Ke Au Okoa, Volume II, Number 11, 2 July 1866 — Ka nalu ma Lahaina [ARTICLE]

Ka nalu ma Lahaina

E Ke Au Okoa:- Aloha oe: I ka Poakahi i hala aku nei, oia ka la 18 o Iune nei, hoomaka mai la ka nalu i kana hana, i ka nana aku i ka nalu, aole o kana mai o ka weliweli, aohe kanaka koa nana e aa aku nei mea he nalu, ia la no, oia ka Poakahi, ua make elua waa maoli, hookahi waapa, he waa maoli ka mua o ka make ana, mai Lanai mai kona holo ana mai, he ipu haole a me ke pu na ukana oluna, ua lilo aku i ke kai ka hapa nui o ka ukana oluna o ka waa, he nui na kanaka i au aku e lawe mai i ka ipu, ua loaa mai kekahi a ua lilo kekahi i ke kai, ua pakele no nae ka waa aole i nahaha, aole no hoi i pilikia kekahi kanaka o luna o ka waa, ma ia la no ma ka auina la, make hou kekahi waa oia ka lua o ka waa i make ia la, he waa lawaia aku ia, me na a-ku he 22, i holo mai lakou me ka manao e kuai i ua mau ia nei i ke dala, loaa e i ka pilikia, poia e ka nalu, lilo aku he 21 a-ku a koe mai hookahi wahi a-ku i ka poe nana ka ia, ua poino pu me kekahi mau mea o ka waa a ma ia ahiahi no make ka waapa, lilo aku i ke kai ehiku mau hipa, koe mai hookahi hipa oia ka walu o na hipa, ua nahaha ka waapa, lilo aku i ke kai ke kia me ka pea. U! poho oe. I ka Poalua ae, ua ku ae o Kilauea ma Lahaina, oia ka la nalu loa i oi ae mamua o ka la mua, oiai au e ku ana ma kahakai i ka wa e ku mai ai ka nalu ua alai ia ae o Kilauea a nalowale, o ke kia wale no ka ike ia aku, aole o kana mai ka nunui o ka nalu, nolaila, ua makau ke Kapena o Kilauea aole i hoolei i ka ukana, o make auanei i ka nalu aka, oia nalu he mea ole ia i na keiki uapo o Lahaina, ua lawe haaheo ia mai na eemoku o Kilauea i uka me ka maluhia, aole kekahi mea i poino, elua wale no waapa nana i lawe na ohua, he whale boat no Molokai i hoolimalima ia e Mr. Pa'upa'u eha dala i mea e lawe ia mai ai kana wahine, aole nae i hoi mai kana wahine, ua lawe mai ia waapa ia Mr. a me Mrs. Treadway ma a me kekahi poe e ae, a o Little Fanny ka lua o ka waapa nana i lawe haaheo mai na ohua o Kilauea, ma ka nana aku ua eleu maoli na keiki o ka ehu kai o Keawaiki. Me ka mahalo, Mr. Kuaana. Lahaina, Maui, lune 22, 1866.