Ke Au Okoa, Volume I, Number 19, 28 August 1865 — Page 3

Oihana Hookolokolo.

AHA HOOKOLOKOLO KIEKIE MA KE KEENA.

Iulai 28, Keono w., kue ia Pokakua k. Hooholoia, ua oki i ko laua mare ana.

Au g. 1, Waiwai o Kapihenui, no Lahaina, ua hookohuia o Lahela w., a me Lonokeawe, oia na Lunahooponopono, me ka haawi hoi i palapala hoopaa $200.

Au g. 3. Waiwai o Koa k., Hoohei k., a me Koa opio k., no Waialua, Oahu. Hookohuia o Pua a me Kaena, oia na Lunahooponopono.

Au g. 5. Waiwai o Nahinu, no Honolulu. Ua hooholoia, o Hinaaimalama, oia ka hooilina.

Au g. 7. Waiwai o Maliu k., no Kualoa, Oahu. Ua hookohuia o Mahoe, oia ka Lunahooponopono, a he kahu hanai hoi o ka hooilina o Emma.

Au g. 8. Ua ae ia o Haumea w., e mare hou.

Au g. 14. Ua ae ia o Hoapili k., e mare hou.

Au g. 15. Ua hoopauia ka mare ana o Geo E. Sherman a me Kuana Sherman.

Au g. 17. Ua ae ia o Kauhane w., e mare hou.

Au g. 17. Ua hoopauia ka mare ana o Kaiwinui k., a me Keliiholokai w.

Au g. 19. Ua hooholoia e hoopau ka mare ana o Ieremia k., a me Miliama Ieremia.

Aug. 22. Waiwai o Ana w. Ua hookohuia o Paahana k., oia ka Lunahooponopono Waiwai.

AHA HOOMALU O HONOLULU.

Au g. 1. Harry, ona' $6; Kolopine, hakaka, $11; Kahaiola moekolohe $31 ; Kaenaena, moekolohe, $31; Kamio, hakaka, $11.37; Beni, holonui, $11.62; Kanainui, holonui $11; Ulunui, hakaka, $5; Kela, holonui, $11; Luhiehu, ona, $3; Kalili, hakaka, $4; Heluaina, hakaka, $3; Halekeniki, ona, $3; Kaukane, holonui, $5; Kauaana, holonui, $11.25; M. Rowlands, ona, $6; Kaoio, ona, $3; Bila Rotuma, ona, $3; Kahana, ona, $3; G. Smith, ona, $6; Debastian, ona, $6; G. Cathcart, ona, $6.

Au g. 2. T. Mitchell, hakaka $13, 37.

Au g. 3. Pelehu, kue i na makai, hookahi mahina ma ka hana oolea; Hainehi, pepehi wahine, 20 la hana, me $4.37; H. Fosbrook, 1 mahina hana, $3 hoopai.

Au g. 5. Kaailaau, hakaka, $18.75; Heluaina, ona, $5.

Au g. 7. W. Blake, holonui, $10.

Au g. 14. C. Williams (he paahao) hakaka. $26.25.

Au g. 15. Mauliola, aihue lole, $20 a me 2 makahiki hana.

Au g. 18. G. McCollongh, ona, $6.

Au g. 24. Kaiula, aihue moa, $4.87; Manuel Sylva, aihue waki, $50, me hookahi makahiki hana; Kekai, holonui, $18.

Au g. 25. Kaailaau, Naone, a me Makanui, aihue waiona, hoopaa ia e hookolokolo imua o ka Aha Kiekie.

HE PALAKI MAI KU OE.—I ke kakahiaka iho nei o ka Poakolu, ua alako ia aku makou i ka ike ana aku i ka lulumi nui ana o na kanaka ma ka ipuka o ka hale kuai o Mr. Bolles ma; a i ko makou hiki ana aku ilaila, ike iho la makou he wahi haole o Fred'k Ainger, he wahi haole no luna o kekahi o na moku okohola i hoi mai nei, e palaki ana i ke kamaa o kekahi kanaka. Ua lawe ae ua wahi haole nei, aole no kekahi kumu e ae, aka, no ka loaa hana ole, a ma kana hoomaka ana ua lilo ia i mea makaikai na kanaka hana ole hele wale iho no. Ia oukou e ka poe hana ole e hele ana e makaikai ia ia, a ike oukou i kana hana, alaila e pono e lalau pu i ka palaki a me ka ipu inika, a e hoolilo iho ia oukou i mau koa ukali ma ka hana maikai i hoike ia maila e ka ili keokeo! He ili keokeo kela, aole i hilahila i ka palaki ana mai i kou ku e ka ili ulaula! Ke manaolana nei makou e lilo keia i haawina na oukou e uhai ai!

AIHUE.—I kela pule iho nei, ua hoao kekahi pukiki e aihue mai i kekahi wati dala iluna o ka moku Domitilla . O kona hoao ana, ua akamai no; ua hana mua kela i kekahi ha niu me kekahi laau e iho i nakinaki ia me ke kuaina, e like ka hana ana me he lou ulu la. Ua maa mau kona hele ana iluna o ua moku nei, me ke noi aku e holo sela ia, aka, no ka nui loa o na sela, nolaila, aole i loaa ia ia ka hanohano o ka noho sela ana, a na ia maa mau no hoi i ae mai ia ia e hele iluna o ua moku nei me ke keakea ole ia mai e kekahi. Hoomaka iho la ia i kana hana ma ka hookomo ana i ua lou nei ana i hoomakaukau ai ma kekahi puka aniani liilii o ka moku. Ia ia e hoao ana e ahele mai, ike mai la ke kuene iloko o ka rumi, lalau aku la kela i ka wati, a holo aku la ia iluna e nana i ka mea nana e aihue nei. Ia wa holo aku la ka mea aihue, a alualu ia aku la a paa. Hookolokolo ia oia a ua hoopai ia e hana ma ka hana oolea hookahi makahiki, a me $50,00.

