Ke Au Okoa, Volume I, Number 42, 5 February 1866 — Page 1

KE AU OKOA.

BUKE I--HELU 42.}  HONOLULU, MONEDE, FEBERUARI 5, 1866.  {$2.00 NO KA MAK.

 

"KE AU OKOA,"

E HOOPUKA MAU IA'NA I

KELA POAKAHI KEIA POAKAHI,

MA KA

HO RA EWALU O KAKAHIAKA.

ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela ho ka lua o ke dala, e uku e ia iloko o ka hapa hope o ka makahiki.

 

"KE AU OKOA."

KA UKU O NA

OLELO HOOLAHA.

NA OLELO HOOLAHA—No na lalani he 10, oia hoi 1 iniha, no ka hoopuka hookahi ana, $1.00; alua hoopaka ana, $1.50; ekolu, $1.75; hookahi mahina, $2.00.

Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Pai.

 

He mele inoa no Mi ss. Mary Paakai Kalawaia.

Auhea wale ana oe, E ka muliwai o Nile,

O ke alanui aina, O na hookele moku,

Ke hoi nei no au, Ma ka hema o A sia,

I ka poai olu hema, I ka latitu ewalu,

Ewalu o'u Ona ana, Kumakena i ka laki,

Laki anuunuu mai, Ka piina o na ale,

Ale mai nei ka moana, Hanupanupa i ke anu,

Anu ai Okaki, Kela kai kaulana,

He kai i aloha a, E na keiki kupa,

Akahi kikini laki, Ke hoi nei i ka hema,

Ku au i Honolulu, I ke kilohana o ka lai,

Pehea la ka nohona, Ke uleu la no paha,

Na paka ua hooilo, A ka makani ulumano,

Na ale kawahawaha, Kai anu o Papine,

E kali iho ka manao, A hala'e Welehu,

Me oe a ke aloha, Luana i Ainahou.

Auhea wale ana oe, ka awapuhi o uka,

Noho iuiu i ka wao, I ka lipo nahele i Laa,

E laa kuu punihei, I ka ala ahi ai ala,

Oi ala ike ole iho, Noho i Kauauahoa.

Aole au e piliwi, I ka mali leo a ka manu,

A ka iiwi maka ona, Ai pua lehua o uka,

Nana i kapapa iho, Pau ai na kupu eu,

Ake aku nei ka manao, Na hau kolo o Maihi,

Ka makani pakuikui, Iho lua me ka hoolua,

Nana i lauwili mai, Hoi hou ka ihu i hope,

Alo hookahi o Kapuni, I ke anu a ka hooilo,

Aole no e hiki, Ua paa i ka leo kapu,

Hoi nele ai Limaloa, I ka wai o Mana,

Ua ike iho nei no, Ka makani la he Koolau,

Ua kuhi au oiala, O ka lua o Maliu,

Na ipu a Poiheke, A he peelua paha ia,

Ke kolo hele i ke kula, Ua oki malie oe,

E ka uluau o Hilo, Me oe a ke aloha,

Luana i Ainahou.

Auhea wale ana oe, Ku'u laki oia Kau,

Ku'u hoa o na la, Oiai o'u mau niho,

Uhauha mai nei oe, I ka laki o nei kino,

Ku'u kino paa i ka ohu, I ka malu kuwawa,

He wa olelo mai, Nana manu liilii,

Haunaele Pekina, O ke kumo o Honokaona,

E waiho malie aku, I ko ko makemake,

Ke lawe ae nei au, I ka aulii o Puna,

Na waa kau pukoa, O Kialoa o Kona,

Pehea la ka manao, I ka malu ulu o Lele,

I ka noho mai i ka olu, I ka wai o Kapoulu,

Ulu ae loko e halia, O ka pa leo ia mai,

Ake ka manao e ike, o ka wai ohelo a ka manu

Aia i ka wao e ka leo, Hoolono pololei o uka

O ka wa leo o ka manu, E haupu au e halia,

Me oe a ke aloha, Luana i Ainahou.

M R. BAFF HUAKINI.

W. E. KEALAKAI, Kakauolelo.

Hale-Koa, Honolulu, Jan 19, 1866.

 

KE KAAO O HABIBA!

He Kaao no Arabia.

HELU 8.

Ia wa, puka mai la kekahi kupua ma kona ano mau, e lululima pu me Habiba. Ua hele wale a kanikoo kona mau makahiki; ua nahaehae kona mau eheu, a e kau ana na alina o ke kaulahao i hoopaa ia ai oia e ke kupua ino hookaumaha, o kona inoa o Balasana.

