Ke Au Okoa, Volume I, Number 13, 17 July 1865 — Page 1
KE AU OKOA.
BUKE I--HELU 13.} HONOLULU, MONEDE, IULAI 17, 1865. {$2.00 NO KA MAK.
"KE AU OKOA,"
E HOOPUKA MAU IA'NA I
KELA POAKAHI KEIA POAKAHI,
MA KA
HO RA EALU O KAKAHIAKA.
ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela hoi ka lua o ke dala, e uku e ia iloko o ka hapa hope o ka makahiki.
"KE AU OKOA."
KA UKU O NA
OLELO HOOLAHA.
NA OLELO HOOLAHA—No na lalani he 10, oia hoi 1 iniha, no ka hoopuka hookahi ana, $1 00; alua hoopuka ana, $1 50 ; ekolu, $1 75; hookahi mahina, $2 00.
Aia no ko keena o "KE AU OKOA" ma ka Hale Paipalapala Aupuni, maluna no o ka Hale Pai.
He mau Mele.
He inoa no S. H. Kinoiki.
Nani Haupu ke kuahiwi o Kaala,
Aala ia pua ke honi aku,
Ku ka pua ula i ka nahele,
Hai iho ke Kama i ka inoa o ka makuakane.
Ke nihi ae la ka ua ma Kaala,
Aala no ka lau noho i ka malu,
Me kuu ipo Lauae i Makana,
Hai no ke Kama i ka inoa o ka makuahine.
E hoomalu oe i ko'u wahi, a hiki aku au,
Hiki aku au, wehe na pono Kivila,
Aloha ae au o ka leo o ka manu,
I ke kani ku-a mai,
Hai ke Kama i ka inoa o ka makuakane.
He kane ipo, he moe mau ka loaa,
Ua loaa oe i ka la 20 o Iune,
Aloha ae au i kahi wai o Mauna Malihini,
He malihini aku au a noho ilaila,
He kamaaina ka ua i ka nahele,
Heha ke oho o ka lau Apii i ka makani,
Hai no ke Kama i ka inoa o ka makuahine.
Paa mai o Koloa i ka Noe,
He noe wale no o Kahoaea,
Ea ka ihu o Annie Laurie i ka ale,
Ale kuloko o Kaieieiwaho,
Aia iwaho ka poohiwi o Keaolewa,
Ke kau ia la e ke ao Opua,
Hai ke Kama i ka inoa o ke kupunakane.
Ka palekaua o Makalii,
He alii na'u o Waialeale,
He mauna ia no Kauai,
He wahi aloha no na mea elua,
Manuahi mai hoi ke kolu,
Ekolu mea i holo i kuu manao,
Hai no ke Kama i ka inoa o na makua.
Nani Kuhiau i ka welo a ka hae,
Ka maka ia o ka moku holo mai,
Ua ike au i ka hoki inuwai o Paiaa,
Ua loaa au ia Kauai, o Manokalanipo,
Hanau i Oahu, o Kekuihewa,
I ka malama o Maraki,
Hai no ke Kama i ka inoa o ka makuahine.
Nani Haliimaile, i ka malu o Haleola,
Ola au i ka pono a ka makua,
Eia mai au o ka wai o Kemamo,
E kena ai o ko makewai,
He wai imi na ka malihini,
Mahole ka ili o Kalamakea,
Hai no ke Kama i ka inoa o ka makuahine.
Maikai Mauna Malihini, ua iliwai ia,
Hookahi no au ka puukani o Kauai,
He Edena au no E va,
Ke kupuna o ke Kamaeu,
Eu o Hawaii,
Pela o Maui,
Hai ke Kama i ka inoa o ka aina o na makua.
S. W. Kaleo.
Mauna Malihini, Koloa, K., Iulai 10, 1865
He inoa no M. E. H. Nihoa.
Auhea wale ana oe,
E ka hau kakahiaka,
O mai nei e ke anu,
Mehana i ka poli o ke hoa,
O ko'u hoa no oe,
I ka olu o Haleola,
Honua mai la i uka,
I ka ua kanilehua,
Elua no mau pua,
Ua lai o ka Hoiwai,
Waiwai nui no kau,
A'u e hiipoi nei,
Mahalo au o ka nani,
Kuahine o Manoa,
Lihau mai la iluna,
Pohina i ka lau laau,
Hoolaau mai ana,
Ka ukana a ke aloha,
Aloha wale Lanihuli,
I puia e ka makani,
Kahiko mai Nuuanu,
I ka pua kamakahala,
Hala lei no kuu kama,
Na hala i Kekele,
A ka paa i Mololani,
I ka ua apuakea,
Kuakea mai i ke kula,
Hoola mai i ke pili,
Pili ia ke ehu-kai,
Ehuehu o Puaena,
Enaena wale oi ala,
I ka pili koolua ia,
Eleu no ka wahine,
Meleana no he inoa.
