Ke Au Okoa, Volume I, Number 29, 6 November 1865 — Page 1

KE AU OKOA.

BUKE I--HELU 29.}  HONOLULU, MONEDE, NOVEMABA 6, 1865.  {$2.00 NO KA MAK.

 

"KE AU OKOA,"

E HOOPUKA MAU IA'NA I

KELA POAKAHI KEIA POAKAHI,

MA KA

HO RA EWALU O KAKAHIAKA.

ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela ho ka lua o ke dala, e uku e ia iloko o ka hapa hope o ka makahiki.

 

"KE AU OKOA."

KA UKU O NA

OLELO HOOLAHA.

NA OLELO HOOLAHA—No na lalani he 10, oia hoi 1 iniha, no ka hoopuka hookahi ana, $1.00; alua hoopaka ana, $1.50; ekolu, $1.75; hookahi mahina, $2.00.

Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Pai.

 

BEDERA BASIMA & GIOHARA.

He Kaao no Arabia.

HELU 1.

Aia i na wa kahiko loa ma ka aina o ka poe Peresia , kahi i noho ai kekahi alii, o Sekemana kona inoa, a o ka inoa o kona wahi o Korasana. He hookahi haneri ka nui o kona poe haia wahine, a aohe oia i hoopomaikai ia mai i kekahi keikikane a kaikamahine hoi ma o lakou la, a noonoo iho la oia no keia mea i kekahi la, a kanikau iho la oia no ka mauna wale ia no o ka hapanui o kona ola me ka loaa ola o kekahi keiki, i mea nana e noho ke aupuni i loaa mai ia ia mai kona mau kupuna mai.

No ia mea, ua uhi mai maluna ona ka ehaeha paumako o ka naau, a i kekahi la ia ia e noho ana iloko o kona halealii, komo mai la kekahi o kona mau kauwa, a olelo mai la, "E kuu haku, aia ma ka ipuka kekahi kaikamahine na kekahi kanaka kalepa, aohe kaikamahine e ae i ike ia ka nani e like me ia." Pane mai la ke alii, e lawe mai ia ia imua nei o'u." No ia mea, komo mai la ke kanaka kalepa a me kekahi mau kauwa i ona la, a ike aku la ua alii nei i ka nani io o ua kaikamahine nei, ua pololei kona kino, me he ohe kukahawai la i pa ole ia e ka makani.

Nolaila, i ka ike ana o ke alii ia ia, a me kona nani lua ole, a ninau aku la oia i ke kanaka kalepa, "Heaha ke kumukuai o keia kaikamahine?'' Pane mai la ke kanaka kalepa, "Ua kuai aku au ia ia no na apana gula elua tausani, a ua noho oia me a'u no na makahiki ekolu, o ko'u lilo a pau nona, ekolu tausani apana gula, a ano, ua lawe mai nei au ia ia i makana na'u ia oe." No keia mea hoaahu aku la ke alii ia ia i kekahi lole hanohano nani, a haawi ae la no hoi i ka olelo kauoha e makana aku ia ia i umi tausani apana gula. Honi iho la ia i ka lima o ke alii, a lawe mai la oia ia mau mea, a hele aku la ia ma kona ala iho, me ka hoomaikai aku i ke alii no kona lokomaikai nui.

Alaila, haawi ia aku la ua kaikamahine nei i na haia wahine e malama ai, me ke kauoha ae i na puuku o ka halealii, e haawi aku ia ia i na mea a pau obscured e makemake ai. Kahi i ku ai o ka halealii ia manawa, aia ma kapakai, a ua kapa ia ua hale alii nei o ke Kulanakauhale Keokeo a iloko, o ua hale nei kahi i hoihoiia ai o ua kaikamahine nei, iloko o kekahi rumi malu, a nona na puka aniani e haliu pono ana i ke kai. Ua kauoha ke alii i kona mau puuku, e pani paa na puka, mahope iho o ka lawe ana i na mea a pau loa e makemake ai.

Hele aku la no hoi ke alii e ike ia ia, aka, aole nae kela i pane aku ia ia, a aohe no hoi i nana aku ua kaikamahine la. Hele aku la ke alii a noho pu iho la me ia, a hoolale aku la ia e lawe mai i ai na laua, a ai laua a ana, me ka pane ole aku o ua kaikamahine nei! I ka pau ana o ka laua paina ana, mahalo mau mai la no ke alii i ka nani o ua kaikamahine nei, a aohe no hoi i ana kona mau maka i ka nana mau aku ia ia i na manawa a pau loa. Kamailio aku la ke alii me ka ninau aku iaia i kona inoa, aohe nae ona pane mai, aohe no hoi i hai mai i kona inoa ; a o ke kumu nui i huhu ole ai ke alii, no kona ui a nani loa hoi, a no ka waipahe o kana mau hana. Nolaila, olelo iho la ke alii iloko iho ona, ''Ua nani oe ma na wahi a pau loa, a hookahi wale no hoi kina, o kou kamailio ole."

