Ke Aloha Aina, Volume VIII, Number 24, 14 June 1902 — Page 2

KE ALOHA AINA

POAONO, JUNE 14, 1902

 

HALAWAI MA PUUHALE

NA OLELO WIWO OLE A J.W. BIPIKANE.

 

            He halawai pili kalaiaina ka i malamaia ma ka pa hoomalu o Puuhale ma ka po Poalua aku nei i hala, Iune 3, 1902, e na kanaka Hawaii oiaio oia Kihapai i noho hoomaluia e Mr. Honona.  Mahope o ke kahea inoa ana a me ka heluhelu ana i ka moolelo o ka halawai i hala, na hiki aku la ka papa kuhikuhi ma kahi hoeueu kalaiaina.  Wahi a ka lunahoomalu.  O keia ka manawa e hoakaka ai kela a me keia mea i ka pono o kona aoao kalaiaina e ku nei, Demokalaka paha Bepubalika paha.  Mahope o ka olelo ana a kekahi keonimana Repubalika e pili ana no ka malihini i hoea mai e kono aku ana iaia e haiolelo, na ku ae ua malihini aia oia o Bipikaue, a penei kana mau olelo: “Nui ko’u mahalo i ko oukou lokomaikai i ka haawi ana mai manawa no’u e kamailio ai.  Hookahi wale no a’u mea e hoike aku ia oukou e wae i mau kanaka hoopono, kanaka luli ole ka manao a lawe ole i na dala kipe.  Na Lunamakaainana Home Rula o kakou aole loa lakou i hana i kekahi mea e pono ki kakou na kanaka Hawaii.  (Pololei) Oia hookahi ke kumu e mahae nei na Home Rula mai o a o. Ua ike no kakou he kakaikahi wale no na Home Rula i lawe i na dala kipe a o D. Kalauokalani no ka makua o keia hana.  Aole loa e upoi ia kuu mau maka a hiki i hona haule ana.  Pau ka Ahaolelo heaha na mea i ike ia?  Ke ku mai nei ka hale nani o ua makua ala e hooia mai ana ua lawe oia i na dala kipe.  Me ka mahalo.”

Kuokoa Home Rula.

 

HE KANE LOKOINO.

            Ua hopu ia o Niho, kekaha o na keiki hoehoe o ka waapa pailaka ma kela pule aku nei no ka pepehi i kana wahine.  O ka mea nana i hoopuka i ka palapala hopu na Kauka Moore, ke kauka nana e lawelawe ana i ka wahine poino.  O ka hanau ana aku no ia o ka wahine he ekolu la mamua aku.  Ua olelo ia he elua manawa a keia kanaka i pepehi ai i kana wahine, a na hoike aku o Kauka Moore i ka oihana makai he kanalua kona no ka palekana o ke ola o ka wahine i hoehaia.  Eia o Niho ke paa nei ma ka halewai no ke kali ana i ke kalani o kana wahine.  Hoku.

 

            Eia halekuai White House ke malama nei he kuai hoopau nui o na waiwai like ole, na hookuu akea ia ka lehuleu e kipa aku, a e wae no lakou iho.

 

NA PALAPALA.

            Aole e ili maluna o makou na koi koi o na ahewa ana no keia mau manao o hoopuka ia malalo o keia poo aka, e ili no ia maluna o na poe na lakou I kakau mai.  L.H.

 

Lunahooponopono o KE ALOHA AINA,

Mr. E.L. Like;

Aloha oe:

 

            E oluolu oe e haawi mai i kekahi wahi kaawale o ka kakou wahaolelo wiwo ole no ka’u wahi ukana e hooili aku la, a nau e hoomaikeike ae i ike mai ai o Joe Kalana e hoopau wale nei i kona Manawa me kona mau manao lili kohu ole i ka makuahine o KE ALOHA AINA.  E waiho oia ia mau hana lapuwale ana, a eia ka hana pono ana e hana ai:

            E malama mai oia i ka makuakane ona ia “Kalana,” aole oha hoomanao mai i wahi ola no keia elemakule, a eia oia ke hele mau nei e noi hele i na la a pau ia poe aku ia poe aku, a he ku maoli kekahi poe i ka uluhua me ka olelo, “ua like ka hoi o Kalana me he mea keiki ole ala.”  Aole he nana mai o ua o Jae Kalana i kona makuakane ponoi a hoopoina iho la i na mea a ka makua i hana ai, a i  malama pauaho ole ai i kona mau la opio, a huli mai la no nae e pehi i ka pohaku.  Eia ka pohaku ana i pehi mai ai.  Hoolaha mai kela aole e kuai o Kalana i ka hale, no ka mea, ua lilo ka iaia.  Ehia la dala i lilo ai, he dala makani paha kana i haawi ai i ka makuakane ona, a i aha la ka pono o ka noho elemakule ana ina aole e kuai la kekahi mau mea, alaila, na oi aku ka pono e hoihoi ia o Kalana i Lunalilo Home, kahi o ka poe ilihune ohana ole, i loaa ai na malama kupono ia ana mamua o keia hoomainoino ana a kana keiki ponoi, aole hoomanao mai, a kikua mai i wahi kenikeni e pono ai,  Ina no oia e hoouna mai ma o kekahi mea kupono  o anei a nana e malama a haawi liilii aku iaia, ua oi aku ia o ka pono i ole ia e hele mau e makilo i na la a pau, a he nui ka poe kuonoono o Hilo nei e hoopuka mau nei pela.  He mea pono maoli ia Joe Kalana ke iawe a malama i kona makuakane o loaa pono mai i ka olelo a kahiko e i ana, “hokai paha ananei ua lelmakule maka ole moe i ke ala.”

            He nui ka wahawaha o ka poe o Hilo nei i kau mau hana kohu ole e paio mai nei me ka makuahine o ka lahui aole makou he poe lawe nui i ka Home Rula, aka, o ka KE ALOHA AINA paue ka makou e ike nei i ko koke iho nei no i ka hookomo i ko mau manao pilikino ma ka Elele Hawaii o Hilo nei a make ana ia wahi nupepea, pino ma u wale mai nei hei ke ola o ko ke Kuokoa L.H. a ke hoohele ae la i ke Kuokoa Home Ralau.  Ina i hiki ole ia oe e Joe Kalana ke hana i pono no kona makuakane ponoi nana mai oia, pehea e hiki ai iaia ke hana i pono no ka lahui ka poe mawaho loa aku ona, E KE ALOHA AINA mai kiloi mai i kau momi imua o keia holoholona, mai hoopau wale i kou Manawa e pane aku iaia. 

HILO TAONA.

Hilo, Iune 6, 1902.

 

IA JOS. KALANA

            Mr. Lunahooponopono:  Olluolu e haawi mai ia’u i wahi kolamu maloko o ka wahaolelo wiwo ole o ka lahui.

            Minamina nui au ia oe ina he kanaka Hawaii oiaio oe, oiai au ke ike mau nei iloko o ka nupepa olelo makuahine o kaua au e kala nei i k loa a me ka laula mai o a o  o ka Paeaina “E Repubalika Kakou.”  

Aole anei oe i ike i ka mea nana i hookahuli I ke aupuni moi?  Aole anei oe i hoomaopopo iho i ka ini o ka poe au e kakoo nei e anai pu la kakou Hawaii, a i hooiaio ia mai hoi mai ka waha ponoi mai o Kiaaina Dole ma Bosetona?  Aole anei oe i ike a hoomaopopo iho i ka ini nui o na Repubalika e hoohaiki i ko kakou mana koho balota i hooiaio ia mai no hoi e ke Kiaaina ma Bosetona me keia mau olelo:  “We demand that the whites be supported and the Natives Hawaiian put down.’ ‘Ke kauoha nei makou e kakooia ka poe keokeo a e kulai a kuaia na kanaka Hawaii ilalo.”

Ina oe i hoomaopopo pono i keia mau ninau a me ka haina, alaila, o oe e Joe Kalana kei aahu i ka lole eleele kahakaha o ka hookamani, hoopilimeaai, hoopunipuni a me ke kumakaia i oi pakela aku i ko Benedict Arnold.  Oia nei ke keo nimana a kenerala kaulana ma Amerika Huipuia i aahu i kona kahiko koa me na pihi e hee aua i kona umauma, aka, maloko o kei aahu koa he aahu eleele kahakaha kumaikaia i kona aupuni, kona Peresidena, kona aina a me kona hae aloha ka ike ia e ka lehulehu mai o  a o a puni na kiho eha o ka honua. 