W. Hoolai.
Auhea wale ana oe,
Kahi wai o ke Kapua,
Kupu mai nei ka manao,
Hakai wela i ke kino,
O ke kino no keia,
Lilo me Hiku i ka pua,
Na pua ohelohelo,
Ko pa ula i ka uka,
Ka nahele o Alanapo,
Po wale i ke onaona,
I ke oho o kaawapuhi,
I ka hale lehua a ka manu,
Manu heu wale oi ala,
Kaua hoa kamalii,
O ka hookohu no kau,
A nau maoli iho,
Eia no HelanI,
Na loko ae ke kunou,
E naue no paha wau,
I ka wai o Hikiau,
Waimaka kulu a ke hau,
Hau anu o ke kuahiwi,
Wai e inu no ke kama,
Kamalei oe a Like,
Meleana no he inoa.
Kalaikalipo.
O Bennet Benson ka inoa o kekkahi keiki, ua komo ia iloko o ke kaua elua makahiki. Ua komohia oia iloko o na hoouka kaua ana he umikumamalua, a elua wale no ona loaa ana i ka eha, a he umikumamalima wale no nae kona mau makahiki.
KENE TE.
HE Mooolelo no Sekotia.
MOKUNA XXXII.
Ua uhi mai na panopano poliuliu o ke aumoe, a e hoauau ia ana na pakaua, na towera, na ululaau, na kualono, a me na kakai pali o Sekotia, iloko o na kiowai molaelae o ko ka mahina malamalama. Ke nana aku oe e ka mea heluhelu iloko o na kikee ana o ka ululaau, a me na ala ololi o na pakaua, me he mea la ua waiho okoa wale no kela mea keia mea. Ma kekahi o na kee ana o na ala e holo ana i ka pakaua o Alanadela, a malalo hoi o na kukuna palupalu o kela mahina kau ahiahi, ike ia aku la kekahi o na kanaka koa o ka pakaua o Makalapina, a nona hoi ka inoa a makou i hai aku ai ma kela mokuna o Davida a me kona mau hoa ukali, e kapio malie ana i ko lakou ala iloko o ka ululaau o Alanadela, a aohe hoi i liuliu hiki aku la lakou i kahi e ku ana ke kia hoomanao o na mea make. Lele iho la o Davida mai kona lio mai, a haalele iho la i kona mau ukali, a hele aku la oia e nana i kahi i ku ai ke kia hoomanao, ina he mea kahi i hiki mai ilaila, a hoi hou mai la oia i kona mau ukali. Ee hou ae la ia maluna o kona lio, a naue malie aku la lakou ma kekahi ala okoa; aia hoi, hoea mai la imua o ko lakou mau maka ka palauli o ka amana, kahi e make ai o Kenete. A! e ka mea heluhelu, aole anei e nakolo e kou mau aa i ka weliweli ke ike aku i kahi i hoomakaukau ia, nou e hoi ai e moe pu me makuahine honua? A, ina e kau ole mai iluna ou ka li—ia, alaila, o kou puuwai a me kou naau, ua hanaia noloko mai o ka paea a me ke kila!
Ma kahi a ka amana e ku ana, ua kua ia, a ua ke ia ua wahi la, a waiho molaelae wale iho no, i uluaoa nae i ka amana e ku ana, i uhiia i na hailona o ke kanikau o ka make. I ko lakou hoonenene ana aku e hiki i ua amana nei, aole e hiki i na lio ke nee hou aku, aohe no hoi e hiki ina e hoouna ae lakou i na kepa i ka aoao o na lio ; a nolaila, ua ku malie iho lakou no kekahi mau minute, a nana aku i ka eehia a me ke ano o ka amana; a ia lakou e aneane ana e hoi hou i kahi i ku ai ke kia hoomanao, ike aku la lakou i kekahi mea e hele mai ana. I ko lakou ike ana aku ia mea, o ae la na kukuna o ka weliweli i ko lakou mau aakoko, aka, komo mai la ia Davida kekahi manao, a olelo aku la oia i kona mau ukali, "Mea paha o ka mea keia a kakou e imi nei." Ua oiaio loa ia manao ana, a lele mai la lakou mailuna mai o ko lakou mau lio, a hele nihi aku la lakou me ka pane leo ole o kahi i kahi, o lohe ia mai auanei ko lakou nihi ana aku, a ''puiwa e ka manu e—ena i ke kanaka." I ko lakou kokoke loa ana aku, ike iho la lakou oiaio no keia, ua huli mai la ke kua io lakou nei, .e kukuli ana imua o ka amana. "Oia, oiaio keia," wahi a Davida i ka hawanawana ana aku i kona mau ukali, a kokoke kupono loa aku la lakou nei, he kokoke kupono ole ia ia ke holo mai ko lakou mana aku, ina ia e puiwa a holo. A ike pono loa iho la lakou o ke kuene no keia o Angus Winetona.