Ninau ae la oia i na haia wahine, ina ua kamailio oia, olelo mai la lakou, "Aole oia i pane iki i kekahi hopuna olelo, mai kona wa i hiki mai ai.'' Kauoha ae la oia i na haia wahine, e kii aku i ka lakou mau pila, a e hele mai e hookani imua ona, mea paha o hoolioli ia mai oia e ke kani hone ana a na pila, a kamailio mai la hoi ia. Hookani mai la lakou i na pila, a himeni mai la i na himeni lea loa, a hoolioli ia ae la ka puuwai o kela mea keia mea, aohe o lakou mea i olioli ole, koe nae o ua kaikamahine nei. Nolaila, ua kupilikii ka naau o ke alii, a hoopili loa aku la ia i ua kaikamahine nei, me ka manao ole aku i kekahi poe kaikamahine e ae.

Noho pu iho la laua a hala ka makahiki, me he mea la hookahi no ia la, aole nae oia i pane iki mai, a i kekahi la olelo aku la ia ia, i ka wa a ke aloha i paila ai, "E ke kau nui a na uhane, he oiaio ko'u aloha ia oe, aohe he uuku, a ua hoopau aku au i ka'u launa ana me ka'u mau haia wahine nou, a ke hoolilo nei au o oe ko'u waiwai o keia honua, a ua hoomanawanui au no keia makahiki holookoa. Ke noi aku nei au ma o Alahe la, e hooluolu mai ia iloko o kona ahonui i kou naau, a e pane mai ia'u. A ina paha oe he aa, e hai mai oe ma kekahi hoailona, i manao ai au, aole io he hiki ia oe ke kamailio. Ke noi ae nei au i ke Akua, e hoopomaikai ia'u ma ka hoohua ana mai i keikikane ma ou la, i mea nana e noho alii ko'u aupuni mahope mai o'u; no ka mea, hookahi wale no au, aohe hooilina, a ke hele aku nei ko'u mau makahiki i ke kanikoo ana. Ke noi aku nei au ia oe ma o Alahe la, ina he aloha io oe ia'u, e pane mai oe.''

No keia mea, kulou iho la ka maka o ke kaikamahine ilalo me ka noonoo nui. A mahope, ea mai la kona poo iluna, a nana mai la i ke alii me ka mino ana o na papalina, a na ka mino ana o kona mau papalina i hoomalamalama loa ae i ka rumi a laua e kamailio ana, a pane mai la ia, "E ke alii wiwo ole, ua lohe ia mai kau mau pule e ke Akua, no ka mea hoi, ua hapai au, a ua aneane au e hanau. Aka, aole au i ike, he keikikane a he kaikamahine paha, a ina aole au i hapai, aole wau e kamailio iki aku ana ia oe i hookahi wahi mapuna olelo.''

A i ka wa i lohe mai ai oia i ka olelo ana a ke kaikamahine, mea e ka lelele a me ka panapana o kona puuwai i ka olioli kuhohonu, a honi mai la oia i kona poo a me na lima, a olelo iho la ia, "E hoomaikai ia ke Akua, no ka hooko ana mai i na mea a'u i makemake ai, ka mea mua kou kamailio mai, ka alua kou hapai ana." Ku ae la ke alii, a komo aku la ia iloko o ka rumi hookipa o ka halealii, a kauoha ae la oia i kona mau Kuhina, e lawe ae i hookahi haneri tausani apana gula, a e haawi aku ia mau mea a pau loa i ka poe ilihune a me ka poe nele. No ia mea, hana iho la na Kuhina e like me ka ke alii i kauoha aku ai.

Mahope iho, komo mai la ke alii, a pulike mai la i kana aloha i kona poli, me ka ninau mai ia ia, "Heaha ke kumu nui e kuu haku wahine, ka mea nana i hoolilo mai ia'u i kauwa hookahi no kou aloha, i pane ole mai ai oe i keia makahiki holookoa, a akahi wale no i keia la? Heaha la ke kumu o kou hamau loihi loa ana?" Pane aku la ke kaikamahine, "E lohe oe e ke alii o keia au, he malihini ilihune au, ua kaawale au mai ko'u ohana mai." A i ka lohe ana o ke alii i kana mau olelo, ike iho la ia i kona makemake, a pane mai la oia ia ia, "E like me kau mea e olelo mai nei he ilihune oe, nolaila, aole kumu nui o kou olelo ana pela, oiai o ko'u aupuni a pau loa mai ka uka a ke kai nou ia; a ina oe he makemake e ike i kou ohana, e kuhikuhi mai oe i ko lakou wahi i noho ai, a na'u no e kena ia lakou a hiki mai."