UA LILO I HOOKAHI OWILI.—Ua olioli makou i ka hai ae, ma ke ahiahi o ka Poaha iho nei, ua hoohui ia o James Lemon Esq., a me Miss. Mary Ann Wond, kaikamahine makahiapo a Mr. Wond o Honolulu nei. Ma ia hui ia ana, ua lilo laua i

"Elua uhane hookahi no nae manao,

Elua puuwai hookahi no nae pana ana!"

Ua hiki mai io makou nei ka lono e manao ana ka Lunakanawai Kiekie, E. H. Allen; a me ka Loio Kuhina, C. C. Harris e holo maluna o Kilauea i keia ahiahi i Hawaii no ke Kau Jure e hiki mai ana.

Na moku i puhi ia e ka Shenandoah

Ua hoomakaukau makou i ka papa inoa o na moku a me ko lakou mau Kapena i kela pule aku nei, aka, no ka piha u o ko kakou pepa o kela Poakahi aku nei, nolaila, aohe i komo ia pule. I ke kakahiaka iho nei o ka Poaono ua halawai mai makou me ka J. H. Kaiheekai palapala e pili ana no ia mea; a eia ka papa inoa o ua mau moku nei i puhi ia ai e ka Shenandoah:

Eia na moku i puhi ia ma ka mokupuni o Ponepe; ka Har vest, 3,50 barela aila; ka Edward Cary; ka Pearl; a me ka Hector, 300; a iloko hoi o ka moana Aukaki, i ka la 21 o June, o Abigail ka maka mua i pau i ke ahi a o Euphrates a me William Thompson; ma ka la 22 o June, o Jireh Swift a me Sophia Thornton, a ma ke la 22 o Susan Abigail, Isabella, Gen. Williams, Wm., C. Nye, Nimrod, Congress 2d., Hillman, Martha 2d., Nassau, Favorite, Covington, Issac Howland, Wavely. Ka huina a pau loa he 22.

Na moku i haawi ia aku me na palapala hoopaa, o Bark Nile, ua holo ia i Kapalakiko; o Milo, ua ku ia i Kapalakiko, a me Gen. Pike. Na moku i hoi mai ma ke awa nei o Honolulu, i ka la 11 iho nei o Aukake, o James Murray, Kap., Covington.

Oia iho la na moku i pau i ke puhi ia i ke ahi, a me na moku i hoopakele ia mai, a ma keia papa e ike ia ai ka moku i holo sela aku ai ko kakou mau hoalauna, a mai komohia no paha iloko o kakou ka manao e hoi waiwai mai ana lakou, oiai he poe pio lakou na ka Shenandoah.

UA HEMO A UA HOLO.—I ke kakahiaka nui iho nei o ka Poalima ia makou i iho mai ai ma kahi kuai o na mea ulu ma Monikahaae, ike aku la makou i kekahi kanaka poohina e holo mai ana maluna o ka lio, me kekahi mau puaa iloko o na eke. Hele mai la kekahi e manao ana paha e kuai a haha iho la me ka milimili i ua mau puaa nei a ke kanikoo, a no ka makemake ole paha, a no ka manao ole no paha kahi e kuai, hoalala puaa ae la ia; o ka lio aole no hoi paha ia i maa i keia leo ano e, puiwa ae la ia, a haalele iho la i kona kahu me na puaa a laua e hoaikane me makuahine honua; a i ko makou haalele ana aku ia ia, e hoolilo ana ia i kekahi hapa o kona manawa i ka hoonana ana i na puaa, a o kekahi hapa hoi i ka lomilomi ana i kona mau oloolo wawae.

"MANUUNUU WALE KINI O HONOKOHAU."—I ke kakahiaka o kela Poakahi aku nei, ia makou i kiei aku ai iloko o ke keena hookolokolo o ka Aha Hoomalu, halawai mai la me makou ka hiohiona o kekahi pukiki i lawe ia ae imua o ua Aha la e hookolokolo ia ai no ka hoeha i kekahi wahine. Ua lawe ia ae ia ilaila me kana wahine a me kana mau keiki he eiwa ko lakou nui; ua hai mai ko lakou mau helehelena ua awiliwili pu ke koko Aferika iloko o ko lakou mau puhaka. Aka, o ka mea nui i ka makou ike ana, o ka nui o kana mau pua, ina pela ka nui o ka hanau ana o na wahine Hawaii, alaila, aole kakou e kono ia mai e kii aku ma kahi e, e hoopae mai i mau lima hana.

UA HIAMOE.—Me ka minamina, ke hoike aku nei makou, ua kailiia'ku ka uhane o David Adams, (oia hoi o Kewiki, ke keiki a Alika, o Kalihi,) inehinei, i ka wa kakahiaka nui, kona hele ana ma ke ala hoi ole mai. He 38 ka nui o kona mau makahiki, me na malama keu he umikumamakahi: ke uwe pu nei makou me kona poe kini makamaka, aka, he manao lana no e halawai uhane me ia ma kela ao.

