Ke Aloha Aina, Volume VIII, Number 23, 7 June 1902 — Page 7

KE ALOHA AINA, POAONO, IUNE 7, 1902.

 

MOOLELO HOONI PUUWAI

NO

Kuu Aloha i na Pua, Kuu Ipo o na Launahele!

 

Ka Makaikiu Kupaianaha!

 

            He paki liilii ana no ke kuha, he lele liilii ana no na buke kanawai he peku ana no na wawae i ke pani o ka pahu hao, aia ua loio nei ua noho iho iluna o ka noho me kona mau helehelena e hoike ana ua hiki iaia ke haehae i kekahi kino kanaka a weluwelu liilii.

            O ka hoea aku o kahi elemakule laepaa ma ua kakahiaka ala a ku he alo me ia o ia ka ua loio Wabila nei e kali ana, alaila, o kona hopena no ia aole e hehi hou iwaho o ke alanui.  Aka, ua ae mai anei na lani ia mau manao o keia puuwai eleele?  Aole, aole loa.

            Mai ia kakahiaka a poeleele mai ia poeleele a kakahiaka hou aole loa i hiki aku ka makaikiu, a ua hoopiha loa ia o loio Wabila e ka inaina a me ke kuaki.

            No ka makaikiu iaia e hoi ala ma kela la, ke hoonaaikola ala kana mau olelo no ka halawai aku o ua loio nei ma ke kakahiaka e pii ai ke kai a lele liilii iluna o na makalae, a he mea oiaio, a pololei ia mau olelo a ua kiu nei e like me ka kaua i ike ae nei e ka makamaka heluhelu.

            Wahi a ua makaikiu nei, ua kuhi paha oe e kona loio wahahee o oe wale no ka ike ia mea he fulu hoo punipuni.  I pelo wale aku no wau ia oe a ke bilivi mai oe ia'u, alaila, ua ike au i na mea huna ekaeka o kou keena oia hoi he keena ia no na hana karaima eleele loa, a no kahi wa e hui hou aku ai aole loa oe e nalowale no ka mea he kuni hiki ole ke holoi ia, he maka hua aniani.

            Ha, ha ha, loio Hon Wiliama Wabila, he loio makahi oe, a ina he mea hiki ia'u ke poalo i kela onohi hua aniani mai ko maka ae, alaila, i ka la a'u e hooko ai ia olelo, he maka bipi bulu ia na kuu poka pu panapana.

            O keia na olelo kaena a ka makai kiu Heneri Beleinehama, a o ka hookoia ana oia olelo na ke au no ia o ka moolelo e hoike mai.  Aka, aole nae i moeuhane mua a makai kiu puuwai wiwo ole nei aia no he la e sila, a e hooko ia ai ka olelo o na mea a pau a ke akua i hana ai, oia hoi, he wa ko na mea a pau.

            Nolaila, o ka makaikiu Beleinehama iloko o kona hanohano nui no kana mau hana kaulana i lawelawe a i hooko ai me ka hopohopo ole no ka pono o ka hana i hookau ia aku ai maluna o kona hokua e ke keena oihana makaikiu o Ladaka, aia hoi, ma keia la ka piha ana o ka lua o na pule mai kela ia mai o kana huakai elua o ka hoea ana ma ke keena loio o Hon Wabila aia oia ua hiki hou aku la no ke kolu o ka manawa, malalo o ka aahu o ke kanaka kaahele, a oiai ua ike mua ia na hoomakaukau e ana ma ka aoao o ka loio no ka hopu pio ana i na poe a pau e kipa hou aku ana ma ia hope aku, nolaila, aohe mea i koe o ka  makaikai wale aku no i ua kiu nei a me kana mau hana me kona mau enemi.

            Maloko iho o ke kuka loihi o ua makaikiu nei e kaei ana kana kahei poka a ma kela a me keia aoao iloko o na eke e paa ana kana mau ou panapana punahele, a me ia ku lana i hoea aku ai oia no ke keena o loio Wabila, a komo loa no loko me ka hookaukaulua ole iho.

            O ka bele hoailona i keke ae ai oia ka leo kauoha i na lala o ka pahi poniada e lele like iho me ka awiwi loa a hopu i ke kino o ka makaikiu iloko o ka palaka me ka maopopo mua ole o keia mau hana powa.  Aka, o keia moto kaulana Honor Your Duty—oia ka mea nana i hookikina iaia e hakoko oia no kona pono, a oiai no e aumeume ana lakou me ka ikaika ua poha aku la ka puupuu konahao a ka makaikiu maluna o kekahi o kona mau enemi a walawala pahu aku la – akahi iluna o ka papahele, poha hou ka helu elua a ua kiu nei i ka ianakila, a ia wa i kani ae ai he elua mau leo poha pu panapana mai ua makaikiu ala mai, alaila, paa iho la ia iloko o na lima umii wela ka hao o kona mau enemi, a iloko o na kupaka a me na ka kaa ana iluna o ka papahele ua paa pono iho la ka makaikiu i ke kupee ia me na kaula o na lima a me na wawae, oiai hoi na powa he elua mau kino make e waiho oni ole ana iluna o ka papahele, a mawaho ae o kela he ewalu mau kanaka e hoopuni ana i ka lakou pio.