Nolaila, pane mai la ke kaikamahine, "E ike oe e ke alii, o ko'u inoa o Gulunea o ke Kai. O ko'u makuakane, oia kekahi o na alii nui oloko o ke kai, a i kona make ana, waiho mai la oia i ke aupuni ia makou, a ia makou e hauoli ana ia, hele mai la kekahi alii a lawe aku la i ke aupuni mai ko makou lima aku. O ka inoa o ko'u kaikunane o Sale, a o ko'u makuahine, oia kekahi o na wahine oloko o ke kai, a hakaka iho la maua me kuu kaikunane, a olelo aku la au ia ia, e kiola ana au ia'u iho iloko o na lima o kanaka o ka aina nei. Nolaila puka mai la au mai ke kai mai, a noho iho la au maluna o kekahi mokupuni, ma ka malamalama o ka mahina, aia hoi, maalo ae la kekahi kanaka ma o'u la, a lawe aku la ia ia'u i kona wahi, makemake iho la kela e lilo au i haia wahine nana, aka, papai aku la au ia ia ma kona poo, a aneane oia e make.

"No ia mea, kuai aku la oia ia'u me ke kanaka nana au i haawi mai ia oe, he kanaka maikai haipule oia, a ina aole no oe i aloha ia'u, maluna ae o na haia wahine a pau loa au, alaila, ina no ua lele koke aku no au mai keia puka aniani aku a iloko o ke kai, a hoi aku no au i ko'u home mau iloko o ke kai. Aka hoi, ina au e hoi aku io lakou la, a ina au e hai aku, ua kuai ia au e kekahi alii me kona mau waiwai o keia ao, aole auanei lakou e manao io mai, a oia iho la ko'u moolelo mai ka mua a i ka hope." A i kona lohe ana i kana mau olelo a pau loa, hoomaikai aku la oia ia ia, a olelo aku la, "Ma o Alahe la! aole e hiki ia'u ke kaawale mai ou aku no ka hora hookahi, e kuu haku wahine, a pehea la auanei ka pono?"

Pane mai la o Gulunea, "E kuu haku, ua aneane e hiki mai ka wa e hanau ai, a e kahea ae paha au i kuu ohana e hele mai lakou." "A pehea lakou e hiki ai ke hele iloko o ke kai?" wahi a ke alii. Pane mai la ia, "He hiki ia makou ke hele ma ke kai, e like me ka hiki ia oukou ka hele ana ma ka aina. I ko lakou hiki ana mai, e hai aku no au ia lakou, ua kuai ia au e oe me kou waiwai. He alii nui oe, he mamo hoi na na 'lii, a ike auanei no hoi lakou, he alii io no oe. Na ka nani o kou halealii nei, a me na mea a pau e hooiaio aku ia lakou i na mea a pau a'u e hai aku ai ia lakou."

A nolaila, olelo  mai la ke alii, "E hana e like me kau mea i manao ai he pono, no ka mea, ma na mea a pau loa au e hana ai; malaila pu aku au e kokua like ai." A olelo mai la ke kaikamahine, "E ike oe e ke alii, he hiki no ia makou ke hele iloko o ke kai me ka eha ole o ko makou mau maka, aia no hoi iloko o ke kai na mea kupanaha o na ano a pau loa, o na mea nunui e ike ia nei ma ka aina nei, he mau kiko liilii ia iloko o ke kai. Mai loko mai no hoi o ke kai, ua ike mai makou i ka la, ka mahina, a ma na hoku. O na mana a pau loa i hiki ai ia makou ke ike i keia mau mea a pau loa, no ke kila mai no ia a Solomona, ke keiki a Davida." I ka lohe ana e ke alii i keia mau mea, ua kahaha kona manao no ke kupaianaha, no ka mea, ua manao loa no ia no ka aina nei o Gulunea, a aohe la noloko mai o ke kai, aka, ua like pu no kona aloha ia ia.

Ia wa, lawe mai la ia mai kona poli mai, me he wahi apana laau ala la, a kiola iho la iloko o kekahi ipu puhi mea ala, a namunamu iho la kona waha i kekahi mau huaolelo i lohe ole ia e kekahi poe e ae, a hoouna ae la oia i kekahi hokio nui launa ole; aole i liuliu, punohu ae la kekahi punohu uahi nui, a olelo mai la o Gulunea i ke alii, "E kuu haku, e ku ae oe, a e pee aku ma kahi malu i hoike aku ai au ia oe i kuu makuahine, kaikunane, a me kuu ohana; no ka mea, ke makemake nei au e kahea aku ia lakou, a e ike no auanei oe ia lakou, a e kahaha no auanei kou manao a me kou noonoo kanaka, i kou wa e ike aku ai ia lakou a pau loa, i ko lakou puka ana mai ke kai mai, no ka mea, he mau mea kupanaha lakou a pau loa a ke Akua i hana ai."