"Ea," wahi a ke kupua, ''i ka wa o Camarilasamana ke noho alii ana, ekolu o makou mau heiau hoomana, aka, pau iho la lakou i ka ulupa ia i ka houna e Rakika. Kela puu opala e ku nei imua o ko kakou mau alo, oia no ke koena o ke kulanakauhale ana i hoohiola ai, a o na kanaka oloko olaila, ua pau ia ia i ka amu ia, nolaila oe e ike nei aohe mau mea ulu, a aohe hoi oihana kalepa o makou nei i keia wa. Ua waiho mai o Ilabusa ia'u i ka hooponopono ana o keia mokupuni, aka, i ka hiki ana mai o Rakika, ua kiola ia au iloko o ka rumi, i hoopakele ia mai nei e kou koa a me kou ikaika. I hele mai nei au e haawi aku i ko'u hoomaikai ana aku ia oe ke elele a Solomona, ka mea nana i pepehi iho nei i kona mau enemi me kana pahikaua.''

No ia mea, pane aku la o Habiba, ''E Balasana, ma ka inoa o ke kaula nui, a me Doratila, nona ke koa owau, ke hoihoi aku nei au ia oe ka malama ana o ke aupuni, a ke haawi aku nei ia oe. E lawe oe i keia mau puu dala e waiho nei ma kuu mau kapuai; e kukulu hou oe i ka heiau i hoohiolo ia. E noho alii oe maluna o keia mokupuni, o Mahomeda, Solomona, a me ka inoa o kou alii wahine maikai Doratila. E malama maikai oe i ka aina, a e imi hoi oe i mea e hiki aku ai au io Midenasa la."

"E ke koa wiwo ole,'' wahi a Balasana, "ke hoomaikai aku nei ko'u uhane ia oe no na mea a pau loa au i waiho mai nei ia'u, a e uhai no au ma na mea a pau a ka lani e kauoha mai ai e hana. Aka, o kau mea e noi mai nei, no ka mea, he mea hiki ole ia'u ke kokua aku ia oe, ma ke aia au e hele nei. Ua hoonele loa keia mokupuni i na mea powa; o ke ala e hele ai ma ka lewa, he hiki ole no, no ka mea, ua pau ko'u mau eheu i ka nahaehae. E pono no ia oe ke hele ma kau huakai maluna o kahi waa au i holo mai nei. E hookuu aku oe ia oe iho na na kupua opiopi ekolu i lawe mai nei ia oe, na lakou no e lawe a hiki oe i ka mokupuni i noho ai ke poo o keia poe kupua kipi. Na mea a pau au e hana ai, aia wale no ia ma kou koa a me kou ikaika. Ua hohola aku la ka eehia o kau mau mea kaua ma ka mokupuni Olenalena a me ka mokupuni Ulaula. O Mokilarasa ke tiga o ke kai, oia ke noho alii nei maluna o keia mau mokupuni. He keiki oia na ke kupua au i pepehi iho nei. He nui

na pilikia e loohia mai ai oe, aka, ina e make oia ia oe, alaila, o kau mea e hana ai o ka hookau i ka ili o ua tiga la maluna o kou pahu hao, alaila, e pau auanei lakou na kipi a pau i ke kukuli hoomaikai mai ia oe."

Huli ae la ua Habiba nei a kamailio aku la i ka mua loa penei, "Ina e loaa ana ia'u kekahi wahi waapa uuku, e holo no au maluna olaila i ka mokupuni Olenalena; aka, no ka loaa ole o kekahi kokua oia ano ia'u, nolaila, aole auanei e hiki i ko oukou ano kupua ke kokua mai ia'u? Pane mai la no hoi ua mua loa nei, "Ina o ka makau ka mea nana e keakea mai ia lakou mai ka hele pu ana me oe ma keia hana  nui, alaila, na makou no e hoike aku ia lakou i ka hana kupono a lakou e hana aku ai ia oe. E hiki no i na i-a kupua nei ke lawe aku ia kakou a kuaau hookuu aku, aohe e hiki ke hele hou aku, no ka mea, mamuli lakou pilikia ia Mokilarasa." "A hiki i kuaau,'' wahi a Habiba, "he pako-u wale no ia wahi i ka mea manaopaa e hele ana imua, e hooko ai i kana hana."

Pane hou aku la ke kaikamahine o ke kai, ''E ke koa lua ole ma ka honua a puni, owai la ka mea e hoole aku i ka uhai ana aku ia oe ma kau hana koa e hele nei e hoopio i ka poe kipi ino loa o ka honua nei, e hoopau hoi. Ina no au hana e hele nei e hooko, ua oi loa no ko makou lealea o ka nana aku ia oe, a o ke kamailio pu hoi, oia wale iho la no ka makou e ake nui nei. Aka, aole anei ou makau o lilo oe i mea amu na keia mau kupua ino?" "Aole au i ike iki ia mea he makau, aka, o ko'u hoonele ana i ka makemake o ka lani, ma ka hoopakele ana i kou alii wahine ia Doratila!" "E ke alii opio wiwo ole, e hilinai oe maluna o ko makou malama ana ia oe me ka hoolohe, oiai ua makaukau mau makou e malama i kau mau kauoha i na wa a pau au e kena mai ai.''

