Ke Au Okoa, Volume I, Number 52, 16 April 1866 — Page 4

KE AU OKOA.

HONOLULU, APERILA 16, 1866.

Bila Oiaio.

I kekahi kakahiaka o ka la 15 o Aperila, hiki aku la kekahi makai Farani, ma ka hale o kekahi wahine o Baron de C., e waiho a make ana oia maluna o kona moe, me kekahi lipine i nakii ia ma koa pu a-i. A ua mare ia oia me Baron de C., he wahine kane make nae oia mamua; a no kona mare ana me Baron, nolaila, ua kapaia kona inoa ma ka inoa o ke kane, (oia hoi o Baroness.) A o ka nui o kona mau makahiki, he iwakaluakumamawalu, a he wahine ui a puukani no hoi ia, a iloko o ko laua mau makahiki i noho pu ai, ua oluolu ko laua noho ana.

A i kekahi manawa mahope mai, ua holo aku ua Baron nei i Rusia, e hooponopono i kekahi waiwai o kona ohana i hoili ia mai nona. A noho no o Baroness i ko laua home, me keahi kaikamahine o Anetine Lemona kona inoa, a na ua Baroness nei no i ao ia ia i ke kakau lima a me ka heluhelu, a he kaikamahine helehelena maikai no hoi keia. A i kekahi po, hele ua Baroness nei i ka hale Opera. (he wahi ia e hana ia ai na hana ano e, me he wahi keaka la,) a no ko Anetine Baroness nei. Aka, i kona wa i hele ai i ka hale Opera, ua ki oia i ka puka o Anetine, no kona manao o hiki mai kekahi poino ili wale mai maluna o ua kaikamahine nei.

A he mea mau no hoi ia Baroness i na kakahiaka a pau ana e ala ae ai, he hookani mua i ka bele, a ia wa e hele aku ai o Anetine i ka rumi o Baroness; pela mau e kani ai i na kakahiaka a pau. A i kekahi kakahiaka, aole i kani iki mai ka bele a ua Baroness nei, a hiki wale i ke kiekie loa ana ae o ka la, a no ke kani ole mai o ka bele, nolaila, ua haohao loa na kauwa a ua wahine nei. Ia wa, hele aku la kekahi kauwa wahine i ka rumi o Anetine e noho ana, me ka manao e ninau aku no ke kumu o ke kani ole ana o ka bele, aka, i ka hele ana aku o ke kauwa a hiki i ka rumi o Anetine, aole ia iloko o ka rumi. A ia wa, lohe ia aku la ka leo o ke kaikamahine e uwe ana, a ia wa, pii aku la na kauwa i ka rumi o Baroness, aka, aole nae i hemo ka puka, a nana aku la lakou ma ke olepelepe o ka puka aniani, a ike lea aku la lakou e a ana no ka ipu kukui iluna o kekahi papakaukau uuku e ku ana ma ke poo o ka moe, a ike aku la lakou e waiho mai ana ke kino o Baroness, a i ko lakou komo ana aku iloko o ka rumi, ike iho la lakou ua make ko lakou haku wahine, a ike pu aku la no hoi lakou e waiho oni ole ana o Anetine maluna o ka papahele, a ike pu iho la no hoi lakou i ka lipine i nakii ia ma ka ai o Baroness.

A i kona pohala ana ae, hoomaopopo iho la lakou, owai la ka mea nana i pepehi ia Baroness? A i ko lakou nana ana i na mea a pau oloko o ua rumi nei, ike aku la lakou e waiho mokaki mai ana na palapala o kela ano keia ano, a ike pu iho la no hoi lakou ua hemo ka pahu-ume o ke pakaukau palapala. A ia wa, komo mai la ka makai iloko o ua rumi nei, a nana iho la ia ma o a maanei o ka rumi, a ninau ae la i na kauwa a ua Baroness nei, a olelo ae la ua makai nei, "Ke ike nei au aole he poe e ae ka mea nana i pepehi ia Baroness, na kekahi no o oukou i pepehi ia Baroness, nolaila, ke makemake nei au e huli pakahi aku i na pahu o oukou a pau.'' A hooholo ae la na kauwa, e nana ia na pahu o lakou pakahi a pau, aka, o Anetine, aole iho la he pono o kona manao, a i ka huli ia ana o ko Anetine pahu, loaa iho la kekahi mau dala a me kekahi mau gula, no ua wahine nei, malalo loa o ka pahu o Anetine. A i ka ninau ana mai a ka makai no na dala a me ke gula, ia manawa, pane koke mai la o Anetine, "Aole o'u makemake e ninau mai oe ia'u e nei makai ma ia mea."

