Ke Aloha Aina, Volume VIII, Number 25, 21 June 1902 — Page 1

KE ALOHA AINA

 

BUKE VIII.   HONOLULU, POAONO, IUNE 21, 1902.  HELU 25

 

E WAIHO LAKOU I NA HANA PILI KALAIAINA.

 

            E like me na kanoha i loaa mai nei mai Amerika Huipuia e kukaawale loa aku na poe paa oihana aupuni mai ko lakou komo ana aku iloko o na hana pili kalaiaina, eia na luna aupuni kiekie o ke Teritori ke hoouna nei i na palapala a puni na mokupuni i na keena aupuni a pau a lakou e noho mana nei e hai aku ana aole loa e lawelaweia kekahi pili hana kalaiaina e kekahi mea maloko oia mau keena, o keia iho ka leta a ka Puuku Wright ia J. W. Pratt ka Luna Auhau Nui, a oia ano leta hookahi ka i hoouna ia aku ma na keena aupuni a pau:

J. W. Pratt, Esq., Luna Auhau.

            Aloha oe:--O ka makemake o ke Kiaaina o na luna aupuni ame na poe hana aupuni a pau e hooki lakou mai ke komo ana aku e lawelawe i na hana pili kalai aina ma keia kau paio kalaiaina e nee mai nei.

            E oluolu oe e a'o aku i na luna a me na poe hana a pau maloko o kou keena i keia manao.

W. H. WRIGHT, Puuku.

            Maloko o keia kanoha ne nui na loli ano nui e ike ia nei maloko o ka poai o ka aoao Repubalika, no ka mea he hapanui o na luna nui o loko o keia aoao kalaiaina he poe hana apuni.

 

EIA AE O KALANI AIMOKU.

 

            Ma na hoike i loaa mai nei ma ka pule mua o keia mahina aku e hehi hou mai ai na kap@ai o Kalani Aimoku i ke one o Kakuhihewa nei mahope o kona kaawale ana aku no kekahi mau mahina loihi.

 

BILA KAA HAPAUMI.

 

            Wasinetona, Iune 10 I keia la i waiho aku ai o Sentoa Burton he bila e apono ana i ka hoohana ana aku o ka Hui Kaa Hapaumi Hawaii i ka uwila.

            Wasinetona, Iune 11  Eia o Wilikoki a me C@ypless ke hooikaika nei no ka pono o ka bila kaa napaumi, aka, ua manao ia aole no e holo ana.

 

EIA AKU KEIA KOMISINA A HOEA MAI 1,000,000 KA AMERIKA E KOKUA AI.

 

No Ka Huli Pono ana Ina ua Hiki ia Hawaii ke Hooponopono Nona Iho.

 

            Wasinetona, Iune 6.  Eia he mau olelo i hiki ke hilinai ia ua hookohu aku la o Peresidena Rusevala ia Richard W. G. Welling, he loio no no Nu Ioka, a he hoaloha oiaio hoi no ka Peresidena i Komisina no ka holo ana aku i Hawaii a me Pilipine e noii pono ai a hoike mai iaia i ke kulana e pili ana ia mau panalaau.

            Ua haalele aku o Mr. Welling ia Nu Ioka i keia wa, a ua manaoia e kaawale aku ana oia no kekahi mau mahina lehulehu.  Aole he maopopo o kona alahele i hele aku la ma ke ala aku paha o Kapalakiko a kau aku maluna o kekahi mokuahi no Honolulu, a i ole mai Nu Ioka paha no Europa ma kona alahele no Pilipine.

            E huli pono aku ana o Mr. Welling i na kumu i ala mai ai kekahi mau hana ekaeka nana i hoohikilele i ke aupuni.  E hoao pu aka ana oia e huli i ka oiaio e pili ana i ka hoopiha ia o ka opu o na kipi Pilipine i ka wai, e na aliikoa Amerika i wahi no lakou e hoike ae ai i na mea huna.

            O Mr. Welling, wahi a na hoike i loaa mai la, ua loaa iaia ka mana piha o ka noii ana aku i na mea a pau me ke akahele loa a o kana mau hoike e hoouna pololei mai ana oia i ka Peresidena.  E huli pono aku ana oia i ke kulana o na kanaka ma Pilipine.

            E huli pono aku ana o Mr. Welling i na kumu i ala mai ai kekahi mau hana ekaeka nana i hoohikilele i ke aupuni.  E hoao pu aku ana oia e huli i ka oiaio e pili ana i ka hoopiha ia o ka opu o na kipi Pilipine i ka wai, e na aliikoa Amerika i wahi no lakou e hoike ae ai i na mea huna.