Ia wa no, i hookuu hou ia aku ai ua wahi waa nei o lakou i ke kai, a holo aku la me ka mama loa. Akahi no lakou a ike iho, ua ike ia mai la ko lakou nei holo aku i ka mokupuni Olenalena. I ko lakou nei hiki ana aku no mawaho mai o kuaau, ka pau iho la no ia o ka holo ana o ua mau wahi i-a nei, na lakou e huki ana i kahi waa, a kupaka mokumoku na ili i hoopaaia ai ua mau i-a nei i kahi waa. Ia wa koke no, i hoaleale ia mai ai ke kai, e na kupua ino o ke kai, a holo mai la lakou i ua wahi waa nei me ka manao e hoopiholo i ua wahi waa nei, a ia lakou nei pu hoi kahi. Manao iho la keia, aohe pono o ka hoomaunauna wale i ka manawa, oiai ua aneane ka popilikia e halawai mai ko ia nei mau wahi hoahele, a mau hoa kuwili hoi oia mau kai anu.

Ko ia nei a-u aku la no ia iloko o ke kai, me ka pahikaua ma kona lima me ka puana ana i na olelo kilokilo e kau ana maluna o ua pahikaua nei. Me he mea la he mea mana nui loa keia, wehe like ae la ke kai ma o a maanei, aole i emo hiki aku la keia i kula, me ko ia nei keakea ole ia mai. Ike aku la keia i ko ia nei mau enemi, a holo aku la lakou ma o a maanei ia ia nei i pae aku ai. Hele aku la keia a halawai me kekahi poe e manao mai ana e hana ino ia ia nei, a lele aku la no hoi keia e kaua aku ia lakou, me he oaka ana la o ka uila; a o ka poe e mea mai ana e hana ino ia ia nei, haule iho la lakou malalo o ka ia nei pahikaua.

Ia wa koke no, hele mai la o Mokila rasa e halawai ma ke ano kaua me ia nei, me ka laau nui ma kona lima; aka, i kona ike ana mai ia ia nei, holo aku la ia mai oia nei me ka mama launa ole. Uhai aku la o Habiba ia ia; aka, no ka hiki ole o ka mama kanaka, ke hoohalike aku me ka mama kupua. nolaila, kahea ae la keia me ka leo nui penei, ''E Mokilarasa! Ke hoopaa nei au ia oe ma o Solomona." I ka lohe ana no i ko ia nei leo, ku iho la ua tiga nei i kahi hookahi me ka naue ole ae. Hookahi no aia nei oki ana i ka pahikaua, lele ana i kahi e; aole nae i liuliu hoi no paa. Pela ke oki ana a Habiba a eiwa no hoi oki ana, make loa ua kupua nei; ko ia nei lole iho la no ia i ka ili a kau ae la iluna o ko ia nei pahu hae, a make loa aku la o Mokilarasa.

I ka make ana o ke kupua ino, hoi ae la kela mea keia mea i ko lakou ano mau, a malie malino mai la ke kai, i hoouluku ia ai e ka makani ino. I ka wa i houluulu hou ae ai na kaikamahine o ke kai, lele ae la ka muli loa o Ilasaide, a kau ae la maluna o kahi waa, a puhi ae la i ka ole , e kahea ana i na wahi i-a e hoi mai a ma ka lakou hana mau o ka huki i ua wahi waa nei, a hoi like mai la no hoi lakou me ka hoolohe i kona leo. Hoea mai la na kanaka he heluhelu wale mai loko mai o ke kai, me ka hoolea mai me ka olioli no ka make ana oia kupua ino o ke kai, a no ia mea lakou i hookokoke mai ai i ka aina, i ka make ana o Mokilarasa.

Hoi mai la o Habiba iluna o ka moku, me ka manao nui ole aku i na hoomaikai ia ana mai ona o lakou, aka, olelo aku la keia. ''E na mea a ke Akua a pau i hana ai, e hoomaikai aku oukou i ke Akua ka Makua Nui iloko o ka lani, e haliu aku i ko oukou mau

maka i ka lani, a ilaila wale no oukou e hoomaikai aku ai no ko oukou hoopakeleia mai. Aole na ko'u koa a me ko'u wiwo ole ke kumu o ko oukou hoopakele ia ana, aka, na ka lani i kauoha i ka opu o ko'u makuahine e hoohua mai ia'u i mea nana e hoopakele ia oukou mai keia poe kupua ino mai. E na makaainana o Doratila, e hoomau i ko oukou aloha ia Doratila ko oukou alii wahine, na'u nei kana kauwa, a me oukou pu hoi i hoouna ae i ka oukou mau pule i ka lani no kona mau pomaikai!"