            Ilalo no ka rumi eleele me ka oukou pio a e lawe pu aku me keia mau kino make.  E wiki, e wiki, e na lala o ka pahi poniada, wahi a ka leo kauoha o Loio Wiliama Wabila.

            Emoole aia aku la ke pio ilalo ilo ko o ka rumi eleele me na kino make elua o na powa.  Alaila, o ka leo ninau oulea o Loio Wabila ka mea nana i wawahi ae ke anoano mehameha pu o ua keena ala.

            Sa Malihini, owai oe a heaha kau hana i hele mai nei, ua ike no anei oe i keia mau kino kanaka au i pepehi iho nei?

            Wahi a ka makaikiu i pane aku ai.  He kanaka kaahele au e hele ana no ka pono o ka'u oihana i koho ia ai e ke aupuni, a no ko'u ike ana i kau hoolaha oihana ua komo mai la au e imi pono ina paha ua loaa kou aponoia e ke aupuni e lawelawe i kau hana me kuu manao he lolo

io oe eia ka he poe powa oukou e like me ka'u i ike ai ma ka lele ana mai o keia poe e hopu kuleana ole ia'u me ko'u hewa ole, a oiai au ma ko'u kuleana o ka hoopakele ia'u iho ua lawelawe au i kela hana kipu maluna o kou poe kanaka.  Nolaila ua hewa anei au ma kau ike ana?

            Ae, e Mr. Malihini Kaahele, ua hewa oe ma kou ike ana iho la i na mea huna o ko makou nei keena a o kou hoopai na ko makou alii Ka Haku o ka Make e hooholo.  Alaila me kekahi hoailona a ua loio ala i haawi ae ai, ia wa no i hemo ae ai he paku eleele, a oili mai la ke alii Ka Haku o ka Make me kekahi aahu loihi i uhi ia mai ke poo a hiki i na wawae a ua okipuka ia no na maka ka ihu a me ko ka waha.

            Me ka leo okalakala pane mai la ua Haku nei o ka Make, ma ke kanawai o ko makou nei hui he make wale no ka hoopai o kekahi kanaka malihini, a o ka mea pepehi i kekahi lala o keia hui he make no kona hoopai a o na hana kue a pau i ka pono o keia ahahui he make wale no na hooopai.  Nolaila o ka make ana no kou uku hoopai a o keia mau kino kanaka au i pepehi ai e waiho pu ia ana no ia maloko nei o keia lumi me oe a hiki i ka helelei ana o kou mau iwi, iloko o ka popopo a me ka palahe.  Nao!  Hoopaa i ka lawehala ma loko o ka halepaahao Pahu Huina-ha a waiho iaia e make ma ka hora 4 o keia ahiahi.  Alaila huli ae la ua Haku nei o ka Make a hoi no kahi ana i hele mai ai a uhi hou ia ae la ka paku, a o ka makaikiu ua hookomo ia iho la ia i loko o kona halepaahao a pani ia iho ia ke pani me ka laka ia ana a paa e hiki ole ai ke hemo a o na kanaka i make ai i na poka pu a ua kiu nei ua hoomoeia iho la ma kela a me keia aoao o ka pahu a loaa nohoi na moe puu o ua kiu kaulana nei o Ladana.

            Ano e ka mea heluhelu i ko kaua hookuu ana aku i keia mokuna eia kaua ke ike nei ua paa pio ka makai kiu Heneri Beinehama he paaho na ka mana o kela pahu huina ha a kona mau enemi i hookomo ai a o ka hora o kona halawai ana me kona hopena weliweli o ka make aia no ia ma@ka hora 4 o ia ahiahi.  Alaila e hoea io mai ana anei ua manawa ala me kona hopoena awahia ma ka lima o keia poe pu uwai eleele, a i ole e iho mai ana anei kekahi anela e hoopakele iaia.

 

            I keia Poaha ae, Iune 12, e haalele iho ai ka bana ia Honolulu nei no ka hoolealea ana i na kupa o Kauai, aina kaulana i ka malie.  Ma Waimea lakou e kipa mua aku ai, a e hoohala ia ana e ka bana he umi la malaila.  Aia o hope makai nui Coney ke liuliu ala no ka hookipa ana aku i na keiki o ka bana aupuni.

