Ke Aloha Aina, Volume VIII, Number 25, 21 June 1902 — Page 4

KE ALOHA AINA

 

4  KE ALOHA AINA, POAONO, IUNE 21 1902.

 

Ke Aloha Aina

 

Hookumuia no ka Pomaikai o ka Lehulehu, a he Nupepa no ka Lahui Hawaii.

 

EDWARD L. LIKE, Lunahooponopono.

JOSEPH K. LIKE, Luna Hoopuka.

ALEX NAWAHI, Luna Hoohana.

EMMA A. NAWAHI, Puuku o KE ALOHA AINA.

 

PUKA PULE.

 

E hoopuka ia ana ma na kakahiaka Poaono a pau.

 

No ka makahiki,          $2.00

No ka Eono Mahina    $1.00

No ke Kope Hookahi    .05

 

KEENA HANA.

 

            Ma alanui Moi, Leleo, Helu 370 Kokoke ma ka Hale Hoolulu Kaaahi.  Pahu Leta 513.

 

HONOLULU,            IUNE 21, 1902

 

            E HELE mai ana kahi poe ma keia hope aku me na lima huluhulu e like me ko Esau; a e walaau mai ana kahi poe me ka leo, o ka leo no nae o Iakopa, aka, e uhi ia ana na maka i ka uhi maka i ike ole la aku.  E makaala i na poe o keia ano no ka wa e hiki mai ana.

 

      O KA hookaawale ia ana o na poe paa oihana aupuni a pau mai loko aku o ko lakou noho mana ana ma na Mahele a me na Apana Koho Balota a puni ka Paeaina, he hana naauao maoli no ia a ka Peresidena i hana mai nei.  Oiai, ua lawe maoli ae no na luna aupuni o kakou a upiki i ka mana iloko o ko lakou mau maiuu me ka hoohaiki maoli no i ka pono kiwila o ke kanaka, me ka lawelawe pu ia o na hana kipe i mea e kuai ia ai ka manao kuokoa o ke kana e huli aku a koho i ko lakou mau balota.  Nolaila, he ma'i ahulau nui keia i pahola iho la maluna o ka aoao Repubalika i keia wa, a e maha ana no hoi ka lehulehu mai keia mau hana lima nui mai a keia poe.

 

      INA e lokahi ana ka aoao lahui ma keia kau ae, e koho i poe kupono i noho ia e ka uhane o ka hoopono, ka mana kuokoa, a paulele e hooko ia na mea a pau e loaa ai ka pono i ka lahui, a e pomaikai pu ai hoi ka aina me na hana hoowaiwai a holomua ma keia hope aku; alaila, e mau no auanei ke kawelewele ana o na oiwi ponoi o ka aina ma ka noho ana e lawelawe i na oihana aupuni, ake, i nahili hou mai no ke koho ana i na poe i ike ia he hemahema aole i lawa ka makaukau me ka eleu no ka hele ana mai e paio no ka pono a me ka pomaikai o ka lehulehu, aka, no ko lakou mau pono ponoi wal eiho.  Ke olelo nei makou, o keia ka hope loa nou e Hawaii ponoi, a e lanakila ana na malihini maluna ou.

      MAI ka mea kakau mai o ka Boletina ma Wasinetona i loaa mai ai ka hooia mahope iho no ka la 9 nei:

      "I keia la i hooholo ai ke Komite Senate no na Paemoku Pakipika e waiho aku i kekahi hoololi i ka bila laulaha o na haawina dala lawa ole e uku i hookahi miliona dala no ka koi poho ahi a e hoomana i ke Teritori e hoopuka i mau bona no ke koena aku, e ukuia mai na loaa i nei mua aku."

      No makou iho o KE ALOHA AINA nei, ua lawa keia hooia ae la no kakou a pau e hoakakuu iho ai i na manao hopohopo e pili ana i ka loaa kokua ole mai ia Amerika Huipuia mai.

     

KE PAU MAI NEI LAKOU NEI I KA HAALELE.