He ninau no na la ma ka helu Hawaii.

E ke alakai o ka Nupepa "KE AU OKOA" Aloha oe, a ina he wahi kaawale koe o ka Nupepa aole i piha, alaila e hookomo iho oe i keia mau wahi ninau ma ia wahi, a ina ua piha e, alaila, e kapae iki ae, aole hoi ka hiamoe iho.

Penei kakou e ninau ai, ku iho la au ma ka huina o ke alanui Nuuanu a me ke alanui Moi, nana iho la au ma ka wati, o ka hora 4 noia o ko ka la hele ana, hora ehia ia o ko ka mahina hele ana ma ia la, owai ka inoa a o owai ia la ma ka helu Hawaii?

Napoo iho la ka la i ka hora 5, 58 minute puka ka mahina hora 9 34 minute, owai ia la ma ka helu Hawaii?

He wahi palapala aloha ka'u ia Pomare ma Borabora i ka malama o Ianuari i hala aku nei, ma ka la 23, owai ka inoa o kuu la i palapala ai? Hiki mai ka D. Nuuhiwa palapala ia'u, penei, hooili aku ana au i kuu wahi lio lele i ka poaha mua o Nov. 1865 e hiki mai ana, owai ia la?

Owai ka inoa o ka la 13 a me 18 o Nov, o keia makahiki?

I ka la 7 o Feb. i hala aku nei ua haule kekahi kaikamahine i ke kowali ma Leleo, owai ia la? E hakaka ana elua wahine aloko o ka halepule o Kaumakapili ma ka la 27 o June, he la hoike kula ia o na kula aupuni, owai ka inoa oia la?

Ua koho ia o W. N. Pualewa i Luna Hoomalu no ka ahaaina a kamalii ma ka halepule o Maemae, o ka mea Hanohano W. Ka, a me ka mea Hanohano J. W. Noa, i mau pua hoonani no ia la a o J. D. Halai i haiolelo hope, oia nae ka la 30 o June, owai ka inoa oia la ma ka helu Hawaii.

Ua halawai au me ka mea kaulana Mr. Kanekoa ka mea nana i hai pololei ka ninau Bai bala a A. Kalauli ma ka la 20 o June i kuu ike ana ua ohuleia ke poo o kuu hoa, owai ka inoa oia la?

Ninau Bai bala.

Heaha ka inoa o ka laau a ke Akua i papa mai ai ia Adamu a me Ewa?

Heaha ka inoa o ka laau i kau ia ai ko kakou Hoola?

Heaha ka inoa o ka laau makole i oleloia e Ioane ma ka Hoikeana 3; 18, ia ia ma ka mokupuni o Pakemasa?

Owai ka inoa o ke kaula e pule ana ma ke kumu o kona kookoo?

Pehea ka loihi mai kahi a ke Akua i ku ai a kahea aku, a hiki i kahi a Adamu e moe ana?

Ua loheia ke hoi la ka ua-u e moe i ka lua, lele koae a kau i ke pali elua ia, a ke moe la no ka honu-aukai o Ponihua a me ka nene okuu o ka nahele, ke lana nei no ka manao o ko oukou hoa e loaa ana no, a ke hauoli nei au me ka manao aloha i na hoa. Owau no me ka mahalo. J. N. KAUNAMANO.

Ke Kiaha Wai Aloha.

E ke Au Okoa; Aloha oe:

Ua nui kuu kakali ana me ke ahonui i ka ike a me ka halawai pinepine ana me oe, a ua nui no hoi na waimaka i mauna ia e oe, e ake ana e maliu a e hookipa ia'na oe iloko o ka rumi hookipa a ke aloha, e ka poe i aie nui mai ia oe, a ina no hoi i nui kou ahonui, alaila, ua maha wau; a ina no hoi i nana ia keia me ka noonoo nui ia, alaila, ua hoi no kuu luhi ; a ke nonoi aku nei au me ka manaolana a me ka hopohopo ole, aole no e poho ka manawa ke heluhelu i keia mau olelo malalo iho, a penei no ia:

Ua nui a pinepine no hoi ke kamailio a me ka hoopaapaa ana ma ka waha, a maloko o na nupepa o keia ao e ka poe naauao, no ka ino a me ka pomaikai o ka hiipoi ana i "Ke kiaha wai aloha," ua hooipo maoli kekahi poe me ka paulele nui ana, aohe hoa nanea o ke kulu aumoe a me kaliula, o ke kiaha wai aloha wale no, a aohe no hoi e loaa na hoa launa lealea, ke ole e hoomanao ia ua kiaha la, a aole no hoi e haiamu ia kou ipuka hale e ke onaona o kou mau hoa, ke ole oe i kuliu mua ma na mea hoolele hauli no ka hoomanao ana i ka inu aloha ana no kekahi mea i kaulana, a mea hoi i makamae mau ia e oe, oiai na la inea ma keia kae o ua wahi eehia la, oiai na la e ai ai i ka ai, oiai na niho iloko o ka manawa i hoomaka'i ka luluu ana o na hua o keia hanauna, akahi no a eli ia ka auwai no ka hoopulu ana i na makalua i anoi nui ia e hoopulu; ia manawa, mahope iho o ka luku nui ana a ka Mea Mana Loa i ko ke ao nei, ua ala mai na hapauea o ke kuahiwi uliuli, na kula panoa hoolau kanaka ole, na awawa uliuli koiuiu, na pali noho a ka Aukuu, ko ka uka maka pehu a me na hapauea o ke kaha, a hopu i na laau a me na mea like a oi ae, e houhou iho maluna o na pepeiao luheluhe o ka honua akea, a e hana i pauma wai hooilina e na kupuna i ka lakou mau mamo. A no ia mea, ua manao nui ia ua maikai, a ua hanohano ua kiaha la ma kekahi mea, a ma ka makaikai maoli ana ua nani loa no, a ua hihiu ma na kulana kiekie o ka noho ana, oiai na la o ka inea e hoohoahanau a hoaikane ana me oe, a a'u no hoi e kaena ae nei, he hoa hoolauna.