A hoomaopopo loa iho la ua makai nei, na Anetine no i pepehi ia Baroness, a hele aku la ia e hoopii i ka Lunakanawai. A i ka hookolokolo ia ana, maopopo loa iho la, na ua Anetine nei no i pepehi o Baroness. A hoopaa ia aku la ua Anetine nei iloko o ka Halepaahao ; a i ka wa i hookolokolo ia ai o Anetine, e noho ana ka loio Barnard iloke o ka rumi, a i kona hoi ana mai, hoomaopopo iho la ka loio Barnard, aohe i pepehi o Anetine ia Baroness. A i ka hiki ana ona i ka hale, loaa iho la ia ia ka palapala a Anetine, e kauoha mai ana ia ia i loio oia nona, a ma kona nana ana i ka palapala a Anetine, lana loa iho la kona manao aole i ku o Anetine i ka hewa, no ka mea, wahi a ka palapala a Anetine, na Baroness no i haawi aku ia ia i ke dala a me na gula, ia ia e malama ai. A i ka pau ana o kana nana ana i ka palapala, a ia wa hele aku la ua loio Barnard nei, i ka hale o kekahi hoalauna o kona makuakane, a i ka ike ana mai o ua kanaka nei, kahea mai la oia e komo aku keia iloko, a ninau mai la no hoi i kana mea i hele aku ai.

Ia manawa, hai aku la ua loio nei i ke kumu o kona hele ana aku ilaila, a olelo mai la no hoi ua kanaka nei, "E pono e hele oe i ka hale o Baroness, e nana i na mea oloko o ka hale." Ia manawa, puka hou aku la ka loio a hoi i kona hale, a hele aku la ua loio nei i ka hale o Baroness e nana ai, a i kona hiki ana i ka hale o Baroness, nana iho la ia i na mea a pau oloko o ka rumi, e waiho ana no e like me ka waiho ana i ke kakahiaka o ka la mamua aku, a haalele iho la ia i ka rumi o Baroness, a hoi mai la ia me ka naau kaumaha, a ia ia i puka mai ai mailoko mai o ka hale, iho mai la ia i ke alanui pii, a ku—ia mai la kona wawae i kekahi mea, a no ka

poeleele, aole ia i ike pono, ia manawa lalau iho la ua loio nei, a i ka nana ana, ike iho la ia he papale, a o ua papale nei, no Baron, ke kane a Baroness ka wahine i pepehiia, a i ka hoomaopopo ana iho o ua loio nei, no Baron io no ia papale, a me he mea la, ua hele mai oia iloko o ua hale nei, a pepehi iho la i kana wahine a make, i ka puka ana i waho me ka wikiwiki loa, nolaila, haule ua papale la, a no ka manao paha o ua Baron nei, o ike ia oia ke kii iho i kona papale, a nolaila, aole oia i manao nui i ua papale nei. Ia wa, paa iho la ia i ua papale nei i kona lima, me kona mano e hele e hoike aku i ua papale nei ia Anetine, a ina ua ike o Anetine i ua papale nei, no ke kane a Baroness keia papale, alaila, e loaa ana no ia'u ke kumu pono e hemo ai o Anetine. A i ka hele ana aku o Barnard iloko o ka Halepaahao, a hoike aku la oia ia Anetine i ka papale, me ka ninau aku ia ia, "Aole anei oe i ike i keia papale?" wahi a Barnard, "Ma o na lani la, ke ike nei au, o ka papale no na o Baron, i ka wa ana i haalele ai ia Parisa," wahi a Anetine. "Ma ko'u manao, aole no Baron keia papale nui," wahi a Barnard, "Ke ike maopopo loa nei au, no Baron no ke—na papale, no ka mea, ia ia i haalele ai ia Parisa, o kona wa ia i kuai ai i ua papale la, a no ka nui, nolaila, olelo mai o Baron ia'u e hookomo hou i pale maloko, a ina oe e nana iho maloko, alaila, e ike ana no oe."

A i ka nana ana iho o ka loio Barnard, ike iho la ia ua hookomo hou ia he papale hou, a loaa pu iho la no hoi ia ia he bila hookaa, i kakau ia e kekahi haku mea hale, no ka moe ana a me ka ai ana o Baron, i ka hale hotele ma Strasburg, a ua kakau ia, Aperila 7, a nana aku la kekahi i kekahi, me ka pane leo ole. Ia manawa, pane aku la ka loio, "Aohe mea e ae nana i pepehi o Baroness; a ke maopopo nei ia'u, na Baron no i pepehi o Baroness." Ia manawa, haalele iho la ka loio ia Anetine, a hele aku la ia i ka hale o ka hoalauna o kona makuakane, a i kona hiki ana aku imua o ke alo o ua elemakule hoa aloha nei o kona makuakane, ia wa no, ninau mai la ua kanaka nei no na mea a Barnard i hele ai e nana i ka hale o Baroness. A hai aku la no hoi ia no kana mea i hele ai e imi, a me ka loaa ana o ka papale o Baron ia ia, ma ke alapii o ka hale, ia ia i huli hoi mai ai mailoko mai o ka rumi o Baroness.

Ia manawa, pane mai la ua elemakele nei, "E pono oe e hoi e noonoo, a e noho no hoi au e noonoo, no ka hana ana i keia hihia, no ka mea, he hihia ano nui keia.'' Ia wa, haalele iho la ua loio nei i kona hoa kuka, a hoi aku la i kona hale e imi ai i kahi kupono o ke kanawai e pale ai ua hihia nei. A i kekahi kakahiaka, hele hou aku la o Barnard i ka hale o ua elemakule nei, e kuka pu ai no ua hihia nei, a i kona hiki ana aku, pane mai la ua elemakule nei, "Ua noonoo iho nei au ma na mea e pili ana no Anetine, a hiki i ko'u wa i ike aku nei ia oe, a ua maopopo ia'u, aohe i hana o Anetine i ka hewa e olelo ia nei, nana i pepehi ia Baroness."