 

      Ke haalele maoli mai nei kahi poe, a ke hoopau maoli ia mai nei hoi kahi poe "paa oihana aupuni" e noho nei iloko o ka Aha Komite Kuwaena o ka aoao Repubalika.  O ka makemake o ka Peresidena o Amerika a i a'o maoli mai nei i ke Kiaaina a me na Luna Aupuni Kiekie o ke Teritori nei, aole e hoohuikau wale na poe e paa ana i na oihana aupuni me na hana kalaiaina (oia hoi na hana pili balota).  "Ke kohu ulu aaiole mai nei hoi na poe kakoo oia aoao i keia mau la."

      Eia ka mea e hoomaopopo ia aku nei, ua waiho aku kekahi poe o keia Komite no ia kumu ae la, a o kahi poe hoi he haalele maoli no mamuli o ka lokahi ole o ko lakou mau manao kekahi a me kekahi, oiai, aia iloko o keia Komite he poe kakoo ia Dole a o kekahi hoi he poe kue loa ia Dole.  Eia iho ka papainoa o na poe i waiho mai la i keia mau la:  McCant Stewart, A. V. Gia, J A. Kennedy, B. H. Wright, Kale Wilikoki, Anaru Cox o Waialua, J. H. Boyd, Sam Johnson.

      Aohe i laua aku ka poe i koe e haalele iho ana, a he ma'i ahulau nui keia e palahalaha aku ana ma na wahi a pau o na apana kuaaina.  Aole io no i kupono na luna aupuni e komo pu mai e pulapu i na hana koho balota, pela i iulu nui mai ai ka uluaoa iwaena o na luna kiekie o ke aupuni e like me ia i ike ia iho nei ma kela makahiki i kaahope aku la.  Hoohaahaa mai kahi kiekie i kahi, a nui ko lakou haunaele a hoouluhua pu aku la i ka Peresidena o Amerika.

 

LOAA KE DALA NO KA KOI POHO AHI.

 

      He lono ka i loaa mai he mau la mamua aku nei mai kekahi mea i hilinaiia ma Wasinetona, ke kahuapoo [content unreadable] aupuni makua, e hoike mai ana aole e loaa mai ana kekahi haawina dala e kokua ai i keia Aupuni Teritori i ka hookaa ana i na olelo hooholo a ke Komisina Poho Ahi.  Eia ka he lono palaueka wale no keia.

      Ma ka mokumahu Siera o ka Poakolu nei i lohe hou ia mai ai ua hoike aku ke komite iaia ka noonoo ana no na koi poho pauahi o Hawaii nei i ka Ahaolelo Nui i ke kupono e hookomoia kekahi puu dala, he $1,000,000 ka huina, iloko o ka bila haawina.  A o kekahi hoi, e haawiia mai ka mana i ke Teritori nei e hoopuka i mau bona aie dala no ka huina aku i koe e hiki ai ke hookaa piha ia na koi poho pauahi o kakou nei.

      Ke hele a loaa mai ka hooiaio loa ia o keia lono ano nui ma keia mua koke iho, alaila, e loaa ana ho he wahi kahoaka no ka loaa koke mai o ke dala.  Nolaila, ke uwalo aku nei makou i na poe oiwi i hoopilikiaia e hoolohe i na a'o ana a KE ALOHA AINA i hoopuka ai mamua iki aku nei.  E manaolanaia o ka malamalama koe a hoea mai.

 

AOLE HE OIAIO O KELA MAU LOHE.

 

      E like me na mea i hoolaha ia maloko o ke Kuokoa e i ana:  Ua wae ia ka inoa o Rev S. L Desha oia kekahi moho Senate na ka aoao Repubalika no keia kau ae.

      Ua loaa mai la ka hoike i ko makou keena nei e hoole ia mai ana, aohe oiaio oia mau mea i hoolaha ia pela (i hea auanei kahi i wae ia ai).  Ua makemake maoli na haole Repubalika e lawe k kona inoa a me Parisa i mau moho na lakou; aole nae oia i haawi aku i kona ae, o ke kumu; ua manao no oia, he mea pono na kona lahui oiwi ponoi no oia e wae ae i kona inoa a i ole e waiho iho paha, a i manao lakou e kakoo iaia ua hiki.

