Ke Aloha Aina, Volume VIII, Number 29, 19 July 1902 — Page 5

KE ALOHA AINA

POAONO, IULAI 19, 1902.

 

KA MAKAIKIU DAVID KAAPA

 

Ka Hanu Meheu Pohihihi ma ke Alahele o na Poe Haihai Kanawai.

 

            Eia makou ke hoopuka aku nei he moolelo oiaio no kekahi mau hana kaulana i lawelawe ia e David Kaapa i keia mau la i hala iho la, a i kupono loa hoi e kapa ia aku ka makaikiu kupaianaha o na Ailana Anuenue, a e kauia oia ma ka papa kiekie o na makaikiu kaulana o ka honua nei ma ka imi ana i na meheu pohihihi, a penei ka moolelo e pili ana nona.

            He mau po i hala ae nei ua komo ia iho la keia mau hale noho, a ua lilo aku i ke kolohe keia mau waiwai malalo iho nei mai ka home aku o S.F. Chillingworth, makuakane o ka Hope Maki Nui chillingworth, kihi o alanui Nuuanu a me kula, ua puehu aku he 1 pila gita, 1 pila ukulele, 2 pahi waiu bata dala, 11 puna dala a me $4.50 ma ke dala maoli.

            Miss V. @Alpio, kii o halanui Moi a me Piikoi, ua lilo 1 pine gula, 1uwati hoala hiamoe a me $2.50 ma ke dala maoli.

            Isaac L C ckett, Kalihi, ua lilo 1 uwate dala me 4 paa nihi, no Mrs. Cockett, 1 uwate dala, 1 paa kupee lima gula a me 1 kaula uwati dala.

            Edward L. Like, Luna hooponopono o Ke Aloha Aina, alanui Moi, ua lilo he 1 uwati dala, Mrs. L. K. Like 1 uwate gula, Chas Sach 1 uwati dala me $100 ma ke dala maoli.

            Kauka Oyama, lilo he 1 uwati gula a me 1 kaula uwati gula.

            O keia mau hale i komo aihue ia ae la, aole he hookahi o lakou i ike i ka mea a mau mea paha nana keia mau hana kolohe, oiai lakou e kala ia  ana e ka hiamoe kulipolipo, a ua komo mai hoi ka aihue ma na puka aniani. Ma ka home nae o ka makou lunahooponopono i ike ia ai ai he meheu lepo o kekahi mau manamana wawae o ka aihue e kau ana maluna o kekahi nupepa a ua aihue nei i mahui ole ai he meheu ia nana e hahao aku ana iaia iloko o na umii paa ana a ke aupuni.

            O keia mau manamana wawae hookalakupua o ka po a me na waiwai i lilo i ke kolohe, ua hoike ia aku ia ia Makaikiu David Kaapa me ka manaolana ole ia e loaa hou ana kekahi oia mau waiwai i aihue ia. Ma ka nana akahele ana a ka makaikiu i keia mau manamaa wawae ua ike iho la oia aole keia he mau manamana wawae no kekahi kanaka komo kamaa mau, a i kona huli ana ae a noonoo i na lahui komo kamaa nui ole ua haupu ae la oia he Hawaii a i ole he Porto Rico ka mea nana keia mau aihue i hana maluna o keia mau hale.

            Alaila, me keia hiohiona pohihihi ua huli ae la oia a hookolo aku la mahope o ke kolohe nona keia mau kapuai. O ke alahele noeau a D.Kaapa i hooko aku ai no ka hanoano o kana oihana oia no ka hopu ana i na Porto Rico hana ole a pau e hele wale ana ma ka alanui ma ke ano aeahaukae, Iwaena o keia mau Porto Rico i hopu ia no ka aeahaukae ua loaa aku la he pahi ma kona home i kulike loa me na hoakaka o ka pahi i aihue ia mai ai mai ka home mai o S.F. Chillingworth.

            O ka loaa ana o keia pahi i ka makaikiu na ia mea i alakai aku i ka meheu pololei o ka mea nana i lawelawe i keia mau hana aihue. Ua lawe kokeia aku ua Porto Rico ala no ka halewai e ninaninau ia ai me ke oolea, a i kona ike ana ua hiki ole iaia ke huna hou iho ua ae aku la oia nana i lawelawe i keia mau hana aihue, a o keia mau waiwai nae aole ia ma Honolulu, akak, ua lawe ia aku e kekahi Porto Rico okoa i Kauai e kuai ai ma ka Poalua Iulai 8, e like me ka hoike a keia Porto Rico, ma ka Poaha ae maluna o ka Mikahala i kau aku ai o Makaikiu Kaapa no ka imi ana i keia Porto Rico me na waiwai aihue malalo o kona malu.