I ka pau o keia mau olelo ana, houluulu like mai la na kanaka mai kela pea keia pea mai e mahalo a e hoomaikai aku hoi ia ia no kona hoopakele ana ia lakou mai ka noho inea ana me ka noho'na paahao malalo o Doratila. Na ka lakou mau olelo mahalo i hooikaika mai i kona mau aakoko, i hele aku ia imua i ke koi ana mai a kona lunaikehala, e hooko i na mea a pau ana i hoohiki ai imua o ka lani. Hoohiki mai la no hoi kela a me keia e noho maluhia lakou malalo o kona malu, a nonoi mai la no hoi i ko lakou makemake nui, e hooponopono hou ia ko lakou mau kanawai.

Aole i liuliu hiki ana ke kupua o Balasana, i uhai mai no ia ia nei, ka mea nana i hoopakele mai ia ia mai kona noho'na paahao. I kona hiki ana mai e hoomaikai mai ana na kanaka o ka mokupuni Olenalena ia ia nei, no ko lakou lanakila ana.

I ka hiki ana mai o ua Balasana nei, kahea ae la ia me ka leo nui, "E na makaainana o Doratila; ke ae aku nei keia koa i na hoike ana o ko oukou hoa maoli. E hoi kela a me keia a noho alii maluna iho o na waiwai o oukou a pau. A ia oe o Habiba, e pono oe e hooluolu iki ia oe iho, oiai o ka hoouka kaua ana aku ia i ka mokupuni Ulaula, aohe ia he mea uuku. Owau hookahi ke holo ae maluna o kahi waa, a halihali mai au i ka ili a me na mea kaua a Mokilarasa. Ina no e ike mai ka poe kipi i keia mau mea, alaila, e kulou wale mai no kela a me keia i kou mau kupee hao. E pono oe e malama i kou ikaika no ka mokupuni Omaomao, Uliuli, a maluna o na mokupuni a pau loa, ka mokupuni Eleele."

No keia mau olelo a Balasana, haule aku la keia hooluolu i mea e hooikaika ia mai ai ko ia nei mau lala, ke halawai aku me na kupueu o ke kai. Ua hiamoe o Habiba i ka wa i hoi mai ai o Balasana me na eke ili kao elua. "O keia mau mea e ke koa," wahi a ka elemakule ia Habiba mahope iho o kona hoala ana mai ia ia, 'eia iloko nei o keia mau eke na enemi ino loa o keia mau mokupuni. Ua hookomo mai nei au ia laua iloko nei o keia eke, i mea e hoouna aku ai ia laua e noho pio iloko o ka lua pouli o ka mauna Caucasusa. A ka la apopo, alaila, e makaukau loa oe i ka hele ana ma kau huakai hele, me ka molohai ole, a ia wa no hoi oe e hiki aku ai i ka mokupuni Ulaula, aka, he mea pohihihi nae ka ike e ana i na popilikia e kakali mai la ia oe imua. O ke alii ino loa o Nisabika ka mea noho alii maluna o ka mokupuni Omaomao a me ka mokupuni Uliuli; na hana kilokilo a keia kupua, ua like kona mana me Abarika. He mea hiki ole ia'u ke hai aku ia oe i na ino a pau loa ana e hana mai ai ia oe, aka, na kou ano koa no a me kou makau ole e paloe aku i ka lakou mau hana ino mai ia oe, a me ka pale ana aku no hoi i na mea i hoohalua ia no ko'u make ana. O makou nei la, he mea hiki ole ia ia makou, aka, o ka mana hea la, ka mea nana i hookuemi hope mai i ka mana o ke koa o Doratila.

O ke kue a me ka hoopilikia mai, oia wale no na mea nana i ho-a mai i ka makau ole o Habiba, ke alii opio o Arabia. I ka wehe ana mai o kai ao, kau ae la keia maluna o ua wahi waa nei, a lawe aku la na wahi i-a ia ia nei i ka mokupuni Ulaula. Holo puni ae la keia, i ka mokupuni Ulaula a hiki ma kekahi lae, e nana ana i ka mokupuni Omaomao, i makaukau ai keia i ka hoouka kaua aku i ua mokupuni la i kekahi la ae.

Aole no hoi i haalele mai na kaikamahine o ke kai ia ia nei, aka, hoomau mai la no lakou i ka malama ana i na mea a pau loa a ia nei e makemake ai. Ia wa, hoomanao ae la keia i na olelo akamai a ka ia nei kumu e olelo ana, "Mai makau i ka puulu kaua au e ike aku ai, aka, e malama pono loa oe i ka puulu kaua au e ike ole aku ai no ka mea, aia ia lakou ka make. Nolaila, hooholo paa loa iho la keia i ko ia nei manao, e malama pono loa keia ia ia nei iho, i na wa a pau loa i ka wa moe a me ka wa ala, o loaa mai auanei keia i na poino a ko ia nei mau enemi. Haule iho la keia hiamoe, a i ko ia nei ala ana ae i ke kakahiaka nui, haawi ae la keia i ko ia nei hoomaikai ana i ke Akua, ka mea nana i kiai me ka maluhia ia po a ao.

