o ka oneki, a e uwikiwiki mai ana hoi na ‘kukuna o Nahealani ma na ao opua i ka ilikai, ulu ae nei na hoomanao ana no na hoaloha o ke ala mai Buffalo a hoea wale i ka aina kulaiwi.  Nolaila, e o’u makamaka ahonui, us ulu ae paha ka manao ia oukou penei: Pehea la hoi ua o mea ma i ai ai ma ke kaahi?  A oia ka’u e hoomaiekike iki aku ia kakou, mamua o ko kakou hehi hou ana i ka aina nei.

 

                                    KA  AI MA HE KAAAHI

 

            Na makou no kai makou ai i hoio mai ai.  He palaoa, puaa hame, hua moa, me ka pipi i hoomoa oma ia.  He mau kuke no ka makou i hoi pu mai ai.  Aohe o makou lawelawe aku, no laua ka hana ana i na mea a pao, a he haupa wale iho no ka makou.

            No na ohua e ae, aole no i pilikia.  He ia no ko ke kaa, me kala nui no nae e loaa ai.  Mai ka $1.00 a pii aku ka ai hookahi ane.  a no ka poe ano hemahema i ke kala, he ku ke kaa ma na wahi hoolulu ma na hora paina, no 22 minute wale no i kela me keia manawa paina.  Ke lohi aku no ka ohua haule, aole e kali ia nona.

            Ma kahi o ka moe ana poino makou.  Aole e like me ko makou holo ana i ka Hikina-he loaa kahi e moe ai iluna o ka kaa, e like me ka moe ana moloko o ka hotele.  I pono ili makou i ka loaa ana o ko makou “chair car”, oia hoi, he kaa me na nono pulu hiki ke hooloihi a hilinai i hope.  Ke noho iluna, ku pololei; a ke makemake e hooluola i ke kino, kulai mai i hope, a hoonee aku ke pale wawai imua, o ka loaa iho la no ia o kahi hooluola kupono.

 

            No na kaa moe maoli, penei: ka hooponopono ana: Ma kela a me keia noho, ua hana ia he mau ie palupalu no ka elemu me ka kua.  He mau mea hemo wale no keia.  O ke ku ana nae o na noho, he huli alo-oia hoi-huli aku kahi i kekahi.  Aia hoi, maluna ae o ke kukuna o ka puka aniani, he papa pale hiki ke kulai mai, e like me na pahu ume wehe maluna iho a lilo ke pani i pakaukau.  Maloko o keia wahi no bela, nalii, paku a me na lako e ae o ka moe ana o na mea elua (a hea paha ke moe palua).

            I ka wa e makaukau ai e moe, e wehe ia ana na pulu ie a hoomoe ma ka loa i paa pono na noho; kau iho ka pela, uhi ka halii, hao ke kihei pili me ka uluna, nau aku koe.  Nui ka ike pokole ka hana i ka naauao.

 

                                    NA HOALOHA O KE ALA.

 

            Nui a lehulehu wale na haole kulana kiekie i launa ia e makou ma keia ala huli hoi i ka aina nei.  Mai Buffalo mai a hoea i Kikako: Hon. William P. Boland, no Scranton, Pennsylvania, e holo ana oia i Mekiko e nana ai i kekahi mau aina eli minerala.  He haole kuonoono loa keia, Geo. N. Willis, he Luna Hoohana no ka poe lawelawe o ka Hui Telegarapa “Western Union” o Kikako.  Mr. J. H. O’Dea, he hoa no ka Papa Hooko o ka Hui Telegarapa maluna ae nei.  Rev. Edgar KK. Kellar o Carrollton, Missouri.  Hon. John J. Darrien he loio no New Orleans, Louisiana.  He keonimana keia no ka Papa Hoonaauao o ka Mokoaina o Louisiana.  Mr. Geo. E. Prine, no Kansas City, he hoahui no ka Hui Haua Mikini o kela a me Keai anao-Bradley, Amerson & Cio.  Hon. C. A. Randall, ka Hope Peresidena o ka Hui “Star Clothing Manufacturing Co” Jefferson City, Missouri, me kekahi poe e ae.

 

                                    KA  AINA E

 

            Hora 4:30 a.m. Poaona, Novemaba la 30, ua hoopuoho ia ko’u hiamoe e kekahi haawina moe uhane hoopuiwa, me he la e hea ia iho ana e ala , eia ka aina mamua pono!  No ka hiki hou ole ke pili hou ka maka, ua ala loa, au a pii hou a okuu iluna o ka onekii.  Ia’u e okuu ana me na manao pihoihoi, ua pa aheahe malie ae he wahi makani ma ka aina ae nei, hanu mai la no au i ka ae kuahiwi.

            Ia wa, haloiloi iho la na waimaka, kau mai no maka o na lei o ko’u nohoa, na keiki, ka ohana me na hoaloha.  Nui ke aloha me ka olioli pu o ka naau i ke kokoke ana mai o na hora e halawai hou me ka hauli piha.