A maanei la, ua awihi ia mai au me ke kunou pu ia mai, e na ohia haama o keia kau, me ka ninau mai, "Heaha la ke ano o ke kiaha wai aloha?" Ua ku iki au me ka lele nui o kuu oili, me kuu paulele nui no hoi, e ake ana o ka uhi mai o na kulu wai a ka noonoo kupono o ka ua lani polua, i hiki ai ia'u ke hai aku me ka pololei i ka ninau, a ua hiki paha i ka hora elua o ke aumoe, akahi no a loaa ia'u, ala ae la au a kikeke aku i ka puka o ka ninau, a hai aku la au, "O ke ano o ke kiaha wai aloha, he kiaha rama no ia." Nana mai la kela ia'u, a olelo mai la me ke ano akaaka, "Ae," o ka haina o kuu ninau a'u i hai aku ai ia oe, oia no; ua loaa mai la ia oe, a he manaolana no hoi ko'u me kuu paulele nui, e hai mai oe e like me ka mea hiki ia oe ke wehewehe no ka ino a me ka maikai o ka rama. Ua noonoo nui ia e ka poe akamai a naauao loa o keia ao, he maikai a he ino ka rama, no ka maikai op ka rama, ua maikai ka rama iwaena o ka poe akahele o ka noonoo, a ua ino hoi iwaena o ka poe akahele ole o ka noonoo, ua hopu ka poe hopuhopualulu me ka manao mua ole, he hope awahia ko ka rama ke maiau ole ia mamua; a malaila no i lilo ai ka rama he mea ino, ua maikai ka rama ke hookomo ia iloko o ka opu o ke kanaka, mahope iho o ka noonoo nui ana i ke kumu nui o kona hooipo ia ana, ua maikai a hemolele loa ka rama no kekahi oihana e paaua nui ia nei, oia hoi ka lilo ana o ka mea ino i mea maikai iwaena o na kahuna lapaau, ua hoolilo ia ka rama oia wale iho no i kahi wa i laau aikai me ka paipai ole ia, a malaila ua hemolele loa ka rama, a i kekahi wa, ua paipai ia me kekahi laau e ae, a ma ia mea ua maikai no ka rama. Ina kakou e nana iwaena o ka poe kuai liilii a me ka poe kuai nui aku i ka rama ia hai, alaila, e ike auanei kakou, ua hoopoaikai aku ka rama ma ke ano o na laau lapaau a na Kauka, ua ike maoli ia o na kulu wai rama i hana ia ma ke ano hoopomaikai aku, ua loohia mau ia e ka pomaikai ma na mea ano like, aole au e kuihe ana ina ino, ua ike ia e ka poe naauao a pau o ka honua nei, o ka lilo ana o ka rama ma ke ano kokua aku ua maikai oia; a he nui loa no na mea i pomaikai i ka rama.

Maanei la, ke noi aku nei au i ka lehulehu, e hoomaopopo mua i ke ino a me ka maikai o ka rama, mamua o ko oukou hoahewa a hoapono ana i ka rama, ua kaupaona ia ka rama kona maikai a me kona ino; he oiaio, he mea ino io no ka rama, a ua lilo ia mea i puu opala i ka poe i ike maoli i ke ino. Ina kakou e hoomaopopo ana, alaila, e ike auanei kakou, aole hookahi mea ma keia honua akea i makemake i ka mea ino, a ina aole hookahi mea, alaila, pehea la auanei kakou e manao ai he mea ino ka rama? No ka mea, ua hana ia ke kanaka e nana a e hoomaopopo i na like elua, ua ana kekahi poe i ka mea hookahi iloko o elua, he mama a he koikoi, he ino a he maikai; ina ua ike ia e kekaei poe he ino ka rama, a i kekahi poe hoi he maikai ka rama, alaila, ua like no a like, a ma ka hapa hea la anei e huli ai ka manao, no ka mea, he ano like no a like?

I ka wa i puhi ia ai ka rama ma Maderia, ua nui loa ka pomaikai e kolaila poe no ka rama, no ka mea, ua hoolilo lakou i ka rama i aila ipu-kukui, a i laau lapaau no na mai hano a me kekahi mau mai e ae, a ma ia mea ua ike kakou ua maikai ka rama, a ina ua ike kakou he maikai a hemolele ka rama, mahea la auanei kakou e hooili ai i ka huaolelo ino?

LIUA.

(Aole i pau.)

Na anoai o ka la.

Aia ma ka aoao hea o ka pika ke au? Aia no hoi paha mawaho.

