Ke Au Okoa, Volume I, Number 10, 26 June 1865 — Mea hou ma Kahakuloa. [ARTICLE]

Mea hou ma Kahakuloa.

E KE AU OKOA E; Aloha oe: Ma ka la 17 o Mei i kaahope ae nei, ma ia la, hanau iho la o Umi w, na Kamalii k, me Wae w, he kaikamahine ano maikai o na helehelena, eia nae ua make koke oia ma ka la 8 o Iune, a he mea pono paha iaʻu ma keia kakau manao ana, e hoakaka aku i na mea kupanaha loa o kona make ana, eia no ia. Ua loaa mai ia ia <illeigible> mai wela a puni koke kona kino i ka eha hui loa, aohe moe iki o ka po, ua ala mau kona mau makua me ka makaala, no ka pilikia a me ka nawiliwali o kona kino. A ma ia hope iho, hoomaka mai la

ka pehu ana ma ke poo, he puu nui a <illeigible> pele, he keu a ka manaonao ke nana aku. Eia nae, ua paa kona poo i ka uhiia me ka iau kalo, aka, ua lanakila no ka mai maluna o kona poo holookoa, nana aku no hoi oe, he keu o ka hoomanawanui o keia kaikamahine uuku i keia pilikia i loaa mai ia ia, oiai kona mau la opiopio a nalo koke aku ma ka aoao mau o ka honua. A ma ka auina la o ka Poaono, ua poha koke ka puu o ke poo, a ua puka mai kekahi mea kupanaha loa mailoko mai o ke poo, oia hoi o ka Moo, ua like ke ano me ka Pinao, a ma ka lua o ka puu, puka hou mai he Moo, e ola ana no, a kau iho la ma ka lima o Wae, kona makuahine, a i kona kahili ana i kona lima, haule ka Moo ilalo a holo aku a pili ma ka paia o ka hale, a ia manara koke no, make loa iho la ua kaikamahine nei, mahope iho o ka ikeia ana o keia mau mea hou ano e. Oia kahi mea hou o kekahi apana kuaaina o keia mau mokupuni. Nou ke aloha, ka mea e puka mau mai ana i kela a me keia hebedoma. Me ke aloha no. L.K. KAUAKEA Alele, Kahakuloa, Maui, Iune 12, 1865