Ke Au Okoa, Volume I, Number 37, 1 January 1866 — Page 1

KE AU OKOA.

BUKE I--HELU 37.}  HONOLULU, MONEDE, IANUARI 1 , 1866.  {$2.00 NO KA MAK.

 

"KE AU OKOA,"

E HOOPUKA MAU IA'NA I

KELA POAKAHI KEIA POAKAHI,

MA KA

HO RA EWALU O KAKAHIAKA.

ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela ho ka lua o ke dala, e uku e ia iloko o ka hapa hope o ka makahiki.

 

"KE AU OKOA."

KA UKU O NA

OLELO HOOLAHA.

NA OLELO HOOLAHA—No na lalani he 10, oia hoi 1 iniha, no ka hoopuka hookahi ana, $1.00; alua hoopaka ana, $1.50; ekolu, $1.75; hookahi mahina, $2.00.

Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Pai.

 

KE KAAO O HABIBA!

He Kaao no Arabia.

HELU 4.

He oiaio no, ua ao, a aia ka la iluna, e hoolei iho ana kona mau kukuna maluna o na papalina o Habiba, Ala ae la oia me ke ano pahaohao, a nana ae la keia ma o a maanei, ike wale ae la no keia i ke kuakea a ke one o ka waoakua. Kahea ae la oia i kona mau hoahele, kana mau mea kaua a me kona lio, aohe lakou, no ka mea, ua hala aku. Ia wa, olelo ae la keia, "E ka ohumu, he ino na hua o kou puhaka; o kou mau koa he makau i ka make no ka hana kaulana. E Arabia e kanikau oe, aohe nae e na.

"E Arabia e! ua hala kou nani! E haehae no oe i kou aahu; e kau i ka lepo maluna o kou poo, e holoi i kou mau papalina me kou waimaka, e u oe e kanikau, a e kumakena no kou mau koa no ko lakou haalele i kau makahiapo, e mihi ana oe i kou hoohanau ana i keia poe makau wale. E inaina mau ana kau mau pulaupula, no ka mea, ua inaina ke kaula nui ia lakou. E ka aina momona o kuu mau kupuna, aole e ulu ana na hua ono maluna o kou poli; e piha ana kou mau kula i na hua hihiu wale no. E na ohana hipa e hanai ia la iloko o kou mau awawa, e pau ana ke kahe ana mai o ko lkaou mau u.

"E na kanaka eleu, ka poe nana i olelo aku i ka waoakua e lilo i kihapai maikai, ka poe hoi nana i hoomomona i na kula o Hesebona, e nana ae oukou i ke kapalili o na hae iluna o ko oukou mau halelole, e olioli hoi oukou no ko oukou lanakila ana. A o oukou hoi e na ohana i olioli ai i na la i kaahope ae, e haule mai ana oukou mai ko oukou mau waiwai, e wehe ae oukou i na kapa kila e hoaahu la i ko oukou mau lima, na ihe a oukou e pahu ai, na pua e oili aku ana mai ka oukou mau pana aku, ua like no ia me na ohe hakihaki wale, oiai, ua hala kou nani e Arabia! E haawi aku i ko oukou mau lima i hoopaa ia mai ai i na kupee hao, no ka mea, ma kahi e noho ole ai o ka pono, aole e hoopunana ana ka lanakila.

"Mai hoonaukiuki hou oukou i na keiki o Aigupita, no ka mea, e hoomanao no oukou, aohe mea nana oukou e hoopakele mai ka poino mai.

"E Salamisa, kuu makuakane, i kou wa i kauoha mai ai e hoihoi aku lakou i ka mea makamae i waiho ia mai ai iloko o ko lakou malama ana; i kou wa i ninau mai ai ia lakou, 'auhea kuu keiki,' ua hoopiha ia lakou i ka weliweli nui! E weliweli ana lakou i ka wa a ka opu o ka honua e hamama ae ai no ke ale ana aku ia lakou. E na uhane makau wale, mai aa oukou e hoi hou i Arabia. Ua makau wale oukou i ka wi a me ka make, ina oukou e uhai mai ia'u; aka, ma ke ala a oukou e hoi la, e uhai aku no ka wi ia oukou ma kela waoakua keia waoakua a oukou e hele aku ai!

"E ka hoku i hoomalamalama mai ai maluna o ka hanau ana o Habiba, a i kahea mai ai ia ia e alo i keia mau ino, no ka hopena olioli, e nana mai oe ia ia. Ke hoowahawaha nei oia i keia mau popilikia, a ke hele nei imua e hoopai aku ai i na ino. E oluolu kou manao e kokua mai, ma ka aa ana aku i na popilikia a pau, a e hooko hoi i kau mea e imi nei e hoopakele."