Aka, aohe i oni iki ae ke kuene—a aohe no hoi he komo mai iloko ona paha ka manao he mau eu keia o ke aumoe, e hele aku ana e hoopilikia i ka mehameha o kana mau hana malu. Ua kaulia maluna o lakou ka eehia weliweli no ka ike ana aku i ke kuene e kukuli ana me he kii pohaku la, a i ko lakou nana pono loa ana aku ia ia, me he mea la e nana ana oia i kekahi kupapau make, a i ole ia he mea e paha no kekahi ao okoa! Ia lakou e nana ana i ua kuene nei, hawanawana aku la o Davida i kona mau ukali, "Ua hiamoe oia ma ke kaakaa no nae o na maka, a me he mea la ua hele mai oia ia nei iloko o kona wa hiamoe, aole ia i ike i kana mea a hana nei.'' Haele aku la lakou nei a ku ma ka aoao o ua kuene nei, a hooluliluli aku la o Davida i ke kuene me ka i aku, "E ala—e ku iluna—a e hele mai me makou.'' Ku ae la iluna ke kuene me ke kaakaa no o na maka, a ike ae la ia i ka palauli o ka amana e kau iho ana maluna ona, a leha ae la ia ma o a maanei, a i ka wa i hoi mai ai paha kona mau noonoo kanaka i ona la, ku iho la ia me he pohaku la ka naue ole, alaila, pii ae la na manao ehaeha i kona umauma ; a hooho ae la ia me ka leo nui, me he mea la aohe leo kanaka, aka, me he leo la o ka holoholona hihiu o ka waoakua, a haule a make iho la ia ilalo, me he mea la ua haalele mai ke ''ao o Olepau" ia ia. Ua maa mau keia mau keiki o Makalapina i ka hookahe koko, aka, i ko lakou ike ana i ka haule ana o ke kuena ilalo, ua uluhia lakou e ka weliweli kuhohonu, hiki ole ke anana ia aku. Hoea mai la na hiohiona o na tausani uhane iluna o ko lakou mau manao, a me he mea la e oili mai ana no hoi mailoko mai o na puha laau o ka ulunahele. Aka, o keia makau o lakou no kahi manawa pokole wale no, a hoopuka mua mai la o Davida i ka olelo ana, "A! e o'u mau hoa, ke ku nei kakou me he mau ki
pohaku la, me he mea la ua makau kakou i ko kakou mau aka iho."
Ia wa, hoala ae la na kanaka i ke kuene a ike iho la lakou, aole ia i haalele mai i ka la. Wehe ae la lakou i ka hainaka e paa ana i kona a-i i mea e komo mai ai ka ea oluolu a pohala iki ae la ia. Hapai wikiwiki aku la lakou ia ia i kahi a na lio e ku ana, a hoouka ae la ia ia maluna o ka lio o Davida e kau ana; a lawe ia aku la ia i ka pakaua o Makalapina.
Ua loihi loa ka ai ana a me ka inu ana a na keiki o Makalapina, a me he mea la ua kaniu ia iho ko laua mau noonoo ana, e ka ikaika a me ka mana o keia mea he kiaha waina, a ua papa pu ia mai no hoi e ka eha i loohia ai laua, a huli hoi aku la laua i ko laua mau rumi moe i loaa ai ia laua ka hooluolu ana iho i ko laua mau kino i polukuluku ia e ka eha, a hoi mai ko laua mau elele. Aole paha i u wale ka pili ana iho o ko laua mau maka, a waena paha o ka hora akahi a me ka hora alua, komo mai la kekahi kanaka e hoala i na haku o Makalapina mai ko laua hooluolu ana, a e hai aku hoi, ua hoi mai o Davida me kona mau ukali,i hele aku ai e huli iloko o ka ululaau o Alanadela. Aohe i liuliu komo mai la laua iloko o ka rumi, kahi a Davida e paa ana ia ia. Aohe no hoi i hoi lea loa mai ko ke kuene noonoo kanaka a pau loa, aka, hoomaka ae la ia i ka i ana, ''No ke aha ko oukou mea i hana ai e like me keia? Nawai i haawi i ka mana ia oe a me kou mau ukali e alako mai ia'u ia nei? Aole anei o oukou makau i ka inaina o ka Marquis o Alanadela?" ''Ua oki, ua oki, kau olelo ana," wahi a Davida, ''e i ae o'u mau haku, e lohe oe e ke kuene o ka pakaua o Alanadela, aohe e hiki i ka poe o ka pakaua nei a Makalapina ke kukai olelo, ina e puka mai na olelo awahia mai na waha mai o ko lakou poe enemi." Pau ka pane ana aku a ke kuene, no ka mea, manao iho la ia oia ka mea pono loa ana e hana ai, oiai he pio ia no ko lakou ikaika; a aohe nae ia i ike i ke kumu a na haku o ka pakaua o Makalapina i manao ai e hoopaahao ia ia.