Ia lakou nei e holo malie ana me ka maluhia, aole i ike ia, hoouna ae la ua mau kaikamahine nei ekolu i ka auwe ana me he mea la ua kuia mai lakou me kekahi mau poino. Ia wa koke no hoi, nalowale iho la ke poo o ka muli loa o ua mau kaikamahine nei malalo o ke kai. No keia mea, lele ino iho la o Habiba iloko o ke kai me ka pahikaua ma kona lima. Ia ia nei i luu aku ai, paa mai la keia i ka hei i ka upena, aka, puana ae la keia i ka huaolelo kilokilo "mana," me ka hilikau ae i ka maka o ka ia nei pahikaua, mokumoku liilii ae la ka upena.

Lalau aku la keia ia Ilasaide a hookau ae la ia ia maluna o ka waa, a lele aku la keia e kokua i na kaikuaana. Ia lakou nei a pau loa i kau ai iluna o ka waa, ike iho la keia aohe e hiki i na wahi i-a ke holo aku imua; o laua pu kahi i hihia i ka upena. Wehe iho ia keia a hemo, kau aku la oia maluna o kekahi i-a a holo aku la i kula, me ka hili ana i kana pahikaua ma o a maanei; pau loa iho la no hoi ua upena nei e kue mai ana i ko ia nei wahi e holo aku ai a pae i kula.

Maluna o kiekiena o kekahi pakaua, nana mai la ua alii nei i ka lana hele aku a keia mea i ka moana, e holo aku ana e pili i ka aina. Ike mai la keia i ka nahaehae a me ka mokumoku o ka upena a ia nei, i hoomakaukau ai no kela mea, keia mea e keehi mai ana maluna o ua mokupuni nei, aka, aole nae ia i ike mai i ka hele aku a ke koa o Arabia. Ike mai la nae oia i ka holo aku a keia wahi waa me ka mama loa, me na kaikamahine opiopio maluna olaila. Maluna o ua halealii nei ona keia i nana mai ai i ua poe kaikamahine nei, a manao makau iho la keia o aloha auanei keia i na waipahe wale o ko lakou mau helehelena.

O kona halealii hoi, he kila wale no; a hookahi wale no alapii a hiki ilaila, ua kipapa ia me na kui ooi. Ua manao ua kupua nei, aole mea e hiki mai i ua wahi nei, oiai, ua hana ia me na mana kupua. Ua hilinai nui loa ua kupua nei i ka ikaika a me ka paa pono o ua hale kila nei ona, a oia wale no ka mea ana i hilinai nui ai. Ku puni ae la na wahine i ko ia nei pae ana aku i kula, a hele aku la e halawai me ua kupua nei o ka hale kila. I ko ia nei hiki ana aku, hoowahawaha mai la ua o Nisabika ia ia nei, me ka olelo mai, "E ka malihini ae hewa, heaha ke ano pupule nana oe i hoouna mai ia nei e make?" Pane aku la o Habiba ia ia, "Owau ke koa wiwo ole nona ka inoa i kapa ia o Habiba, ke keiki alii hoi o Arabia, a oia hoi ka mea nana e pepehi a e luku aku i na enemi ino a pau loa o Doratila. Nolaila, i hele mai nei au e hoopai i ka poe a pau loa e kipi ana i ke Akua a me Solomona."

No keia mau olelo a Habiba, ua ho-a ia kona huhu enaena launa ole, a olelo mai la ia penei, "E ka moonihoawa lapuwale, ano, e lawe oe i ka make i like me ka make a'u e haawi aku ai i kekahi o ko'u mau kauwa ino loa." Ia ia i olelo ai i keia mau hopuna olelo, hoala ae la ia i kana newa nui kaumaha e hahau ia ia nei me ka manao e hoouna ia ia i kahi mau o ka honua, aka, pale ae la no o Habiba me ka maka o kana pahikaua. I ka ike ana mai no o ua kupua ino nei i na mea i palapala ia maluna o ka pahikaua, haule ano e mai la ka laau newa a ua kupua nei i ka honua, a haule pu iho la no hoi me ia i ka lepo. I kona ike ana ua haule oia iloko o ke ahonui o kona enemi, hoopuka ae la oia i kekahi mau huaolelo kilokilo.