Me keia mau olelo, kukuli iho la o Habiba ma ke kae o kekahi punawai, a pule ae la i ke Akua a me ke kaula nui me ka makau ole, me he mea la aia no ia iloko o ka halelole o kona mokuakane. Nana aku la oia i ka akau, a ike aku la ia i kekahi hoku nui, a oia aku no hoi kona alakai mahope aku, a ike aku la oia i kekahi pali kuhoho, ma ia pali oia e pii aku ai. Ike iho la ia e waiho ana ma kona aoao kona paleumauma, kona koloka, a me kana pahikaua, a i iho la oia, "Mai makau oe e Doratila, aohe i nele loa kau koa i ka mea kaua ole, ua nui iho la no keia mau mea kaua i hoopai ino aku ai au i kou mau enemi." Mamua ae o kona hoomaka ana aku e hele, lalau aku la oia i kekahi mau aa laau, i mea nana e ai hele ai, i kiola ia ai ka pololi a me ka makewai. He mea no hoi ia na Ila Habula kana kumu i ao mai ai ia ia, oia ka mea malama ke hiki aku i kahi neoneo.

I kona wa i makaukau ai me keia mau mea hele aku la keia, e hoomanawanui ana i ka wela a ka la. Mamua o ka uhi ana mai o ka panopano o ka po, hiki aku la keia i ka mauna a ia nei i ke ai i ke kakahiaka. Ilaila keia i ike ai i kekahi pali kuhoho, ua piha olalo i ka wai; aka, no ke kuhoho loa, aole e hiki pono aku ilalo me ka pilikia ole. Ike ae la keia i ke ku a kahi laau ma ke kae o ua ana nei, oki ae la keia i na aa, a nakii ae la malaila keia i hookuukuu ai a hiki ilalo. Malaila keia i hoona ai i ka make a ka wai. Mahope iho, haawi ae la keia i ko ia nei hoomaikai ana i ka Makua Nui i ka lani, no ka hoopakele ana ia ia mai na ino a pau i hala

aku mahape. Puka mai la keia mailoko mai o ua ana nei, a ua kono ia mai la keia, ilaila ia e moe ai ia po. Ma kekahi wahi aku, ike aku la keia i kekahi wahi pohaku nui poopoo, a kii aku la keia i kekahi mau pohaku e ae, i mea panipani no ka puka, i ole e komo mai na holoholona ino, a hoopilikia mai i ko Habiba ola.

Hohola ae la ia i ke koloka, a moe iho la me kona paleumauma malalo o kona poo, a me kana pahikaua ma kona aoao, aka, ia ia i hoomakaukau iho ai e moe, olelo ae la ia, penei:

"O ke kanaka koa, e loaa mau ana ia ia ma kela wahi keia wahi he halelole; a o ke kanaka koa ole, aole ia e ike i kahi e waiho ai o kona poo.

"Olioli wale ka mea i hoomaamaa ia i ke kani mau a ka pila i kona wa e hiamoe ana, no ka mea, aole e ala mai oia ke kui mai ka hekili.

"E Salamisa, E Ila Habula, a me Doratila, e nana mai oe i kau keiki, kau haumana, a me kau ipo. Ke hoomaha nei au iloko o ka malumalu o keia pohaku, me ka manaolana e ala ae ana ia e ike i ka nani o kana mea e hooikaika nei.

"E na hoku imoimo, e kiai a e kue mai nei i ka'u mau hana, e hoopuehu aku ana au ia oukou a pau loa, mai ka lani ae. Ke aa aku nei au i ko oukou lehulehu a pau loa."

Mahope iho o ko Habiba olelo ana i keia mau mea, haule iho la keia e hiamoe. I ka ike ana o na lahui hihiu o ka waonahele i ko ia nei mau kapuai maluna o ke one, hele mai la lakou a mawaho o ke ana a ia nei e moe ana, hoouna ae la i ko lakou mau uwo ana, me ka leo haalulu, a aneane e helelei ka lapauila o ka ipuka o ke ana a ia nei e moe ana. Ua hakaka na holoholona ma ka puka o ua ana nei, me ka hookeke ae ma o a maanei, e ake ana e komo iloko e amu ia ia nei, aole nae keia i ala i ka hana halulu a keia mau mea. E hiki no paha i ke aloha ke hooalala ae i ka hoomanao ana a ka ipo, aka, aole e hiki i ka makau ke hooala ae ia ia nei.