I aku la o Inidulupa, "E hoi oe e Davida, aka, mai imi koke oe i kou wahi moe i keia manawa, e hoouka i elua noho lio maluna o na lio holo loa. E hai aku oe ia Ivora, e lawe mai i na ki iloko o kona malama ana, hai aku nae oe ia ia, e ku ia mawaho o ka puka a kahea ia aku oia e komo mai.'' Puka aku la o Davida e hooko i na makemake a kona mau haku, a kiola iho la na kukuna powehiwehi o ka ipukukui maluna o na helehelena o ke kuene a me na keiki o Makalapina. "E noho ilalo," wahi a Inidulupa, "e noho ilalo. Aohe no paha he mea kanalua, ka haohao ana o kou manao i ke kumu o kou laweia ana mai ia nei; a oiai aohe o maua nakui a hoomaunauna wale no i ka manawa ma ka olelo ana, no ka mea, no ka hiamoe keia wa o ka po, nolaila, e hai aku no au ia oe i ke kumu. Owau o Inidulupa o Makalapina, ua haawi aku au i ko'u puuwai a me ko'u manao a pau e lilo i wahine na'u o Evelina ke kaikamahine kamakahi a Galenakaila; a no ia mea i manao ai au aia iloko o kou mana ka hooko ia ana o ko'u mau koii ana.'' ''Aia ia'u,'' wahi a ke kuene, ''e ike olua e na 'lii koa, owau nei la he wahi kauwa haahaa loa au na ka Marquis o Alanadela, ke kane hoopalau a Lede Evelina e mare aku ai.'' ''Ua ike no maua,'' wahi a Inidulupa, "ke kane ia a Evelina e mare aku ai, aka, aia he wahi kee iki iloko o ka kou haku hana ana. A o ka maua mea i manao ai e hana, owau ka mea nana e hali ia Lede Evelina imua o ke kuahu. O oe ka mea nana e ahai aku ia ia i ko'u mau manao." "E oluolu oe," wahi a ke kuene, "e hai maopopo loa mai i ke kumu o kou manao."
''E hoolohe mai oo e An gus," wahi a Inidulupa, "ua hoohiki paa loa iho au e lilo o Evelina i wahine na'u; a ua ike no paha i na hoao elua ana a maua e lawe mai ia Eveiina i wahine na'u. Ua ko ole ka maua mea i manao ai ma ka ikaika, nolaila, ke hoao nei maua ma ke akamai, no ke kiolaia ana mai o na kumu iloko o ko maua mana e hiki ai ke hookoia. Ano e Angus, i kela la aku nei i hookolokoloia ai o Keneta, ua hai oe ma kau olelo hoike, ia Kenete e waiho ana maluna o kona wahi moe, ua komo aku oe e halawai me Kenete, a mihi mai la kela ia oe, ua pepehi io oia ia Macoma, a me na punahele a ka Martquis. Ka lua hoi—ua hai mai ka Marquis, ua mihi aku o Kenete ia ia e like me ka mihi ana imua ou. A ano e Angus Winetona, ke kuene nui o ka pakaua o Alanadela, he hiki no ke hooiaio ia imua o na aha, he mau mea hoohiki hoopunipuni wale no olua—." I mai la ke kuene, ''Heaha kau mea e olelo nei? Aole au i ike i kekahi mea ino a kuu haku ahonui i hana ai ia olua, i komo mai ai ko olua kekeue a opuino ia ia. A ina ua komohia pu au iloko o ko olua inaina mau loa, aohe pono o ia, no ka mea, aohe e keehi iho ana ka liona maluna o na mea kolo liilii loa." "Ua pahee kau olelo ana e Angus," wahi a Inidulupa, "a ua hiki mai no hoi ka lono ma kela wahi keia wahi, he
maikai kau olelo ana—mea paha ua oi aku ka maikai oia mamua o kau mau hana ana. A! ke ika nei oe ua hou ia kou uhane, aohe au e hooloihi aku ana i ka'u olelo, ina e like me ka'u mea i olelo mua ae nei, e hooiaio aku au ia oe a me kou haku ka Marquis o Alanadela i mau mea hoohiki wahahee, heaha la auanei ka hopena? E hoopau ia ka li ia ana o Kenete—e kahea hou ia aku na Lunakanawai e hoi hou mai—alaila, he ahahookolokolo hou iloke o ka pakaua o Alanadela—a o ka hopena oia, e hoahewa ia auanei oe a me kou haku ka Marquis o Alanadela, a e hoouna ia hoi olua i mau hoa noho no ka hoopaahao loihi loaia ma ka rumi pouli, a e kuni ia auanei ko olua mau inoa me na sila hilahila loa o ka wahahee imi ola. A ma kona haule ana iloko o keia hewa e hoonele ia ai i kona waiwai a pau loa a me kona inoa, a o oe hoi i kou noho lanakila oluolu ana.''