No ia mea, ku ae la ke alii iluna, a komo aku la ma kahi malu, a nana mai la i ka mea a Gulunea e hana ai. Puhi iho la ia i ka mea ala, a hiki wale i ka wa a ke kai i aleale mai ai, a iloko oia aleale ana, hoea mua mai la kekahi kanaka ui opiopio i loaa ole kona lua ma ka aina nei, ua like kona mau helehelena me he mahina la, a oia ka ka poe haku mele i mele ai penei:

"Hookahi wale no poepoe ana o ka mahina iloko o ka malama hookahi,

Aka, o ka puia o kou mau maka e ke onaona, he mea mau i na la a pau,

O kona wahi noho, aia no ia iloko o ka puuwai o kahi hookahi,

Aka, o kou nani, ua nohoia eia na puuwai a pau i ka wa hookahi."

Mahope iho, puka mai la kekahi wahine ua aoo, a mahope ona elima mau kaikamahine, a o ko lakou mau helehelena, ua ano like no me Gulunea. Alaila, ike mai la ke alii ia lakou a pau e hele ana maluna o ka ili o ke kai, a pii aku la lakou a halawai pu me Gulunea, a uwe iho la lakou me ka ehaeha nui o ka naau, a olelo mai la lakou ia ia, "E Gulunea, heaha la ke kumu nui o kou haalele ana ae ia makou iloko o keia mau makahiki eha, aole makou i ike i kou wahi e noho ae nei? Ma o Alahe la! ua ino keia ao ia makou, no ka mea, aole e hiki ia makou ke ai a ke inu i kela la keia la, oiai ua nalowale oe ka momi o ko kakou ohana." Honi pakahi aku la ia i kona poe pilikana a pau loa, a ninaninau mai la oia ia lakou a pau loa i ke ano o ko lakou noho ana, a me ke ano o ko lakou alii.

I ka lakou ninau mai i ke ano o kona haalele ana, na wahi a me ka poe ana i launa aku ai, ia ia i haalele aku ai ia lakou. No ia mea, olelo aku la ia lakou, "E ike oukou, i kuu wa i haalele aku ai ia oukou, hele mai la au i ka aina nei a noho iho la maluna o kekahi mokupuni, a lawe ia aku la au e kekahi kanaka a kuai ia i kekahi kanaka kalelepa, a lawe mai la oia ia'u, a kuai aku la ia'u i ke alii, no na apana gula he umi tausani. Hana maikai mai la ke alii ia'u, a haalele aku la ia i ka manao ana i kekahi poe haia wahine e ae, kana mau punahele, a lilo mai la kona manao a pau loa ia'u, a ia'u hookahi wale no, a haawi mai la oia ia'u i na mea a pau loa ana iloko nei o keia kulanakauhale." A i ka wa i lohe ai ke kaikunane i keia mau olelo, olelo mai la oia, "E hoomaikai ia ke Akua, oiai ea, ua hui hou ae nei kakou, e pono oe e ku ae a e hoi pu me makou i ko kakou aina, a me ko kakou ohana."

I ka wa i lohe ai ke alii i keia mau olelo a ke kaikunane, auhee aku la kona noonoo kanaka mai ona aku la, no ka mea, ua manao ia, o ae aku o Gulunea i ke koi mai a kona poe, nolaila, ua kupikipikio loa iho la kona manao, o kaawale aku anei kana aloha mai ona aku, a hemo ka laua pili i hoa ia a paa. Aka, i ka lohe ana o Gulunea i ka olelo a kona kaikunane, olelo aku la ia, "Ma o Alahe la, e kuu kaikunane, ke kanaka nana au i kuai, oia ke alii o keia kulanakauhale; ua hana mai oia ia'u, a he mea oia i lako i ka waiwai o na ano a pau loa; a mai ka la o'u i hiki mai ai a hiki wale i keia wa, aole au i lohe i kekahi huaolelo e hoehaeha mai ai i ko'u naau, aohe i hooki ae oia i kona malama maikai ana mai ia'u. Ina au e haalele ia ia, e make auanei oia, no ka mea, ua nui loa kona aloha ia'u, aole no hoi oia wale kekahi kumu o'u e hoololohe ai, ke ike mai nei no oukou, ua aneane au e hanau mai i ke keiki, a e hoomaikai ia no hoi o Alahe, no ko'u lilo ana he kaikamahine na kekahi o na alii o ke kai, a o ka'u kane oia kekahi o na'lii nui o ka aina. Aohe no i hoopilikia mai ke Akua ia'u, a ua hana pono mai oia ia'u, a ke noi ae nei au i ka Makua e hoohanau mai i keiki kane na'u, i lilo ai oia i hooilina no kona mau waiwai a me kona aupuni mai o a o, a i lilo ai oia i mea nana e noho na halealii, a me na hale hanohano a pau o kona makuakane alii."