Ia wa, lele aku la o Habiba iluna o kona enemi, a hoao iho la e hou i kana pahikaua i kona kino, aka, ua hookahaha ia mai kona manao e ka ike ana iho, aohe kona kino o loko o ke kapa kila wale no ke waiho ana ma kona mau kapuai. Ua nalowale ano e aku ke kino o Nisabika, aka, aole nae oia i ike he mea hiki i ke kino o ke kupua ke haalele mai i ke kapa kila; a pela i ko ai ka mea i wanana ia, "O ka mea e lanakila maluna ona, oia ka haku o ka hale kila." Keehi iho la o Habiba i ua kapa kila nei, a hookau liilii ia ma o a maanei i na tausani apana, a pela no hoi i ko ai ka wanana i olelo ia ai, "O ka mana o Nisabika e hoopuehu ia no lakou me ka mokaki."

I ka nalowale ana o ua kupua nei, ua holo aku la ia a komo malalo o kona hale kila, a hoea mai la ia ma kona ano mau, me ka pahikaua ma kona lima; a puka mai la a ku ma ka puka, me ka aa mai e hakaka me Habiba. No keia hana a ke kupua, puni iho la o Habiba i ka apuhi. I ko ia nei hiki ana aku ma ka ipuka, kahea ae la ua kupua nei i kekahi olelo kilokilo a wehe ae la ka honua, haule iho la keia iloko o kekahi lua nui, me ka iho mai o na pohaku e ulupa iho ia ia nei, a e hoolilo hoi i ua lua nei i lua kupapau no ia nei. I ko ia nei haule ana ilalo, a nana ae la keia o ka helelei iho a na pohaku nunui, puana ae la keia i ka huaolelo "mana," a kau malie ae la na pohaku ma ko lakou wahi i haule iho ai, me ka hoeha ole mai ia ia nei, aka, lohe aku la keia i kekahi leo e uwo mai ana, ua uhi ia oia iloko o ka puahiohio o ka lepo.

O ka leo no ia o ua kupua ino nei e pa-e mai nei, me ka olelo mai, "E ke Alii opio e! akahi no au a ike i kou hopena a me ko'u, ma keia mau popilikia e loohia nei ia'u! Ua hoomakapo ia mai au, ka'u no ia i manao ai e hiki mai ana oe, aka, aole au i ike e hiki mai ana oe! Ua hoano e ae oe i kou mana malalo o ka aahu nawaliwali, a ua hoopio ia au e kou hupo launa ole! Ke kanu ia nei au

malalo o keia wahi ino. E oluolu oe, o ka'u noi hope loa ia ia oe, o hoouna oe e lawe ia au e hoopaahao iloko o na rumi pouli o Caucasusa, i loaa ai ia'u ka maha o ka hui ana e uwe pu me ko'u mau hoa i hoopaahao ia iloko olaila."

Pane aku la o Habiba, "E ke kupua! he oiaio, ua nui na karaima au i hana ai, aka, e like me ke ano o ke koa io, e haawi aku no au i na noi hope loa a ko'u enemi ponoi! Aka, e malama no au i na mea a'u e hana ai, oiai, aole au e haawi aku ana ia oe i ka haina, aia a haawi aku i ka'u mau pule nou."

Ua haule iho o Habiba mawaena o ke kowa o na pohaku. I ka wa i pau ae ai ka puahiohio a ka lepo, a waiho molaelae ae la ka lua, ike ae la ia me he mau wahi hoku la maluna o kona poo; o na maka no ia o ke kaikamahine muli loa o Ilasaide. Pane aku la ua wahi kaikamahine nei, "Pehea oe e kuu Alii opio, ua eha anei oe? Nani wale ko makou olioli nui, i kou pakele ana. E kuhi ana makou ua make oe, i ka wa i haule iho nei keia mauna maluna o kou poo! E lalau mai oe i kuu lauoho, e paa a paa loa. Mai makau oe, aole au e eha. Eia no ka ikaika ia'u e huki ae ai ia oe mai ka lua mai."

Ia ia i hoopuka ai i keia mau huaolelo, hookuu iho la ia i ka lauoho o kona poo apo ae la o Habiba, a huki ae la ia ia a kau iluna me kona mau owili lauoho. O kana hana mua o ka hoomaikai aku i kona mea nana i hoopakele, aka, ia ia nei i hoomaikai aku ai ia ia, olelo mai la o Ilasaide, "Aole au i hana iki i kekahi mea e kupono ai la hoi kou mahalo ana mai ia'u. Ina ia'u ka mana, na'u no e hooluolu aku ia ia oe ma na mea a pau loa au e makemake ai." Alaila, haawi aku la oia i kona lima ia Habiba, a iho aku la laua maluna o na pohaku, a hiki laua nei mawaho loa o ka hale kila o ua kupua nei, o Nisabaki. Aole laua nei i hiki lea aku mawaho o ka pakaua kila, ike aku la o Ilasaide i kona mau kaikuaana, a kahea aku la ia laua, "E o'u mau kaikuaana, eia oia, aole i poino i ke kupua ino." Hele mai la laua me ko laua mau waimaka e haloiloi ana, no ka manao ua make la o Habiba.