"A! e na keiki koa o Makalapina nei, he mau mea hoomakaukau wale no keia a olua e hoomakaukau mai nei i ka mea manao hopohopo wale e like me a'u nei ;" wahi a ke kuene, me kona ike ole i kana mea e olelo ana, a ku e wale mai la no na tausani hiohiona makau i ke kii o ka onohi o kona manao. Olelo mai la o Inidulupa, "Aole anei i olelo mai na Lunakanawai, ina i hewa ole o Keneta, alaila, he mea maopopo loa, he mau hoike hoohiki wahahee loa olua?" Pau loa iho la ka olelo ana a ke kuene, a leha aku la kona mau maka i na keiki Makalapina, me he mea la paha e kakali aku ana i ko laua ahonui e hookuu mai ia ia. Ku ae la o Eta Makalapina iluna me ka olelo aku, ''Ua oki ke kapai olelo ana, e ku a e hele mai me maua, a na maua no e hoike aku ia oe i ka hooiaio kupono.'' "Ae,'' wahi a Inidulupa, a kauo hopuhopualulu ia aku la ke kuene a hiki i ka puka i kahi a Ivora e ku ana me he puaa la, a kahea aku la, "E iho aku oe mamua ilalo o ka rumi pouli." Ku mai la o Ivora nana i kona mau haku, me ka olelo mai, ''E kuu mau haku, ua hoololi aku au i ke keena pouli o ka mea paahao ilalo loa, iloko o kahi paa loa.'' ''Mea paha,'' wahi a Inidulupa, ''he mau kumu kupono no o kou hoololi ana i kona keena, aka, aole kakou e kakali, e hai mai oe i ke kumu o kou hoololi ana, e alakai aku oe ia makou ilaila, a i ole ia, a haawi mai oe ia'u i na ki a me ka ipukukui. ''Aka, he paahao okoa e ae no kahi malaila,'' wahi a Ivora. "Owai ia mea e Ivora," wahi a Inidulupa, ''a e kala ia aku no oe ke ikeia ia mea he pono, a ina hoi oe ua hana i kekahi mea kue, alaila, e haawi ia aku no kou io na na manu o ka lewa i inai na lakou."
Pane mai la o Ivora me ka leo makau loa, ''E o'u mau haku koa, aole no'u ka hewa, aka, no kahi wahine a olua i lawe mai ai ia nei. Ua hana mai ia ma ke ano kipi, a nolaila i hoopaa ai au ia ia iloko o ka rumi pouli." "Ina oia wale no kau mea i hana ai," wahi a Eta, "ua maikai, aohe hewa, a nolaila, e alakai aku oe i ke ala ilalo o na rumi pouli o kahi paa loa." Aohe i kanalua iho o Ivora i kona lohe ana i keia mau olelo, a alakai aku la ia i na keiki Makalapina a me ke kuene me ka makau ole, no ka mea, ua paakuku kona mau aakoko i ka eehia. Ia lukou e iho ana ilalo iloko o na keena pouli, ua ano huihui ke ea olalo, a manao iho la ke kuene e laweia ana ilalo e haawiia aku i make hikiwawe loa ia ia, a i ole ia, e lawe ia ana paha ia e hoaikane aku me ka rumi pouli, a ia ia i aneane ai e hoopuka mai i kona uwe ana, komo mai la kekahi manao iloko ona, aohe kekahi mau mea ino e hana ia mai ana ia ia, no ka mea, aohe e pomaikai laua ma ka powa ana aku i ka hanu a ke Akua Mana Loa i hoonoho ai iloko o ke kino o ke kanaka, o kona ola ana ka mea e ko ai ko laua mau makemake, ina i like me ka laua mea i olelo mai ai he kuko, a he lia nui ko laua ia Evelina.