Na ka maluhiluhi o ka loa o kahi a ia nei i hele mai ai, i kiola ae i ka loihi o ka po, puka mai la ka la, a hoouna uiuiki mai la ia i kona mau kukuna ma na hakahaka pohaku e hoala mai ia ia nei, oiai, ua makaukau oia me kona malamalama olinolino e alakai ia ia nei ma kana huakai hele. Ala ae la keia, a iho aku la i ka wai i hoopau ia ae ka ono loloiele maluhiluhi o ka hiamoe mai ko ia nei mau maka aku. Ai iho la keia i na wahi aa laau ana, pule iho la keia a pau, lalau aku la i kona koloka a me kana mau mea kaua a hele aku la keia ma kana huakai.

I ko ia nei hiki ana aku i ka piko o kekahi mauna, hoea hou mai la no kekani mauna imua ona. Aohe ala, aohe no hoi he kuamoo e kupono ai la ka pii ana aku i ua mauna nei. Nana iho la keia ilalo, aia hoi he kula panoa wai ole, aohe ulu mai o kau wahi opu laau, i loaa ai ia ia ia nei kahi e hoomaha ai i ka wela kikiki a ka la; aohe wahi kulu wai, i mea e hooma-u iho ai i ka maloo o ko ia nei mau lehelehe, a me he mea la e alakai aku ana ia ia nei i ke ao malalo lilo. Maloeloe iho la o Habiba i ka hele ana, a hao mai la no hoi ka poino a ka makewai a me ka pololi, no ka mea, ua pau loa iho la na wahi aa laau a ia nei. Wikiwiki aku la ko ia nei hele ana, i hiki aku ai keia i kekahi mauna mamua o ka uhi ana mai o ka po.

Hiki io aku la no keia mamua o ka napoo ana o ka la, aka, iloko o ko ia nei kahaha nui, aohe punawai, aohe no hoi wahi mea opilopilo wai. Hoao iho la keia i kahi e hiki ai ia ia nei ke hoopau ae i kona mau poino. Ike iho la keia i ka haule nui a ke kehau i ka po ma ka aina, a ia ia nei e hele ana, hoomahola ae la keia i kona hainaka, me ko ia nei manao e uwi ia ke ma-u pono ka hainaka. Mahope iho o ka hooma-u ia ana o kona mau lehelehe i ka enaena a ka wai, hoomaikai ae la keia i ke Akua, a hookuu iho la keia ia ia nei iho e hoomaha. Aka, aole e hiki ia ia nei ke hiamoe iho ke ole keia e kaukau ae mamua, a olelo ae la oia penei:

"E Habiba—e, e pane mai oe. I kou wa i olelo ia ai e hele a e uhai ae i ka nani iloko o na popilikia he nui wale, ua olelo ia no auanei oe e lawe pu oe me oe iho i na mea e pono ai oe ma ke ala?

"Eia oe iloko o ka waonahele. E ninau aku ia Mahomeda, heaha la kona mea i kauoha ole ae ai ia Mose e hoouna mai i ka mane a me ka meli ma kou ala, e like me ka hoouna ana a ia mau mea, maluna o na keiki a me na ohana a Aberahama?

"Ua hanau ia oe e kaua, a e pono ia oe e kaua. E kuoo e Habiba. Aia no ka Lani mahope, aka, nau no e noonoo nou iho.

"Ka hauoli o Salamisa, o Ila Habula, o Amirala, o ka Lani, ka puuwai a me ka lima o Doratila, ka noho alii o na kai ehiku—a o keia na makana no kau mau hana koa loa. E hele kuoo oe iloko o ke ahi, a e hiki auanei oe i kahi nani loa."

I ka pau ana o keia, moe iho la iloko o ka malu. Ala ae la ia i kakahiaka nui, kii aku

la ia i ka hainaka, a uwi iho la ia iloko o kekahi poopoo pohaku, he mau kulu wai ia i hoomaikai ia e ka Lani, a i ae la ia penei: "O ka mea nana i haawi mai ia'u i keia mau kulu kehau, e hoonani mau aku no au ia ia. Ua holo aku ka makewai a me ka pololi, mai ko'u alo aku e ka Haku o na mea a pau loa."

Ia Habiba i hoomau aku ai i kona hele ana, loaa aku la ia ia kekahi lua e moe ana kekahi tiga wahine me kana mau keiki iloko. I ka ike ana mai o ua tiga nei ia ia nei, uwo ae la ia a lele mai la iluna oia nei, me ka manaolana e ale holookoa ia ia nei me ke ahonui ole, aka, pule mai la o Habiba ia ia me kona pale umauma, a hou mai la ia ia i ka pahi i kona puuwai. Haule iho la ua tiga nei ilalo, lole iho la keia i ka ili, a halii iho la i ke ana me ia; o na keiki a ke tiga pepehi iho la keia, a loaa iho la ka ia nei mea paina; o ka hainaka no hoi oia nei, i ka poeleele, a ma-u iho la, uwi keia iloko o ke poo o ke tiga. Na ka wela no hoi o ka la, nana i hoomo-a i ka io o ke tiga.