            O Lihue kahi a Makaikiu David Kaapa i kipa mua aku ai, malaila ua komo huli aku la oia ilkoo o na hale o na Porto Rico, a loaa aku la ka uwati hoala hiamoe i aihue ia mai kahi mai o Miss Mc Alpin, a me ka pila gita a me ka pila ukulele i lawe ia mai kahi mai o S.F. Chillingworth, aka, o ka mea nana i lawe aku i keia mau waiwai aihue ilaila, aole @@@ ma Lihue ma ia manawa. Mai na hoike i loaa mai na hala aku ka mea ana e huli nei no Koloa, aole ka makikiu i haawi aku i manawa no ke kolohe e pakele ai mai iaia aku, nolaila, me ka hoohakalia hou ole iho, ua hiki aku ia oia i Koloa a hopu aku la i ka Porto Rico a lawehala hoi ana i alo aku ai i na alo hanupanopa o Kaieiewaho no ka hooko ana ia ka hanohano o ka oihana ana e paa nei.

            Maoloko o ka poli o ka Porto Rico i loaa aku ai ka uwati a ko makou lunahooponopono, E.L. Like a me ka Mrs. Like, a hoihoi hou ia mai ia ke kolohe no Honolulu nei, a ke paa nei ka aihue a me ka kokua aihue ma ka halewai no ke kali ana i ka hoolohe ia ana o ko laua hihia ma ke kiure o Augate ae nei. O ka inoa o ka Porto rico nana keia mau hana aihue makau ole o Cecilio Ortiz a o ka mea iaia na waiwai ai hue i hopu ia ai ma Kauai o O.Carpa.

            O ka uwati a ko makou lunahooponopono he waiwai ia i hooilina ia mai iaia e kona makuakane mamua o kona make ana, o ka nui o na makahiki o keia uwati mai kona wa i kua ia ai he aneane no ia a piha ke 30 makahiki. He uwati keia i minamina nui ia e ko makou luna hooponopono i hiki ole ke lilo no na kumukua i nui a he hoapili nona ma na wahi a pau ana e hele ai.

            O ke a ʻ o a ka Makaikiu David Kaapa ia makou a i ka lehulehu e akahele loa oukou i na Porto rico kalewa kii a i ole e hoea aku ana paha imua o oukou ma kekahi ano e no, no ka mea, aole maoli ia o ko lakou iini o ka lilo aku o ka lakou mau mea kua, aka, i wahi no lakou e maopopo ai i ka hale hiki ia lakou ke aihue a me ka hale hiki ole, ka hale ilio a me ka hale ilio ole.

            O keia hana i lawelawe ia ae la e keia makaikiu Hawaii he kaulana no ia e kupono loa ai i ke aupuni ke hoopii hou ae i kona uku mahina, no ka mea, ua hoike maoli mai oia i kona makaukau piha ma ka imi ana i na meheu pohihihi o na poe haihai kanawai. E hoomaopopo ia ma Honolulu nei i lawelawe ia ai na hana aihue ma Kauai nae i loaa ai na waiwai i aihue ia.  Hanohano ka Oihana Makaikiu Hawaii i na kanaka hanu meheu pohihihi e like ala me Makaikiu david Kaapa. A nou ko Ke Aloha Aina haaheo mau ana.

 

E PONI IA ANA KA MOI EDEWADA VII.

 

            Ladana, Iulai 7. E poni ia ana ka Moi Edewada mawaena o ka ll o Augate a me ke la 15 o Augate.  Ke pii hikiwawe nei kona oluolu, a pela i hoea mai ai ka olelo hooholo maluna ae nei, aole i hoopukaia mai na hoolaha aupuni. O na huakai hookahakaha ma na alanui a me ke anaina pule ma ka Weseminisita Abe e hoopokole ia ana. E holo mai ana na Moi mai ka Halealii Bakinehama mai ma ka Mall a ka Whitehall, alaila no ka Abe, o ke alahele a keia hua kai e lawe ae ai e like no ia me ka wa i wehe ia ai ka Ahaolelo.

 

UA KU MAI KA MOHIKANA.

 

            O na manao hopohopo no ka halawai o ka mokukaua Mohikana me kekahi ulia poino ma ka moana, ua hoopau ia ae ia i kona wa i hookomo mai ai i ke awa o Kou nei ma ka Poakolu nei.

            O ke kumu o kona ulolohi loa, mamuli no ia o kona puhi ia ana e na kikiao makani ikaika mai kona alahele pololei e hiki mai ai i Hawaii nei. Ua kipa ae oia ma Dutch Harbor mamua o kona hoomau hou ana mai no Honolulu nei. Ua haalele aku oia ia Iokohama ma ka la 26 aku nei o Mei.

 

Palapala Hooia Hoahu. E like me ia i Hoopukaia e ka HUI HAWAIIAN REALTY A ME MATURITY KAUPALENAIA. Hoahu Maraki 30, 1901. Huina Waiwai $50,000. 5,000 Mahele; $10.00 Pakahi; uku pau ia

 

Heaha na Kumu?

1. aole makou e koi aku ana ia oe e uhaai i kau dala.