Mahope iho oia wa, a aneane aku la lakou e hiki i ka rumi pouli, kahi i hoopaaia ai ka paahao ma kakahi aoao o ka pohaku, kahea aku la o Inidulupa ia Ivora e haawi mai ia i ka ipukukui; a hopu aku la oia ia Angus ma ka poohiwi me ka olelo aku, "Ano, e Angus, e hoomakaukau oe ia oe iho, no ka mea au e ike aku ai.'' Aka, ua uhi ia mai la kona kino holookoa e ka weliweli a me ka makau nui i ka wa a Inidulupa i hapai ae ai i ka ipukukui, a hoomalamalama aku la kona mau kukuna maluna o ka rumi kahi i hoopaa ia'i kahi wahine, non na apapalina i noho ia e ka w i a me ka hakahaka, a leha mai la hoi na maka o ua wahi wahine nei maloko mai o na pani ulili hao. Ninau aku la o Inidulupa i ke kaane, ''Ua ike anei oe i kela wahi wahine, ua ike anei oe ia ia, oia ka'u ninau ia oe?" Pane mai la ka leo wi o kahi wahine, a wa aku la ia iloko o na rumi pouli, "Aole ia i ike ia'u, aka, owau ka mea i ike ia ia; i ka po makani nui—iloko o ka ululaau—ma ka aoao o ke kia hoomanao—au i hoopu-a aku ai iloko o kona mau pepeiao i kona inoa—." "Aole pono o ko kakou kalakalai olelo me keia wahi wahine kilokilo, e haele
kakou i kela rumi pouli, no ka mea, he hoi aku ko keia kanaka i ka pakaua o Alanadela i keia po," "He oiaio ia," wahi a Iniulupa, a hele aku la lakou mamua iho o ka lua o ke keena pouli, a hapai ae la ia i ka ipukukui a kiekie, a kiola aku la kona mau kukuna i ka malamalama nui ma ka ulili o ka ipuka hao o ke keena pouli. A iloko olaila—iloko o ke, keena o ka rumi paahao—e hilinai ana kona kua i ke pani hao—me na lauoho kiwalawalao, na papalina wiwi, a me kona helehelena ano e—ua ano e loa, ina o ka poe i ike mua ia ia, aole lakou e manao aku e oia—aia iloko olaila ka paahao a Angus Winetona i lawe ia aku ai e ike—a owai ia? O Macoma! I kona ike ana mai i ke kuene, kahea mai la oia, "E ka lani! o oe no auanei ia e Angus Winetona, e hoola, e hoola mai ia'u?" "E! o oe auanei ia e Macoma!" wahi a ke kuene, a ae mai la no hoi o Macoma, a i kona lohe ana aku, haule a maule iho la oia ma ke kapuai o na keiki o Makalapina! * * * * * * *.
He hapalua hora mahope iho, ua hoihoiia aku o Angus Winetona maluna o ka lio e Davida mai ka pakaua aku o Makalapina; a i ka wa a na kukuna powehiwehi o ka mahina i kiola iho ai i kona malamalama maluna o na helehelena o ke kuene, me he mea la he umi mau makahiki i oi aku mamua o kona mau makahiki ia manawa, no ka mea, ua hele a alualu kona mau helehelena ia wa. "Ea, e ke kuene, e pono kaua e holo wikiwiki, i hiki koke aku kaua i ka pakaua o Alanadela," wahi a Davida, a hou ae la ia i na kepa i ka aoao o kona lio, a hoohalike ae la no hoi ke kuene i ka hana ana i kona lio pela. Pela ko laua holo mama ana, a hiki i kahi e uakee ae ai ke alanui iloko o ka ululaau, hooki iho la laua i ka holo ana a ko laua mau lio, pane aku la o Davida, "Maanei kahi i hakaka ai makou i kela mau po i hala aku nei, a na'u no i pepehi me ko'u lima ponoi, i kekahi o na punahele a ka Marquis o Alanadela. I ka pau ana ae o ka hakaka ana, na makou no i kiola aku i ko laua mau kino iloko o kela nahelehele."
Aole i pane iki aku o Angus Winetona; a ua pau loa hoi ka laua kamailio ana, a hiki wale aku laua mawaho o na kaiaulu o Alanadela. "A ano," wahi a Davida, "aole paha he hoonaukiuki ou i ko'u hai ana aku ia oe, maanei e pau ia ko'u ukali ana mai ia oe, a e pono paha ia oe e hoi malalo, a e hoi au i ka pakaua o ko'u mau haku." "Ae, ae," wahi a Angus Winetona, a lele iho la ia ilalo mai ka lio mai, a haawi mai la ia i ke kaulawaha o kona lio ia Davida, a hoi aku la ia i Alanadela, a huli ae la o Davida me na lio a hoi aku la i Makalapina.