 

HOOLAHA KUAI A ME HOOPAA A KA MEA MORAKI.

 

            Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia e Mary A. Aki a me Samuel K. Aki, kana kane, no Honolulu laua.  Mokupuni o Oahu, Teritori o Hawaii ia S. C. Allen, e lawelawe hana nei ma Honolulu i oleloia, malalo o ka inoa hui o Allen & Robinson, ma ka la 16 o Mei, 1896, a i hoopa a ia ma ke Keena Kope, ma Honolulu i oleloia, buke 160, ma na aoao 380, 381 a me 382, a i hoolilo ia aku i ka Portuguese Mutual Benefit Society of Hawaii he hui i hoalaia a e ku nei malalo o na Kana wai o ke Teritori o Hawaii, ma kekahi palapala hoolilo i hanaia ma ka la 1 o Dekemaba, 1900, a ua hoopaaia ma ke Keena Kope Aupuni, Buke 214, aoao 396 me 397.  Ke hoolahaia aku nei ma keia, ua manao ka mea paa moraki e paa i ua moraki la i oleloia no ka hahaki ia o ka aelike, oia, ka uku ole ia o ke kumupaa a me ka ukupanee i ka wa uku.

            Ke hoolahaia aku nei mahope o ka hala ana o na pule ekolu mai keia la i hoolahaia ai o keia waiwai e hooliloia aku no ia ma ke kuai kudala ana ma ke Keena Kudala o JAMES F. MORGAN, ma Honolulu i oleloia ma ka Poaono, Iune 14, 1902, hora 12 o ke awakea o ka la i oleloia.

            No na mea i koe e ninau ia J. M. VIVAS Loio o ka mea paa ale o ka mea paa moraki, Honolulu.

The Portuguese Mutual Benefit Society of Hawaii,

Paa Aie o ka Mea Paa Moraki.

            O ka waiwai i hoakakaia ma ua moraki ala.

            O kele mau aina a pau e waiho ana ma ke alanui Kamehameha IV e noho ia nei e Mary A. Aki a me Samuel K. Aki i oleloia, i hoakakaia penei:

            E hoomaka ana ma ka aoao Komohana o Alanui Kamehameha IV 450 kapuai Akau mai ka hookuina o ke alanui Moi a@ alanui Kamehameha IV (aoao akau) alaila, holo:

Akau 34@ 30' Hikina ma Alanui Kamehameha IV 126 kapuai, alaila

Akau 50@ 30' Komohana 200 kapuai ma ke alanui e pili ana alaila .

 

Palapala Hooia Hoahu

Elike me ia i Hoopukaia e ka

HUI HAWAIIAN REALIY A ME MATURITY KAUPALENAIA

 

Hoaku Maraki 30, 1901

            Huina, Waiwai $50,000

5,000 Mahele; $10.00 Pakahi; Uku Pau ia

 

Heaha na Kumu?

            1.  Aole makou e koi aku ana ia oa e uhaai i kau dala.

            2.  E haawi ana makou i kekahi ala hele palekana e hiki ai ke hoopuka puka a loaa ke dala mamuli o ka hoohui i na huina liilii i kela a me keia mahina, a mamuli o ia mea, e koe ana he huina dala mai ka hoolilo ia ma kekahi ano e ae, a e loaa ole ana ia oe kekahi wahi pomaikai mai loko mai oia mea.

            3.  O ka nui o na makahiki a me ka oihana a hana a ka mea hoahu, aole loa ia he kumu hoanoe a hoololi, no ka mea, ua hiki i na kane, na wahine a me na keiki ke lilo i poe hoahu.

Hooia Hoahu

 

            4.  Na makou e kukulu i mau home no oukou a e hoopuka no ho makou i Huina Hoahu Hoopukapuka e hookaa ia iloko o 75 mahina, me eha (4) Palapala (Coupons) Hooia o $50 pakahi i hoopilipuia, oka averika no ka puunaue iloko 19 mahina, a e ohi ana makou $150, a e loaa ana ia oe $200.  O kou puka $33.33 no kela a me keia dala pakahi i hoahu ia e loaa ana ia oe he 33-1-3 keneta puka.

            5.  No ka mea aole oihana hoopukapuka i ikeia i oi aku ka pomaikai ma mua o keia.  E kakau mai i na hoa kaka piha.  E hauoli mau ana ka Hui e hoike a e hoakaka piha aku i na mea a pau a me na lawelawe ana ke makemake ia, ke kakau ia mai ma ka leta a ke ninau kino ia mai.

 

HUI HAWAIIAN REALTY A ME MATURITY KAUPALENAIA.

 

            McIntyre Hale kihi o na Alanui Pau u a me Moi, Rumi 3 a me 4.  Pahu Le@ 262.

 

                        L. K. KENEWELA, Peresidena