Ia wa koke no, uhi mai la ka po, lilo iho la ua ana nei i wahi no ia nei e hiamoe ai ia po. I ka pau ana o ko ia nei poina ana, haule iho la keia hiamoe. Mamua nae o ko ia nei haule ana iho e moe, olelo keia penei:

"Na pomaikai a pau loa a ka Mea Mana Loa, ua haawi ae ia ma o a maanei. I kona wa e ana mai ai, e hiki no i ke kanaka mikiala mai ona mai.

"Ke hoomaikai aku nei au ia oe e Mahomeda, no ka mea, aole oe i hoopoina mai ia'u, i ka haalele ana o ko'u mau kanaka a pau loa ia'u.

"He mea ole na mea a pau ia'u. Ka enemi i kue mai imua o'u, ua haule aku ia ilalo, o kona ili ko'u kapa aahu ia; o kona io kai hanai mai ia'u, a o kona poo ko'u kiaha.

"E haalulu oukou e na enemi o Doratila, no ka mea, ua lanakila kona koa. Ke kii nei oia i na mea kaua, a me na mea huna a Solomona."

Ua hoohoihoi ia mai la o Habiba, me ka ikaika hou, ala ae la ia i ke alaula ana mai o ka malamalama o kekahi la ae, a hele aku la keia me ke ano ikaika lea maoli o kona kino. Aka, aole ia i ike aku i ka hopena o kana huakaihele; no ka mea, hoea mai la kekahi mau mea keakea a me kekahi mau popilikia he nui wale imua ona. Maluna o ia mau kula neoneo, na wahi i hehi ole ia e ko ke kanaka mau wawae, halawai mau mai la keia me na holoholona hihiu a pau, a holo aku la lakou mai o ia nei aku, me ka mama loa; o na nahesa nunui, lele mai la lakou maluna o ia nei, me ka manao e ale holookoa aku ia ia nei, aka, lalau ae la keia i kekahi mau pohaku nunui, a ulupa iho la. I kekahi wa nae, ua aneane e haalele mai kona eleu a me kona ikaika, no ka nui loa o na hoa e hakaka pu ai me ia.

I ko ia nei hiki ana iluna o kiekiena o kekahi puu, ua pau loa kahi ai a ia nei, he mau wahi aa uuku wale no koe, nana aku la keia imua ona, ike aku la keia i kekahi kula he one wale no, a no ka hiki ole ia ia nei ke hele i ka la, hele iho la keia i ka po, a o ka hoku akau ko ia nei alakai; i ke ao keia e hiamoe ai. I ka po ko ia nei wa e hele ana, olelo ae la ia penei:

"He wahi hookahi e ae no anei ma ka honua nei e mahalo ole ae ai ke kanaka i na hana a pau loa a ke Akua? Ke puka ae la ka mahina, e pani i kahi o ka la i iho aku la i ka ilikai, a kaiao hoea hou mai no. Na hoku, na makahiapo mua o na kulu kehau, ua puka mai lakou mamua ona. E hooluolu no oukou i na one o ka waoakua, aohe nae he mea nana e hoomomona i ko oukou mau kula papaala. O ka naau pi ua like ia me ke one o ka waoakua. E lu mai no ka lani i na pomaikai he nui wale, aka, aole e ulu maluna ou.

"I nui ke aho o Habiba haole no oe e hoowahawaha, i na mea a pau i hana ia mai nou. E nana oe i kela mea iloko o ke aouli. Malaila i keia wa no, ua ike ia kou hopena. E kipaku aku oe i kou mau makau a pau loa, a e kahea aku i kou ikaika a me kou eleu. E nana aku oe, ua molaelae ae la ke aouli. Aia kou mau lunakanawai, ke kahea mai la o Mahomeda a me kona mau kaula ehiku ia oe!

"E ke Kaula Nui, ke aikane a ke Akua! ke kahea aku nei kekahi o kou ohana ia oe, ilako o ka waoakua; e hoolohe, e hoolohe mai i kona leo.

"O ka ana e imi, ua kupono ia na ke koa. He kii hoohalike oe ma ka honua nei no na koa ikaika. O ka nani a me ke aloha na mea nana i ho-a i kona puuwai! Aohe mea au i makau ai, o na mea a pau ma ka honua."

