Ke Au Okoa, Volume III, Number 50, 2 April 1868 — Makena ua Olai. [ARTICLE]

Makena ua Olai.

He noho wale ae nei no hoi ia Hawaii nui a Kane, a he kanikoo koe, ike ana hoi i ka hana mau o ke olai, kui iho no, kui iho no, ke helu aku la au a he iwakalua kemamalima ka nui oka naue ana. O ka manawa oia helu ana a'u, mai ka hora umi o kakahiaka o ka la 28 o Maraki nei, a hiki i ka hora eiwa oia po no. Hookahi no nae olai ana i nui ai ka naue ana. Ke nana ae la au i ko makou hale hele a opaipai, me he kanaka inu rama la. O ka Lunakanawai keia o makou holo kela iwaho, a nana lau laau i alai aku i ka wela o ka la mai kona mau maka aku, no ka makau o hanee ka hale, "hupo no hoi ke keiki Iapana." Ke manao nei au, eia ka wahine o Kilauea ilalo kahi i eku mai ai. O Kauliki paha kana ihu e kau mai nei, hoea mai i kahi e hoea mai ai, nau ohaoka, loaa nae ka mea kamailio a kakou o keia mau la aku. E aloha auanei ka Luna o Ke Au Okoa. J. W. KUPAKKEE Kepulu, Kona Hema, March 28, 1868. E Ke Au Okoa ; Aloha oe : E oluolu oe ke hookomo iho, i nei mau wahi mamala olelo ma kou pakeke, a nau ia e hali aku imua, o ka mea nana ka ninau, i haopuka ia ma ka Nupepa Kuokoa Buke ehiku Helu 4, malaila e ninau ana i ka mea, nana i hoopuka ke kaao o Hamanalau. Ninau 1. O Kaihuauwaalalua io anei ke kane hoao o Hamanalau? Ninau 3. I Hawaii io anei kahi i hanai ai o ke keiki a Hamanalau? Ninau 5. I Hawaii io anei kahi i make ai o Hamanalau? E ka mea e pani nei ina ua ike oe, e pono paha ke kali oe a pau ka hoopuka ana a ka mea nana i hoopuka ke kaao o Hamanalau, alaila, hana oe me kau mana i ike no ka mea, aole o makou makemake e pane oe i ka mea nana e hoopuka nei ke kaao. He hopau manawa wale no kau, a me kou keakea ana i ka pono o kekahi, no keaha no la hoi kou mea i hoopuka mua ole ai mamua i kau, waiho ka oe a puka i ai ala, hana ae oe kau honahili, aole o makou makemake iki i kau, i lohe! Me ka mea i alakai maikai ae i keia kaao ko makou aloha. Ke hoopau nei ka peni i kana hana, me na keiki ulele hua kepau ko'u mahalo, ke noho nei no ke keiki o ka hau anu o California. C. H. HIKIAU. West Butte Gutter County, Cal. M. 2, --68.