A i ka wa i lohe ai kona kaikunane, kona makuahine, a me kona mau kaikaina i kana mau olelo, ua noho ia mai la ko lakou mau helehelena e ka olioli, a olelo mai la lakou ia ia, "E Gulunea, ua ike no oe i ka mea nui loa iloko o ko makou naau, a ua ike no hoi oe i ka nui o ko makou aloha ia oe, a ua ike no hoi oe, o oe ka mea a makou i aloha nui loa ai, a ke makemake nei makou e kau mai ka pomaikai, ka maha, a me na oluolu a pau loa maluna ou mai keia a aku, a hiki wale i ka wa a ka Mea nona keia ola ana, e kii mai obscured lawe aku. Ina aole he maha a he oluolu i loaa ia oe maanei, e ku ae a e hoi pu me makou i ka poli o ko kakou ohana, aka, ina ua maikai iho la no kou noho ana maanei, oia ka makou e ake neui nei."

Ia wa, pane mai la o Gulunea, "Ma o Alahe la, aohe mea a oukou e manao mai ai, aole au i maha a i oluolu, no ka mea, o na mea a pau loa a'u e makemake ai, he loaa wale no ia ke makemake ae au." I ka lohe ana o ke alii i keia mau olelo a Gulunea, ua hoohoihoi ia mai kona naau, a ua hoonui loa ia mai kona aloha ia ia, a ike iho la no hoi ia ua aloha io ka o Gulunea ia ia, e like me kona aloha ia ia, a ike aku la no hoi ia ua ake nui o Gulunea e noho pu me ia, a hiki wale i ka hanau ana o ke keiki.

Alaila, kauoha ae la o Gulunea i na haia wahine e lawe mai i na mea ai ono loa a pau loa, a o Gulunea maoli no ka mea nana e lawe aku i ka mea ai imua o lakou, no kona makemake ole e ike ka poe kauwa i kona ohana. Nolaila, lawe ia mai la na mea ai, a ai iho la kona ohana ia mau mea me ia. Mahope iho, olelo mai la kona poe ohana ia ia, "E Gulunea, he malihini kou haku kane ia makou, aole makou i ike ia ia, ke ai nei makou i kana ai, me ko makou ike ole ia ia, nolaila, aohe pono iki oia mea i ko makou manao, oiai, aole oe i hoikeike aku ia makou ia ia, i kukuluia ai ka launa maikai ana mawaena o makou a me ia."

Hooki ae la lakou i ko lakou ai ana, ho-a iho la lakou i ko lakou inaina enaena, puka mai la ke ahi mai ko lakou mau maka a me ko lakou mau waha mai. I ka ike ana mai o ke alii i keia mau mea, ua uluhia ia iho la oia e ka makau a me ka weliweli nui. Alaila, hoomalimali aku la o Gulunea ia lakou obscured aku la ia, a olelo aku la i ke alii, "E kuu haku, ua lohe anei oe i ka'u mau olelo mahalo nou imua o ko'u ohana, a ua ike anei oe i ka huhu enaena o lakou ia'u, no ko lakou ike ole ia oe, a ua lohe auanei oe i ko'u hoole ana aku ia lakou i koi mai ai e hoi pu makou i ko makou aina?" Pane mai la ke alii, "Aole au i ike i kou aloha ia'u mamua, he hoomanao wale no au, a ano, ke ike nei au he aloha io ka po ia'u."

Olelo aku la o Gulunea i kona haku kane, "Pehea la wau e haalele ai ia oe, oiai o ko kaua kaawale ana aole ia he mea uuku na kaua e hoomanawanui ai; aole no hoi oia wale no, aka, ua loaa mai ia'u kekahi pomaikai nui loa, a oia hoi ka mea a'u e koko nei iloko o ko'u opu. A ano e ke alii, e oluolu oe e hoohaahaa ia oe iho ma ka hele ana e aloha aku oe i ko'u ohana, ike mai ai lakou ia oe, a i noho like ai hoi kakou me ka lokahi nui mawaena ou e ke alii a me ko'u ohana. E lohe oe e ke alii, ua aloha ko'u kaikunane a me ko'u makuahine a ko'u makuakane e ike ia oe, no ko'u mahalo ana aku ia lakou nou, a ua olelo mai lakou, aole makou e haalele ana ia oe a me keia aina, a ike a aloha aku makou i ke alii, nolaila, ua makemake lakou e ike a e launa pu me oe."