Pela o Habiba i hele aku ai, a hoopoina ia mai la ka maloeloe a me ka nele i ka ai ole. Ia ia i nana aku ai i ka waoakua, manao iho la ia, ua ike aku oia i kekahi mea eleele. I iho la ia iloko ona, "Palekana, he palena mai no ka ko keia mauna, a i ole ia o ka mea eleele a'u e ike nei, he houluulu ana a na ao, maluna o kekahi wahi i noho ia e kanaka. E Habiba, aole e liuliu a ike aku no oe i kanaka. Mea paha aole i ike keia poe i ke keiki a ke kanaka; e hoike aku no au ia lakou i ke

Akua i ka lani, a e hooikaika no au e manaoio ia ia a me kana mau hana kupanaha a pau loa ma keia honua a kanaka e noho iho ai no ka wa pokole a hele aku i kahi mau e naue ia nei. Aole no au e noi aku ana e haawi mai lakou ia'u i gula, i dala, i mau pu-a hipa, i mau hale lole! E noi wale aku no au ia lakou i wahi kiaha wai, raiki, a me ke kuhikuhi mai hoi ia'u i ke ala e hiki aku ai i Caucasusa."

Hoao nui loa iho la o Habiba e hiki koke aku i ua wahi nei, a ia ia nei i ike ai i ka mea eleele, aka, aohe wahi mea a kokoke mai, e like no me ka mamao mua no ana i ike mua ai, pela no e nee mau ai i kela wa keia wa a ia nei e hookokoke aku ai. Ua hele mai la oloko a make i ka hakahaka a ka pololi. No ka nui o ka pololi, haule iho la keia hiamoe, a na ka huihui o ke ahiahi i hooala ae i ko ia nei hiamoe. Ua hoopoluluhi ia keia e na moeuhane ano e, me he mea la e kahe mai ana he muliwai, a nee hou aku la mai oia nei aku; he mau mea ai kahi i waiho ia imua oia nei, aka, ia ia nei i kikoo aku ai i kona lima, me he mea la, ua lalau ia mai e kekahi lima ano e a lawe ia aku ma kahi e. Ala ae la oia a hoomau aku la i kana huakai, me ka manaolana e hiki aku ana la ia ilaila i ke kakahiaka nui.

Puka mai la ka la i kekahi kakahiaka ae, a e noho mai ana no ua mea nei i kahi e lilo loa, aohe wahi mea a pilipili aina mai. Hao mai la ka wela i na kapuai o Habiba, a pa mai la no hoi ka makani me ka lawe pu mai i ke one, a aneane pilikia o Habiba, a aneane no hoi e haalele mai ka manaolana ia ia. Hohola iho la oia i ka ili o ke tiga ana i pepehi ai, kukuli iho la keia a pule ae la penei:

"Ua nalowale au iloko o ka moana o ka waoakua, a o kona mau palena imua o'u me he ao la, na ka Makua Nui no nae o na mea a pau loa e malama mau ia'u, ma na wahi a me na mea a pau loa, ke kuia ia mai au e ka popilikia.

"Aole e hiki i kuu mau kapuai ke kaikai ae ia'u, no ka mea, ua poanaana kuu mau oloolo wawae; aka, ina he mea hiki ia'u ke kolo, e kolo no au maluna o kuu opu, a hiki i kahi i kauoha ia mai ai au e ka lani e hooko. Aka, heaha la auanei kau e olelo mai ai e ke kaula nui, ke ike mai oe i kekahi keiki a kou ohana e kokolo ana i ka ili o ka honua me he moo kolo la."

Ia ia e kamailio ana e like me keia, ike aku la keia i ka mea eleele a ia nei i ike ai mamua e mahele ae nei i olua, a lele pololei ae la iluna o ke aouli, a holo ponoi mai la io nei la, a mahope ike aku la keia he manu nui. Lele mai la ua manu nei a he kanalima kapuai mai oia nei aku, kuu iho la ua manu nei. Ku ae la o Habiba a hele aku la i ua manu nei, me ka olelo aku penei:—

"E ka manu, o oe kahi hana akamai a ka Mea Mana Loa, ina ua hoouna ia mai nei oe e hoopakele mai ia'u, alaila, e haawi mai oe i kahi hoailona i ike ai au." Ia wa, hohola mai la ka eheu o ua manu nei, hele aku la keia a kokoke, ike iho la keia ha halii ia o luna i kahi noho maikai loa, kau ae la keia maluna, a lawe ia aku la keia iloko o ke aouli me ka hikiwawe loa, me he mea la he oaka ana la a ka uila.

(Aole i pau.)

 

KALAKAIAMANU, WAIALUA,

12 Dekemaba 1865.

E huli kakou e nana i na olelo a J. Koii, ke keiki a A. Unauna a e huli i ka oiaio i ka loaa a me ka loaa ole i ka wahahee, a me ka alapahi.