"Ae, he hiki ke noonoo ia ma keia papale a me ka bila hookaa a ka haku nona ka hotele ana i noho ai, a me he mea la, ua hoi malu mai oia i ke kulanakauhale nei, a pepehi i kana wahine, no ka mea, ua ike no kaua, ua holo o Baron i Strasburg, a malaila oia i noho ai hookahi hebedoma, a pehea hoi i hiki ai nei papale i kahi o kana wahine, a me keia bila hookaa a ka mea hale i kakau ai i ka la 7 o Aperila, nolaila, he pono e hoopii ia o Baron, no kona pepehi ana i kana wahine?" wahi a Barnard. Ia manawa, hooholo iho la laua, e kii ia o Baron, a kakau iho la laua i kekahi wahi palapala i ka Lunakanawai, e hoouna aku i kekahi makai nui, e huli ia Baron, ma Strasburg. A i ka loaa ana o ka palapala i ka Lunakanawai, hoouna aku la ia i kekahi makai nui, e hele e ninau, a e imi ia Baron, ma Strasburg.

A i ka hiki ana o ka makai i Strasburg, heke aku la ia a hiki i ka hotele a Baron i noho ai, a ninau aku la ia no ua Baron nei, ia wa, hai mai la no hoi ka haku mea hale, ilaila no oia kahi i noho ai, hookahi hebedoma. A no ka maopopo ole o kahi a ua Baron nei i hele ai, nolaila, hele loa aku la no ua makai nei a hiki i kahi i loaa ai o kekahi kaa lio, kau iho la oia ma ua kaa nei, a kamailio pu iho la laua me ka mea hookele kaa, no na mea e pili ana ia Baron. A olelo mai la ua kanaka hookele kaa nei, '' E loaa ana no ia oe, no ka mea, aohe nalowale ia kanaka maanei.''

A i ka hiki ana o ua makai nei ma kekahi hale, komo aku la ua makai nei a ninau aku la i ka mea hale, no Baron, ia manawa, haiia mai la i ua makai nei, aia no oia iloko o kekahi rumi okoa aku kahi i noho ai, ia manawa, hele aku la ia a komo iloko o ka rumi o ua Baron nei. A kahea mai la no hoi ua Baron nei e noho iluna o ka noho, a ike aku la ua makai nei, he mau ope palapala ke waiho ana iluna o ke pakaukau, a hoomaka aku la hoi ua makai nei e ninau ia Baron.

"Ia oe i haalele aku ai i kou hale i ka la 25 o Maraki, mahea oe i hele ai?'' wahi a ka makai, "Ia'u i haalele ai i ko'u home, a ua hele au ma Ceremania, a mai laila aku a hiki St. Petersburg," wahi a Baron, "Owai ke kulanakauhale mua au i noho ai?" wahi a ka makai, "O Strasburg," wahi a Baron, ia manawa, kakau iho la ua makai nei i ka olelo a Baron iloko o kana wahi buke hoomanao.

"I ka la hea oe i hiki ai i Strasburg?" wahi a ka makai, "I ka la 28," wahi a Baron.

"A pehea ka loihi o kou noho ana ilaila?" wahi a ka makai, "He hapalua la wale no," wahi a Baron.

"A ia oe i noho ai ilaila, a mahea oe i hele hou aku ai?" wahi a ka makai, "I ko'u hele ana i Frankfort," wahi a Baron.

Ia manawa, pane aku la ua makai nei, "Ke lauwili nei kau olelo ana, wahi au, i ka la 28 kou hiki ana i Strasburg, ilaila oe i noho ai he hapalua la wale no, wahi hoi a ka haku hale au i noho ai, hookahi ou hebedoma o ka nono ana ilaila, a i ka la 7 o Aperila, kou haalele ana ia wahi, nolaila, ua lauwili kou kamailio ana," wahi a ka makai, "Heaha la ke kumu o kou ninau ana i ko'u wahi i hele ai?" wahi a Baron. "E Baron, aole o'u makemake e ninau mai oe ia'u, no ka mea, i hele mai nei au e ninau ia oe, a o kau hana ka hai mai i ka'u mau mea a pau loa e ninau aku ia ia oe," wahi a ka makai.

"Aole au e ae iki aku ana, ina oe e ninau hou mai ia'u, no ka mea, aole i maopopo ke kumu o kau ninau ana ia'u, nolaila, e hele koke oe ano iwaho," wahi a Baron, "E Baron, e hoolohe mai oe ia'u, no ka mea, aole hoi i pau ka'u ninau ana ia oe, aole anei oe i hoi malu aku i kou hale, a pepehi i kau wahine, i ka la 15 o Aperila?" Ia manawa, ku ae la ua o Baron nei iluna, me ka helehelena makau, a hoole mai la, "Aole ia i hoi hou i kahi o kanawahine, mai kona la i haalele ai i kana wahine a hiki i ka la ana e kamailio nei me ka makai." Ia manawa, hoike mai la ua makai nei i ka papale, a olelo pu mai no hoi, "Aole anei nou keia papale?" A hoole mai la no hoi o ua Baron nei.