Heaha ka mea, ina oe e makemake ana e loihi, oki nae oe i pokole ai? He penikala.

Owai ke kanaka aohe inoa? O Inoaole.

I kekahi po hele aku la kekahi kanaka mahiai iloko o ka hale e waiho ai ka mauu ai a na holoholona, a makau iho la ia i kekahi e waiho ana iloko olaila. Kii aku la kela i ka ipukukui e hoomalamalama, a aia no ua mea nei e waiho ana, aole nae i hele aku a kokoke loa; a hoala aku la ia i ka ohana holookoa a pau loa, a o lakou no hoi kahi i uhi ia e ka makau. Nolaila, kii aku la ua kanaka mahiai nei, i kekahi mau makai, me ko ia nei manao he kanaka ona rama ke moe ala iloko o ka hale hoahu weuweu. I ka hiki ana aku me na makai ilaila, a hoala aku la i ua mea nei, aohe ala mai, olelo ino aku la aohe puka mai iwaho. A e ka mea heluhelu heaha la kou manao no keia mea a lakou e hoala nei. Aohe hiki ia oe ke hai mai, a e hai aku au, "he poo kii o ka moku, ua nalo kahi hapa i ka weuweu."

I keia la aku nei, i ka wa e uhau ana kekahi mau haole i na uinihepa o ka hale o Bainapa e kukulu ia nei, ninau aku kekahi wahi kanaka i kekahi, "Aole auanei ou makemake i kela mau wahi pohaku uinihepa?" Pane mai la kekahi wahi kanaka, aohe o'u makemake i kela poe pohaku ulaula, o ka pohaku melemele nakeke iloko o ka pakeke ka'u makemake."

Poho makou! Poho makou!!

E KE AU OKOA E—Aloha oe:—

E oluolu paha oe e ka Lunahooponopo, e hookomo iho i kela mau hua nui i kau ia ma ke poo o keia kakau manao, oia hoi keia. Poho makou! Poho makou!! Penei ke kumu o makou i noho ai, aia i ka la 6 o Iulai, paipai mai la ke kumu a makou, oia hoi o J. H. Moku, e hapai makou i wahi ahaaina na makou, i wahi ahaaina lulu dala, no ko makou luakini. Olelo mai o L. Ahukini, aole e pono, no ka mea, o ka makou hana iho nei ia mamua, aole loaa mai o ke dala, ia manawa, olelo mai la o Moku ia makou, na'u e kii i ka ahahui aloha o Lahaina, ia manawa, ae makou.

Ia makou na mea ai, puaa, limu, oopu, opihi, hee, opae, a lako makou i na mea i olelo ai ia makou, makaukau ka ai i ka la 12 o Aug., oia hi ka Poaono, kakali wale mai makou aole hele mai o ka ahahui aloha.

Nolaila, maopopo ia makou ua poho makou. Ua pau ke hoi ke keiki o Honokohau, ua ahiahi. Me ka mahalo.

Na D. M. KALAMA.

Honokohau, Aug. 14, 1865.

KUHINA O KO NA AINA E.—Ua kaumaha makou i ka lono ana mai, ke mai ia nei ke Kuhina o ko na aina e a ke hoaikane la ia me kahi moe i keia mau la, aia no mauka ma kona wahi, ma Rosebank.

OLELO HOOLAHA!

Ke kauoha ia aku nei na Luna a pau o ka Nupepa "KE AU OKOA," e hooili mai ma ka lima o ka Luna Pai, o J. H. Black, i na dala a pau loa, a ia ia wale no, aole ia hai, oia hoi na dala no ka lawe pepa, na olelo hoolaha, na kanikau, a me na mele; aole hoi e ae ia kekahi palapala hookaa ke ole i kakauia ma kona inoa mai keia manawa aku, e kapaeia no. MA KE KAUOHA.

He kanikau no Kahoe.

Aloha nui oe e Kahoe,

Nou ka uhane i hele hookahi aku nei aohe lua,

O malohi o maeele,

O walania o ka eha i ka a-i,

Kahea mai ke kaikamahine,

Auhea oukou—e?

O ko ia nei manawa paha keia,

Ke pii mai nei ke anu i na wawae,

O lele pau, o oili pulelo i ka wanaao,

I ka wehena o ke alaula malamalama,

O oe ka ia e Hoopepe e ua e Hilo,

Ua i ka malama e hoiloli ai,

I na malama ino ke hanau,

Ua hana ino ka kuu kane ia'u,

Ua haalele i ka pili a maua,

Me ke kama lei aloha a maua he keiki,

O oe i—a.

O oe ka ia e Pakaihi i ka aha kau o Hilo,

Ka ua kulu pakakahi o Makakala,

E kala no la oe i haalele ai,

Ua hao na kiowai a ka ua Ukiukiu,

Kuu hoa pili, pili kaua—e,

Kuu kane mai ka hale wai—e,

Hale malu a ke Kiowao,

Aohe kane, he makua,

He hooponopono no ka la pilikia,

E uwe helu mai o Kahaikupuna,

Aloha ino nu kuu hoa pili,

Hele aku la oe i ka po lialia,

Haalele mai nei oe ia'u,

Kuu hoa pili o ka makani keaau—e,

O ka piina loa ana i Kanaenae.

Na MRS. W.