1. E makana no au ia J. Koi he $100, ke loaa ia ia na mea a pau loa i olelo ia ma ka pauku 7, ma ka helu 29, he olioli loa au a e loaa ka makana ia ia me ka oluolu. Aole o ke kuauhau mai a Kumuhonua a hiki ia Wakea, mai a Wakea a hiki ia Kamehameha 1, aia no ia i ka buke kuauhau a Kaoo, oia hoi a Auwae, aole nolaila ka makana. (No ka mea i olelo ia ma ka pauku 7, helu 29.) Aole no hoi i haawi o Unauna i ka Moiwahine i keia wahi, aole no hoi i loaa ia Auwae a i D. Malo, ia ia wale no.

2. E makana no au ia J. Koii ke loaa ia ia he elemakule a he luahine a he kanaka ma Kaupo a Kipahulu a mai Hawaii a Kauai, oia paha i ka ilina he makemake au e loaa, a ua ninau aku au i ke kuauhau i kekahi mea e makana au he $100.

Ina e ninau mai oe ua ninau mele anei oe? ae ua ninau no au, hookahi ma Honuapo i Kau, a hookahi i Waihee, ua hoolohe aku no, he hora paha ka manawa, e nana wale aku no i ke ano, a ua ike oe ma ka nupepa i kekahi.

Ua ninau anei i ke kapu heiau? ae, ua ninau au i kekahi kanaka o Kipahulu o Mona ka inoa ma ke kauoha a S. Dibble a ua lawe ia ma Lahainaluna e kamailio pu me ia aole o'u makemake ia oe e kuhikuhi lalau i ka lahui me kou ike ole i ke kuauhau.

3. O oe anei ke kanaka o ka lalani, ua komo anei oe i ka lalani, no ka lalani anei o Kahikimaaiaea? Uhu! He Napoopo no ua ikea ke poo, he Napoopoo no, ua ikea ka pepeiao, he Napoopoo no elike me oe.

"Kinikini kauhale liilii o lalo, aia i lalo lilo i lalo lilo, he Ahu au no Kau, he Io au no Hilo? Aole au e hoehewahewa ke loaa mai mailoko mai o ka papa o Kauhiokeka a Keawe, a me ka papa o Kekaulike. Uhu! Ua o Kekahimoku la ea; uhu! Pehea i na o ke kia o ka moku ka maikai, a o ka papa o lalo ua popopo, ua hiki anei ke holo ia moku?

Ua like me ke kuukuu pu nawelewele e iho mai ana mailuna mai.

"E iho e ke kuukuu, e iho e ke kuukuu, e maka iole, e make iole, e maka iole."

"He Kaiuli au na Kaoao a Makaku o Kaupo ko'u papa, a me ke ewe o ko'u mau kupuna."

He oiaio kau olelo he keiki papa oe nolaila. O oe ka pua ponoi a poe loli koko o Kaupo, a ka poe kuakuai loli kae o Kiei, peepee poopoo aa o Pohoula, kihae peepeelua o Naholoku, ua panio ia i ko lae a palahiwa, oia ka ohana a Pipieueue o Holawa. Oia ko wahi kupunakane o Kauakahiakua lolikoko.

5. He mau kupuna ike anei ko J. Koi Unauna, i ke kuauhau? Ua hamo i ka lae i ka aila a olelo mai ma ka wahahee a me ka hoopunipuni, he ike i ke kuauhau ke hoole aku nei au ma ka oiaio, aole i ike e hoole auanei na ilina kupapau kahi i waiho ai na iwi, o ka oihana a Lolikoko o ke kilokilo, a hiki ia Kauwahine he kilokilo, nou ka hale hou noho ana kela, ua hewa ko hale i puaa, a loaa ka puaa, kunikuni aku i ke ahi a hoihoi mai la iloko, a hoa ka umi puaa, poha ka waha o ka palaualelo, oia ka oihana a kona mau kupuna, a pii koi me ka hilahila ole, a manene ole, a ua ike i ke kuauhau.

Ma ka aoao o ka makuakane anei i loaa ai ke kuauhau, ke hoole aku nei au, aole oiaio he moe uhane, he kahaule he hua makani, o Waiolama iho nei no ka mea nana i ao i ka hea inoa, a i ke mele, oia wale iho la no.

Heaha ka mea a J. Koi e olelo nei i na kupuna kuauhau ona ua papa mai, he kekeukeu, a he keukeu.

Ua ike au i ko mau kupunakane, o uka o Naholoku, o Haueka, o Haukae, o Eeka na lakou i papa mai ea! Ua poina nae io lakou aole i ao ia A. Unauna, nolaila, i na hoa ai ka lae ia Kepoookalani o ka mau no nae ia o ke Kaupo, he lae hohoa.

O na kupuna hea la ona ka i papa mai, o ka ohana kupuna ka ona, o Hamakualoa ma ka papa hoi, he poe nui loa keia ou, mai Pauwwela a Puolua.