Ia manawa, pane hou aku la ua makai nei, "Ina aole nou keia papale, aia i hea ka bila hookaa i haawiia mai ai e ka mea nona ka hale ia oe?" A hoike aku la ua makai nei i ka bila imua o Baron, alaila, lalau mai la no hoi ua Baron nei i ka bila, me ka haalulu o kona lima, a kalele iho la kekahi lima maluna o ka noho.

Ma ka hooiaio ana, nau no i pepehi ko wahine, no ka mea, ma kau wahi a pau e hele ai, ua ike ia oe, a ma kou pepehi ana i kau wahine, no kela bila no au e paa la, i hooiaio mai, ua pepehi ia e oe kau wahine, me ko manao paha, aole oe e ike ia. Ia manawa, maopopo loa ae la na ua Baron nei no i pepehi ia Baroness, a lawe ia aku la o Baron, e hoopaa ia iloko o ka Halepaahao, a hiki i ka wa e hookolokolo ai, alaila, kii aku.

A i ka po i hoopaa ia ai a ao ae, i ke kii ia ana e hookolokolo, i ka hiki ana aku o ka luna o ka Halepaahao iloko o ka rumi i hoopaa ia ai o ua Baron nei, ike aku la ka luna Halepaahao, ua make ia. A maopopo loa ae la i na poe a pau, nana no i pepehi. A i ka manao wale ana o kekahi poe, ua lawe pu no oia i laau make me ia, a ua ai oia i ka laau make, a o ke kumu ia o kona make ana. A ma ia hope mai, ua kaulana loa ae la ka loio Barnard i ke akamai, no ka imi ana i kahi i loaa ai ka mea nana i pepehi o Baroness, a ma ke akamai o Barnard, i loaa ai ka pepehi kanaka.

No Kilauea.

Auhea oukou e na makamaka mai Hawaii a Niihau, ke hai aku nei au ia oukou, ua hemo o Kilauea ua hoi aku nei i ka lai o Honolulu ua haalele mai i ke kai hawanawana o Kawaihae, ua nui no kona mau la o ka paa ana, ua kokoke ekolu mahina.

Penei ua ili oia ma ka malama o Ianuari a ua hemo oia ma ka la 31 o Maraki, penei ke ano o ka hana ana i hemo ai oia, ua kapili ia ewalu pahu nui huinahaloa.

Penei ke ano elua anana ka laula kokoke eha anana ka loa, hookahi anana a oi ae ke kiekie pela ko lakou ano a pau ewalu, ua nui no ka noonoo o ka mea nana keia hana oia o Kolopeka kekahi o na mea i lilo ai o Kilauea ma ke kudala ana, o ke ano o na laau i kapili ia ai he papa manoanoa ekolu iniha oia malalo elua iniha ka manoanoa o ka papa ma na aoao o na kua he ewalu, oia na kua nui a me na kua e ae he nui wale o kela ano keia ano, o na kua e pili ana i ka moku he ono umi, e ninau mai paha auanei o'u hoa heaha la ia mea he ono umi, eia eono iniha ka manoanoa, a he umi iniha ka laula oia ke ono umi a pela aku i mea e pau ai ke kanalua o ka poe aole i ike i ke ano oia mea, aohe olelo ana no ka poe i maa ma na mea naauao ua holo no ka hana ana.

Eia ka inoa o na kamana, Alika, Keo, Manu, Kupihe, Keoki, Aalona, a me na haole maoli ekolu hui ia me Kolopeka eha lakou o kekahi o ka poe i hai mua ia ae la maluna elua kanaka maoli, eha hapahaole o lakou ka poe mai Honolulu mai hui me makou me na kamaaina umi kumamaono, oia ka nui o na mea i hana i na pahu, he umi kanaka eli iloko o ke kai me ko lakou luna haole o Keo, owau hoi he luna no na kanaka hana me ka poe kamana ma ka hana ana i na pahu ma ke one wela o ka aina, ua hana lakou me ka hoomanawanui no ka wela o ka la.

I kona la i hoomaka ai ka hemo ana mamua ae nae oia wa, ua huki ia ka hae o Kilauea, o ka wa no ia i ike koke mai ai na Kapena o na moku okohola o ka holo mai la no ia me na waapa o lakou pii na Kapena iluna o Kilauea o na waapa malalo e lawe ai i na heleuma ma kela aoao keia aoao o ka heleuma kolo pololei iwaho na ko Wm. F. Canway waapa ia me kona poe a pau, o W. F. Canway hoi aia oia maluna o Kilauea, kahi i houluulu ai no ka haki ana i kela kaula keia kaula a pela aku, a hiki i ka hemo loa ana o ka pau no ia o ka hele uluulu ana hoolai ka hana ana ia po.

Ua nui ko'u hai ana ia oukou ma keia mea ua ike ae la no e aho ia. S. W.

Kawaihae k, Aperila 4, 1866.

He mau la ma ka ola ana o ka sela.