Kuu makuakane i ke kula loa o Halehope,

A me ka ihona welawela o Pahukauila,

Hoomaha aku i kai o Puaena,

Ua ena kuu makuakane, ua haalele mai ia'u,

Ua hoi aku la no paha i ke kai leo nui o Kahuku,

I kahi a kakou i noho ai,

O oe ka ia e ke kai leo nui,

Kai wawalo i ka muo o ka Hala,

Hala oe me ke aloha pau ole.

Na MRS. KAHAUMIA.

S. W. NAILIILI, —Kakauolelo.

Pamoo, Honolulu, Aug. 23, 1865.

HE HALE KUAI

—NO—

KE KANAKA HAWAII.

NO KUU IKE, UA PILIKIA OUKOU I NA Hale Kuai mua, no ka hoopii ino o ke kumukanawai o na ano lole a pau. Nolaila, ua wehe ae au i Hale Kuai, a eia ke waiho nei na kinohinohi o na ano nani a pau, ka mea a ka manao e lawe ai a paihi na eheu o Hihimanu. E komo oe e Hawaii, o Keawe; e kipa ae oe e Maui, o Kama; e naue mai na keiki o Kuihewa, e awiwi e Kauai, o Mano. He oluolu no au ke aie mai. E loaa no au ma ke Alanui Maunakea, mauka o Lepekaholo. Na MOSE.

Honolulu, Aug. 22, 1865. 19-8m*

OLELO PAPA!

E IKE IA E NA MEA A PAU LOA, OWAU o ka mea nona ka inoa malalo iho, ke papa loa aku nei, aole e hookuu wale a ae hewa paha na holoholona o kela ano keia ano, maluna o ko'u aina ma Pawaa, i ike ia ma ka inoa

MA RSHFIELD.

O ka mea e kue i keia, e hoopii ia no make Kanawai.

J. L. LEWIS.

Honolulu, Aug. 26, 1865. 19-1m

OLELO HOOLAHA

NO KA MEA, UA NOIIA MAI AU KA MEA nona ka inoa malalo e I. J. Porter, o Laupahoehoe, e hookohu i Luna Hooponopono Waiwai o Maaele (k.,) o ia wahi no, i make: Nolaila, e ike na mea pau, o ka Poakahi, oia ka la 2 o Okatoba, 1865, i ka hora 9 kakahiaka, ka manawa i haiia no ka hoolohe ana i ka mea i noiia mai, me na mea a pau i hoole, ke pili. Na'u na G. S. KENWAY,

Lunakanawai Kaapuni o Hilo.

Hilo, Aug. 15, 1865. 19-1t

OLELO HOOLAHA.

E IKE AUANEI NA KANAKA A PAU, OWAU o ka mea nona ka inoa malalo iho nei, ke hoike aku nei au, eia kekahi Hoki komo hewa ma kuu aina ma Puiwa, Nuuanu nei. Eia ke ano o ua Hoki la, he Hoki wahine ulaula nui, huelo poomuku, aole maopopo ka hao. Hele mai oukou a pau loa, eia ka uku o ka Hoki, $5.00; a i ole ia, he $10.00 ai i kuu mea kanu, hehi i kuu mea kanu.

(19-2 t*) Na'u na MANOUALANI.

OLELO HOOLAHA.

E KU DALA IA ANA KA LIO O KUAPUU A me ko Aalona, i ka Poalua, la 29 o Augate, i ka hora 12 o ke awakea.

Lio kane ulaula, IW IP akau.

" wahine ulaula, hao ano e.

Na Lio Hou Mai.

Lio kane kukaenalo, aole ike ia o ka hao.

" " ulaula nui, hao ano e.

" " eleele wiwi, hao ano e.

" " puakea kuapuka, hao JT akau.

" " keokeo wiwi, hao S akau, ano e, hema.

" " " " he moo ka hao, hao ano e.

E kii koke mai ka poe nona kiea mau lio, o hala na la he 15, nele oukou.

P. KAAIAHUA,

Luna Pa Aupuni.

Pauoa, Augate 26, 1865. 19-1t*

OLELO HOOLAHA.

E IKE MAI NA KANAKA A PAU MA MOANALUA, kuu moo aina kuai me M. Hoomoepule, a me na kuleana e ae i hui mai me a'u, a me ka moo aina o Kaia. Ke hookapu aku nei au, i na holoholona, Bipi, Lio, Miula, Puaa, Moa, mai hookuu i na holoholona o lakou ma keia wahi i hai ia maluna. Ina kue kekahi i keia, e uku ke poo hookahi o ka holoholona, elua dala maoli, ($2.00,) uku no ka Puaa, $1.00, no ka Moa, $0.50 keneta. E lilo keia i olelo oiaio mai keia la aku o kona laha ana ma ka nupepa.

IULO ANTON.

Moanalua, Oahu, Aug. 24, 1865. 18-1t*

OLELO HOOLAHA.