6. Ua olelo io mai no anei ou mau kupuna, aia a ninau ponoi mai ke alii ka Moi, heaha ka mea i alakai hewa ai ia Kauikeaouli a hoole ia Lonoikamakahiki, a alakai hewa ia Kalaninuiamamao. I ke kamailio ana ua ike no ke alii i ka moolelo o Lonoikamakahiki. Pehea la ka ike hoopunipuni, e wahahee ai imua o ka Moi, o Kalaninuiiamamao wale no anei ke kanaka o Kapaihi, o Kapaihi-ahilina ko Lonoikamakahiki akaaka, ua loaa apowale, a hoowahawaha mai ke 'Lii i ka ike hoopunipuni, aole ike i ka moolelo alii, he wahi poopoo muku ka ike e waiho nei ma ka buke a ka Moiwahine, i kahi kuauhau, aloha wale kahi ike apo lau a lawe ae hookohukohu.

7. Pehea i loaa ia A. Unauna ke poo muku kuauhau, aole i ao ia e Auwae, aole no i ao pono ia he makilo, he makilo, he mau keiki ike i ka palapala o Kaniau me A. Unauna a mailaila i ike ai haawi mai o Auwae ia Kaoo, a palapala iho o A. Unauna, a malaila iho kaei nihomole kuauhau i loaa ai.

8. He piikoi, he kaikamahine o Iliilihia i Maunakiekie, he hoahanau o Kalaihi kaha ka  a ma Lehua no kana keiki no J. Koii a he mau moopuna o Kalkaua ma Auwe! Auwe!! kupanaha ka ike ana iho nei no i na wahi kupunawahine o J. Koi, he poe kahilihili mona, a he poe hoolei manaku, a pii aku nei ka lepo i na moopuna a Kaahumanu, manene ole.

Na ko Waialua e kapa aku he mau haku, a e kapa aku he mau moopuna, a e kapa aku he mau keiki. No ke aha? He loaa i ka Papa, he loaa maloko o Kaakauaalani, he loaa maloko o Kuihewaikalauapalalaokalani, he loaa maloko o Papaikaniau, he honua ke we, he papa no Waialua.

9. "Ke hai aku nei au ia oe e ke keiki noho ehukai o Mokuleia, paeaea paoolekai o ka lae o Kaena, loaa ka i-a o ka noho kaha ana o ua ino o ka oiwi."

Nawai i kuhikuhi ia oe i ka lae o Kaena, i kahi o ke kaikoo, o ka lulu iha no ia o Pohakuokauai, malaila hoi o Kawelo laua o Makuakeke, i huli iho ai ia Maiau, i ka upena kuu uhu a Kawelo, a hei aku la o Uhumakaino me Uhumakaikai, nahua iho e Hina, i ka aa o Uhumakaikai. Na ua wahi keiki nei ka laau o Kuikaa, pa i ka lae la nahaha ka puniu.

10. Ua hiki anei ia J. Koii ke hana i Papakuhikuhi makahiki no kona kuauhau moolelo kaua, mai ka wa kahiko mai? E hookomo i na mea kaulana o kela wa o keia wa.

Ua loaa anei a aole e hemo hookahi hapa iniha, e hiki anei ke hookuikui ae i na hunahuna materia a lilo i mea okoa, e like me ka apana laau i kaawale mai ka ume pipili, pela e hiki ole ai ia ia.

11. He kanaka akamai anei ke kumu a J. Koii, ka luaui o A. Unauna ka inoa, he noiau anei i ke kalaiolelo, a he makaukau anei? Ua ike makou o Kahauhili, o Kuawili, o Kalauwili, he mau haumana akamai loa keia i ka hai kapekepeke i ka olelo, olioli loa keia mau haumana ia ia. I ka malama o Sepatemaba, 1855, i ka Poakolu, haiolelo o A. Unauna ma ka noho o Kuihelani, ku mai o A. Unauna, a hoopili i na heiau a Kamehameha I., ia Puukohola, a nalowale o Kapoukahi, aole loaa iki, akaaka o Kauwai ma, ke hai aku nei ko makou wahi, ke homahoma la kela i luna, e ole e ku mai he mau wahi kanaka no Hana, o Kapeka laua o Oloolo, no Honokohau mai o Ahukui, e ole lakou loaa ai, hoohenehene ae la kekahi poe. Ina pohihihi ia ia kekahi mau mea kokoke, e manaoio aku anei kakou he lawaia no ke ko-a loa? He lawaia paeaea ke loaa ia ia.