E KA LUNA HOOPONOPONO;

ALOHA OE:—E oluolu oe e hookuu mai ia'u e hai iki aku au ia oe, i ke ano o kekahi mau la a'u i alo ai ma na kai anu, a ma na ehaeha o ka noho ana kupilikii ma ke ola ana o keia mea he sela holo maluna o na moku okohola.

I kekahi la, i ka wa a ka la e kupono ana i kiekiena, maalo ana kekahi moku, mawaho pono ae o ko makou wahi, a hulo ae la kela kanaka keia kanaka , no ka mea, akahi no a ike iho ko makou wahi i keia mea he moku. "He ulu laau nee ia iloko o ke kai,'' wahi a lakou; a aole i liuliu kuu iho la kona mau heleuma, a hoolei ia mai la kona mau waapa ma na palekai ona, aohe i liuliu pae mai la kona mau waapa i kula. I ka hiki ana mai o na haole i kula, kuai mai lakou i na pahu uala, na manu palehu, a me na lako kupono no ke holo ma ka moana no kekahi mau malama ewalu.

I ko makou ninau ana aku mahope iho o ko lakou haalele ana mai ia makou, ihea la lakou e holo aku ai mahope iho oia manawa. Hai mai lakou, e holo ana i Honolulu, no ke kepa ana i mau kanaka e kokua ai i ka pepehi ana i ka ia nui o ka moana he kohola. Ua lohe au no na moolelo o ka poe e holo ana i ka moana, no ka pepehi ana i ke kohola. Ua olelo mai kekahi poe, he mea lealea wale no elike me he la lealea la o ka aina nei, pela iho la ka, ka holo ana o ka moana. Hahai mai lakou ia'u, i ka ono o ka mea io pahu, ke kini poki piha i ka malakeke, me ka palena paakiki i hooma-u ia iloko o ka wai malakeke.

I ka po, i ka wa ka e ku ai ka wati, alaila, hooma-u iho la ke sela i kana palena iloko o ka malakeke, a huli ka wati, alaila, hoi mai la ka make a mai, a ai iho la i kana kinipoki berena, me ka olioli nui, oiai, ua hakahaka loa oloko i ka noho ana iluna o ke kia no ka wa loihi loa. O keia kekahi mea lealea loa a ka poe sela i olelo ai. O kekahi o ka lohe aku i ka hookiokio a ka makani i na kaula likini, ke hoolohe ae ka i ka papuhea a na ale i ka palekai.

Aole nae o keia ka mea nui a lakou i olelo mai ai ia'u, aka, wahi a lakou, ina ka e hele a ka moana, hoi mai ua piha ka moku i ka aila, alaila hoi mai ohi na wahi kaki, a i ka ohi ana mai o na wahi dala pokeokeo na wahi pakeke.

Na keia mea, i kono nui mai i ko'u manao e au i ke kai, a e hoomanawanui hoi i na popilikia a pau. I ko'u hiki ana aku i Honolulu, ua loaa mua mai la au i ka poe kepa, a lawe ia aku la au i ka hale kepa, e hoolimalima ai ia'u iho, no ke kikina hookahi. A hiki i ka la i holo ai ka moku, ua pau aku la na wahi dala i loaa mua mai ia'u, i ka uhauha ia i kela lealea i keia lealea. I ko makou hoopuka ana aku i ke awa, a i ka wa hoi i uu ia ae ai na pea, huli ae la au a nana, i ka neenee mai io makou aku na puu uliuli a me na awaawa o ka aina hanau.

I ka nalowale ana mai o ka aina, hu mai la na manao aloha i ka aina. I ko'u po mua ma ka moana, aohe au i moe pono iki, no ka mea, ua hoopilikia ia mai au e na hoomanao ana no ka home. Aole no ia wale no hoi, aka, no ka hohono ano e kekahi o ka moku, oiai, akahiakahi a kau iluna o keia mea he moku, nolaila, luai aku la au, a waiho a make aku la iluna o ka oneki. A no keia mea, no ka hiki ole ia'u ke lawelawe i na mea e pili ana no ka moku, nolaila, ua peku ia mai la ko'u lemu e na kamaa buti nui o ka malamamoku.

I ka pau ana o ko'u omaimai ana, nana aku la au ma ka aoao o ka palekai o ka moku, ike aku la au aoleo ka uliuli o ka nahelehele, aka hoi, o ka uliuli o ka moana lipolipo mai o a o, a hookahi wale no wahi mea a'u e hoomanao ae ai, ua ane like me ka aina, oia hoi ka lele hoolahalaha mai a na manu kai, me he aukuu la e kiai ana i kuapa o ko hai makaha. Hala ae ana ka la, ka pule, a me ka mahina, aohe wahi aina i ike ia aku, ua huna loa ia mai ko makou maka aku.

I kekahi la nae i ka wa kiai o kekahi kanaka maluna o ka makea, hooho ae la ia, aia he mea e puhi ana i ke kai mamua, a manao ae la au, o keia paha ka mea a makou e imi nei. A he oiaio io no oia. Kauoha koke ae la na'lii moku e hookuu ia ka waapa; a owau kekahi i lilo i hoa kokua maluna o kekahi o na waapa. I ko makou holo ana aku a aneane e halawai me ua ia nei, ia wa, ho-u aku la kekahi o makou i ke o, a huki aku la ua ia nui nei ia makou. I ka'u nana iho i ko makou wa e huki ia ana, aohe wahi o makou e ili aku ai, me he mea la e lawe ia ana makou i kela welelau o ka honua, a hookuu ia aku makou e imi i pono no makou iho.