Pane mai la ke alii, "Ke lohe nei au a malama, no ka mea, oia no ka'u mea i ake nui ai, o ka halawai he maka a he maka." Nolaila, ku ae la ia iluna, a puka aku la e halawai a e aloha aku ia lakou, a wikiwiki ino mai la no hoi lakou i ke ku mai iluna e halawai me ia, me ke aloha nui loa. Ai iho la lakou me ia ma ka papaaina, a noho pu iho la no hoi me lakou no na la he kanakolu. Alaila, makemake iho la lakou e hoi i ko lakou hoi iaakana, u la no hoi lakou i ko lakou aina kai.

(Aole i pau.)

 

I ka Hoaloha Opiopio.

E KA LUNA HOOPONOPONO;—Aloha oe:

E oluolu oe e hookuu mai ia'u e kapala hou aku au i kekahi kolamu o kou pepa ahonui me kekahi mau lalani pokole, i kuleana ai ko'u pani ana, no na mea e pili ana i ko'u mau hoa'loha oaiopio.

E kuu hoa'loha opiopio, e oluolu oe e halo iho maluna o keia mau wahi lalani pokole, no ka mea, ua manaolana au aole no he poino, aka, he pomaikai ke loaa ia oe, ke haliu mai oe ia. Ua haha-i aku au ia oe i kekahi mau poino a me kekahi mau kumu e alako aku ai ia oe i kou hulihia ana. A ano, ke hai hou aku nei au ia oe, o ka launa ana me na hoalauna ino, oia kekahi kumu o ka popilikia.

I ko'u manao, ua oi ae paha ka poe opiopio i lilo i ka hoowalewale ia ma keia kumu, mamua o na kumu e ae. He nui ka poe i haalele i ko lakou mau home, me ko lakou mau ano maikai, aole nae i maikai loa ko lakou mau ano, aka, ua hupo nae lakou i na ala pakauakee o ka hewa—he poe i makau i na hewa o kela ano keia ano, a mahope ua haule lakou, he mau mohai i kupalu ia iloko o ka huikau ana me na hoalauna ino, lapuwale. O ke kanaka, he mea hui mau ia me kona poe hoalauna, aohe no paha he wa i ike ole ia ai ka hui ole ana o ke kanaka me ke kanaka, no ka mea, he mea hiki ole no i ke kanaka ke hookaawale ia lakou iho, oiai he mea mau no ia mai ka Makua mai.

O ka wa opiopio nae o ke kanaka, oia ka wa makau loa ia, o ka launa ana me kona obscured a oia ka wa e makaala loa ia obscured oia ka wa e kukulu ia ai ke obscured makua ana. I kela la keia la, obscured mai kakou me na kanaka obscured au i ka hana, me ko kakou ike obscured o lakou puni lealea; aka, o ka hapanui o lakou, ua kono mau ia lakou e hana mau me kekahi poe hoalauna lealea, a ina aole lakou e noonoo ana i ka wae ana i ko lakou mau hoalauna, alaila, e haule auanei lakou iloko o na lua poho a me ka nenelu o ka hewa. He mea hiki ole ke hoomau i ke ano pono, no ka launa ana a ka poe lapuwale, oiai i na wa a pau loa au e hookuoo ai ia oe iho, e haule auanei ke kaumaha o ka paona ma ka aoao o ka hapanui. O na hoonioniolo ana, aole e mau ana ia ke hui aku oe me ka poe puni lealea, ua like me ko lawe ana i kau mau dala iloko o ka banako o ka poe aihue, e powa mai no auanei lakou ia ae ia mau mea.

O kau mau hana maikai ano haipule, he mea ino loa ia ia lakou la, a he mea hoonaukiuki mau no hoi ia lakou, i na wa a pau au e hoao ai, e ume mai ia oe iho; e huhu mau auanei lakou ia oe, aia ko lakou manao a lilo pu aku oe iloko o ka lakou mau hana lapuwale, a me ka lakou mau hana diabolo. O ka opio auwana, i lilo i ka upena a ka hoowalewale ia, oia ka mea milimili maikai loa a Satana, no ka lawe pu ana mai i na uhane ola maikai, a me ka naau opiopio. Ina oe e hookuu aku ia oe iho, me keia poe au i manao ai he mau hoalauna kupono no kou launa ana, alaila, e lilo auanei oe iloko o ka lapuu ana a ka Nahesa, aohe mea hiki ke lawe mai ia oe mailoko mai olaila, o ka oia mau wale no. Mea paha, i kahi manawa, manao ae e hoi hope, aka, aohe e hiki ia oe, no ka obscured hoomau mai la no kela i ka hoohoihoi ana mai ia oe, a me ka hoolalelale mai e hele aku imua, me na kapuai mama, kuike ole, e ake ae ana e hiki koke aku oe i ka pohaku o ka piholo ana iloko o ka hohwalewale ia.