E IKE AUANEI NA KANAKA A PAU O o kela ano keia ano, na Haole, na Pake, a me na kanaka Hawaii, a me kekahi poe kanaka e ae no. O makou o ka poe nona na inoa malalo, ke hookapu aku nei makou i ko makou mau aina hoolimalima, ka aina hoi o ka mea Hanohano C. Kanaina, e waiho la ma Kailua, Koolaupoko, Oahu, e pili ana me Makawao. Eia na inoa, AINONI, PALAPU, KALUALANI HAKALA, KUKUIMOEMOE, a me LAILUA. Aole e hele wale na holoholona maluna o keia mau aina i hai ia ae la maluna, kapu ka Bipi, Lio, Hoki, Miula, Hipa, Kao, Puaa, Pelehu, Moa, kaka, a me na holoholona e ae, no. Ina e komo ka Bipi, Lio, Hoki, Miula, e uku no hookahi dala no ke poo pakahi, ($1.00,) o ka Hipa, Kao, Puaa, he Hapalua Dala no ke poo hookahi, o ka Pelehu, Moa, Kaka, he Hapaha Dala no ke poo hookahi. Eia kekahi, ua kapu loa na kaanaka i kuleana ole iloko o keia mau aina i hai ia ae la maluna, aole e helewale, a lawe wale paha i na mea e uku ana maluna o keia mau aina. Ina e loaa ia makou, e uku no $1.00, no kona komohewa. E lilo keia i Kanawai paa no ko makou mau aina, mai kona la e laha ai ma ka Nupepa. A no ka oiaio o keia, ke kau nei makou i ko makou mau inoa.

KALEO, KEKUKU, KUIHELANI, KEAWE, BILA, NAKAUOHAMUA, KUAWELA, PUHI, KALOHE, KAWAHAHEENUI, KIAIMAKANI, AIWOHI.

Auwaiolimu, Honolulu, Augate 4, 1865. 16-1m*

OLELO HOOLAHA.

NO KA MEA, UA KOHOIA MAKOU, KA poe nana na inoa malalo iho, he mau Luna Hooponopono maluna o ka waiwai o Bennett H. Sniffin, no Kula, i make aku nei: Nolaila, ua kauoha ia na mea a pau i aie aku, a aie mai paha ia B. H. Sniffin, e hoike mai i ka lakou buke helu, e hooponopono ia mamua ai o ka la 1 o Novemaka e hiki mai ana.

KAMAKANOENOE,

G. E. MINER,

T. W. EVERETT,

Makawao, Maui, Aug, 5, 1865. 16-4t

OLELO HOOLAHA.

NO KA MEA, UA NONOIIA MAI KA MEA nona ka inoa malalo, e Makalua (k,) e hookohu ia ia i Luna Hooponopono Waiwai no ka waiwai o Kupalii (k,) o Lahaina, Maui, i make aku nei. Nolaila, ua hoikeia i na kanaka a pau, ke pili, o ka Poakolu, oia ka la 23 o Augate e hiki mai ana, ma ka hora 10 o ke kakahiaka, oia ka manawa e hoolohe ai ka oiaio o keia nonoi ana mai, aia ma ko'u Keena Hookolokolo ma Lahaina, Maui, kahi e hana ai.

A. M. KAHALEWAI,

Lunakanawai Kaapuni o ka Apana Elua.

Lahaina, Augate 11, 1865. 17-3t.

OLELO HOOLAHA.

MA KA WAIWAI O PHILLIS E. MOLINEAUX. No ka mea, ua noiia mai ka Mea Hanohano R. G. Davis, Lunakanawai o ka Aha Kiekie e J. W. Austin, no ka hookohu ia ia i Luna Hooponopono Waiwai o Phillis E. Molineaux, no Honolulu, Oahu, i make aku nei: Nolaila, ua hoikeia i na kanaka a pau loa, ke pili, o ka Poakahi, oia ka la 28 o Augate, i ka hora 10 o kakahiaka, oia ka la a me ke hora i oleloia no ka hoolohe i ka oiaio o keia palapala kauoha, a me kela noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.

Wm. HUMPHREYS,

Hope Kakauolelo o ka Aha Kiekie.

Honolulu, Augate 7, 1865. 17-3t.

KA MOKUMAHU "KILAUEA!"

E HOLO ANA IA MAI HONOLULU aku ma ka POAKAHI, AUGATE 28,

LAHAINA, MAALAEA,

KALEPOLEPO, ULUPALAKUA,

HONOIPU, KAWAIHAE,

KAILUA a me KEALAKEKUA.

Ma ia hope aku, eia na la holo o KILAUEA, POAKAHI, la 28 Augate.

E haalele ana ka Mokuahi "KILAUEA," ia Honolulu nei, a e holo ana ia i

KOLOA, KAUAI,

ma ka hora 4 o ka la 5 o Okatoba, 1865.

E holo ana ka Mokuahi "ANNIE LAURIE," ma ma na awa o Maui a me Hawaii, i na pule e hoomaha ai o KILAUEA.

JANION, GREEN & Co,

1- tf. Agena o Kilauea.

I KA LEHULEHU!

HE MEA HOU!!

—HE—

MAKEPONO, HE NANI,

—A—

HE MAKEPONO LOA!

UA LOAA MAI IA A. S. GRINBAUM MA, MA ka moku "Cometa,"

HE AHI KOE KAULANA!

A PULU OLE NO HOI I KA WAI!!

—NA—

A. M. POLLAK,

a ua ike ia ma ka honua a puni, oia ka oi o ka

Maikai Loa a me ka Makepono Loa,

I ike ia a puni ka honua.

NO KA MAKEPONO LOA.

He 150 Ahi Koe iloko o ka Pahu hookahi, he 50 hoi kona oi aku mamua o ke Ahi Koe Koe Pele.

NO KA NANI.

Ma na mea i hana ia ai ua Ahi Koe nei, aohe wahi hohono pele—aohe no hoi e pakui ke honi aku,—a ua hookomo ia iloko o ka pahu maikai, nolaila, ua kupono loa ia no na hale hookipa, a me na hale oihana.