Oi holo aku makou a ana paha ka huhu o ua ia nei, lana malie iho la ia; a i ka nana hou ana mai i hope, aohe ko makou moku, ua nalowale loa ia, nolaila, manao iho la au o ka make no paha auanei keia, a hoomanao ae la au i ke oluolu o ka home a me na mea a pau loa, o ka aina hanau. Pepehi iho la makou i ua ia nei a make, a aole i liuliu, iho mai ana ko makou moku, a komo mai la ka manao olioli iloko o'u no ka pakele.

Hoomau aku la makou i ka holo ana ia mau la, a komo hou makou iloko o na kaei anu. Hao mai la ke anu a ke hau, ke koekoe hoi o ka moana. Iloko no o keia anu nui ua hoouna ia no makou e hele e pepehi ia. Pela mau au i hana ia ai, a hiki wale i ka wa o makou i hoi ai i ka home.

I ke ku ana mai no hoi i ke awa, ohi iho la ko makou kaki, a i ka puka ana mai no mai ka hale kepa mai, kau liilii ae la no na wahi io i kela lealea keia lealea, a aole paha i hala ae na pule ekolu, o ko'u kepa hou no ia. Pela no, elike no me ka hoi mua ana mai, a aohe no au i puka, o aohe no hoi i poho, a eia no au la o KUKALAHALE.

Honolulu, Aperila 9, 1866.

Aole poho ke dala ke lilo i Ke Au Okoa.

E KE AU OKOA:—Aloha oe:

Eia mai ka manao o ko oukou hoaaloha o ka lepo ula o Ewa nei, ka mea hoi nana i kii iho nei ka Nupepa ''KE AU OKOA'' ma Honolulu i hala ae nei ko'u manawa e kii ana, ua ike iho paha oukou i ko'u manao ma ko kakou pepa i hooopukaia ma ka Helu 50 o ka la 2 o Aperila nei,'' a ua hala ia, a eia ka ninau ia oukou e ka poe i lawe mua iho nei i KE AU OKOA, a me ka poe i koe aole i lawe? pehea oukou i keia makahiki hou o ko kakou pepa e hiki mai ana? no ka mea, aole poho ke dala ke lilo i KE AU OKOA, no ka mea, he nui ka waiwai i loaa mai ma ka heluhelu ana, i na moolelo a me na kaao i lohe ole ia e kakou mamua, a me na nu hou o na aina e, a me ko Hawaii nei, a me na olelo hoolaha o kela ano keia ano, nolaila, e na keiki o ka ua waahila o Halawa, ina e kipa aku ka Helu mua o KE AU OKOA ma kou home, e hoolohe pepeiao mai ia hai me ka maopopo ole, nolaila, e na keiki papa o Aiea, eia mai KE AU OKOA, hoolilo ia aku i hoa kaunu nou, he ole loa ka noho wale iho, mai pi, mai aua, haawi ia na dala $2.00, a i ole ia $1.00 dala no ka hapa makahiki mua, oia hoi 6 mahina, e na keiki maka palupalu o Kalauao i walea i ka olu o ka wai o Kahuawai, lawe ia KE AU OKOA, a pela mai hoi ko Waimalu poe & Waiau, Waimano, Manana, Waiawa, Waipio, Waikele, Hoaeae, Honouliuli, manuahi wale mai hoi o Puuloa, e ala like mai kakou a lalau like i ka Nupepa KE AU OKOA, mai ku oe i ko wahi luaui ke ao i ka nuha, e ao iho no ma ka aoao o ka makuakane o kaua ka eleu, ina e lalau like kakou a pau, alaila, aole he hana nui i ke alu, he pupu kahi wale no, alaila, e lilo ka apana o Ewa nei ka heke mamua o na apana e ae, ina e loaa ko kakou luna kupono nana e kii i kela pule keia pule ma Honolulu, alaila, ua holokahana, no ka mea, i ka wa ia'u ke kii o ka pepa ma Honolulu mamua iho nei, o ka'u ke ope pepa e loaa e mai mamua, a mahope ko Honolulu a me na wahi e ae, pau e i ko Ewa nei poe i ka heluhelu ia, a hookahi ka ike ana mai Honolulu a Ewa nei, aole e lohi ka make wai, nolaila, mai kanalua ka manao ana e ka hanauna hou o ke koko hookahi o ka ili ulaula, i ike i na mea hou o ka Ahaolelo e hiki mai ana, nolaila, e miki kakou ia ia a lilo mua ia ia kakou, maanei ke waiho aku nei au i ko'u manao aloha ia oukou a pau loa, me ka mahalo i kou Luna Hooponopono, me ke aloha lulu lima i na keiki hoonoho kepau, o ka manao iho la no ia o ke keiki o ka ia hamauleo o Ewa. Me ka mahalo. MOSE MANU.

Waiawa, Ewa, Aperila 7, 1866.

Haina o na ninau Baibala a S. E. K. Papaai.