MOKUNA XXXIII.
E oluolu paha oe e ka mea heluhelu, e hookuu mai ia makou e kalana iki aku i kekahi o na mea i haiia aku ma na mokuna i kaahope ae, a o na kumu hoi i hookokonoia ai ka Marquis e hana i kekahi mau mea pahele oiaio ole, e kue a e lawe ai i ke ola o Kenete. Ua ho-aia ka puuwai o ka Marquis e ke ahi a ke aloha ia Evelina, i kona ike ana aku i "Na laumaia i palaluhiehu" maluna o na papalina o ke kaikamahine kamakahi lua ole ma ia mau okana, a ka mea hanohano Haku o Galenakaila; aole nae oia i ike i ka hinuhinu a me ka lilelile o keia mea he aloha io o na la opiopio, aole no hoi paha ia i ike, aole e loaa ana keia mea he aloha io me ke kumukuai, aka, aia wale no ma ke kuai ana paha i na puuwai makamae elua i ulu nui ole ia e kekahi mau nahelehele e ae, koe nae ke aloha aina, he mea mau no ia i kanu ia iloko o ka naau o ke kanaka, a me ke aloha makua. Oiai ua maa mau ka Marquis i ka hooko ana i na kaunu a me na koii o kona iini me ka manao ole i ka pono o hai, a he mea hoi nana e alai mai ana i kona mau makemake, aka, ma keia mea ana e hana nei, ua pahua loa kana mau hana.
E hoomanao no paha oe e ka mea heluhelu, i ka wa a ka Marquis i noi aku ai ia Galenakaila e lilo o Evelina i wahine nana, aole ia i ike he aloha e kukuluia ana mawaena o ka mea palupalu Evelina a me Kenete. Ua ike no hoi ia, i kona wa i koi ia aku ai e hele mai i ka pakaua o Alanadela i ua aloha la mawaena o Evelina a me Kenete, a he ekolu no hoi la mahope iho oia manawa, ua hoomalamalamaia oia no ua mea la e Galenakaila; a oia ke kumu nana i koi hu-a ole i na manao iini loa iloko o ka Marquis, ke hoomanao ae ua koii haakei, a aohe ona makemake e ku ia me he paku la mawaena o ke aloha ana i hiipoi ai no ka manawa loihi, a me Evelina. A ke noonoo ae no hoi ka Marquis o keia wahi keiki makua ole, kala ole, a inoa ole hoi, ka mea nana e hoopahua i kona mau iini nui. E hoomanao hou no paha oe i ka wa a Kenete i hoopakele mai ai ia Evelina mai na lima mai o Ranalda a me Ivora, a hoihoi hou mai ia ia i ka pakaua, a hai aku ai o Evelina ia Galenakaila a me ka Marquis, aole no ko Kenete, koa wale no i ka hoopakele ana ia ia, aka, no ka malama ana i ka rula o na kauwa i na haku,
oiai e noho ana o Kenete, aohe ma ke ano o ka papa oluna, aka, ma ka papa olalo. Ilaila, i ike aku ai ka Marquis, ua aaki paa loa ilalo o ka mole o ko Evelina puuwai ke aloha no Kenete, a aohe hoi i kau ekekei iho ia maluna o ko Evelina puuwai, a ia ia i pii mau ai kona huhu, pela kona kukulu paa ana i kana mau hana ino i poino ai ke ola o Kenete. I mea e lilo loa ai o Evelina nana, nolaila ke kumu o ka Marquis i olelo aku ai ia Evelina he aloha ia ia Kenete, a ae mai ai o Evelina, ina e hookuu ka Marquis ia Kenete e holo a pakale, alaila, e lilo o Evelina i wahine mare nana. O keia ka olelo hoohiki a ke kaikamahine opiopio i haawi aku ai i ka Marquis i hoku nana e manaolana ai e lilo ana ia ia o Evelina, a ua wikiwiki loa hoi ka Marquis i ka hooko ana ia mea, aole nae i ko ua pahu-a.