      Ua lohe pu mai no hoi makou he maikai no ka manao o na hoahanau no kona holo Senate, a he ikaika pu hoi kona inoa ma na Kona.  Ina o ka iini nui o ka lahui e loaa i poe kupono iloko o kela mau Hale "i hiki ole ke kipeia" a i kanaka e hana ana i ka pono kaulike o ka lehulehu, mai ka waiwai a ka ilihune, mai ke kiekie a ka haahaa ke ole hoi e nana i ka aoao kalaiaina.  Ke manao nei KE ALOHA AINA, e loaa no ia kakou ka hilinai ana, o Rev S. L Desha (Kiwini) o Hilo, kekahi o na kanaka kupono e wae ia e kona lahui e hoouna mai i mea hana no ka pono ma keia kau ae, oiai, aia iloko o kona ekalesia he mau Repubalika a he poe aloha aina pu.

 

NA HAWAII E HOOPONOPONO NONA IHO

 

      Ina he oiaio keia mau hoike mai Wasinetona mai ua hoouna mai la o Peresidena Rosevala ia Richard Welling kekahi o kona mau hoaloha oiaio, e hele mei e nana i ke kupono o na poe e noho ana ma Hawaii nei e hooponopono i ko lakou aupuni iho, a pela hoi me Pilipine.  Ma ka hoomaopopo ana aku i keia manao o ka Peresidena, me he la, e hoihoi hou mai ana oia na Hawaii e hooponopono iho a o kana wale no ka noho hoomalu mai, e like me ka noho kuokoa ana ae la o Cuba.  Mai luna lilo wale mai no keia ina o ka manao ia o ka Peresidena.

 

HE AHAMELE UWILA MAKENETI.

 

      Ma ka Hale Halawai o na Pokii ma ka Relief Camp No. 2, Kauluwela, ke hiki aku i ka Poaono, Iune 21.  E loaa no na tikiki ma ka lima o na lede o ka Pualiokealoha.  E hoomaka ana na hana i ka hora 8 p.m.

 

MAHELE 1.

 

Chorus --E ala e Kauiuwela no ka pono,   Charity Army.

Trio--Honani ka ua i Hilo Hanakahi, C mahi, Miss Annie, S K Kamakaia.

Conet Solo--O Maui no e ka oi,    S K Kamakaia.

Solo & Chorus--Welo eka Hao-Alu ka Uwea Charity Army.

Duette--Flute & Gita.  "Iahu la oe maanei,"    Bily Pos y S K Kamakaia.

 

MAHELE 2.

 

Chorus--E nai wale no oukou i kuu pono aole pau,      Charity Army.

Trio--E ka lahui Hawaii oiwi ponoi,   C Mahi, S K Kamakaia, Miss Annie.

Cornet Solo--E Kaililauokekoa e, ua moe oe,       S K Kamakaia.

Quartette--Pali ma ke kua, Mahina ma ke alo ,     C Mahi, emele, Annie, S K Kamakaia.

Solo & Chorus--

      E hoi i ka olu-hiu

      I ka luna iu o Kauluwela-wela

      Ilaila ae ike ai--sure

      Wela e ka Hao-Alu ka Uwea.

 

      Na loaa no kekahi mau hemahema oia puali.

      He oiaio me ka hoohewahewa ole ia e puka mai ana ke gula me ka daimana ma Kauluwela, ke ku mau aku kela hana haipule e malamaia nei e ko kakou hoaloha Rev. S. K. Kamakaia, a no ka nani o ka inoa o ko kakou Haku aloha o Iesu, ke kono aloha ia aku nei na hoaloha e makee ana i ka hooholomua ana i na hana pono a ko kakou hoaloha oiaio, e alakai mai nei i kahi mau mahele i manao ole ia e oili mai ana kekahi mau mea maikai.  E hoomanao pu ia hoi, he mau kahuli leo lea hou o u ae no kekahi mawaho ae o ka Pualiokealoha, oia hoi, ke ole he mau kuia e komo pu ae ana ma ia ahemele, ka ipu kukui pio ole i ka makani he Kauaula, oia hoi he mau opio wae o ke kula kaulana o Lahainaluna, "The Nighting Glee Club."  A malia he mau kahuli leo hou ae no kekahi.