E KE AU OKOA E:—Aloha oe:

Ninau 1. Owai ka inoa o ke kanaka i hana i pahi oi loa nana hookahi cubita ka loihi a omau ae la ma kona uha akau maloko o kona kapa.

Haina. O Ehuka, Lunakanawai 3, 16:

Ninau 2. Owai ka inoa o ke kanaka a ke Akua i kau ai i ka uhane ino, a na Davida i hookani me ka lira a haalele ka uhane ino?

Haina. O Kaula, Samuela 1. 16, 23:

Ninau 3. I ka makahiki hea a i ka malama hea hoi ka hanaia ana o ke kumu o ka hale o Iehova?

I ka makahiki ha i hoonoho ia ai ke kumu o ka hale o Iehova i ka malama o Zifa, 1 Na 'Lii, 6. 37:

Ninau 4. I ka malama hea, a i ka makahiki hea la hoi ka paa ana o ka hale o Iehova?

Haina. I ka makahiki umikumamakahi i ka malama o Bula, oia ka walu o ka malama o ka makahiki 1, Na 'Lii 6, 38.

Ninau 5. Heaha ka hamare, a me ke koi i kalai ia ai ka pohaku o ka hale o Iehova?

Haina, Aole i hai ia ka inoa o ka hamare, a me ke koi. 1. Na 'Lii 6; 7.

Ninau 6. Heaha ka holoholona ma ka honua nei, aole o lakou alii?

Haina. He uhini, Solomona 30, 27.

Ninau 7. Owai la ke kanaka i pee ia Iehova iloko o kona lua me he Liona la?

Haina. O Davida, Halelu 10, 9:

Ninau 8. Owai ka inoa o ke kulanakauhale o ka poe hewa, i hai ia ma ka Palapala Hemolele?

Haina. O Gileada, Hokea 6, 8:

Ninau 9. Owai ke alii o ka poe Isaraela i lawehala?

Haina. O Baara, 1. Na 'Lii 15, 33, 34.

Ninau 10. Owai ka lahui kanaka o ka honua nei i hoolilo ia i kumu waina?

Haina. O ka Isaraela, Hokea 10, 1:

Oia iho la na haina o ka ninau Baibala a ke keiki o Kaapoko, pa iho ia ia la olu kela he wai olalo. Ua pau ke hoi nei ke keiki o ke ehukai o Haoaloa ua uhi ka ohu iluna o Makanau. Me ka mahalo.

Z. E. K. KALUAHINE.

Kaalaiki, Kau, Hawaii, Aperila 4, 1866.

NA LUNA O KEIA PEPA.

EIA IHO NA INOA O KA POE MA KELA wahi keia wahi i hookohuia i poe Puna o KE AU OKOA. Me lakou nei e hooponopono ai na makamaka lawe nupepa no ka uku o ka pepa, a me ko na Olelo Hoolaha.

HAWAII— J. H. Coney, Hilo.

D. H. Hitchcock, Hilo.

L. Kaina, Puna.

W. T. Martin, Kau.

C. N. Spencer, "

J. G. Hoapili, Kona Hema.

P. Cummings, "

J. Z. Waiau, Kona Akau.

J. H. Kamalo, "

G. K. Lindsay, Kohala.

J. Naiapaakai, "

S. P. Koko, Hamakua.

MAUI—A. M. Kahalewai, Lahaina.

P. H. Treadway, "

W. Ap Jones, "

E Saffrey, Honuaula.

C. K. Kakani, Kaupo.

John Rae, Hana.

W. P. Kahale, Wailuku.

W. G. Needham, Makawao.

T. W. Everett, "

MOLOKAI—M r. Meyers, E. H. Rogers.

OAHU— J. P. E. Kahaleaahu, Ewa & Waianae.

J. M. Kalanipoo, Waialua & Koolauloa.

J. W. Kea, Koolaupoko.

KAUAI— T. H. Marshall, Lihue.

S. Kamahalo, "

J. S. Low, Hanalei.

H. J. Wana, "

G. W. Lilikalani, Koloa.

J. Kauai, Waimea.

ANOAI A KA MANAO!

OWAU O KA OUKOU KAUWA, KE KAHEA aku nei au i na

KEIKI PUNI NANI,

o na Kaiaulu o Hawaii nei, e kipa mai, e wae, e kilohi, no oukou iho, i na lole hoeha puuwai, o na opuu pua rose ma ko'u Hale Humuhumu Lole, oia hoi o

ANOAI A KA MANAO,

ma ke Alanui Nuuanu, ma ka Hale Humuhumu Lole mua o FISCHER, aia ilaila na lau Ahihi kahi i haiamu ai. H. L. BAUMEISTER.

Mea Humuhumu Lole,

Honolulu, Mar. 15, 1866. 48-6m*

KALAKO HOU!

MAKALENA HOU!

MAKALENA HOU!!

MAKALENA HOU!!!

NO KE KUMUKUAI MAKEPONO LOA!

Na wa e kuai ai, mai ke kakahiaka Poakahi, a hiki i ke ahiahi Poalima.

Ma ke kihi o ke Alanui Nuuanu a me ke Alanui Marine; mamua aku o ka Hotele Royala.

(38-3m) ISAAC REINHART.

RAIKI! RAIKI!