Aole i holo lea loa ko ia nei lanakila maluna o ka mokupuni Omaomao. Aohe e hiki ke komo aku iloko o ka pakaua kila, na papu hoi, ua paa pono loa, a ua hukiia ae na alahaka iluna. No keia mea, olelo aku la keia i na kaikamahine o ke kai anu, "Aole au i ike i ka'u mea e hana ai i keia wa, me he mea la o keia papu, he mea hiki ole i ke kanaka ke komo aku iloko olaila. Aole e hiki ia'u ke paulele ma ko'u mana iho, e waiho aku no au na ka mana o ka lani e alakai i keia mau kapuai. Iloko o ko'u manao, me he mea la, e haule hou aku ana paha wau, i ua ino hou a ke kupua ino a Nisabika, nolaila, e o'u mau kaikuahine o ke kai, e pono paha ia oukou e hoi, a owau wale no ke alo ae i keia mau ino."

No keia mau olelo a Habiba, olelo mai la lakou, "Aole makou e haalele iki ana ia oe, aohe popilikia a makou e makau ai, ina o oe pu kekahi me makou; aohe no makou e makau iki ana ke hiolo mai keia pali aa, a o oe nae kekahi me makou i na wa a pau. Ke hoohiki nei makou, aohe makou e haalele iki ana ia oe, a ko na mea a pau a kou naau a me kou puuwai e iini nei!'' Hoopau loa ia ae la ko Habiba manao kuihe ana i na kaikamahine o ke kai, a hele aku la lakou a mawaho o ka puka nui o ua pakaua kila nei, hue ae la o Habiba i kana pahikaua me ke kahea aku, ''Ma ka inoa o Solomona, a me ka pono a me ka pomaikai o keia mau mea, ke kauoha ae nei au, e hookuu ia mai keia alapii ilalo nei."

Aole i emo ke kuu mai la no ia o ua mau alapii nei ilalo, a pii aku la o Habiba a komo i kahi akea o ka pakaua. Iwaenakonu o keia wahi, e ku ana kekahi kia nui, ua kakau ia a puni i na huaolelo kilokilo o kela ano keia ano; ma ka mole o ua kia nei, ua kakau ia penei : "Aohe e hiki ke kulai ia ilalo, aia wale no ma ka mana o Arabia." Hoopa aku la o Habiba i ua mau huaolelo nei me kana pahikaua. Pu-a mai la kekahi leo halulu mailoko mai o ka pakaua, a hina aku la ua kia nei me ka uhi ia i ka lepo. Na makaainana o Doratila i hoopaa ia e keia kupua ino, puka mai la lakou mai ko lakou mau lua pouli mai. A puka mai la kekahi hale hao, a ike iho la o Habiba i kekahi mea kupanaha loa—he wahine e ku olohelohe ana, a ua huna ia kona mau helehelena i kona mau lauoho loloa.

I ko ia nei ike ana aku i ua wahine nei, ninau aku la keia, "Owai oe e keia wahine?'' Pane mai la ua wahine nei, "Ea! e oluolu oe ma ka'u noi e hoopakele ae oe ia'u mai keia hale hao ae, a e haawi mai hoi oe i mau wahi aahu no'u, i maemae ai ko'u ku ana aku imua ou. Ua hoopaa ia au me kekahi mau mana kilokilo e ke kupueu ino loa o Nisabika. E hoopakele mai oe ia'u, a aole au e hoopina ana i ka hoomaikai aku i ke Akua, ia Mahomeda, a ia oe hoi e ke koa!" "Aole no paha oe," wahi a Habiba, "e hoopoina ia Solomona ka mea nona ka inoa a'u

e wawahi nei i keia mau pani hao." Ia wa koke no hoi keia i wawahi ai i na pani hao.

Haehae ae la no hoi na kaikaikamahine o ke kai i kekahi mau apana o ko lakou mau aahu, a humuhumu iho la i kapa no ua kaikamahine paahao nei, a hoaahu aku la ia ia, a puka mai la oia iwaho. I ka ike ana mai o na makaainana o Doratila ua hemo ua kaikamahine nei, hele mai la lakou a kukuli iho la imua oia. No keia mea, haohao iho la o Habiba, a ninau mai la, "Heaha ke ano o keia mea a oukou e kukuli nei imua o keia wahine, a owai oia?" Pane mai la lakou, "O keia ka wahine nona na OWILI LAUOHO NANI. Oia nei, ko makou alii mamua ae o ke kipi ana o Abarika. Oia nei, ka hoahanau pili loa o Doratila."

"E ka lani!" Wahi a ke Alii opio o Ara bia, "He Aliiwahine anei keia, he pilikana no Doratila! Pehea la auanei e hiki ai ia'u ke hoihoi aku i ona la i ka mea i nalowale?" Ia wa, pane mai la lakou, "Aohe mea e ae au e hana ai, no ka mea, ua make iho nei ia oe ke kupua ino o keia mokupuni. Aia iloko o kela pakaua kahi ana i hoiliili ai i na waiwai a pau loa o keia wahine. Oiai, o oe ka mua i lanakila maluna o keia aina, a o oe no ka haku o ia mau mea a pau loa. O kela poe wahine la e nonohe mai la, o lakou na haiawahine a keia Alilwahine."