12. E hele o J. Koii, i Lahainaluna e huli i ka buke a ka Moi Kamehameha III., i hoohiki ai e huli ia ka moolelo kahiko o Hawaii nei, o ka manao no ia o keia mau Moi, o ka paa o ka moolelo pololei o Hawaii nei. Aka, no ka Ahaolelo ka aua i ka puu dala, aka, aole i pau ka manawa e hookaawale ia, i puu dala no ia oihana. He nui na haole e kakau nei i ka moolelo Hawaii, he poomuku.

13. Ke olelo mai nei oe, nau ka ninau mua, aole pela ka oiaio, he uhu a'e hewa oe, nolaila, nanahu hewa i ka pohaku o ka pakali, nolaila, hei wale ia i ka loa o ke aho, loaa wale ia uhu a ka lawaia i waho wale no, he ia oe i lou wale i ka hai lihi, i ke kowelo ana o ka maunu a hai, a i ko hopuhopualulu e lele kamako, puua ko puu i ke kiholo, lapuu ko elelo ia Manaiakalani, i ke keiki a Kapakanakaokalani, ke keiki a Kuhemunuiokalani, ka moopuna a Haupunuimaunakiekie, he lepo paha oe.

14. Ua hai mai oe no ka pau ole o ko mau ninau, aole hoi oe i uku, no ko ninau ia D. Malo a me kekahi mau ninau e ae. E like me ka'u e haawi e nei ia oe i uku. INa e loaa ole e kii aku au i ka uku ia oe, elua a'u uku e haawi ai ia oe.

O ka ohikui o kau mau ninau kekahi mea pono ole, he mau mea hai wale no. Elua wale no aina i oleloia o Honolulu me Waikiki, eha paha makahiki, alaila, puni Oahu, lele i Molokai, a pela aku, aka, no ko mahaoi, e puu i ko auwae.

15. Ua moa hou keia imu kalo a na kanaka noho uka o Noholoku, ke kauoha o na kupuna o na Lolikoko.  S. M. KAMAKAU.

 

He mau olelo nane.

KE KANAKA MAHIAI A ME KANA MAU KEIKI.

E aneane ana e make kekahi kanaka mahiai, a no kona makemake e uhai kana mau keiki ma kana hana i hoomau ai i kona mau la, nolaila, kahea aku la ia lakou, e hookokoke mai ma kona wahi moe; a hai aku la ia i kona manao ia lakou penei: "E a'u mau keiki aloha, aohe a'u waiwai e ae e waiho aku ai no oukou, o kuu aina mahi wale no, a me kuu malawaina, a oia mau mea no oukou ia; a ke manaolana nei au i ko'u wa e make ai, e noonoo pono oukou i na mea a pau e pili ana i ko oukou pomaikai, a aole e hoomaunauna wale aku i na mea a'u e waiho aku nei imua o oukou.

"O ko'u waihona dala a pau loa, aia ia iloko o ka malawaina kahi a'u i huna ai, hookahi kapuai malalo iho o ka ili honua, aka, aole hiki ia'u ke ala ae, a hele aku e hoike ia oukou i kahi i waiho ai. E aloha anei oukou e a'u mau keiki; e noho pono oukou e a'u mau kekii, a e aloha aku kahi i kahi; a mai hoopoina oukou i ko'u mau huaolelo, no ka mahinaai a me ka malawaina."

I ka make ana aku o ka makuakane; i iho la na keiki, "E hele kakou e eli ma ka malawaina a pau, no ka mea, ina loaa ia kakou ka waihona dala a ko kakou makuakane, alaila, aohe a kakou hana, he ai wale no a he inu elike me na keiki a na alii. Nolaila uwaa iho la lakou nei i ka malawaina a puni, aohe loaa iki o ka mea a lakou i imi ai; aka, ma ka lakou nei uwa ana, ua hoowali maikai la ka lepo, a kanu iho la lakou i ka waina. Ia makahiki hua nui loa mai la ka waina, a loaa io iho la ia lakou nei he waihona dala nui.

 

O ka wa kupono o ka ohiai, o ka wa mehana, oiai ina e waiho a papuhea mai na ao, alaila, o ka haukeke auanei ka hope o ka poe e ohi ana.

 

Ina e hele ka lapuwale mamua, ka uhai mai no koe o ka hoopai ino mai mahope, no ka mea, he mau hoa kuilima laua, aohe i haalele hoi kahi i kahi.

 

Mai hakaka me ko oukou mau kaikaina a me ko oukou mau kaikuahine; aka,e noho malu a me ka lokahi.

 

O ke kuamuamu a me ka hoohiki ino, aole ia na ka poe naauao, aka, na ka poe naaupo wale no ia.

 

Ina kakou e manao ana e hana i kekahi hana, e pono e hoomaka koke, mai waiho loihi aku.