            Ina aole oe i hoomaopopo i kela mau mea i hanaia, hele mai oe ia’u na’u no e kuhikuhi aku ia oe, a no ka nui ino o ko’u minamina ia oe, ke ninau aku nei au ia  oe.  Heaha hoi ko mea i haelele iho ai i ke Aloha Aina a huli aku a kakoo i ka aoao Repubalika?  Heaha na kumu o kou manao ana mai e kokua ia’u aole hoi i ko aoao au e pai mau nei?  Me keia mau nioi e kuu io ua lawa, aloha kaua.

DANIEL AUWAI MAHUKA.

*

PAPA INOA O KE KOMITE A

KA AHAHUI KULA SABATI

O KA PAEAINA.

 

            Mamuli o ka Hoiko Hui o na Kula Sabati o na mokupuni o Maui a me Molokai ma Wainee, Lahaina, iloko o keia mahina, na noonoo pu ia ke koho ana i kekahi mau hoa o ke Komite no ke kiai ana ame ka hookipa ana i na haumaha o ka Ahahui Kula Sabati Nui o ka Paeaina no ka Hoike Hui ma Lahaina, ma ka mahina o Iulai, 1902.

            Komite nui o ka Manawa.

            Oia no ke Komite Hooko o na Kula Sabati o na mokupuni o Maui a me Molokai.

            Rev. John Kalino,

            “ E M Ezera,

            S W Maule.

            J W Kalua:

Ke Komite Kiai Maluhia main a Mokupuni mai.

            No na Mokuaina o Hawaii.

 

Puna me Hilo—

            Rev. S L Desha

            J M Kauila,

            L D Keliipio.

Hamakua me Kohala—

            Rev. C M Kamakawiwoole,

            T S K Nakanelua,

            John Moanauli,

            Rev. S W Kekuewa.

 

Na Kona me Kau—

            J K Nahale,

            D Alawa,

            Y K Kaapa,

            T K R Amalu,

            G P Kamauoha,

            J N Koomoa.

 

No Maui me Molokai.

Maui Hikina—

            J S H Kaleo,

            Rev. E M Hanuna,

            D W Napihaa.

Makawao me Maui Komohana—

            Peter N. Kahokuoluna,

            Rev. Moses Kuikahi,

            John Paulo,

            Pilipo Pali.

Maui Waena—

            M P Waiwaiole.

            Rev Nawahine,

            W S Maule,

            Mrs. K Brown.

Molokai—

            A K Laumana,

            J N Uahinui,

            Rev. D kaai,

            J Nakaleka.

Oahu—

            Rev. E S Timoteo,

            “ J M Ezera,

            S K Mahoe,

            E P Aikue.

Kauai—

            Rev. E S Timoteo,

            Wm. Huddy,

            Willie Ellis,

            John Kekina,

            J K Kahuniai.

 

Komite Hookipa a me Malama I na Haumana Kula Sabati o ka Paeaina.

 

Hawaii—Na haumana Kula Sabati o Puna, Rev. E M Hanuna.

Na haumana Kula Sabati o Hilo, D Kahaulelio.

Ko Hawaii Akau, Rev. J. Kalino.

Hawaii Kom., Rev. M. Kuikahi,

Oahu—Na Kona me na Koolau, J S H Kaleo me Rev. Kapu.

Kauai Hikioa a me Komohana, Pilipo Pali a me A K Laumua.—

Lahui, Hawaii.

 

UA NALOWALE

            I kekahi wahi o ke Alanui Kuakini a me ke Alanui Nuuanu he kuka koa Inverness, i uhi ia me ka pale ailika a me na pihi kalaunu Hawaii.  Iloko o kekahi eke he papale haulaula me kekahi kainaka holu kikokiko keokeo. E oluolu ka mea I loaa ai keia kuka koa e hoihoi mai i keia keena.