E OUKOU A PAU, KA POE KANU RAIKI ma ka Mokupuni o Oahu, a me na Mokupuni e ae kekahi, owau, ka mea nona ka inoa malalo iho, e uku no au i ke kumukuai kiekie, no ka Raiki i pau ole ka ili, ke lawe ia mai ma ka Wili Raiki ma Punaluu, Oahu, a i ole ia, ma ko'u keena ma Honolulu.

H. W. SEVERANCE,

A gena o ka Huina Raiki o Punaluu.

Honolulu, Okatoba 7, 1865. 38-tf

OLELO HOOLAHA.

UA HALAWAI KA AHAHUI O HAMAKUA, Hawaii, i ka la 18 o Dek., 1865, ma Eleio, e imi i ka mea e pono ai ka hana ana i ke Awa o Honomalino, e like me ke kauoha ana a ke Kuhina Kalaiaina, "E hana na kanaka o Hamakua nei i ke Awa o Honomalino" Nolaila, ua halawai keia Aha mamua aku nei, kohoia o D. W. Kaila, i Puuku, o N. Keau, i Lunahoomalu, o P. Kaaekuahiwi, i Kakauolelo.

HOOHOLOIA; E haawi mai ke Kuhina Kalaiaina, Eha Haneri Dala, (400.00,) e kokua na kanaka o Hamakua, Eha Haneri Dala, (400.00.) Ua haawi mai ke Kuhina Kalaiaina, Hookahi Haneri Dala, (100.00,) i keia wa, a e haawi ana na kanaka Hookahi Haneri Dala, (100.00.)

Eia na inoa o na Luna ohi dala, Kamakahiki, no Waimanu a me Kahulaana, D. W. Kaila, no Waipio a me Manaaiole, N. Keikenui, no Eleio a me Kapulena, P. Kaaekuahiwi, no Kawela, S. Hao, no Paauhau, E. Nainoa, no Maunahoano, N. Kaai, no Kaala.

E halawai keia mau luna ma Eleio, i ka la 29 o Dekemaba nei, i maopopo ka nui o na dala i loaa mai. A ma ka malama o Ianuarii hoomaka ka hana hou ana i ke awa. P. KAAEKUAHIWI.

37- Kakauolelo.

HALE KUAI HOU!

—MA—

WAILUKU, MAUI!

O KA MEA NONA KA INOA I KAKAU IA malalo nei, ua wehe ae nei oia i Hale Kuai Hou, kokoke ma ka Uwapo o Wailuku, e pili kokoke ana ma ka Hale Kuai o AKANA LIILII. Oia ka Hale Kuai Hae Ulaula, hui pu me ka Uliuli. Ma keia Hale Kuai

NA ANO LOLE A PAU!

NA PUAHAU O MAREKA!

NA KALAKOA ANO NU HOU!

NA KALEKO ANO NU HOU!

A ME NA LOLE O KELA ANO, KEIA ANO.

NA LOLE KANE ANO NU HOU LOA!

A ma keia Hale Kuai e loaa mau ai na mea ano hou loa mai Kaleponi mai. E loaa no ia oukou me ke kumukuai oluolu loa, me ke kuka pu ana me a'u.

Owau no AKINA, (PAKE.)

Ona o ka Hale Kuai Hou.

Wailuku, 20 Feb., 1866. 45-3m

OLELO HOOLAHA!

UA MAKEMAKE KA MEA NONA KA INOA malalo nei, e kuai i

100 Paona Wi OO!

I ihi ia ka alualu. F. HORNE,

Mea Hana Mea Ono.

Polelewa, Alanui Moi, Feb. 23, 1866. 45-tf

HE MAU AINA MAIKAI

E KUAI KUDALA IA ANA!

E KUAI KUDALA IA ANA NA AINA O LEVI HAALELEA, e ka mea nona ka inoa malalo nei, ma ka Hale Hookolokolo, ma Honolulu, iloko o Aperila, la 2, M. H. 1866, i ka hora 12 o ke awakea. A o ka inoa o ua mau aina la e kuai kudala ia ana, eia iho malalo nei:

Aina. Kahanui, Aia ma Molokai.

" Kipu, " "

" Manawainui, " "

" Kapuahi, " "

" Kumuele, " "

" Awawaia, " "

" Makanalua, " "

" Kamanoni, " "

" Wainiha, " Kauai.

" Waikoko, " "

A e ike no na mea a pau e makemake e ike i na kii o ua mau aina la, ma ka Hale Kudala o ka mea nona ka inoa malalo nei. H. W. SEVERANCE.

46-4 t Luna Kudala.

OLELO HOOLAHA.

UA HIKI MAI NEI KEKAHI KAUKA HOU, oia o

Kauka Bekatiniga, (Dr. G. Bectinger,)

he kahuna akamai ia i ka lapaau, ka okioki ana i na wahi kina, a me ka lapaau ana i na maka. Aia kona keena lapaau ma MONIKAHAAE, ma ka Hale lapaau o Kauka Hilibarani. Kona hora hana, mai ka hora 9 a hiki i ka hora 12; a mai ka hora 2 a hiki i ka hora 4 o ke ahiahi.

Honolulu, Mar. 24, 1866. 49-4t