Ke Au Okoa, Volume I, Number 6, 29 May 1865 — Ka Moookuauhau, a he Papa Hoomanao hoi, o na mea kaulana maloko o na mooolelo Hawaii. [ARTICLE]

Ka Moookuauhau, a he Papa Hoomanao hoi, o na mea kaulana maloko o na mooolelo Hawaii.

1832. Mei 17, hiki mai ka puali elima o na Misionari. 1832. Hoolaaia ka hale pule pohaku ma Wainee, Lahaina. 1832. Iune 5, make o Kaahumanu. 1832. Iune, hooliloia o Kinau i Kuhina Nui. 1832. Sepatemaba, hoomakaia ka haunaele e Kaomi. 1832. Holo aku na Misionari, o Alekanedero, Wini, a me Tineka, e noho misionari ai ma Nuuhiwa. 1832. Ua paa ka Papu o Lahaina. 1832. Hoomakaia ke kula pualu ma Mililani, Honolulu. 1832. Dekemaba, holo aku na misionari Katolika i Califonia. 1833. Hoi aku o Kuakini i Hawaii, a noho o Kinau ke Kiaaina o Oahu. 1833. Maraki, hoomakaia ke Au ia Kamehameha III., a o Kinau kona Kuhina Nui. 1833. Mei 1, hiki mai ka puali eono o na misionari. 1833. Iulai 2, holo aku o Alexanedero, Limaikaika a me Pareka i Nuuhiwa. 1833. Kukuluia ka hale pule ma Polelewa. 1833. Make o Kaomi. 1834. Feberuari 9, hanauia o Kamehameha IV., ALEKANEDERO LIHOLIHO. 1834. Make o Kamanele. 1834. Make o Keola. 1834. Feberuari 14, hoopukaia ka Nupepa mua ma Hawaii nei, oia ka Lama Hawaii, i paiia ma Lahainaluna. 1834. Hoopukaia ke Kumu Hawaii, nupepa ma Honolulu. 1835. Mare ia o Leleiohoku laua o Nahienaena. 1835. Iune 6, hiki mai ka puali ehiku o na Misionari Amerika. 1835. Paiia ka Alemanaka mua ma Hawaii nei. 1836. Ianuari 2, hanauia ke Alii Wahine, EMMA. 1836. Hoomaka ia ke kula kaikamahine o Wailuku. 1836. Hoomakaia ke pai ana o kekahi nupepa ma ka olelo Beritania ma Honolulu. 1836. Hoomakaia ke Kula Nui ma Hilo, e Laimana. 1836. Dekemaba, make o Nahienaena. 1836. Feberuari 4. mareia o Kamehameha III laua o Kalama. 1837. Aperila 9, hiki mai ka awalu o na puali Misionari. 1837. Make o Aikanaka. 1837. Puhi ia ka hae ma Kalamakini. 1837. Hoomakaia ka hooponopono ana i na alanui ma Honolulu. 1837. Novemaba 7, kaikoo nui ma na wahi a pau o ko Hawaii nei pae aina. 1838. Hoomakaia ke ao ana i na 'Lii e Rikeke, ma ka Oihana Aupuni. 1838. Novemaba 1, hanauia o Victoria Kamamalu. 1838. Nui ka huli ana o na kanaka i ka pule Calavina. 1839. Aperila 4, make o Kinau. 1839. Aperila 5, lilo o Kekauluohi ke Kuhina Nui. 1839. Ua pau ka Baibala i ke pai ia ma ka olelo Hawaii. 1839. Iulai 9, hiki mai ka manuwa Farani, l' Artemise, Capt. La Place. 1839. Make o Kaikioewa, Aperila 19. 1839. Make o Liliha, Aukake 25. 1840. Hoomakaia ke kula o na alii opio. 1840. Make o Hoapili-kane, Ianuari. 1840. Hoomakaia ke kukulu ana o ka hale pule ma Kawaiahao. 1840. Aukake 8, hoi aku o Binamu ma i Amerika. 1840. Okatoba 8, haawiia ke Kumukanawai mua e Kamehameha III. 1840. Liia o Kamanawa ma. 1840. Hiki mai na moku imi aina o Amerika, o Comodore Wilkes ma. 1841. Make o Kapiolani. 1841. Hiki mai ka iwa o na puali Misionari. 1841. Hoomakaia ke Kulanui ma ka Punahou. 1842. Ianuari, make o Hoapili Wahine (Kalakaua.) 1842. Holo o Haalilio ma i ka aina e, ma ke ano Komisina. 1842. Iulai 21, paa pono loa ka Hale pule ma Kawaiahao. 1842. Sepatemaba 27, hiki mai ka umi o na puali Misionari. 1843. Ae mai ke aupuni o Amerika i ke kuokoa ana o Hawaii nei. 1843. Feberuari 25, lawe o Lo Keoki i ka hae Hawaii, a hoala ae i ka hae Pelekane. 1843. Iulai 31, hoihoi ia mai ka ea o ka aina e Adimarala Kamaki. 1843. Make o Bartimeus Puaaiki. 1844. Ae mai ke aupuni o Belegiuma i ke kuokoa o Hawaii nei. 1844. Novemaba 28, apono mai ke aupuni o Farani a me Beritania i ke kuokoa o Hawaii nei. 1844. Hiki mai ka umikumamakahi o na puali Misionari. 1844. Laweia ke kilika mai Hawaii aku nei, he 197 paona. 1844. Make o Haalilio i ka moana i kona hoi ana mai. 1844. Kohoia i mau Luna Makaainana, malalo o ke Kumukanawai o Okatoba, 1840.