Olelo aku la o Habiba, "E lawe mai ia lakou maanei, a me na poe a pau loa e pili ana i ke alii wahine. Na oukou no e malama i keia halealii o ua alii wahine la. I keia wa nae, e hoomakaukau oukou i na mea a pau loa ana e makemake ai; a ina oia e oluolu, alaila, e kuhikuhi mai no oukou ia'u i ka rumi nani loa oloko nei o ka pakaua, a na'u no me ko'u mau lima e alakai ia ia iloko olaila." Aole i liuliu, houluulu mai la na kauwa a ke alii wahine. Hoikeike o Habiba ia lakou a pau loa, a olelo aku la oia i ua alii wahine nei, "E ka pilikana o Doratila, e oluolu oe, oiai au he koa hoopai ino no kou pilikana, e hookuu mai oe ia'u i ka hanohano o ka ukali ana aku ia oe iloko o kou rumi i hooluolu iho ai oe ia oe iho mamua o ka hiki ana mai o ka paina awakea."

Kulou iho la ua alii wahine nei ilalo na maka, a hookuu aku la oia ia ia iho, e alakai ia oia iloko o kona rumi e ka iwa o Arabia. I ko lakou nei komo ana aku iloko o ua pakaua nei, aia hoi, ua hele wale o loko "a punia i ke anaona," oia no oe i ka nahele ua kipapa ia i ka maile, ka awapuhi a me na ulu wehiwehi no o ka nahele a pau loa, me he hale ai lehua la a ka manu, ka hele wale a

"Ulupe i ka lehua makanoe,

Ua ikemaka iho nei i ka nani o Aipo."

Hahai pu mai la no hoi na kaikamahine o ke kai ia laua nei, i mea nana e kahi i ka hihia o ka lauoho o ua kaikamahine alii nei. Ia lakou nei wale no ma kahi rumi mehameha, i aku ua alii nei, "Auwe! o keia mau lauoho ke kumu o ko'u popilikia, aka, o ko'u mea no nau hoi ia i loaa iki ai ia'u ka oluolu, a ua malama maikai no hoi au ia lakou i ko'u mau la e hoopaahaoia ana. A ano, ke waiho aku nei au na olua e kahi ia mau mea."

(Aole i pau.)

 

He makani ikaika.

E KA LUNA HOOPONOPONO ;—Aloha oe:

I na la 14 a me ka la 17 o Januari nei, ua pa mai kekahi makani ikaika loa mai ke komohana hema mai o ka mokupuni o Kauai nei, a ua hoohina ia kekahi mau hale o ka apana o Lihue nei.

I ka la mua i olelo ia maluna, oia ka la Sabati, ua pa mai ka makani me kona ikaika, a hina kekahi mau hale, hookahi hale ma Haiku, he hale kua no Kauhi kahuna lapaau, elua hale ma kahi o J. A. Wilimana i noho ai.

I ka lua o ka la i olelo ia maluna, pa hou mai la no ka makani, ua oi ae ka ikaika mamua o ka makani i pa mua ai i ka la mua, ua hina hou kekahi mau hale, o ka hale hookolokolo ma Nawiliwili ua hapai ia e ka makani ma kahi e, ua kaawale aku ke kahua i ku mua ai, a ke ku nei oia ma kahi e me ka hio ana i ka aoao akau, me he moku la i i-kaia e ka nalu ka waiho kapakahi. Ua haihai kekahi lanai, ua naha ka papahele oloko, a me kekahi kala, elua hale pili ma ka aoao komohana ae o ua hale hookolokolo i hina, hookahi hale ma Kalapaki, eha hale ma Malumalu, kahi o J. Hardey i noho mua ai, elua hale ma Lihue, o ka hale o J. Waiamau kekahi i hio i ka makani, he hale hou no ia, aole i noho ia, hio e i ka makani, o kona mea no nae o ka hio ana i ka makani, o ke kukulu ia ana no e ka mea nana i hana a kiekie loa iluna me he hale pele la o ka halepule o Lihue.

Hookahi kanaka i kiola ia e ka makani ma ka hale wili ko o Lihue, i pii iluna o ka hale ma ke kauoha a ka haku hana, kiola ia oia mai kaupaku ae a haule iloko o ka loi, eha kona lima, o Pukoula kona inoa.

Oia na mea i hana ino ia e ka makani ma keia apana. E aloha auanei. Ke noho ae nei au e ake hou ae i kahi o ko'u wahi hale i hana ino ia e ka makani.

S. R. HAPUKU.

Niumalu, Januari 25, 1866.