Ke Aloha Aina, Volume VIII, Number 51, 20 December 1902 — Page 6

KE ALOHA AINA

 

POAONO, DEKEMABA 20, 1902.

 

OIAIO KA HOIKE A KA MOE

 

            Redding, Dec. 4.  O Richard William, nona ka hoahanau i piholo ma Little Backbone Creek, ma ka la 18 o Novemaba, ma kela po Poalua aku nei ua loaa iho la iaia he moeuhana pahaohao nana i alakau aku i kahi o ke kino make o kona pokii e waiho ana ma ke kakahiaka Poakolu ae.

            Ma ka auina la o Novemaba 18 oiai o Eddie Williams e paani ana me alua o kona hoahanau a me kekahi hoa paani maluna o kekahi papa i hoomoe ia mai kahi aoao a kahi aoao o ka muliwai uuku o Little Backbone Creek, e kekahi mau limahana o ka hui kaaahi Pakipika Hema, no ke kukulu ana i kekahi uwapo, ua haule aku o Eddie Williams me kekahi o kona hoa paani iloko o ka wai, aka, o kona hoa paani kai pakele aku, a o Williams ua piholo a nalowale oia.

            Ua hoomaka koke ia ka huliia aoa o ke keiki poino e kona mau makua a me na hoaloha a hoea i ka nuku o ka muliwai, aka, aole nae oia i loaa.  Ua hoopuka ia na uku makana no kona kino make no na la lehulehu kona huli ia ana, aole no nae he wahi pomaikai i loaa mai me ka hoopau loa ia o ka huli ana aku iaia.

            Alaila, moeuhana iho la o Richard Williams.  Ike iho la oia iaia e lawaia ana ma kapa o ka muliwai Sakarameto.  Ma kahi he elua mile ma ka hema aku o Kennett ike iho la oia i ke kino make o kona hoahanau.  E heliu ana kona mau maka iaia alaila kaakaa ae la kona mau maka a me he la ua lohe aku oia i keia mau olelo mai iaia mai:  "He huihui loa ka wai e Richard.  Aole anei oe e hoopakele ae ia'u?"

            I ko Richard wa i puoho ae ai ma ke kakahiaka Poakolu ua noonoo nui loa oia i keia moe.  Ua hoomaopopo loa oia i kahi ana i ike ai i kona kaikaina make, he wahi i kamaaina iaia i ka hele ia e lawaia oopu.  Aole ona hilinai i ka moeuhane, aka, ua hookupilikii ia nae kona manao no keia moeuhana, nolaila, ua hele aku la oia e hooko i ka hoike a ka moe ma ka muliwai, a he mea oiaio, aole i piha ka heneri kapuai mai kahi ana i moeuhana ai i kona hoahanau, aia hoi, e waiho ana ke kino make o Eddie Williams.  Ua hoopaa aku oia i ke kino make i kekahi kumulaau me ka hoi aku e hoike i na makua.  Alaila, kau mai la o Richard Williams maluna o kekahi kaaahi no Redding nei a huli hoi aku la me Luna Koronero Green a me ka pahu kupapau.  I keia la i malama ia ai ka huakai hoolewa o Eddie Williams mai ka home aku o kona mau makua ma Kennett, a he nui na hoaloha i komo aku ma kona hoolewa.

 

HE 70,000 E NOHO ALA

ILOKO O KA PILI-

KIA.

 

            Stockholm, Suedena, Nov 28.  Ma na hoike i loaa mai la i keia la aia ke pahola ala ka wi iloko o ka aoao akau o ka aina.  He 70,000 e noho ala iloko o ka wi.  Mamuli o ka nui o ka na, ua uhi ia na mahinaai e ka wai me ke komo iloko o na hale.  He nui na holoholona i haalele ia iluna o na puu panoa, a ua manao ia e pau ana lakou i ka make.  Ma kekahi mau wahi aia na kanaka ke pepehi aia i ka lakou mau holoholona no na kumukuai haahaa loa  O na bipi waiu he $5 a o na hipa he 50 keneta.  Aia kekahi poe ke ai ala i na ili laau a me na hua laau.  Aole he hana e loaa ana i na poe mahi ai i hooneoneo ia e ka wai a ua hiki ole ia lakou ke moraki aku i ko lakou mau aina mahi.  Aia na kanaka o Suedena Hema ke lulu ala he $100,000 ma ke dala maoli no ke kokua ana i na poe pilikia a he 1000 piha kaa me na mea ai.