Ua koho ia o A. S. GRINBAUM ma, i mau Luna nana e kuai i ua mau Ahi Koe nei, ma na Mokupuni o Hawaii nei, a e hoolako ia kau no hoi ia laua, e like me ka nui o na mea e lilo ana.

Ina oukou e hoao ia, aole oukou e makemake ana i kekahi ano Ahi Koe e ae.

A. M. POLLAK Vienna,

Mea Hana Ahi KOE.

KALAKO HOU!

MAKALENA HOU!

MAKALENA HOU!!

MAKALENA HOU!!!

NO KE KUMUKUAI MAKEPONO LOA!

Na wa e kuai ai, mai ke kakahiaka Poakahi, a hiki i ke ahiahi Poalima.

Ma ke kihi o ke Alanui Nuuanu a me ke Alanui Marine; mamua aku o ka Hotele Royala.

(17-1 y) ISAAC REINHART.

OLELO HOOLAHA

A NA

LUNA HOOPONOPONO WAIWAI

—O—

"MOKUUMEUME!"

E KUAI KUDALA IA ANA E NA MEA NONA na inoa malalo nei, ma ka Hale Hookolokolo, i ka Poakahi, la 28 o Augate, ma ka hora 12 o ke awakea, kela apana aina o ka "MOKUUMEUME," e waiho la ma Ewa. I ka poe a pau loa e makemake ana i wahi mahi, kupono i ka mea hookahi ke malama, a ke mahi hoi; eia ka wa e loaa ai.

JOHN O. DOMINIS,

Luna Hooponopono Waiwai o ka Moi.

C. C. HARRIS (HALAKI,)

Luna Hooponopono Waiwai o L. Haalelea.

Honolulu, Augate 4, 1865. 16-4t

OLELO HOOLAHA.

KAU JURE MA HAWAII.

KE HAAWI IA AKU NEI KA LONO, E hoomaka ia ana ke Kau Jure ku i ka wa o ka Aka Kaapuni, o ka Apana Hookolokolo Akolu, o ka Mokupuni o Hawaii, ma Hilo, ma ka Poalua, la 19 o Sepatemaba e hiki mai ana, ma ka hora 9 kakahiaka. Ma ke kauoha a E. H. ALLEN, Lunakanawai Nui o ka Aha Kiekie.

Wm. HUMPHREYS,

Hope Kakauolelo o ka Aha Kiekie.

Honolulu, Au gate 17, 1865. 18-3t.

KAU KU I KA WA.

O KA AHA KAAPUNI MA HAWAII.

KA POE JURE KANAKA MOLI NO KA AHA Jure o Sepatemaba, e hoomaka ana ma Hilo, Hawaii, ma ka Poalua, ka la 19 o Sepatemaba, M. H. 1865, e hiki mai ana.

Kaaua, Mikeailiki,

Liko, Makehao,

J ohn Akina, Kawaihai,

Paila, Piliwale,

Kamakea, Moepono,

Wahinealioka, Hailama,

D. Nuhau, Iosepa Kaapaa,

Kaia, Lo,

Puaa, Kekaula,

Naihenui, Makaena,

Apolo, Mikaele.

Wm. HUMPHREYS,

Hope Kakauolelo o ka Aha Kiekie.

Hale Hookolokolo Honolulu, Aug. 16, 1865. 18-3t

AHA KAAPUNI MA HAWAII.

KA POE JURE KANAKA MAOLI NO KA AHA Jure o Sepatemaba, e hoomaka ana ma Waimea, Hawaii, i ka la 5 o Sepatemaba, M. H. 1865, e hiki mai ana.

Epa, J. Kalua,

Napuaehu, Luhiau,

Haae, Kukaliikahi,

Maikakio, Uhia,

J. W. Kaaukai, Kamelamela,

Kaima, Kekaula,

J. K alua, Nuuanu,

Uli, Kahalenai,

Pomaikai, Waiau,

Kaaekuahiwi, Nainoa,

Kanekuapuu, Isaac Maui,

Kaanehe, Kaamana.

Wm. HUMPHREYS,

Hope Kakauolelo o ka Aha Kiekie.

Hale Hookolokolo, Honolulu, Au g. 16, 1865. 18-3t

OLELO HOOLAHA.

E IKE AUANEI OUKOU E KA POE E NAnana ana i ka Olelo Hoolaha a Malieailama, o Kaumakapili, Honolulu, ma ka la 27 o Iulai, e hoike ana i ke akea, no ka haalele kumu ole o kana kane mare o Kaaimalu, a me kona kepa ana e holo maluna o ka moku okohola, me ka ike ole o kana wahine. Owau o ka mea nona ka inoa malalo iho, ka mea pili pono i ka mea i hoolahaia ma ke akea, o ka Olelo Hoolaha a Malieailama, aole he oiaio, ua holo aku ke kane maluna o ka moku okohola, me ka waiho mai he puu dala i ka wahine, me ka hai pu mai ia ia, e haalele oia ia Honolulu nei, a e hoi i kahi paa o ke kane, aka, noho no ka wahine ma kona manao iho i Honolulu nei, a ke noho nei no oia ma ke ano kue i ke kanawai mare me kana kane.

C. B. KAILIULAOLE.

Honolulu, Augate 10, 1865. 17-1m