            Ma keia wahi au i noho ai a hiki i ka hora 6, aohe ike libi ia mai o ka a ioa ae.  Nolaila, hoi aku nei an a lalo i ko makou peo hoala aku nei, e pii pu mai e kiai i ka aina.  Ala mai nei lakouo, pau a pau iluna.  Hoi aku nei au a mamua loa o ka ihu, noho.  Malaila au a hiki i ka ike ia ana o Oahnu nei i ka hora 1:15 p,m.

 

                                    HALEAKALA

 

            I ka hora 8 ponoi o ke kakahiaka, oiai makou e haka pono mai ana i ka aina nei, ua hoohauoli nui ia makou a pau i ka ike ana ia Haleakala e ku kilakila ae ana maluluna o ke ao opua ma ka aia Hema.  He hapalua hora mahope ike ia na pali Koolau o Molokai, o na Waikolu ma o kulipolipo ae ana i ke alo makani.

            I nohi, me he wahi ao la ka aina ke oili ae i ke powehiwehi.  Ai a kokoke mai he oi aku a ka ui.  O ka malino iho o ke kai, maikai loa makou.  I ke kakahiaka nui wale ike makou i ka ai,ua   wao aina mai makou.

 

                                    OAHU.

 

            O kahi mua loa o nei e ike ia mai ai, oia no kahi puu oioi ma ka aoao Hikina o ka nuku o Nuuanu, kahi puu o Knoahuanui.  Me ne wahi ao ili la ke houku ae.  A liuiu, oili ae la kona koolua ma ka aoao komohana.  Pela iho la e ioli liilii ai no puu oioi a pau pono ke kuahiwi, a mahope na awaawa me na kaha.  

            I ka hookokoke ana mai i Waimanalo, ahuwale no Koolau, i ka malie.  Weliweli no hoi ka malolo, moni ka haae i ka ua mea he ono.  O ka piha ae no hoi koe a ka makahiki akahi no a ike wahi I’a kamaaioa hou.

            Mawaho pono o Makapuu ike mai la makou i ka ulu nio o Waialae i ka hlonape ae i ke ahae makani.

            “Oia no oe o ke ani peahi

              A ke aloha i ka malu kuikui.”

            A kaalo pono mawaho ae o Wailupe, ahuwale Kaimuki.  O ke alai hoi a Laeahi, ike pono ole ia ke kaona nei.  Aole nae i lialiu iho, ike mai la makou i kauhale.  Hu ae la ke aloha-na ka waimaka ka hana ma ia wahi.

            Hora 5:15 p.m. hoomaka ke kauka i kana apana hana.  Hele no hoi a pau, pili i ka uwapo, na molehulehu.

            Lulu lima me na makamaka lehulehu, maikai makou a pau haawi ke aloha o na hoa i noho aku i ka aina malihini, i ko lakou poe makamaka, me na hoakaka kupono no ko lakou noho ana me ka lakou hana.

 

                                    KA HOPENA.

 

            A oiai na hoaloha e olioli ana i ka ike mai ia makou, e ailiili ana hoi ko’u wahi naau i ka ike ole mai i ko’u mau ohua-he mau keiki, me ka ohana.  A nolaila, e o’u mau makamaka ahonui, mai Hawaii a Niihau, a pela hoi i ka Ahailono pauaho ole a kakou, na hooko aku nei au i ko oukou makemake mai ka mua a hiki no hoi i ka pau ana, a ke noi aku nei aku nei hoi au ia oukou i keia wahi mea iki.  He wahi mea uuku loa-“o hewa auanei au ke  nui!”  OIa hoi keai:

            I oluolu mai ia’u e hooki maanei, a e ui ae au i kuu mau Le Nani a ka Makua Lani i hoopomaikai mai ai i ko’u nohona ana, a e lokahi hoi kakou i ke noi haahaa ana aku Iaia, me ka hoomanawanui a me ka pauaho ole, i loaa ai ia kakou a pau na pono me na pomaikai a pau i hoohua ia ma ka honua nei no ka oluolu o keia noho ana, e like me ka ka Makua Lani i haawi ai i kana mau kauwa, ma na wahi a pau a’u i hele makaikai ai.

            A, oiai hoi e hoomanawanui ana no ka pono o ko’u ohana, e hoomanao mau nao au ia kakou a a pau; a malia paha hoi, e hoea hou mai ana no he wa e ae ia mai ai au e ka makuahine o keia Ahailono pookela a ka lahui e hoohou aku i kekahi ma manao ano nui maluna o kekahi mau mea e pomaikai ai kakouo a pau.

            Me keia mau manao, e ae, mai e kuu lahiu aloha, e pahola aku i Ko’u hoomaikai piha i ko oukou ahonui ma keia moolelo o ka’u huakai me o’u mau hoa kaahele. A e oluolu mai no hoi oukou e kala i na manao kupono ole i komo hewa @@ ka haku a hoonoho ana i keia hoonanea a ka oukou kauwe haahaa.

 

                                    WILLIAM J. COELHO.

 

            He elua mau makai kaulio no laua no inoa o H. Dopp a me W.H. Mc Cormick i hoopai ia he $25 pakahi no ka holonui.  Ua hoolilo ae laua i ke alanui i kahua heihei no laua, a iloko o ko laua moeuhane mua ole ua paa aku la laua i ka ho pu ia e ka Hope Ilamuku Chillingworth mauka ae nei o Kapalama.