He mea olaio, ua kupaa loa o Evelina ma kona hoohiki ana, aka, ua makemake loa ka Marquis e hookupaa ia kona aloha maluna o Evelina, e like me kana mea i hooko ai, aole nae oia i manao e hoi hou mai ana o Kenete. Elua mea a ka Marquis i manao ai e hana, o ke koi aku ia Kenete e holo malu hou—a me ke kiola ia ia iloko o ka make mainoino loa. Pela iho la kana mau mea i noonoo ai, a komo aku ai oia e hai ia Kenete; a kue mai la kela i ka manao mua, a makemake no oia e noho a make me ka wiwo ole i ka pakaua o Alanadela. Ma ko Kenete hoole ana mai, ua ho-a loa ia ko ka Marquis inaina, a ua ike pu no hoi kakou i na olelo haku epa a pau loa ana i hai ai imua o ka aha, e pili ana i ko Kenete pepehi ana ia Macoma a me kona mau punahele. A ua ike no paha kakou i ka hopena oia mau olelo pahele, ua hoouna ia o Kenete e make i ka make mainoino loa maluna o ka amana.
Oiai, ua ahonui mai nei oe e ka mea heluhelu, i ka hookuu ana mai ia makou i ka hoi hope ana no na mea i hana ia, e pili ana i keia moolelo, no ka ka Marquis mau hana kue ia Kenete; a nolaila, e holo ae kakou imua i ka hopena o keia moolelo.
I ka hora eiwa o ke kakahiaka, mahope iho o ka po o ko ke kuene hoi ana mai, a me na mea i hai ia ma kela mau mokuna i hala aku nei, iho mai la ka Marquis mai kona rumi moe mai i ka rumi aina. Aole i maikai kona hiamoe ana ia po iho, aohe no hoi oia i moe pono iki, mai kona wa i hoi mai ai i ka pakaua—aka, i ka po mamua iho, aole i hookuu iho ka hiamoe ia ia iho e kau maluna o kona mau kuemaka. Aole no hoi ona wahi manao ai iki—a i kona hiki ana mai i ka pakaukau aina, lalau aku la ia i ke kiaha waina a inu ae la. Ia ia e holoholo ana me ka noonoo nui no kekahi mea, komo mai la ke kilo, oia wale no ka mea i koe i ka pakaua, aka hoi, no ka hooponopono ana i na mea e li ia ai o Kenete, a olelo mai la ia, "Ua paa pono ka amana i ke kukulu ia, a ua manao iho nei au e holo i ka pakaua Moneka o St. Cuthbert, a e lawe mai au mailala mai i na Moneka nana e ukali aku ia Kenete i ka amana, a i mihi aku ai hoi oia ia lakou i kona mau hewa." "He makemake au e holo pu me oe," wahi a ka Marquis, "aka, aole au i oluolu loa." Ia wa, komo mai la kahi kauwa opiopio o Geoffrey a hawanawana mai la i ka pepeiao o ka Marquis, "A!" wahi a ka Marquis, "ua mai ia kuu kuene ahonui, a ke makemake nei oia e ike koke ia'u i keia wa. E hoi oe e ke keiki a hai aku ia ia, aole e liuliu a hiki aku au ilaila." A hoi aku la kahi keiki e like me ke kauoha a ka haku ia ia.
Maanei paha e kakali iho ai kakou i ke kumu i lilo ai o Geoffrey ka mea nana e lawe aku ka olelo a ke kuene i ka Marquis, o ke kumu oia, no ka pili loa o ka rumi o ua wahi keiki nei me ka rumi o ke kuene. Aohe nae he makemake o ua wahi keiki nei ia Angus Winetona, no ka hoohiki wahahee ana ia Kenete, aka, aohe ia e kaniuhu i ka hana lokomaikai ana aku i ke kuene, ma ka lawe ana aku i kana mau olelo i ka Marquis, oiai ua maluhiluhi a ua hoopilikia ia hoi ke kuene. I ke komo ana aku o ua wahi keiki nei i ka rumi o ke kuene, hai aku la kela, e hiki koke mai ana ka Marquis iloko o kona rumi. Olelo mai la ke kuene i ua wahi keiki nei, e puka iwaho, a i kona lohe ana i ke kipaku ana mai a ke kuene, manao iho la ia, he mau mea malu ka ke kuene a me ka Marquis e olelo ai, nolaila, pani aku la ia i ka puka, me ka waiho aku i ka manao maluna o ke kuene ua puka io keia iwaho, aka, kokolo malu aku la keia malalo o ka moe, e hoolohe ai i ka laua kamailio ana, aole hoi i liuliu iho, komo mai la ka Marquis.
(Aole i pau.)
Ma kekahi papa helu iloko o kekahi nupepa, ua hai ia mai he umi tausani keiki, no lakou na makua Karistiano, e lawe mau ia nei i Aigupita mai Tureke mai, a kuai malaila i kela makahiki keia makahiki.
I ka mahina iho nei o Mei, ua hanaia ma Sacramento, he hookahi miliona elua haneri tausani apana dala, (elua keneta no ka apana dala hookahi.)