            O Mr. Welling, wahi a na hoike i loaa mai la, ua loaa iaia ka mana piha o ka noii ana aku i na mea a pau me ke akahele loa a o kana mau hoike e hoouna pololei mai ana i ka Peresidena.  E huli pono aku ana oia i ke kulana o na kanaka ma Pilipine a me na Paemoku Hawaii i ko lakou mau aupuni ponoi iho.

            Aole he mea i hoopua ia ae no keia misiona a Mr. Welling maloko o ka pohai o na luna aupuni, a he kakaikahi wale no o na hoaloha pili kokoke loa o ka Peresidena i maopopo i keia huakai.

            Ua olelo ia ae e hoohala ana o Welling he eha mahina ma keia huakai hanu mea huna pohihi, a o ka panina o kana misiona oia no ka lawe ana aku o ka Peresidena i kana mau apono imua o ka Ahaolelo e pili ana i ke aupuni kupono no Pilipine a me Hawaii no keia mua aku.  O ka iini nui o ka Peresidena oia ka loaa ana aku iaia o na hoike oiaio e pili i ke kulana ma na Paemoku Hawaii, a pela hoi me na panalaau e ae o Amerika Huipuia.  He lehulehu na manawa o Mr. Welling i hoea mai ai i Wasinetona ma kela pule aku nei.

            Nu Ioka, Iune 6  O Richard W. G. Welling, he loio oia me kona keena ma alanui Wall 2, a e noho ana ma alanui Park 46.  Ua loaa mai na hoike mai kona keena mai ua haalele iho oia i keia kulanakauhale a aole hoi e huli hoi koke mai ana.  O ke kakau olelo nana i hoike ae i keia mea huna i keia po he manao kona ua hala aku o Welling no Europa, aka, o kona wahi nae e loaa aku ai aole he mea i maopopo.

            He 40 ka nui o kona mau makahiki.  He 6 kapuai kona kiekie a maluna aku o 200 paona kona kaumaha.  He lala oia no loko o ka ahahui City Club, no kekahi mau makahiki a me kekahi manawa ua lilo oia i lunahoomalu @ ke komite hooko o keia ahahui.  Ua puka pono mai o Mr. Welling mai ke Kula Nui Harvard mai i ka wa hookahi me ka Peresidena.

 

            Wasinetona, Iune 11  O Senatoa Foraker, mai ke Komite o na Paemoku Pakipika, ua hoike ae oia he hoololi ka i hanaia maloko o ka bila haawina e hookaawale ana he $1,000,000 no ka uku ana i na poho o na poe i hoopoino ia ko lakou mau waiwai ma ka hoao ia ana ai e hoopio i ka ma'i bubonika ma kekahi hapa o Honolulu i ka 1899 a me 1900.  O ke Kiaaina a me Kakauolelo o ke Keena Waiwai o Hawaii @a loaa la laua ka mana o ka hoopuka ana i na bona o $500,000 no ka uku ana i na koi me keia pakui o keia ka huina i kaupalenaia koi a pau.

 

WAIHO NA IWI OIA KOA HAWAII I KA AINA E.

 

            Okalana, Iune 11.  O Samuel K. Richards, ke kanaka Hawaii mua loa i komo iloko o ka oihana kaua o Amerika Huipuia ma ke ano he koa e kue ana ia Sepania, ua make oia i ka haukipila o Alameda ne kahi ona i lawe ia mai ai no ka lapaau ana.

            Ua komo mai o Richards he koa no ka puali C, o ka regimana 49, ma ka la 3 o Feberuari, 1900, a ua hookuu maikai ia oia ma ka la 30 o Iune, 1901, i ka wa i hoopau ia ai kona regimana.  Ma Honolulu oia i komo ai i ka oihana koa i kona wa he 22 makahiki, ua alo oia iloko o na hakaka ana ma Pilipine, a na ka ikaika wela o ka la o keia wahi, i hoonawaliwali mai ia i kona ola kino a lilo i ma'i puuwai.

            Ma ka hora 2 o ka auina la apopo e hoolewa ia aku ai kona kino make mai ka hale hana kupapau aku o Albert Brown.  E hoohanohano ia ana kona huakai hoolewa e na koa a ma ka ilina o na k@a ma Mountain View Cemetery, e kanu ia ai oia.

 

            Ma na lono i loaa mai nei ma ka mokuahi Alameda e haalele aku ana ka Elele Wilikoki ia Kapalakiko i keia Poaono, Iune 21 a e hoea mai ana i keia Poaono aku.