1845. Hoi mai o Rikeke ka Unuhiolelo o hawaii nei me ke kino kupapau o Haalilio. 1845. Make o Kekauluohi. 1845. Ka hoouna muaia ana o ke Kope—248 paona. 1845. Kohoia o Keoni Ana i Kuhina Nui. 1846. Kohoia i mau Komisina e hooponopono i na kuleana aina. 1846. Maraki 20, make o Mi. Wini ma Lahainaluna. I846. Hoi o G. L. Kapeau e noho Kiaaina no Hawaii. 1847. Novemaba, make ka Unuhiolelo o Mi. Rikeke. 1848. Make o Leleiohoku (William Pitt.) 1848. Make o Mose Kekuewa. 1848. Make o Kaiminaauao. 1848. Hiki mai ka umikumamalua o na puali Misionari. 1848. Laha ae ka mai puupuu ulaula (Kaulalii.) 1849. Wawahi ia na pu o ka Papu e ka Farani. 1849. Hoounaia ka bipi mai Hawaii aku nei, he 148 pahu. 1851. Kukuluia ka Ahahui Misionari ma Hawaii nei. 1851. Kukuluia ka Hale Hookolokolo. 1851. Hoomakaia ka Oihana Kalepa ma ka aila a me ka iwi kohola. 1852. Aperila 2, make o Kaliokalani. 1852. Hoouna mua ia ka pepeiao laau. 1853. Hiki mai ka mai puupuu liilii, a laulaha ae ma Hawaii nei. 1854. Wawahiia ka Papu ma Lahaina, ma ke kauoha a ke aupuni. 1854. Dekemaba 15, make o Kamehameha III.. (Kauikeaouli,) a lilo o Kamehameha IV ka Moi. 1855. Make o Paki. 1855. Make o Hikoke o Molokai. 1855. Hoouna muaia ka palaoa mai Hawaii aku nei—463 pahu. 1856. Iune 2, mareia o Kamehameha IVme Emma Ruka. 1856. Mareia o J. Aikake me Ruta Keelikolani. 1857. Wawahiia ka Papu ma Honolulu ma ke kauoha a ke aupuni. 1857. Make o Konia. 1857. Make o Keoni Ana ke Kuhina Nui. 1857. Kohoia o Victoria Kamamalu Kaahumanu i Kuhina Nui. 1857. Make o Wm. L. Lee ka Lunakanawai Kiekie o Hawaii nei. 1857. Holo o Limaikaika i Amerika Huipuia. 1857. Make o Kuakini. 1857. Make o Davida Malo. 1858. Mei 20, hanau ka Haku o Hawaii. 1859. Puka hou ka pele ma Hawaii. 1859. Aperila 26, make o J. Piikoi. 1859. Paiia ke Kanawai Kivila. 1859. Hanaia ka ea aa (mahu) ma Honolulu. 1860. Kukuluia ka Hale Dute ma Lahaina. 1860. Maraki, kukuluia ka Hale Dute hou ma Honolulu. 1860. Mei, make o J. W. E. Maikai. 1860. Kukuluia ka Hale Mai o ka Moi Wahine. 1860. Hiki mai ka mokuahi Kilauea. 1860. Holo o Lota ma i Kalefonia. 1860. Sepatemaba, make o Limaikaika ke Kuhina Aopalapala. 1860. Okatoba, make o G. L. Kapeau, ke Kiaaina o Hawaii. 1860. Dekemaba, make o B. Namakeha. 1862. Make ka HAKU O HAWAII. 1862. Okatoba 11, hiki mai ka Hoomana o Eneleni. 1862. Iulai 18, pau i ke ahi na hale Kulanui o Lahainaluna. 1862. Kukuluia i mau hale hou. 1863. Novemaba 30, make ka Moi Kamehameha IV, a lilo ka Noho Alii ia Kamehameha V. 1864. Mei 5, kaheaia kela apana keia apana e koho i mau Elele no lakou. 1864. Iune 13, kohoia na Elele. 1864. Iulai 7, halawai ka Aha Elele. 1864. Aukake 13, hoopauia ke Kumukanawai i haawiia mai e Kamehameha III,m a hoopau ka Moi i ka Aha Elele. 1864. Aukake 20, haawi mai ka Moi i Kumukanawai Hou. 1864. Sepatemaba 29, kohoia na Luna Makaainana malalo o ke Kumukanawai. 1864. Okatoba 18, halawai ka Ahaolelo. 1864. Make o L Haalelea. 1864. Okatoba, hooholoia e ka Ahaolelo e kukuluia i elua mau hale puhi rama ma Hawaii nei. 1865. Aperila 24, hoopuka ia ka Nupepa KE AU OKOA. 1865. Mei 6, holo aku ka Moi Wahine EMMA LANI ma na aina e.