Kahi i makau loa ia ai o ka hui ana me kela poe keia poe, oia no na kulanakauhale nui, kahi e mumulu mau ia ai e kanaka o kela ano keia ano, a aia no hoi ma ke kulanakauhale kahi laulaha na ino o na ano a pau. Ina oe he kuaaina, a he malihini ka ike ia ana o kou mau maka iloko olaila, a ina paha ua ike ia ia mai oe e kekahi poe o ke kaona, he wahi pakeke nakeke iki kou, e mumulu mai no auanei lakou mahope o kou mau kapuai, me he auana manu kolea la, e lele hoolahalahai ana ma o a maanei, ma na wahi a pau au e hele ai, a i ko lakou wa e ike mai ai ia oe, ua aneane e pokole kou kakai, alaila, e hoomaka no auanei ko lakou hoalualu pakahi ana aku, a hiki wale i kou wa e haha iho ai i kou mau pakeke, aohe. Aka, ua kani iho la ka lakou la aka, no ka mea, ua hei aku la oe iloko o ka lakou la upena, aohe a lakou la nana hou mai ia oe, no ka mea, ua ilihune iho la, imi aku la no lakou he mau hoa e.

I kou wa paha i haalele aku al i kou home kuaaina, he ano haipule oe a me kou ohana, i ka lohe ana paha o kou makuakane, "aia ko keiki, ua hele auwana, a ke hele wale la mao a maanei, no hai ka hale e moe la, no hai kahi kapa e hoaahu ia la, na hai ka ai e makilo hele la, e mokumokuahua auanei ka naau o kou makuakane. Ehia mea aloha o ka moe a kou makuahine, alaila, e olelo auanei kou makuahine, ua hilihewa kana mau pule, ana i hoouna mau ae ai i kela pule ohana ana keia pule ohana ana. E uwe mau auanei ia nou, a e ake nui auanei, o ka malu hou aku o kou poo, iloko o ka ipuka o kou home, aole ia i hoowahawaha ia oe, no kou hele auwana ana, no ka mea paha, aohe nou ka hewa, no laua no paha ka hewa no ka hookuu opiopio ana mai ia oe imua nei o keia ao i piha mau i ka hoowalewale ia.

Aka, e kuu hoaaloha opiopio, aole no kou mau makua ka hewa, nou no, no ka mea, ua ao mau ia oe e uhai i na kapuai o ka pono, mai kou wa i hoomaka mai ai ke kolo ana, a hiki wale i kou wa i haalele aku ai i na paepae wawae o na ipuka o kou home, ua ao ia aku oe, mai hilinai maluna o ka pomaikai o ka hou o ko hai lae, ua papa ia aku oe, mai launa me ka poe ino, a me ka poe puni lealea, ua hahai ia aku oe aole e uhai i na koii ino, a  haakei o kou naau, i hooikaika oe e pale ae i keia mau mea, no ka mea ina aole oe e pale ia mau mea, e hiki mau ia nei kou mau kuamoo o na kuamoo o ka poino, a e hehi mau no auanei kou mau kapuai i na ala apuupuu o ka nele, a e hoopilimeaai ai a me ka nele, i mau kakoo ikaika nou i na la a pau, oiai, i kou mau la ahuai.

Ia oe i komo ai iloko o keia noho 'na ilihu-

ne, e lohe mau no auanei kou mau pepeiao i na leo ke a kou me haku hale, e olelo i kahi keiki hoopilimeaai, noho wale mai no, wahi keiki makilo. Ua lohe no kou mau pepeiao i keia mau olelo ino, aka, aole i hilahila kou naau ia mau mea, ua mau no kou noho ana, oiai, aole oe i ike iho i ke kaumaha oia mea, ua lilo loa oe i ka upena a ka hoowalewale mau ia, e aloko ana ia oe i o ia nei. Pela oe i noho ai ma ke kulanakauhale nei, me kou manao paha e hoi hou i ka hale o kou hanau ia ana, aka, aole e hiki ia oe ke hoi hou ilaila, no ka mea, ua hilahila oe i ka halawai aku me na leo aloha o kou makuahine, a me na u ana o kou makuakane.