 

NUI KA PILIKIA MA RUSIA.

 

            St. Peteresburg, Dec. 6.  Mamuli o ka nele i ka hana he nui ka pilikia e ike ia nei maloko o Rusia.  ma Saratoff ke hana nei na kanaka malaila no 15 keneta o ka la.  he nui na puulu o na poe makilo e komo hele ala ma na hale oihana a me na hale noho no ke noi ana aku i ka lakou mau kokua ana mai, aia pu na alanui ke hoopiha ia ala e na poe ma'i a me na poe wi i ka ai.  Oia mau hiona aia ia ke ike pu ia ala ma na kulanakauhale oloko o ka aina.

 

KE KULANA HUNE E IKEIA

ALA MA LADANA.

 

            Ladana, Dec. 6.  O ke anu he oi loa aku loa aku ia i keia kau hooilo, a ke pahola nei iloko o ka aina holookoa.  He mau haneri poe e holo nei i Inia no ka makaikai ana i kekahi la nui e malamaia ana ma laila.  He mau tausani e holo nei no ka Hema o Farani a me na mokupuni Channels.

            O na ahaaina Karisimaka ke hoala ia nei ma na wahi a pau o ka aina no ka hiki ole ke lawelaweia na hana uhai holoholona, a e hoohala ana hoi i ko lakou manawa lealea maloko o na hale a ma na hale keaka.  Ma Ladana Hikina, he okoa ua nanaina malaila e ikeia nei, aia he mau tausani o na kanaka i hooneleia i ka hana e akoakoa ana ma na puka pa o ua uwapo, e aumeume ana i ka hana, a malalo o ke kokua ana a na makai e hiki ai i na luna ohi kanaka ke ohi aku i na aku i mau kanaka hana.

            Ma Ladana Komohana aia na hale keaka, na haleaina a me na wahi lealea e ae ke hala mua nei e na kanaka no ka lealea a me ka hauoli ana a hiki i na hora koliuliu o ke aumoe.  Ma kekahi aoao aia he 600,000 poe e noho ana i ka hune.  O na hale hana lako kaua ma Woolwich, ua hookuu mai oia he 2,000 mikanika me ka liuliu hou ana no ka hookuu hou mai he 4000.  No ka pakui ana aku i keia poe nele hana he 56,000 poe koa kuikawa i hookuuia mai ka oihana kaua mai.  O kahi ikaika loa o ka hune e ikeia ala oia no o Ladana Hikina, ke hoao ala na nupepa e imi i ke alahele e malamaia ai na keiki liilii ke hoolaha i ko lakou mau pilikia, he nui hoi o lakou e ola ana malalo o ke aloha wale mai no o kekahi mau kumu kula.

 

AOLE NA LIMAHANA ASIA E

AE IA ANA.

 

            Wasinetona, Dec. 3.  O ka hoike e kakoo aku ana ke Komite Pakipika a me Porto Rico i ka hookomo ia ana aku o na limahana Pake iloko o Hawaii aole ia he oiaio, wahi a kekahi Komite Senatoa i holo aku nei i Hawaii ma kela kau haule lau aku nei.  Wahi ana he kue ke komite i ka hookuu ana aku i na Pake e komo iloko o Hawaii, ina no e kaupalena ia ana ko lakou nui.

            O na kanaka o Hawaii, o ka oi loa aku no nae o na poe kanu ko, na makemake loa lakou, e hoohui mai me Amerika Huipuia.  Ua hele mai lakou me ko lakou mau maka e kaakaa ana no me na kanawai e hookapu ana i na Pake maluna o ka buke kanawai.  Nolaila, e ai lakou ia laau hookahi e like me kekahi mau mahele e ae o Amerika Huipuia.  Ina he makemake ko lakou i na limahana emi, e imi iho lakou iwaena o na kanaka e noho ala malaila.