2. E haawi ana makou i kekahi ala hele palekana e hiki ai ke hoopuka puka a loaa ke dala mamuli o ka hoohui i na huina liilii i kela a me keia mahina, a mamuli o ia mea, e koe ana he huina dala mai ka hoolilo la ma kekahi ano e ae, a e loaa ole ana ia oe kekahi wahi pomaikai mai loko mai oi mea.

3. O ka nui o na makahiki a me ka oihana a hana a ka mea hoahu, aole loa ia he kumu hoanaoe a hoololi, no ka mea, ua hiki i na kane, na wahine a me na keiki ke lilo i poe hoahu.

 

HOOIA HOAHU

4.Na makou e kukulu i mau hone no oukou a e hoopuka no ho makou i Huina Hoahu Hoopukapuka e hookaa ia iloko o 75 mahina, me eha (4) Palapala (coupons) Hooia  $50 pakahi i hoopilipuia, oka averika no ka puunaue ilko  19 mahina, a e ohi ana makou $150, a e loaa ana ia oe $200. O kou puka #33.33 no kela a me keia dala pakahi i hoahu ia e loaa ana ia oe he 33-1-3 keneta puka .

5. No ka mea oale oihana hoopukapuka i ikeia i oi aku ka pomaikai ma mua o keia. e kakau mai i na hoa kaka piha. E hauoli mau ana ka Hui e hoike a e hoakaka piha aku i na mea a pau a me na lawelawe ana ke makemake ia, ke kakau ia mai ma ka leta a ke ninau kino ia mai

HUI HAWAIIAN REALTY A ME MATURITY KAUPALENAIA.

McIntyre Hale kihi o na Alanui Papu a me Moi. Rumi 3 a me 4. Pahu Leta 262.

L.K. KENEWELA, Peresidena.

 

HOOLAHA KUAI A HOOKO A KA MEA PAA MORAKI.

 

            No ka hooko ana aku i ka mana o kekahi moraki i hana ia e Manuela, vierra Branco o Honolulu, Mokupuni o Oahu, Teritori o Hawaii, (Paeaina Hawaii), i ka Portuguese Mutrua Benefit Society, he ahahui i kukulu pono ia a e ku nei malalo o na kanawai o ke Teritori o Hawaii, i hanaia ma ka la 13 o Novemaba, 1899, a i hoopaa ia ma ke Keena Kope Aupuni ma Honolulu, i olelo ia buke 196, ma na aoao 482, 483 a me 484, ke hoolaha ia aku nei ma keia he manao ko ka mea paa moraki e paa i ua moraki ala i olelo ia no ka uhakiia o ka aelike, oia hoi, ka ulu oleia o ka ukuanee i kona wa uku.

            Ke hoolaha hou ia aku nei ma keia mahope o ka hala ana he ekolu pule mai ka la i puka ai keia olelo hoolaha, o ka waiwai i hoakaka ia maloko o ua moraki ala i oleloia, e hooliloia aku no ia ma ke kua kudala ia ana ma ke keena kudala o James F. Morgan, ma Honolulu, i oleloia, ma ka Poaono, la 2 Augate 1902, ma ka hora 12 awakea o ka la i olelo ia.

            No na mea i koe e ninau ia.

J.M. VIVAS.

Loio i ka Mea Paa Moraki.

Honolulu, Iulai 10, 1902.

 

NA WAIWAI I HOAKAKAIA MALOKO O KA MORAKI:

 

            O kela apana a mahele aina a pau e waiho ana ma Kaliawa, ma Kalihi, Kona, Mokupunai o Oahu i oleloia, nona ka ili aina 5 28-100 Kuea Kauiahao, o ka Apana 1 o ka Palapala Sila Nui Helu 4136, ililo aku i ka mea moraki ma kekahi palapala kuai i hanaia e Joaquim Gomes de Medeiros ma ka la 10 o Nevemaba, 1899.

            Iulai 10, 12, 19, 26, 30. Aug. 1

 

CAMARA & CO.

Kihi o Alanui Alakea me Moiwahine.

 

MEA KUAI

WAINA, BIA ME NA WAIONA

Na Kauoha a pau e Hooko ia no.

 

NA BIA BUDWEISER, RAINIER ME PRIMO.

PAHU LETA 664. TEL. BLUE 492.

 

Eia maanei o W. Rice, kekahi o na Hawaii i noho loihi me Frank Brown.

 

HALE INU RAMA BOSETONA.

Alanui Hotele ma Ewa o Alanui Nuuanu.

Eia me makou na wai hoomalule, kino e ko ʻ u ai ka puu Wisike, Gini Bia, a pela aku.  Nona ka inoa i hooheno ia Elua kaua i ke Ala Mokihana. E ike ia kaua hoa kanaka he Hawaiia au, Hawaii oe hipuu paa i ke Aloha a mai poina i kou io ponoi me ke Aloha.  Eia ma keia hale ko oukou makamaka Hawaii. R.W. Davies, a ua iini e halawai me oukou.