A ano ke kanaka opiopio, ina aia ma ke kulanakauhale nei kekahi keiki oia ano, ke koi ae nei, keia mau lalani pokole, e hooikaika i nui ke aho, e ku a maloeloe iluna, a e hoi koke i ka hale o kou mau makua, a i ka poli i kou makuahine, no ka mea, aohe i huhu kou makuakane, aohe no hoi e hookae mai kou makuahine; he aloha ko ka ohana o ka home e noho mai la, e kakali mai ana o kou hoi aku.  KAUKA HOLANIKU.

Waipiula, Honolulu, Nov. 2, 1865.

 

No kekahi hana Kahiko.

He mea hoakaka keia i ka ikaika o ko Hawaii nei kanaka, i ka pono a me ka hewa.

Eia na mea e hooikaika ai:

Ina e ao ke kanaka i ke koa, he ikaika ia e make ai ke kino. Ina e ao i ka mokomoko he ikaika ia e eha ai ke kino. Ina e ao i ka lua, he ikaika ia e make ai kekahi kanaka. Ina e ao i ka heihei waa, he ikaika ia e lilo ai ka waiwai o kekahi, a me kona waiwai i kekahi. Ina e ao i ka pahee, a me ka maika, a me ke kukini, a me ka noa, me ka heihei holua, me ka hooholo moa a me ke koi. He mau ikaika pili waiwai keia a pau.

Eia kekahi ikaika: Ina e ikaika i ka palaualelo ha aihue kona ano. Ina e ikaika i na lealea a pau loa, he moe kolohe kona ano, eia keia mea ino loa i ka wa i kaahope ae o ke kake, ua ike maopopoia ka hewa o ke kake, ua oi loa kona hewa mamua o na hewa a pau, no ke kake ke kumu o ka hana uso ole, o keia mau aina i ka wa kahiko, mai Hawaii a Kauai ua oi keia hewa mamua o ke puhi baka, a me na hewa liilii a pau loa.

Eia na ikaika pono o keia mau aina. O ka mahiai o ka lawaia, kalaiwaa, ka piii manu i mea hulu ahuula, o ke kahi olona, i mea upena lawaia.

Oia na ikaika maikai e pili pono ai i ke kino: Oia ka mea e nui ai na makamaka, a me na hoalauna, a me na hale aikane, a me na hale wahine, a me na hale kipa, oia ka pono kahiko o Hawaii nei. Nolaila, ua maopopo ka hewa a me ka pono o ka wa kahiko.

Ua maopopo ka hewa a me ka pono o keia wa, o ka inu i na mea ona, pinika, uwala, a me na mea like. E aloha auanei.

S. M. P.

Waiehu, Maui, Oct 20, 1865.

 

I kekahi la, i ka wa a kekahi wahi keiki e heluhelu ana i kekahi mokuna ma Kinohi, huli ae la ia a olelo aku la i kona makuahine, ina e hana ia ka mea helu o ka wa kahiko maluna o ka lepo. Mahope iho ua ike ia, ua heluhelu ia i na olelo ma Kinohi e hai ana, "A hoonui iho la na keiki a ke kanaka maluna o ka ili o ka honua."

 

Iloko o ke kanaka lapuwale, e punohu auanei ka uwahi nui, i kahi mamala ahi uuku loa, no ka mea, o na mea lapuwale mama loa, oia mau mea ke aa koke ia e ke ahi.

 

Aole kakou i hanau ia no kakou wale iho no, aka, hookahi hapa no ko kakou aina, kekahi no ko kakou mau makua, a o ke koena no ko kakou mau hoaaloha.

 

O ka manawa ua like ia me ka moku e kalewa ana, ina oe maluna olaila, e hana oe i na mea kupono, no kou pae ana aku i kula i kahi maloo.

 

Mai hai aku i kou mau kee i ke kanaka e makemake nui loa mai ana e ike. O hoaiau ia auanei uahi.

 

O ka naauao ua oi ae ia mamua o ka waiwai, elike me ka maikai ua oi ae mamua o ka nani.

 

Ka nui o na kanaka o Beritania e noho nei maluna o ke kai he 375,000, koe na kanaka lawaia, o ka poe holo sela wale no.

 

O na kanaka maikai loa, o lakou na hoku kaahele o ke au a lakou i noho iho ai a naue aku.

 

O ke koko ma kona ano mau ehiku hapawalu he wai maoli.

 

Ka haawi nui, iloko o na kula nui o keia ola ana oia no na haawina e ao mai ana ia kakou e ike mau i ka maha.

 

O ke kanaka koa, oia ke kanaka hilahila ole ke komo i na lole kahiko, a hiki ia ia ke uku no ka paa lole hou.

 

O ka pomaikai ua like ia me ka ohiki iloko o ka lua, aohe e loaa ike ma kahi e, aia wale no ma ke kae o kona lua.