            Aole o makou manao e hookomo aku i na limahana emi o Asia ma kekahi wahi o Amerika Huipuia no ka paio ana i na limahana keokeo.  Pilikia loa ua poe kanuko nei, o ka hoopai kupono ia e loaa i na poe ake hoohui aina.

 

UA MANAOIA E PAU LOA ANA

NO I KE OLA

 

            O kela poe i hoehaia e ke kiana pauda a makou i hoike aku ai i kela pule aku nei nana i kaili aku i ke ola o Kekaha me ka mainoino, a e waiho nei ma ka haukipila, eia ke pii mau ae nei ko lakou oluolu, a ke hoomaka mai la ko lakou mau palapu e ola.  O Kalehua ke kanaka opio i kukonukonu loa kona mau palapu ua manaoia e ola ana no oia, aka, me ka maewaewa nae.  Ua lilo aku kekahi o kona mau onohi maka a pela me kona pepeiao. 

 

POWA IA HE KALAIWA KAA.

 

            Mahope o ka hora 10 o ka po La Pule nei na loaa aku la he hoike i ka halewai no ka powa ia ana o ke kalaiwa o ke kaa hapaumi helu 23.  Ma ka hoike a ke kalaiwa k@a iaia me kona kaa ma ke kihi o ke alanui Beritania a me Punahou, ua pii aku la he kanaka i huna i kona helehelena i ka hainaka malalo iho o ka maka a kau aku la i ka waha o ka pu panapana i kona poo.  Ia wa hookahi no na kau mai la he kanaka okoa mahope o ke kaa a hoopaa iho la i ka paleki o hope alaila, hele mai la oia imua a hopu mai la i ke kalaiwa kaa a lawe aku la i na keneta a pau o loko o kona pakeke i hiki aku ka huina i ka $14.25 a me kana uwati.

            Mahope o ka lilo ana aku o na dala ua lele aku la ua mau powa nei no lalo me ke kauoha mai iaia nei o hoomau aku i ka hooholo ana i ke kaa no ke taona.  I ka wa i nalowale aku ai o na powa ua hoi aku la oia no ka hale holulu mawaho o Kapunahou a hoike aku la i kona poino.  Ma ka hoike a keia kalaiwa he hookahi o keia mau kanaka he loihi a o ka lua he poupou, a ma kona manao he mau haole laua a elua.

 

NA UKU O KEKAHI MAU

LUNA AUPUNI.

 

            Wasinetona, Dec. 1.  O kekahi mau itamu o Hawaii e waiho ia aku ana i ka Ahaolelo oia ka uku makahiki o ke Kiaaina he $5,000; Kakauolelo $3,000; Lunakanawai Kiekie me kona mau kokua elua 15,500; na Lunakanawai o na Aha Kaapuni he $23,500; a me $3,000 no na lilo huikau.

            Ua manao ia e holo ana keia mau haawina me ke kanalua ole, a pela me ka itamu o $4,200 no ka uku ana i ke Kakauolelo a me ka mea kakau o ka Aha Apana o Amerika Huipuia ma Hawaii, ma ka $3,000 a me ka $1,200. 

 

HE BEBE ONA MILIONA

 

            Butte, Dec. 1.  I keia ahiahi ua hanau mai la mai ka wahine mai a W. A. Clark Jr., he keikikane, a nolaila ua lilo ae la iaia ka makana o $1,000,000 a Senatoa W. A. Clark i kau ai maluna o kana keikikane mua a i ole kaikamahine paha e hanau mua ana, i moopuna keiki kane nana e loaa no ia bebe kela makana maluna ae.  O kana kaikamahine muli loa o kona hanau ana mai nei no ia ma Nu Ioka; he kaikamahine, nolaila ua nele ia bebe me na pomaikai, aia o Senatoa Clark i Parisa, a ua hoike ia aku iaia ka lohe o ka loaa ana iaia he moopuna kane.